YOHANE 4 - Ghomala New Testament

Yeso pu mjwǐ Samaria

¹ Cwə yə́ Yeso lə́ yu' gɑ pɑ Farisai yu' pa' pu gɔm gɑ́ pɑkhʉ pyə́ wə jɔ́m gɔ dzə, e piŋ bɑwə nu' pɔ shyə shyə́ Yohane,

² ba tə pa' a nyənyɔ gɑ́ tə Yeso nə lə́ bɑwə nu' pɔ shyə a pɑ, pɑkhʉ̌ pyə nə lə́ bɑwə nu' pɔ shyə a.

³ E təm Yudea gɔ Galilea.

⁴ E lə́ bɑ gɔ cyə m Samaria.

⁵ A lə pɑ po'o e kəm nthʉm mu' tisuŋ Samaria yə pu ŋkhe gɑ Sikar a, bəŋ ca' tsyə Yakop lə hɑ bi mu e Yosɛp a,

⁶ tsʉ' yə ghʉ̌m shyə Yakop bɑ nə a. Pa' Yeso lə bɑ e ghiŋ tə bwa a, e lə cwə dəm kə̌ŋ ghʉ̌m shyə. A lə bɑ nə khɛ̌ a mɔkcʉ́.

⁷ Mu' mjwǐ Samaria lə sɔ' m nə tu' shyə; Yeso ghɔm bi e gɑ: Hɑ yɑ shyə nwə́.

⁸ A lə nə pɑ po'o bɑ pɑkhʉ̌ pyə ghɔ m tisuŋ nə yo ywətsʉ.

⁹ Da' gɑ mjwǐ bɔ, mjwǐ Samaria bɔ ghɔm bi e gɑ: M gɑ́ kɑ́ lé? Wə yə́ o bɑ́ yə́ Yudea a, lo a shyə, myə̀, mjwǐ Samaria! Pɑ Yudea tə shəŋ gɑ pu a pɑ Samaria tamtə́ nə sɔmywə pɑ́.

¹⁰ Yeso pa' bi é gɑ: O lǎ' pe' jyə ywə yə Si hɑ́ a, ba mo yə e gɔm bu gɑ: hɑ yɑ shyə nwə́ a, bɑ wə nə lo é shyə, e hɑ́ shyə́ dzəŋ tsəŋ bu.

¹¹ Mjwǐ bɔ ghɔm bi e gɑ: Cyəpɔ o ka ghə ywə nə nthé shyə, bɑ ghʉ̌m nəŋ shú; tə́ o gɔ lɑ yə bɔ shyə vɔk hɑ?

¹² A bɑ ǒ cyə tá yɔk Yakop yə e lə hɑ̌ ghʉ̌m shyə yəŋ bi pyə, yə ba yʉ yə́ lə nwə̌, ba mnɔm pyə́ a?

¹³ Yeso pa' bi e gɑ: Mo yə ě nwə́ shyə yəŋ a, bɑ ghak e gɔ kwi' khə́.

¹⁴ Da' gɑ́ mo yə e gɔ sɔ' nwə́ shyə yə gɑ̌ gɔ hɑ́ bi e a, bɑ ghak e tə gɔ la'tə́ kwi' khə pɑ́; bɑ shyə́ bɔ yə gɑ̌ gɔ hɑ bi e a gɔ sɔ' pʉɔ cʉ' sa' sǐ shyə yə vɔk mama fə nə a.

¹⁵ Mjwǐ bɔ ghɔm bi e gɑ: Cyəpɔ hɑ shyə bɔ bəm po'o gɑ ghak a kɑ kwi' ŋkhə, a ŋ khɑ piŋ bɑ sɔ' tsɔ'ɔ nə tu' shyə.

¹⁶ Yeso ghɔm bi e gɑ: Ghɔ ŋkhe dhə́ o po e pəmtə́ sɔ' tsɔ'ɔ.

¹⁷ Mjwǐ bɔ pa' bi e gɑ: Ŋ kha ghə dhə́.

¹⁸ Yeso ghɔm bi e gɑ: Ǒ ghɔm pɑpúŋ gɑ: Ŋ kha ghə dhə́; a bɑ ǒ tsə ghə pɑtɔ, ba bɛ yə o gə e cwəlɔ a lə nəŋ bɑ dhə́ o. Nə yə bǎ, o ghɔm nyənyɔ.

