1 Tes 5 - Le Nouveau Testament en langue Dida

¹ Bholiecɩnyɩ, ɩ ‑glɩ 'lɛ daa ɩmɩ ‑naa cɩ 'ka 'lɛ ŋeni ɩya clɩɩa 'kʋ ɩ cɩ 'ka 'lɛ ŋeni na, a 'matɩ 'tanɩ lebhe ma zie anyɩ ɩla gbʋ.

² Sa anyɩ 'titi, a ‑ci sɛɛ wɩaan lebhe ka ‑Kwlenyɔ 'la clɩɩa cɩ 'ka 'lɛ ‑atangblɩsa 'plɩ le saa 'winyɔ ci 'lɛ dobhesa na.

³ Daa ncɛlɩ cɩ 'ka 'lɛ 'cla lebhe: «Pupue ‑kʋ daa ‑tɛtɛa, wɔlɩ ‑ylɛylɛ cɩ 'tanɩ ‑anyɩ ŋeni» na, dɛ 'kwlɩbhɩɛ 'kadie cɩ 'ka 'lɛ maa ‑ataangblɩsa 'wlubhlili le saa valʋ kla 'lɛ nɩkpaankalɩŋlɔ na. 'Nyɩ ma cɩ 'tɛɛ 'wlʋkpalɩɛ mino ‑ylɛylɛ.

⁴ ‑Ma, anyɩ, bholiecɩnyɩ, a 'ta 'tutuun ‑kʋ ɩya clɩɩ ‑naa 'ka anyɩ ‑zɔnvu le 'winyɔ 'bhisa.

⁵ Sa anyɩa 'fɩan ‑tɛtɛa, lelie 'la ncɛlɩ a ‑glɩ 'lɛ, zezezeli 'la ncɛlɩ a ‑glɩ 'lɛ. ‑A 'ta dobhe 'la ncɛlɩ ‑glɩ naa, ‑a 'ta 'tutuun 'la ncɛlɩ ‑glɩ.

⁶ Na, ‑a 'la ŋɔmʋa le, maa ‑anʋa ‑ɔ 'ta 'lɛ Laagɔ ‑ci na 'bhisa, ‑ma ‑a gblɩbhalɩ ɩya ‑a falɩ acɩ pɔlɛcɩ.

⁷ Sa maa ‑ɔ ŋɔmʋ 'lɛ na, dobhe ma ŋɔmʋ 'lɛ. 'Nyɩ maa ‑ɔ tɩa 'lɛ macɩ nʋ na, dobhe ma tɩʋ 'lɛ macɩ.

⁸ ‑Ma ‑anyɩa, ‑ɔ ‑glɩ 'lɛ zezezeli 'la ncɛlɩ na, ɩ ‑fata lebhe ‑a falɩ acɩ pɔlɛcɩ. Pɔɔtɛtɛ ɩya ‑walʋ 'plɩ -ala mlakujanpa ɩya gbʋʋnsalɩɛ 'la pɔlɛkʋtɛlɔa 'plɩ -ala tavʋkpoonkpo.

⁹ Sa Laagɔ 'ta ‑anyɩ desla lebhe ɔ 'ka -anyɩ ɔla dɔgbɛa 'kʋ ‑salɩ, ‑ma ka ɔ la 'lɛ ‑anyɩ le, ‑a ka ‑ala ‑Kwlenyɔ Zozi Klisi 'la 'ŋlɩa nɩkplaan gbʋʋnsalɩɛ 'lɩ.

¹⁰ Klisi ya ‑ala gbʋ 'ku ɩya ka ‑a ‑ka ‑kʋo ‑aana ka ‑a ‑ka 'kuo, ɔ 'ka gba ɩya ‑a ‑yɔɔsɔ 'ka jabhʋa nɩkplaan kʋ.

¹¹ Na, a zʋzʋlʋ 'tɛtɩɩn, saa a nʋa 'lɛ tooto na, ɩya nclɔɔ nclɔɔ 'ka 'tɛtɩ kalɩ.

