YOHANE 7 - Ghomala New Testament

Nə́ cyətə ghə piŋnthʉm mfɑ́ Yeso

¹ A lə pɑ̌ po'o Yeso pɑ́ ŋkəká pɑ́ Galilea; la' e piŋ biŋ nə ghɔ Yudea tsʉ' yə pɑ Yudea lə bɑwə shəŋ nə zhwə e nə a.

² A lə́ nə pɑ̌ po'o tyɛ' ŋwɛnyə pɑ Yudea nə lɑ tsə pé pɑwə sɔ̌'.

³ Mfɑ pyə ghɔm bi e gɑ: Bi a pɑ́ o lə cwə́ pɑ́ tsɔ'ɔ, ghɔ Yudea, po'o tə́ pɑkhʉ̌ pǔ yɔ yap mfa' mǔ.

⁴ Mo tə́ bɑ shəŋ gɑ pu piŋ e gə ywə dʉmnyətʉmnyə pɑ́. Pa' o wə fa' yəŋ nthi mfǎ' a ghə gɑ dzʉ̌ zhyə o.

⁵ A lə́ nə pɑ̌ po'o la' ba kwa' mfɑ pyə pɑwə biŋ e pɑ́.

⁶ Yeso ghɔm bi pu gɑ: Yɑ cwə ka wuŋ ŋkhu'; sɔ' m nə wɔ, yɔ cwə bɑ bǎ cwə kələ́ bɑ pɑ́ pɑpuŋ.

⁷ Bi a pɑ́ dzʉ̌ lə pɔ wɔ pɑ; tə́ sɔ' m nə́ m̀, dzʉ̌ bɔ a nə pa' gɑ̌ ŋkwinthɛ̌ gɑ mfa' dzʉ pɔk.

⁸ Po pʉɔ gɔ nə ŋwɛnyə bǎ, tə́ sɔ' m nə́ m̀ bɑ yɑ cwə ka wuŋ bəmtə.

⁹ Yeso lə ghɔm po'o gúŋ Galilea.

¹⁰ Da' gɑ mfɑ pyə lə cwə̌ tə gɔ m̀ nə ŋwɛnyə, e tam yə́ məjyə̀, da' gɑ la' e ghə tə́ mo yɔ é, guŋ bɑ dʉmnyətʉmnyə.

Yeso zhi'tə ywə Dyə Si

¹¹ A lə́ pɑ̌ cwə ŋwɛnyə, pɑ Yudea pɑ shəŋ Yeso, bɑ gɔm gɑ: Bɛ bɔ̌ hɑ́?

¹² A lə́ bɑ cəcɑ̌ pɔmnəŋ, pu pɑwə nthɛshwə nə e te' o; shɑ́ pɔ pɑwə gɔm gɑ: E bɑ mo pɑpuŋ da' gɑ́ pyə shɑ pɔ pɑ gɔm gɑ: Gɛ̌ e bɑwə fʉtə́ pɔmnəŋ.

¹³ Tə ba tə po'o sɔmmo la tə́ bɑwə gɔm sɔsɔ̌ pɑ́, bɑ bwɔk pɑ Yudea.

¹⁴ Ŋwɛnyə lə́ nə ko cəcɑ̌, Yeso pʉɔ gɔ Dyə Si ntho' nə zhi'tə pɔmnəŋ.

¹⁵ Nwə cyə pɑ Yudea, wap pɑ gɔm gɑ: E nə zhyə ŋwa'nyə m po'o gə la, yʉ yə e la m ji'tə ŋwa'nyə a?

¹⁶ Yeso pa' bi pu gɑ: Ywə yə gɑ̌ ji'tə á a tə́ fɑ m bəm pɑ; a fɑ m bi mo yə e nthəm ǎ.

¹⁷ Mo pɑ gɔ ghə ywə yə́ Si shəŋ a, bɑ e gɔ zhyə bi a ywə yə gɑ̌ ji'tə a fɑ m bi Si a, kɑ bi a gɑ gɔm pɑ́ nə yɑ thə á lə.

¹⁸ Mo yə e gɔmnwə pɑ́ nə yə thə a shəŋ nə ghu'tə pɑ nɑ é; da' mo yɑ́ yə e shəŋ nə ghú'tə mo yə e nthəm e á nə bɑ nyənyɔ, cwanwə tə́ biŋ bɑ nə e pɑ́.

