YOHANE 9 - Ghomala New Testament

Yeso yɛ̀ mu' fʉ̀

¹ Yeso lə́ nə́ cyə jɔ́ mu' mbɛ, e pɑ́ fʉ̀ tə́ fɑ́ nə tyɛ' nə tsə é.

² Pɑkhʉ̌ pyə həŋtə é gɑ: Rabi wɑ lə́ hɔnwə tə́ bɛ yəŋ pɑ́ fʉ̀? A lə́ bɑ pɑ yʉ kɑ pɑ tsə́ é?

³ Yeso pa' bi pú gɑ: Kɑ yʉ kɑ pɑ tsə́ e lə, sɔmmo ka hɔnwə. A bɑ́ po'o m gɑ pu yɔ mfà' Si nə e!

⁴ Pɑ fa' mfà' mo yə e nthəm á cwə yə dzʉ̌ yɑ̌ wə a; nə pa' mtsʉ̌' wə sɔ̌', cwə yə sɔmmo tə́ fa' a pɑ́.

⁵ Ŋ shwə nthʉm dzʉ́ pɑ dəŋ gɑ kɑlə, bɑ gɑ̌ bɑ ŋkha' nthʉm dzʉ́.

⁶ Yeso lə cwə tə́ gɔm po'o, nthətə́ mti si nə gə mtwətwɔp jáp nə mnyə́ fʉ̀,

⁷ biŋ gɔm bi e gɑ: Ghɔ sɔk nɑ o nthʉm tam shyə Siloe, a la'tə gɑ́ gɛ̀ nthə̌m. Fʉ̀ lə́ ghɔ̌ tsʉ'u, sɔk nɑ e, biŋ nə pɑnyə, bɑwə jɔ tsʉ'.

⁸ Pɑ giŋnyə tsʉ'u ba pɔ pyə wap lə́ bɑ jɔ é guŋ mcwə awɛ a, nə pa' e lə́ bɑ dǒ ywə a, pɑ́ gɔm gɑ: Yəŋ tə́ mo yə e kɑ́ bɑ ě cwə si tsɔ'ɔ bɑ do ywə a pɑ̀ lə́?

⁹ Shɑ́ pɔ pɑ́ gɔm gɑ: A bɑ e. Pyə shɑ́ pɔ pɑ́ gɔm yap gɑ: Gɛ̌, a mu' mo hwə́ é hwə́. Tə́ fʉ̀ bɔ ghɔm gɑ: A bɑ́ kwa' myə̀.

¹⁰ Wap ghɔm bi e gɑ: Tə́ mnyə mǔ gyɛ' m gɑ́ kɑ̀?

¹¹ E ghɔm bi pu gɑ: Bɛ yə pu ŋkhe e gɑ Yeso a ghə mtwətwɔp, nə shi'nyə mnyə mə̌, biŋ gɔm bəm gɑ: Ghɔ Siloe sɔk nɑ o. A pɑ́ po'o ŋ gɔ tsʉ'u, sɔk nɑ a, nəŋ jɔtsʉ'.

¹² Wap ghɔm bi e gɑ: Mo bɔ hɑ? E pa' bi pu gɑ: Ŋ khɑ zhyə sɔmywə nə́.

¹³ Pu lə́ lɑ̌ fʉ̀ bɔ nə gɔ ywə́ pɑ Farisai.

¹⁴ A lə́ nə pɑ̌ po'o bɑ Yeso lə́ nthaknyə mtwətwɔp nə gyɛ' mnyə bɛ bɔ po'o tyɛ' Sabat.

¹⁵ Pɑ Farisai lə́ həŋtə é yap pa' a lə́ cyə tə́ e yɔ tsʉ' a. E pa' bi pú gɑ: E yap mtwətwɔp nə mnyə mə̌, sɔk nɑ a, jɔ tsʉ'.

¹⁶ Shɑ pɔ cəcɑ̌ pɑ Farisai lə́ ghɔm gɑ: Mo bǎ tə́ mo Si pɑ́, nə pa' e tə̌ wə jyə Sabat pɑ̀. Da' gɑ̀ pyə shɑ pɔ pɑ gɔm gɑ: Bi a pɑ́ gɛ mhɔ lɑ gʉ' nə gə́ yəŋ nthi mtiŋ msya hɑ? A lə pɑ̌ po'o ŋkhyɛ'nyə ko cəcɑ̌ pu.

¹⁷ Wap piŋ ŋkwi' gɔm bi fʉ̀ bɔ gɑ: Kwa' wə ghɔm yǔ gɑ kɑ́ nə mo yə e gyɛ' mnyə mu a? E pa' bi pu gɑ: E gɔm ghɔm Si.

¹⁸ Pɑ Yudea la tə piŋ gɑ bɛ bɔ lə bɑ fʉ̀ tə́ biŋ jɔ tsʉ', tə́ ŋkhəm cwə yə wap lə ké pɑ tsə e a.

¹⁹ Wap lə həŋtə pɑ tsə e gɑ: Bɛ yə̌ŋ bɑ mú yɔ yə po gɔm gɑ̀ po lə nə tsə é e pɑ́ fʉ̀ a lə́? Tə é jɔ tsʉ' cwəlɔ m gɑ́ kɑ?

²⁰ Wap pa' bi pɑ Yudea gɑ: Pyə̌ zhyə́ nyənyɔ gɑ e shəŋtə bɑ́ mu yɔk, bɑ pyə lə nə tsə́ é e pɑ fʉ̀.

²¹ Tə́ sɔ' m cwəlɔ pa' e wə jɔ tsʉ' a, pyə ka zhyə sɔmywə nə́. Sɔ' m nə mo yə e gyɛ' mnyə myə́ a, bɑ pyə ka zhyə e. Po həŋtə e, e bɑ pɑ́ gətso. Kwa' yʉ siŋ wɔ nwə̀ nə.

²² Pɑ tsə é lə́ gɔm po'o nə pa' wap lə bɑwə bwɔk pɑ Yudea. Nə pa' pɑ Yudea lə́ bɑ wap tsə́ yap gɑ́ bǎ wɑlə́ yə e piŋ gɑ́ Yeso bɑ Kristo a bɑ wap gɔ té é dyə Sinagogə.

²³ A ywə yə a lə gə tə́ pɑ tsə́ é ghɔm gɑ́ po həŋtə é, e bɑ gətso a.

²⁴ Pɑ Farisai lə́ piŋ ŋkwi' ŋkhe mo bɔ̌ yə e lə́ bɑ fʉ̀ a, gɔm bi e gɑ: Ghú'tə́ Si! Wɔk, pyə̌ zhyə gɑ mo bǎ bɑ́ hɔnwə.

²⁵ E pa' bi pu gɑ: Ŋ kha zhyə bi a e bɑ́ hɔnwə a, gɑ̌ zhyə da' gɑ́ ŋ khɑ́ bɑ́ fʉ̀, nəŋ bɑ cwəlɔ bɑwə jɔ tsʉ'.

²⁶ Wap ghɔm bi e gɑ: E gə nə o m gɑ́ kɑ? E gyɛ' mnyə mǔ m gɑ́ kɑ?

²⁷ E pa' bi pú gɑ: Gɑ̌ é da' siŋ wɔ, da' gɑ́ la' po yu'! Nwə kɑ̀ po piŋ bɑwə shəŋ nə piŋ ŋkwi' ju' mu' cʉm é? Pɑ́tyɛ' ba wɔ yɔ pɑwə shəŋ nə zhi pɑkhʉ pyə́ a?

²⁸ Pɑ Farisai lə tó' nə yəmtə é bɑ gɔm gɑ: O bɑ mukhʉ é! Wɔk, pyə bɑ pɑkhʉ̌ Mosɛ.

²⁹ Pyə zhyə́ gɑ Si bɑ e lé gɔmnwə bi Mosɛ, tə́ sɔ' m nə mo yəŋ gɑ, bɑ pyə ka zhyə́ tsʉ' yə e fɑ m nə a.

³⁰ Mbɛ bɔ pa' bi pu gɑ: Msya nwə bɑ́ gɑ po ka zhyə́ e, bɑ é nəŋ gyɛ' mnyə mə̌!

³¹ Pɑ zhyə gɑ́ Si tə́ ju' gi mghɛ mhɔ pɑ, da' gɑ bɑ ju' mcwyɛ'nyə mo yə e dɑ mku' biŋ e biŋ bɑ gə ywə e shəŋ a.

³² Pú la m ju' pá' pu gɔm gɑ́ mo ghyɛ' mnyə mo bɑ pu lə nə tsə́ é e pɑ fʉ̀ a pɑ́.

³³ Bɛ yəŋ la' pe' e lɑ pɑ m nə́ Si pɑ, bɑ e ka ghə sɔmywə.

³⁴ Pɑ Farisai lə pa' bi e gɑ: Wə yə o bɑ gɛ mhɔ tə́ fɑ tyɛ' nə tsə o a, o gɔ la'tə kɑ? Wap lə ghɔm po'o nthé é ma' pé.

³⁵ Yeso lə́ nə yu' gɑ wap zhəŋ é, sɔ' jɔ é gɔm bi é gɑ: O piŋ Mu mo a?

³⁶ Mo bɔ pa' bi Yeso gɑ: Mu mo bɔ bɑ̀ wɑ Cyəpɔ tə́ biŋ e?

³⁷ Yeso ghɔm bi e gɑ: A bɑ ǒ yɔ e. A bɑ mo yə e bɑwə gɔmnwə bu a.

³⁸ Mo bɔ ghɔm gɑ: Gɑ̌ piŋ m Cyəpɔ, e lə́ ghɔm po'o biŋ ŋkham mkwi'tə dzə é.

³⁹ Yeso piŋ gɔm bi e gɑ: Ŋ də́ sɔ' m nthʉm dzʉ́ nə fyɛ', po'o gɑ́ mfʉ̀ yɔ tsʉ', a pɑ yɔ tsʉ' zhi mfʉ̀.

⁴⁰ Pɑ Farisai pyə pu a pu lə bɑ a, lə́ nə yu' mghɔm bɔ gɔm bi Yeso gɑ: Pɑ́ tyɛ' ba wɔk yɔk bɑ pɑ mfʉ̀ a?

⁴¹ Yeso ghɔm bi pu gɑ: Po la' pe' bɑ mfʉ̀ bɑ mhɔ tə̌ nə po pɑ̀. Da' gɑ́ po bɑwə cwəlɔ gɔm gɑ pyə wə jɔ tsʉ' a cyə m po'o, mhɔ mɔ́ wuŋ nə po.