¹⁹ Mjwǐ bɔ ghɔm bi e gɑ, Cyəpɔ gɑ̌ yɔ gɑ o bɑ gɔm ghɔm Si.

²⁰ Mtá pɔk lə́ gamtə Si dəm kuŋ gǒ tsɔ'ɔ, pǒ nəŋ biŋ gɔm m gɑ tsʉ' nə́ ghámtə Si bɑ m Yerusalɛm.

²¹ Yeso ghɔm bi e gɑ: Yu' ywə yə gɑ̌ gɔm a m mɑmjwi; cwə wə sɔ̌', yə po tə́ gɔ piŋ ghamtə Tá m dəm kuŋgǒ kɑ m Yerusalɛm a lə.

²² Pǒ gamtə ywə yə́ po ka zhyə́ ya a; tə́ pyə̌ gamtə ywə yə pyə̌ zhyə a, nə pa' ywə vɔ̀k fɑ m bi pɑ Yudea.

²³ Da' gɑ́ cwə wə sɔ̌', bɑ a tsə́ sɔ' cwəlɔ, cwə yə́ pɑ ghamtə pyə nyənyɔ gɔ pɑ ghamtə Tá m nə zhwenyə ba m nə́ nyənyɔ a; nthi pɑ ghamtə pyə Tá shəŋ a bɑ po'o.

²⁴ Si bɑ zhwenyə, a piŋ shyə m po'o tə́ pɔ pyə wap gamtə é a ghɔ pɑ́ ghamtə é m nə zhwenyə ba m nə́ nyənyɔ.

²⁵ Mjwǐ bɔ ghɔm bi e gɑ: Gɑ̌ zhyə gɑ́ ta' Mesia gɔ sɔ' sɔ', mo yə pu ŋkhe e gɑ Kristo a. Cwə yə e gɔ sɔ' sɔ' a, e siŋ wɔk pɑ̀ guŋ mnwə awɛ.

²⁶ Yeso ghɔm bi é gɑ: Gɑ̌ bɑ é, myə̀ yə gɑ̌ bɑwə gɔmnwə bu a.

²⁷ A lə pɑ po'o pɑkhʉ̌ pyə ŋwak. Nwə cyə wap nə yɔ gɑ́ Yeso pu mjwǐ wə gɔmnwə; da' gɑ́ la' sɔmmo ghɔm bi e gɑ: O shəŋ kɑ? Kɑ m gɑ: Nwə kɑ́ o ghɔmnwə bi e?

²⁸ Mjwǐ bɔ lə tak kɔp nə nthu' shyə é tsʉ'u, khʉdʉ́ gɔ tisuŋ gɔm bi pɔmnəŋ gɑ:

²⁹ Po sɔ' tə́ jɔ mu' mbɛ, bɑ ě siŋ a guŋ ywə yə dɑ̌ ghə a awɛ. Tə é tə gɔ pɑ Kristo a lə́?

³⁰ Wap lə təm tisuŋ, gɔ bəŋ é.

³¹ A lə nə pɑ̌ po'o bɑ pɑkhʉ̌ pyə́ cu' bɑwə nthənyə e gɑ: Rabi tsʉ́ ywə lə.

³² Da' gɑ́ e ghɔm bi pú gɑ: Gɑ̌ gɔ tsʉ́ ywətsʉ yə po ka zhyə yá a!

³³ A pɑ́ po'o pɑkhʉ̌ pyə pɑ gɔm cəcɑ̌ pu gɑ: Jyə gɑ́ a gɔ pɑ́ bɑ mu' mo hɑ ywətsʉ bi e lə́?

³⁴ Yeso ghɔm bi pu gɑ: Ywətsʉ́ á bɑ nə ghə ywə yə mo yə é nthəm á shəŋ a, biŋ gə fa' tsyə́ pəmtə̀.

³⁵ Kwa' wɔ tə́ gɔm gɑ: A cʉ' mŋwə́ pfʉ̀ə pú lɑ tsə pé a? Tə́ gɑ̌ ghɔm bi po gɑ: Po pʉ' mnyə mɔ biŋ dé pé; a bɑ cwə nə lɑ tsə́ e da' ŋkhǔ'!

³⁶ Mo yə e dɑ tsə́ pé a bɑ ě da' ŋkwi ŋkhap fa' e, biŋ bɑwə shu'tə potsə́ nə vɔk mama, tə mo yə e dzə tsə́ a, pu mo yə e dɑ a pɑwə bəmtə ŋwɛnyə.

