1 Pɩɛ 1 - Le Nouveau Testament en langue Dida

‑Ayopalɩɛ

¹ ‑Amʋ Pɩɛlɩ, n ‑glɩ Zozi Klisi 'la lobhulobhunyɔ*. N zie anyɩ Laagɔ 'la deslaslalowiea ‑ɔ ‑dloluo 'lɛ Pɔɔnbhlɩa, Galasiibhlɩa, Kapadɔsʋbhlɩa, Aziibhlɩa ɩya Bitiniibhlɩa 'kʋ na.

² Anyɩa To Laagɔ sla 'lɛ de, 'nyɩ ɔ ya 'lɛ ‑Kplɔkplɔ ‑Wugoa* 'kʋ 'plɩlɩ ɔ ya 'lɛ ‑kplɔ, le a 'ka Zozi Klisi zʋ ɩya ɔla ‑dolua 'ka anyɩ budo na, 'naa 'nyupalɩɛ kʋ anyɩ 'kʋ ɩya pupue zʋlʋzʋlʋlʋ 'kʋ ɩya ɛ ŋeni anyɩ 'kʋ.

-A ya ‑mɔsɔ ‑mɔsɔ ‑valɩɔ

³ 'Naa ‑evliwolɩɛ ŋeni Laagɔ, ‑ala ‑Kwlenyɔ Zozi Klisi To! Ɔla dananɔ 'kadiea nɩkplaan, ‑a ya ‑mɔsɔ ‑mɔsɔ ‑valɩɔ, pɔlɛkʋtɛlɔa ‑ʋ nyɩ 'lɛ jabhʋa 'la gbʋ, Zozi 'Klisi 'la 'kwɩɩnkʋbhuea nɩkplaan,

⁴ le ‑a ka ‑ajaa ‑a nyumo 'ta 'lɛ, ‑a kpobho 'ta 'lɛ, 'nyɩ ‑a kpli 'ta 'lɛ na li. Ala gbʋ ‑ajaa ‑naa ‑zʋɔ 'lɛ 'yɛpɩ ‑laagɔɔn sa,

⁵ anyɩa Laagɔ 'la 'tɛtɩa lɩ 'lɛ 'klʋ, ala pɔɔtɛtɛa 'la gbʋ le a 'ka gbʋʋnsalɩɛa ‑ɩ ‑cɩ ka 'lɛ ɩcɩ bhɩalɩclɩɩa 'kʋ pala na, 'lɩ na.

⁶ Ɩ nʋ anyɩ ‑jaka. 'Nyɩ ka ‑clɩɩklipɛ nɩkplaan, 'kwlɩ ‑ka anyɩ bhɩa 'mizi -mizi, 'nyɩ a ‑ka cɩɩnkalɔɔn ‑kʋ 'titio na,

⁷ a cibhlili lebhe ‑asɩkɛ nyumo, ‑ma ‑kosu nɩkplaan ma clalɩɛ 'lɛ. 'Nyɩ ala pɔɔtɛtɛa kalɩ gbʋ, ɛ zi ‑asɩkɛ 'kʋ. Na, ala pɔɔtɛtɛa 'la nɩkplaanclalɩɛa 'ka 'lɛ anyɩ 'ŋwleenfalɩlɩɛ, 'klʋagba ɩya 'ŋlɩ ‑lalɩ, daa Zozi Klisi cɩ 'ka 'lɛ ɔcɩ pala na, dɛ 'kwlɩ bhɩa 'lɛ anyɩ.

⁸ A 'ta ka ‑azlɔɔ 'ciinlɩ, ‑ma a ‑wɔɔ, a 'tɔɔ ‑jlɛ ‑ma a ‑ka ɔla pɔɔtɛtɛ. Ɩla gbʋ, dɛ pɔlɛkʋmɛnɔ 'kadiea, a mino 'ta 'lɛ ʋla wɔlɩa ‑zɔnsalɩɛ na, ‑yelio 'lɛ anyɩ.

