YOHANE 21 - Ghomala New Testament

Yeso la'tə nɑ e kə́ŋ mʉ'nyə

¹ Mnwə́ bɔ lə cyə̌, Yeso kwi' da'tə nɑ e bi pɑkhʉ̌ pyə́ kə́ŋ shyə́ lɑpʉə Tiberia. Pá' a lə́ nə shyə́ a bɑ gɑ́:

² Simon Pɛtrɔ ba Tomasi yə́ pú ŋkhe e gɑ Didimə ba Natanaɛl mú e Kana m Galilea pu a pǒ Zebede ba shɑ́ pɑkhʉ̌ pɑpʉə lə tǎmtə sí.

³ Simon Pɛtrɔ ghɔm bi pú gɑ: Gɑ gɔ m nə ghəm bapgu. Wap ghɔm bi e gɑ: Pɑ̀ gɔ pəmtə́ ghɔ. Wap lə təm cwəlɔ, ŋkho kənu', da' gɑ wap la tə́ ghəm sɔmywə mtsʉ́' bɔ.

⁴ A lə pɑ̌ fɔkdzʉ̌, Yeso sɔ' nthiŋnyə kəŋ shyə, da' gɑ la' pɑkhʉ̌ pyə pɑwə jyə gɑ a yʉ́ Yeso.

⁵ E ghɔm bi pú gɑ: Pɑkhʉ, pó ka ghə múywə bapgu a? Wap pa' bi e gɑ: gɛ̌.

⁶ E ghɔm bi pu gɑ: Po ma' nthənthɔm yɔ m nə́ ghə̌ŋ tʉɔ nə kənu' tə́ jɔ! Wap lə́ mǎ', gəm bapgu tə la' wap piŋ fəŋ nthənthɔm yap jyə nə́ nə nthəm shyə pɑ̀.

⁷ Mukhʉ̌ yə Yeso lə ŋkhuŋ é a ghɔm bi Pɛtrɔ gɑ: A bɑ́ Cyəpɔ! Pɛtrɔ lə cwətə ju' gɑ a Cyəpɔ, pa' dzə la tə́ bɑ nə e a pɑ, e wuŋ jwe tap e, ja' bvʉ́ shyə.

⁸ Pyə shɑ pɑkhʉ̌ lə lɑ̌ kənu' sɔ' kəŋ shyə, bɑwə fəŋ nthənthɔm bɑ bapgu lo nə́, nə pa' wap la tə́ bɑ́ gʉə sʉəsʉə nə kə̌ŋ shyə pɑ́, wap lə bɑ̀ gwɛ a nə meta ŋkhə.

⁹ Wap cwə̌ tə́ fi' si kəŋ shyə cwəlɔ, jɔ mɔ́k bɑ pu sù, jap bapgu ba pu' msɛ nə́.

¹⁰ Yeso ghɔm bi pu gɑ: Po lɑ bapgu yə po gəm cwəlɔ a nə sɔ̌'.

¹¹ Simon Pɛtrɔ lə ko nthʉm kənu' cwəlɔ, fi' nthənthɔm, mmʉəmmʉ́ə bapgu duŋ shwɔptá m potɔ mŋkhə pɑ́ bɑ ǎ lo nthʉm o; tə́ ba tə pa' bapgu lə bɑ́ nthʉm o dəŋ po'o a, nthənthɔm lə hʉə pɑ̀.

¹² Yeso ghɔm bi pu gɑ: Pó sɔ' dzʉ́ywə; la' sɔm mukhʉ̌ ghə kaktʉɔ nə həŋtə́ é gɑ: O bɑ́ wɑ? Da' gɑ wap lə bɑwə shəŋtə jyə́ gɑ e lə́ bɑ Cyəpɔ.

¹³ A lə pɑ̌ po'o Yeso sɔ'; bé msɛ́ hɑ bi pú; biŋ ŋkwi' hɑ ba bapgu bi pú.

¹⁴ A lə́ bɑ́ po'o bɑ́ batə mcʉ̌m mnthá pa' Yeso da'tə nɑ e bi pɑkhʉ́ pyə a, tə fɑ pa' e lə yǎm nə vʉ̌ a.

Yeso hɑ fa' bi Pɛtrɔ

¹⁵ Nə tsʉ́ ywə lə nə mì, Yeso ghɔm bi Simon Pɛtrɔ gɑ: Simon mú Yohane tə́ o ