1 Tim 4 - Le Nouveau Testament en langue Dida

Yooyo wɔlɩ 'la canya

¹ Laagɔ 'la 'Wugoa nyɩtɛ 'kpataa lebhe, bhɩalɩclɩɩa nɩkplaan, ncɛlɩ ‑anʋa cɩ 'ka pɔɔtɛtɛa ma -zʋɔ 'lɛ Laagɔ 'kʋ na ‑blɔ ɩya ma 'ka ncaanyigliliwugwia gɩlɩ. Ma cɩ 'ka 'devlowugwia 'la cacawɔlɩa 'nyukwliinpo.

² Ma cɩ 'ka macɩ ne te ɩya yooyo ncɛlɩ ɩya yodɩzʋnya, ‑ɔla wɔɔgugwiea ya 'lɛ 'plɩ le saa ma ya 'lɛ letie slo 'ma 'nyɩ ma 'yɛɛ 'lɛ ‑sie na, 'ka maa 'nyiglili.

³ Ncɛlɩ ‑naa ca ncɛlɩ lebhe, ɩ 'ta ‑fata lebhe ma 'cɩ 'ŋwlɛ, ɩ 'ta ‑fata lebhe ma li lɩɩ ‑anɩ. 'Bhlɩmɔɔn ka Laagɔ nʋɩ 'lɛ le maa ‑ɔ ‑ka 'lɛ ɔla pɔɔtɛtɛ, 'nyɩ ‑ɔ ‑ci 'lɛ ‑nʋawlɛa na, -kɩɩ lida ‑kʋ na, ma 'kɔɔ bhibhie ɩya ma 'kɔɔ bhɔlʋ.

⁴ Sa lɩɩa ‑tɛtɛa Laagɔ nʋ 'lɛ na, ɩ nanɩ 'nyɩ ɩ 'ta ‑fata lebhe ma tie nclɔɔ lʋʋ ‑ylɛylɛ. ‑Ma ɩ ‑fata lebhe ma -kɩɩ lida ‑kʋ na, ma bhɔlʋ Laagɔ.

⁵ Sa Laagɔ 'la wɔɔnyɩtʋa ɩya bhibhielia gba 'nyɩ lɩɩa ‑tɛtɛa kplɔ Laagɔ 'la 'klʋʋn.

Zozi Klisi 'la lobhoco 'nanɔ

⁶ Palɩ ɩmɩ ‑naa ‑tɛtɛa bholiecɩa ‑deliin sa. ‑Sa ‑n ‑cɩ ka 'lɛ Zozi Klisi 'la lobhoco 'nanɔ 'plɩ ɩya ‑n ka pala lebhe ‑n ‑ka ‑laagɔwɔlɩa ɩya ‑nʋawlɛa ma cɔɔ 'lɛ na wlɩɩn.

⁷ ‑Ɩ ‑glɩ 'lɛ yooyo -ninia ɩya ‑glɛɛglɛŋwlɛ 'la 'lɩbhɩlɩbhɩa na, tlʋbhalɩɩ cɩ da. 'Sɩslɩlɩ ɩya ‑n nʋ Laagɔ 'la pɔɔsa.

⁸ 'Nyɛkɛa 'la 'tɛtɩɩnzʋlɩɛa 'la nʋnʋgbɩa nanɩ 'bhlɩɩ, ‑ma Laagɔ 'la pɔɔsa 'la nʋlɩɛa zi ɩmɩa 'fɩan 'kʋ, sa ɩ gba 'nyɩ ‑a lɩ ɩmɩa Laagɔ talɩ 'lɛ ‑ndanyɩ 'kʋ, ‑yaka ɩya cɩpa 'la 'pʋpʋa 'kʋ na.

⁹ Ɩ ‑glɩ wɔɔnyɩtʋa ‑ʋ ‑ŋwa 'lɛ 'kʋ le ma 'tɛbhalɩ ‑deli 'kʋ na.

¹⁰ Na, ‑a ‑ka ‑sa 'sɩslɩlɩ 'nyɩ ‑a ‑ka ‑sa 'tɩtɔ na, ka ‑a nʋ 'lɛ sɛɛ, ‑ofi lebhe ‑a ya ‑ala pɔlɛkʋtɛlɔa ‑JajaLaagɔa 'kʋ zʋ, ‑ɔ ‑glɩ 'lɛ ncɛlɩa 'fɩan ɩya maa 'tasɩɩa ‑ɔ ‑ka 'lɛ ɔla pɔɔtɛtɛ na, mala gbʋʋnsanyɔ na.

¹¹ Nyɩtɛ wɔlɩ ‑naa ɩya ‑n ca ncɛlɩa 'fɩan ɩla 'kʋplɩlɩlɩɛ.

'Plɩ nclɔɔa ma cɩ 'lɛ dɩbalɩ na

¹² Nclɔɔ ‑ylɛylɛ 'la 'nyi 'la sɔɔ, ‑ofi lebhe ‑n ‑glɩ nyɩgbɩɔ na, ɩla gbʋ. ‑Ma 'maa 'plɩ nclɔɔa, ncɛlɩa -ɔ -ka 'lɛ Zozi Klisi 'la pɔɔtɛtɛ na cɩ 'lɛ dɩbalɩ na, ‑naa wɔɔnyɩtʋ, ‑naa 'namʋ, ‑naa ‑walʋ, ‑naa pɔɔtɛtɛ ɩya ‑naa nʋnʋgbɩ 'la ‑kplɔlɩɛ nɩkplaan.

¹³ Na, 'fɩɔn n 'ka 'lɛ ci na, zɛlɩ Zieziewɔlɩa* ncɛlɩa 'fɩan 'ci 'kʋ, zʋ maa 'tɛtɩɩn ɩya ‑n ca maa ɩla 'kʋplɩlɩlɩɛ.

¹⁴ ‑Naa 'wɔzɔlʋa 'Wugoa 'la 'tɛtɩa ‑ɩ ‑kʋɔ 'lɛ nɩkplaan na 'kʋ. 'Tɛtɩ ‑naa ‑n 'lɩ 'lɛ, daa Laagɔnekʋnyɩtɛnyaa* nyɩtɛ 'lɛ, 'nyɩ ncaakpasɩa ‑gbɛɔ 'lɛ sɩ 'wlu na.

¹⁵ Falɩ ɩmɩ ‑naa ‑tɛtɛa pɔlɛ cɩ, gɩ ‑naa lobholia 'ciin ɩya ncɛlɩa 'fɩan 'ka ‑naa ‑nwɔvilɩɛa 'lɩ.

¹⁶ 'Lɩ ‑ncɩ 'klʋ ɩya ‑n zʋlʋ ‑naa cacawɔlɩa pɔlɛ 'kʋ. Vi ‑nwɔ. ‑N ‑ka sɛɛ nʋ na, dɛ ‑mɔ 'titi ɩya maa ‑ɔ poo 'lɛ 'nyukwliin na, cɩ 'ka 'lɛ gbʋʋnsalɩɛ 'lɩ.