⁹ ‑Sa a cɩ 'ka 'lɛ ala pɔɔtɛtɛa 'la dluuplʋlɩɛ 'lɩ, ɩmɩ ‑ɩ ‑glɩ 'lɛ ala gbʋʋnsalɩɛa.

Laagɔnekʋnyɩtɛnyaa 'la lobholia

¹⁰ Laagɔnekʋnyɩtɛnyaa* ‑ɔ nyɩtɛ 'lɛ 'nyupalɩɛ ‑naa ‑ɩ ‑bhɔsʋɔa 'lɛ ala gbʋ na ɩla wɔlɩa na, gbʋʋnsalɩɛ ‑naa 'kʋ mala wɔlɩzɔnbilobholia ‑tɛtɛa 'slalɩ 'lɛ.

¹¹ Daa ma pʋ 'lɛ 'kʋklʋʋn 'nyɩ ma ‑kʋa 'lɛ 'kwlɩbhɩɛa ‑ɛ ‑bɛa 'lɛ Klisi ɩya 'klʋagbaa ‑a ‑cɩ 'kaa 'mɛɛ 'lɛ gɩlɩ na, ɩla ‑danʋfʋɛa lida na, ma 'matɩa le ma 'kaa clɩɩa ɩya nʋnʋgbɩa ‑ɩya ɩmɩa Klisi 'la 'Wugoa ‑ʋ ‑kʋa 'lɛ maa nɩkplaan na, ʋ pala 'lɛ maa na, mʋnʋa 'lɛ cɩ na cibhlili.

¹² 'Wugoa yaa maa pala lebhe ‑n 'ta maa 'titi mala gbʋʋ, ‑ma anyɩ ala gbʋ ma ‑saa 'lɛ dɩ ‑naa. ‑Pɔtɔnʋ ɩmɩ Dɩnanɩa* 'la plicinyaa ‑sa 'lɛ anyɩ, ‑Kplɔkplɔ ‑Wugoa* ‑ʋ 'wlʋlʋ 'lɛ ‑laagɔɔn na ʋla 'tɛtɩa nɩkplaan, 'nyɩ ɩla cibhlilitʋ ‑ʋ bhla 'lɛ sɛɛ 'bhlaandleecɩa*.

A 'plɩ ‑kplɔkplɔnya

¹³ ‑Anɩ ‑naa 'la gbʋ na, ala wɔɔgugwiea 'la ŋɔmʋa, a gblɩbhalɩ ɩya a ‑bɛ. A zʋ ala pɔlɛkʋtɛlɔa 'fɩan 'nyupalɩɛa a cɩ 'ka 'lɛ 'lɩ, daa Zozi Klisi cɩ 'ka 'lɛ ɔcɩ pala na 'kʋ.

¹⁴ A namʋ le 'cuoa ‑ɔ ‑ka 'lɛ zʋlɩɛ na, ɩya a 'la gɩlɩanɩ ala ‑godogodolɩɩa 'la 'tʋa ‑ʋ bhlaa 'lɛ anyɩ, daa a 'taa 'lɛ wɔlɩ bhlogbɩɩ ‑ci na.

¹⁵ ‑Ma, saa ɔmɔa ‑ɔ la 'lɛ anyɩ na, ɔ ‑kplɔ 'lɛ na, anyɩ ‑ma 'naa a ‑kplɔ ala nʋnʋgbɩa 'fɩan nɩkplaan.

¹⁶ ‑Masa ɩ ‑zieo lebhe: 'Naa a ‑kplɔ, sa n ‑kplɔ na.