¹⁹ Tə́ Mosɛ nə lə́ hɑ mcò' bi po a lə? Sɔmmo nə́ po lə nəŋ bɑwə giŋ nə mcò'; nwə kɑ po pɑwə shəŋ nə zhwə á?

²⁰ Pɔmnəŋ pa' bi e gɑ: Zhwenyə cwəpuŋ nə o! Wɑ̌ bɑwə shəŋ nə zhwə o?

²¹ Yeso piŋ dɑ ghɔm gɔm bi pu gɑ: Gɑ̌ fa' da' ta' fa' yɑmu', a pɑwə sya guŋ yɔ̀ awɛ.

²² Mosɛ bɑ e lě hɑ nə vó mo bi po, ba tə pa' a tə́ fɑ bi Mosɛ a pɑ, a fɑ m bi mtá pɔk pɑ̀, po nəŋ bɑ bvo mo tyɛ' sabat.

²³ A bi a pɑ gɑ́ bi a pɑ́ pu vó mo tyɛ' sabat tə pɔptə mcò' Mosɛ, bɑ nwə kɑ̀ po yɛluŋ nə m̀ gɑ̀ gɑ̌ yɛ̀ mo nə tyɛ' Sabat?

²⁴ Po tak nə pɑ fyɛ' mo m nə pa' po nə jɔ yɔ sə e a nə́ŋ, bɑ fyɛ' mo m nə́ dəŋdəŋ.

²⁵ Pɑ Yerusalɛm lə́ bɑwə gɔm gɑ: Yɑ́ tə́ bɑ mo yə wap bɑwə shəŋ nə zhwə e á pɑ́ lə́?

²⁶ Ě yəŋ bɑwə gɔmnwə pɑ tə tʉmnyə, sɔmmo lə nəŋ gɔmnwə bi é. Pɑ́tyɛ' bɑ pɑ sa' guŋ pɔk pɑ zhyə cwəlɔ gɑ e bɑ Kristo a?

²⁷ Da' gɑ̀ a bɑwə sɔ' m nə mo yəŋ bɑ pɑ̌ zhyə tsʉ' yə e fɑ m nə a. Tə́ sɔ' m nə́ Kristo, cwə yə e gɔ la' sɔ' a, sɔmmo lə zhyə tsʉ' yə e fɑ m nə a.

²⁸ A lə pɑ̌ po'o, Yeso pá' e lə bɑ Dyə Si bɑwə ji'tə pɔmnəŋ á, ghɔm tə thə́ gɑ: Po bɑ pǒ zhyə a! Bɑ pǒ zhyə tsʉ' yə gɑ̌ fɑ m̀ nə a! A nəŋ bɑ po'o bɑ ŋ tə sɔ' pɑ nə yɑ thə́ pɑ́: Mo yə e nthəm a bɑ nyənyɔ, yʉ́ yə a bɑ po ka zhyə e a.

²⁹ Tə́ a bɑ gɑ̌ zhyə e, nə pa' gɑ̌ fɑ m bəŋ é, yʉ nə nəŋ nthəm a.

³⁰ Wap lə pɑ̌ shəŋ nə ghəm e, da' gɑ́ la' sɔmmo ku' nə yap pǔ nə e, nə pa' yə cwə̀ lə́ jɑ tə wuŋ ŋkhǔ'.

³¹ Bo'gwyə pɔ lə piŋ e cəcɑ̌ pɔmnəŋ, biŋ bɑ gɔm gɑ: Kristo gɔ la' sɔ' ghə mtiŋ msya tə a cyə myə mo yəŋ gɑ́ gə á?

³² Guŋ ywə awɛ yə pɔmnəŋ lə́ bɑwə shamtə́ nə Yeso a lə tǎm mtəŋ pɑ Farisai: Wap pu a mkamsi gwyəgwyə təm msə̌ŋwi gɑ wap ghɔ gəm e.

³³ Yeso ghɔm gɑ: gɑ̌ jɑ́ pɑ́ cəcɑ̌ po nə muywə cwə tə́ piŋ ghɔ bəŋ mo yə e nthəm a.

³⁴ A gɔ pɑ cwə o bɔ po cəŋ a, po lə yɔ a pɑ́; nə pa' tsʉ' yə gɑ̌ gɔ pɑ̀ nə a, bi a pɑ́ po lə sɔ' tsʉ' u.

