1 Tes 1 - Le Nouveau Testament en langue Dida

‑Ayopalɩɛ

¹ Silivɛɛn, Timoti ɩya ‑amʋ Pɔlʋ, ‑anyɩ ‑ɔ zie 'lɛ anyɩ Tesalonikidua 'kʋ 'la ‑laagɔnɩkplaa -a ‑kʋ 'lɛ To Laagɔ ɩya ‑Kwlenyɔ Zozi Klisi nɩkplaan na. 'Nyupalɩɛ ɩya pupue kʋ anyɩ 'kʋ.

Tesalonikinyaa la Dɩnanɩa ‑nʋawlɛ

² Clɩɩa 'fɩan, ‑a bhɔlʋ Laagɔ anyɩa 'fɩan 'la gbʋ, ‑a ‑ka ala da bhibhieda ‑kʋ na.

³ ‑A To Laagɔ 'ci 'kʋ, ‑a luoli ala pɔɔtɛtɛa 'la nʋnʋgbɩa, ala ‑walʋa 'la lobholia ɩya ala pɔlɛkʋtɛlɔa 'la ‑nwɔviliea -ala ‑Kwlenyɔ Zozi Klisi 'nyɩ 'lɛ ‑anyɩ na.

⁴ Bholiecɩnyɩ, ‑a ‑ci sɛɛ lebhe ka Laagɔ wabha 'lɛ anyɩ 'nyɩ ɔ ya 'lɛ anyɩ desla, le a 'ka ɔ 'nʋa 'plɩ.

⁵ Sa, Dɩnanɩa* ‑a ‑sa 'lɛ anyɩ na, 'ta wɔɔnyɩtʋ bhlobhlo nɩkplaan ‑tɛɛ 'plɩlɩ, ‑ma Laagɔ 'la 'tɛtɩa ɩya ‑Kplɔkplɔ ‑Wugoa* 'la nʋnʋgbɩ ‑kʋa 'mɩɩ nɩkplaan 'nyɩ a 'tɛlɩa 'mɩɩ ‑deli 'kʋ. ‑Awlɛ, a ‑ci saa ‑a namʋnamʋnʋ 'lɛ anyɩ sidiin, ala 'nanɩ 'la gbʋ na.

⁶ 'Nyɩ anyɩ ‑ma, a ya ‑anyɩ dɩbalɩ 'nyɩ a ya ‑Kwlenyɔ ‑ma dɩbalɩ. 'Kwlɩ 'kadɩa ‑ɩ bhɩa 'lɛ anyɩ na sidiin, a ya ŋonu a ya Laagɔ 'la wɔɔnyɩtʋa 'ma, pɔlɛkʋmɛnɔa ‑Kplɔkplɔ ‑Wugoa* nyɩ 'lɛ na, nɩkplaan.

⁷ Na, a yanɩ ncɛlɩa Masedʋanɩ ɩya Akayiibhlɩa 'kʋ 'la ncɛlɩa ‑ɔ ‑ka 'lɛ Zozii 'la pɔɔtɛtɛ na, kope 'lɛ 'ciin na, 'plɩ.

⁸ Sa a 'bhlɩ ‑Kwlenyɔ 'la wɔɔnyɩtʋa 'wlʋlʋ 'lɛ 'nyɩ ʋ ya 'lɛ Masedʋanɩ ɩya Akayiibhlɩa 'kʋ dlolu. ‑Awlɛ ala pɔɔtɛtɛa a ‑zʋɔ 'lɛ Laagɔ 'kʋ na, 'la 'dɩa ya daa ‑tɛtɛa dlolu 'nyɩ 'ɩ 'matɩ 'tanɩ le a nyɩtɛ ‑awlɩɩ.

⁹ Sa ncɛlɩa 'fɩan nyɩtɛ saa ‑a mʋa 'lɛ anyɩ 'bhlɩ 'nyɩ a klaklalɩ 'lɛ -anyɩ ɩya saa a ‑tlatlalɩ 'lɛ ala wlɩɩn 'la nʋnʋlɩɩa a gʋgwlaa 'lɛ na, kɔkʋʋn 'nyɩ a ya 'lɛ Laagɔ 'klʋtla, le a 'kanɩ ɔmɔa ‑ɔ ‑kʋ 'lɛ 'nyɩ ‑ɔ ‑glɩ Laagɔ 'titi na, lobho

¹⁰ ɩya a 'kanɩ Zozii, ɔla 'Cʋa ɔ ‑bho 'lɛ 'kwɩɩn 'kʋ 'nyɩ ‑ɔ tlʋbhalɩ 'lɛ -anyɩ Laagɔ 'la dɔgbɛa ‑ɛ ci 'lɛ 'yɛpɩ na cɩ da na, ‑bɛ ɩya ɔ 'ka ‑laagɔɔn 'wlʋ ɩya ɔ 'ka ci na, ɩla wɔlɩa.