¹⁷ 'Nyɩ ɔmɔa ‑ɔ gbazlɩlɩ 'ta 'lɛ nɩkplaan, 'nyɩ ‑ɔ ‑pla 'lɛ nclɔɔ nclɔɔ 'tɩtɩ ɔla nʋnʋgbɩa 'la 'sasʋʋn na, a ‑kɔɔ a to la na, 'dɛndlana, a ‑glɩ 'lɛ 'plɩplɩnya ‑dʋdʋa 'kʋ na, a namʋnʋ ɔla zʋlɩɛ nɩkplaan.

¹⁸ A cibhlili lebhe daa a ‑kʋa 'lɛ a tokadɔcɩa 'la 'kpɔkpɔnamʋa ‑a lili 'lɛ ‑aja 'kʋ na nɩkplaan na, ‑n 'ta nyumonyumolɩɩ, 'dala ‑aana ‑asɩkɛɛ Laagɔ 'ta 'lɛ 'ma ɩya ɔ 'ka anyɩ nɩkplaan 'kplɩ.

¹⁹ ‑Ma gbakabhadolu, ‑ʋ ‑kʋ 'lɛ le 'bhlabhlɩcoa ‑ɛ 'ta 'lɛ 'bhlɛ cɩ ‑ka, 'nyɩ ‑ɛ kplɔ 'lɛ na 'la ‑dolu na, ʋmʋ ɔ 'ma 'lɛ 'nyɩ ɔ ya 'lɛ anyɩ nɩkplaan 'kplɩ. Klisi 'la ‑dolua ɔ 'ma 'lɛ.

²⁰ Ɔmɔ Laagɔ sla 'lɛ de 'fɩɔn 'nyɩ ɔ ya 'lɛ ‑laagɔzɔan nʋ, 'nyɩ bhɩalɩclɩɩ ‑naa nɩkplaan, ɔ yɔɔ 'lɛ ncɛlɩ pala ala gbʋ.

²¹ Ɔmɔ a 'plɩlɩ 'lɛ 'kʋ, 'nyɩ a ‑ka 'lɛ Laagɔ 'la pɔɔtɛtɛ. Ɔmɔ -ɔ ‑bhoo 'lɛ 'kwɩɩn 'kʋ 'nyɩ ɔ yɔɔ 'lɛ 'klʋagbaa 'nyɩ, ɩya ala pɔɔtɛtɛa ɩya pɔlɛkʋtɛlɔa 'ka Laagɔ 'kʋ 'slalɩ.

A wabhawabhalɩ

²² A ya acɩ 'zɩa* cɩ ‑sa, ‑nʋawlɛa 'la 'kʋplɩlɩlɩɛa nɩkplaan, le bholiecɩ 'bhisa, a 'ka ‑nʋawlɛɛsa wabhawabhalɩ. Na, a wabhawabhalɩ ‑gbɔɔn, ‑kplɔkplɔpɔlɛ nɩkplaan.

²³ Sa Laagɔ 'la wɔɔnyɩtʋa ‑ʋ ‑ja 'lɛ 'nyɩ ʋ ‑kʋ 'lɛ 'lʋkʋlʋkʋ na, ʋmʋ nɩkplaan a ‑valɩlɩɔ 'lɛ ‑mɔsɔ ‑mɔsɔ. Ʋ 'ta suciea ‑ɛ ku 'lɛ na ‑glɩ.

²⁴ Ka nclɔɔ ‑kʋ 'lɛ le ‑piti 'bhisa. 'Nyɩ ɔla 'klʋagbaa ‑tɛtɛa ‑kʋ 'lɛ le ‑piti 'la 'flawasɩ 'bhisa. ‑Pitiva yɛ, 'nyɩ ala 'flawasɩa bhli.

²⁵ ‑Ma ‑Kwlenyɔ 'la wɔɔnyɩtʋa ‑kʋ 'lʋkʋlʋkʋ ɩya 'lʋkʋlʋkʋ. 'Nyɩ wɔɔnyɩtʋ ‑naa, ʋmʋ ‑ʋ ‑glɩ 'lɛ Dɩnanɩa* ma ‑sa 'lɛ anyɩ na.