2 Kolt 13 - Le Nouveau Testament en langue Dida

Bhɩalɩwɔlɩ ɩya ‑ayopalɩɛ

¹ ‑Mɔtada n cɩ 'ka 'lɛ anyɩ 'bhlɩ ci. Wɔlɩa ‑tɛtɛa, ɩ ‑cɩ 'ka 'lɛ nyɩtɛɔ na, ɩ ‑fata lebhe ɩ kalɩ ‑danʋfʋɛcɩ ‑mɔsɔ ‑aana ‑mɔta.

² N yaa 'mɩɩ tooto nyɩtɛ, daa n cia 'lɛ ‑mɔsɔdaa anyɩ 'bhlɩ na, 'nyɩ ‑yaka, n 'ta 'lɛ anyɩ sidiin ‑kʋ na, n nyɩtɛ ‑awlɩɩ 'lɛ 'nyɩ n cla 'lɛ maa ‑ɔ yaa 'lɛ nyinyi nʋ, ɩya ‑da -naanʋaa 'fɩan lebhe: Gbazɩ n ‑ka anyɩ 'bhlɩ cɔlɔ na, 'n cɩ 'ta 'cisa ci,

³ ‑masa a ‑wa lebhe a 'ka 'lɩ ɩ ‑ka ‑kʋ lebhe Klisi 'plɩlɩɩn 'kʋ 'nyɩ ɔ nyɩtɛ na. ‑N 'ta le ka ɔ 'ta 'lɛ 'tɛtɩ ‑ka ɩya ɔ 'ka anyɩ klalɩ, ‑ma ka ɔ ‑wa 'lɛ lebhe ɔla 'tɛtɩa kʋ anyɩ nɩkplaan.

⁴ ‑Ghɛɛ, daa ma ‑kʋa 'mɔɔ 'lɛ dabhlalɩsua 'ciin bhoda na, ɔ 'taa 'tɛtɩ ‑ka, ‑ma ɔ ‑ja, Laagɔ 'la 'tɛtɩa nɩkplaan. Na, ‑anyɩ ‑masɛɛ, ‑a ‑yɔɔsɔ ya 'lɛ bhlo 'plɩ na, ‑a 'ta 'tɛtɩ ‑ka, ‑ma ‑a ‑yɔɔsɔ cɩ 'ka jabha ala gbʋ, Laagɔ 'la 'tɛtɩa nɩkplaan.

⁵ Anyɩ 'titi, a mʋ acɩ nɩkplaan ɩya a 'ka kope ɩ ‑ka ‑kʋ lebhe a ‑ka pɔɔtɛtɛ na. A 'lɩ 'ta lebhe Zozi Klisi ‑kʋ anyɩ nɩkplaan bha? Ka a 'tɩɩ palalɩɛ mino 'titio na,

⁶ n gugu lebhe a cɩ cibhlili lebhe -a ya ‑anyɩ acɩ pala.

⁷ -A bhibhie Laagɔ le a 'la nʋa wɔɔnyinyi ‑ylɛylɛ. ‑N 'ta wɔɔmɛnɔ ‑a 'matɩlɩ 'ta 'lɛ 'dɛ, ‑ma ka ‑a ‑wa 'lɛ lebhe a nʋ 'nanɩ, ka ‑anyɩ, ‑a 'ta mino 'titio na.

⁸ Sa, ‑a cɩ 'ta Laagɔ 'la ‑nʋawlɛa gbatlɩmʋnʋlɩɛ mino, ‑ma ka ‑tɛɛ ‑a -cɩ ka 'lɛ ɛla lobholia nʋ.

⁹ ‑Ghɛɛ, ‑a ‑kʋ pɔlɛkʋmɛmɔɔn daa ‑a cɩ 'ta 'lɛ 'tɛtɩ -kalɩ 'nyɩ anyɩ a ‑ka 'lɛ 'tɛtɩ na. 'Lɩka ɩmɩa ‑a 'clalɩ 'lɛ ‑ala bhibhiea nɩkplaan na: Ɩmɩ ‑ɩ ‑glɩ 'lɛ le a 'plɩ 'kʋnylugolunya.

¹⁰ Ɩ 'la gbʋ, n ‑kʋ ka ka 'lɛ 'koonko na, dɛ n zie 'lɛ anyɩ ɩmɩ ‑naa le n ‑ka ci na, n 'la ka sɛ anyɩ gblɔɔgblɔɔ kla, 'tɛtɩa ‑Kwlenyɔ 'nyɩɩn 'lɛ na nɩkplaan. Ka ɔ 'nyɩɩn 'lɛ mɩ le n 'ka 'sla, ‑ma ɔ 'ta mɩ 'nyɩ le n 'ka gbɔlʋ.

¹¹ Na, ‑pɔtɔnʋ, bholiecɩnyɩ, a kʋ pɔlɛkʋmɛnɔɔn, a 'plɩ 'kʋnylugolunya, a zʋzʋlʋ 'tɛtɩɩn, a 'nununu neen, a kʋ pupueen ɩya ‑walʋ ɩya pupue 'la Laagɔa 'ka anyɩ cɩ kʋ.

¹² A ŋʋŋɔnʋ acɩ ‑kpacɩ cɩ bholiecɩ 'bhisa ɩya a 'papalɩ ‑ayo. ‑Kplɔkplɔnyaa 'fɩan pa anyɩ ‑ayo.

¹³ 'Naa ‑Kwlenyɔ Zozi Klisi 'la 'nyupalɩɛa, Laagɔ 'la ‑walʋa ɩya ‑Kplɔkplɔ ‑Wugoa* ‑ʋ ple 'lɛ ‑anyɩ bhlo na, kʋ anyɩa 'fɩan cɩ.