³⁷ A bɑ po'o tə́ ghɔm tsyə a gɔm gɑ: Mu' mo dzə̀ ywə, mu' mo lɑ a, pɑ́ nyənyɔ.

³⁸ Dě nthəm wɔ gɑ́ po ghɔ dɑ tsə́ tsyə po la tə yɔgo' nə a; shɑ́ pɔ lě jɔgo', po ko nə ywə yə wap lə cəŋtə́ jɔgo' nə a.

³⁹ Bo'gwyə pɑ Samaria tisuŋ bɔ lə́ piŋ Yeso, shyə m nə ghɔm mjwǐ yə e lə́ bɑwə biŋ gɑ: E siŋ a guŋ ywə yə dɑ̌ ghə a awɛ.

⁴⁰ Cwə yə pɑ Samaria lə kəm bəŋ e a, shwyɛ'nyə e gɑ e cwə cəcɑ̌ pú. E lə cwə wə́ tyɛ'dzʉ tsɑpʉ́ə.

⁴¹ Pɔ jɔmyɔ̌m piŋ shyə́ m nə ghɔm tsyə́ biŋ é,

⁴² biŋ bɑ gɔm bi mɑmjwi bɔ gɑ: Pyə tə̌ wə́ shyə pɑ da' nə mghɔm mǔ tə́ biŋ pɑ́; kwa' wɔk yu' ghɔm tsyə́, biŋ bɑwə jyə nyənyɔ gɑ e bɑ Gɛvɔk dzʉ.

Bátə mtiŋ msya mɑbʉə Kana

⁴³ A lə́ cyə̌ mtyɛ'dzʉ́ mɑbʉə, Yeso lu tsʉ'u bɔ, gɔ Galilea.

⁴⁴ A nə pɑ̌ po'o bɑ kwa' Yeso lě biŋ gɑ pu tə́ gə mku' sɔm gɔm ghɔm Si gǔŋ pú pɑ́.

⁴⁵ Tə́ ba tə po'o bɑ e lə ŋwak Galilea, pɑ Galilea lɑ e kwa' pɑpuŋ: A lə bɑ ba wap yap lə ghɔ̌ Yerusalɛm nə́ ŋwɛnyə, ŋkho wə́ jɔ guŋ ywə awɛ yə Yeso lə́ ghə a.

⁴⁶ Yeso lə pɑnyə Kana Galilea tsʉ' yə e lə lɑ shyə gə mlu' nə a. Mu' tadyə msəŋwi fò lə bɑ wə́, mú e pɑ Kapɛrnaum bɑwə gǒ.

⁴⁷ E lə yu' pa' pu gɔm gɑ Yeso fɑ Yudea sɔ' Galilea a, gɔ jɔ e, biŋ shwyɛ'nyə e gɑ e tsəŋ jɛ́ mu e yə e lə bɑwə npfʉ́ a.

⁴⁸ Yeso ghɔm bi e gɑ: Po pɑ tə yɔ mtiŋ pu a msya bɑ po tə́ gɔ la' piŋ pɑ!

⁴⁹ Tadyə msəŋwi ghɔm bi e gɑ: Cyəpɔ, tsəŋ mu a nə pfʉ!

⁵⁰ Yeso ghɔm bi e gɑ: Ghɔ̌, mú o vɔk. Bɛ bɔ lə́ piŋ ghɔm tsyə Yeso gɔm bi a, cwəlɔ, ntham məjyə̀.

⁵¹ E lə pɑ dzəŋ cwəlɔ, mghɛ fa' pyə sɔ' pu a pú yu'tə, wap ghɔm bi e gɑ: Mú o vɔk.

⁵² E lə həŋtə wap cwə yə é kɑ yɛ a, wap pa' bi e gɑ: Mhwi kɑ nthəm nə e nə ta' nam yó.

⁵³ Tá mú bɔ yɔ gɑ a cwə yə Yeso kɑ ghɔm bi e gɑ: Mu o vɔk a. Tə fɑ po'o e piŋ, ba guŋ tuŋdyə́ e awɛ.

⁵⁴ Yəŋ bɑ batə mtiŋ msya mɑbʉə myə Yeso lə́ ghə cwə yə e lə́ fɑ Yudea gɔ Galilea a.