³⁵ Pɑ Yudea lə to' nə pɑ gɔm gɑ: E gɔ ghɔ hɑ tə́ bi a pɑ́ pɑ lə piŋ ŋkhu' nə yɔ e? E gɔ ghɔ kwyatə pɔ pyə wap bɑ wap sɛ cəcɑ̌ pɑ́ Grikia ǎ? E gɔ zhi'tə pɑ Grikia a.

³⁶ Tə́ ghɔm tsɔ tsyə e gɔm gɑ̀: Po gɔ cəŋ a po lə yɔ a, tsʉ' yə gɑ̌ nə a bi a pɑ po lə́ sɔ' nə a, po'o da'tə gɑ́ kɑ̀?

Mnwə jʉɔjʉ̀m tyɛ' ŋwɛnyə

³⁷ A lə pɑ̀ nə jʉɔjʉ̀m tyɛ' ŋwɛnyə yə a bɑ̀ tyɛ'dzʉ gwyə a, Yeso tiŋnyə thə́ ntho' bɑ gɔm tə́ thə́ gɑ: A pɑ gɑ̀ ghǎk mo khə́, e sɔ' bəm po'o gɑ mo yə e piŋ á, e nwə́ shyə.

³⁸ Dəŋdəŋ pa' ywə yə pu lə və a gɔm a, mta'mta' shyə dzəŋtsə̌ŋ nthəm nə e dzə́ŋ.

³⁹ E lə́ gɔm po' gɔm Zhwenyə yə pɔ pyə wap piŋ e a lə bɑ gɔ kwi a, nə pa' Zhwenyə lə́ jɑ tə wuŋ bɑwə, bɑ pu ka wuŋ gu'tə Yeso.

⁴⁰ Shɑ̀ pɔ cəcɑ̌ vəŋ pɔ pyə wap lə yu' mghɔm myə a, lə́ pɑ̌ gɔm gɑ: Kwa' nyənyɔ yəŋ bɑ gɔm ghɔm Si.

⁴¹ Shɑ pɔ pɑ́ gɔm gɑ: E bɑ́ Kristo. Da' gɑ shɑ pɔ piŋ bɑ gɔm yap m gɑ: Bi a pɑ Kristo təm m Galilea a?

⁴² Ywə yə pu lə və a tə́ gɔm gɑ́ e gɔ sɔ' pɑ mo nə ŋkhənyə David, piŋ təm m Bɛtəlehɛm, muywə tisuŋ nə guŋ yə David lə́ nthəm m nə́ a lə́?

⁴³ A lə pɑ po'o pɔmnəŋ ghap ghəŋ pʉə nə́ é.

⁴⁴ Shɑ pɔ nə́ pu pɑ shəŋ nə ghəm e, da' gɑ́ la' sɔmmo yap pu nə e.

⁴⁵ Pɑ msəŋwi lə sɔ' jɔ mtadyə mkamsi pu a pɑ Farisai; wap həŋtə msə̌ŋwi gɑ: Nwə kɑ́ bɑ po ka ghəm e?

⁴⁶ Msəŋwi pa' gɑ: Sɔmmo la m gɔmnwə pá' bɛ yəŋ gɑ̀ a.

⁴⁷ Pɑ Farisai ghɔm bi pu gɑ: Pɑ́tyɛ' ba e fʉ̀ bɑ wɔ yɔ a?

⁴⁸ A ghɔ cəcɑ̌ mghətso ba m cəcɑ̌ pɑ Farisai, bǎ ta' mo piŋ é a?

⁴⁹ Da' vəŋ pɑ tə zhyə́ mco' pɔ gɑ! Mghɛ dò.

⁵⁰ Da' gɑ mu' mo nə pɑ Farisai, Nikodemo yə e lə ghɔ jɔ́ Yeso a ghɔm gɑ:

⁵¹ Bi a pɑ̀ mco' mɔk pɑ nyəŋ shɛ́ thə́ mo tə́ yu' e biŋ jyə ywə yə ě ghə a?

⁵² Wap pa' bi e gɑ: Pɑ́tyɛ' bɑ bǎ wə yǔ zhi yə Galilea? Cə́ŋ, o gɔ yɔ gɑ̀ sɔm gɔm ghɔm Si tə́ nthəm Galilea pɑ.

⁵³ Bǎ ya mo á nə pú lə ghɔ m la' e.