Bhɩalɩwɔlɩ ɩya ‑ayopalɩɛ

¹² Bholiecɩnyɩ, ‑a 'cla anyɩ lebhe a zʋ maa ‑Kwlenyɔa 'nyɩ 'lɛ anyɩ 'nyɩ ‑ɔ ‑kʋ 'lɛ anyɩ sidiin le, ‑ɔ ka anyɩ kpa ɩya ‑ɔ ka anyɩ wɔlɩ ca na.

¹³ A kalɩ mala wɔɔgugwie 'nanɛ ɩya mala ‑walʋ, mala lobholia 'la gbʋ. Pupue kʋ anyɩ ‑gbaaglɩɩn.

¹⁴ Bholiecɩnyɩ, a -sa ‑babanyaa 'bɩ, a zʋ maa 'nyɛkɛ 'kɔtɔɔ 'lɛ na pɔlɛɛn, a klalɩ maa ‑ɔ 'taan 'lɛ 'tɛ na ɩya a sla pɔlɛ sa ɩya a 'nyɩ ncɛlɩa 'fɩan.

¹⁵ A zʋlʋ pɔlɛ 'kʋ ɩya a 'la 'maa wɔɔnyinyi, a 'la ‑plʋa wɔɔnyinyi dlu. ‑Ma, a 'matɩ clɩɩa 'fɩan le a 'ka 'nanɩ nʋnʋnʋ ɩya a 'ka ncɛlɩa 'fɩan 'nanɩ nʋ.

¹⁶ A kʋ clɩɩa 'fɩan pɔlɛkʋmɛnɔɔn,

¹⁷ a bhibhie clɩɩa 'fɩan,

¹⁸ ɩya saa ‑tɛtɛa ɩ cɩ 'ka 'lɛ kʋkʋlʋ na, a bhɔlʋ Laagɔ. 'Lɩka ɩmɩa Laagɔ 'matɩlɩ 'lɛ anyɩ wlɩɩn aya Zozi Klisi 'la namʋa nɩkplaan na.

¹⁹ A 'la 'dɩa 'Wugoa ‑gugwieen.

²⁰ A 'la 'maa Laagɔnekʋnyɩtɛnyaa* 'la wɔɔnyɩtʋa ɩya a 'la lia ‑zangʋa.

²¹ ‑Ma a gbazlɩlɩ ‑tɛtɛa 'fɩan nɩkplaan ɩya a 'ma ɩmɩa ‑ɩ nanɩ 'lɛ na

²² ɩya a tlʋbhalɩ wɔɔnyinyia ‑tɛtɛa cɩ da.

²³ 'Naa Laagɔa, ‑ɔ nyɩ 'lɛ pupue na, ɔmɔ 'titi ‑kplɔ anyɩ 'kplookʋ. 'Naa ɔ 'lɩ ala 'wugoa, ala pɔlɛa ɩya ala 'nyɛkɛa 'klʋ ɩya clɩɩa 'kʋa -ala ‑Kwlenyɔ Zozi Klisi cɩ 'ka 'lɛ ci na, ma 'la 'ka anyɩ 'gesalɩda 'lɩ.

²⁴ Ɔmɔa, ‑ɔ la 'lɛ ‑anyɩ na, ɔ cɩ 'ka ɩmɩ ‑naa nʋ, ɔ 'ka anyɩ 'nyɩ, ɔ cɩ 'kɩɩ nʋ.

²⁵ Bholiecɩnyɩ, a bhibhiemʋ ‑ala da.

²⁶ A ŋʋŋɔnʋ bholiecɩa 'fɩan ‑kpacɩ cɩ ɩya a 'pa maa ‑ayo le bholiecɩ.

²⁷ ‑Kwlenyɔ 'la 'ŋlɩa nɩkplaan, n sla anyɩ 'wlu, a zɛlɩlɩ ‑afluwaa ‑naa bholiecɩa 'fɩan 'ci 'kʋ.

²⁸ 'Naa ‑ala ‑Kwlenyɔ Zozi Klisi 'la 'nyupalɩɛa kʋ anyɩ 'kʋ.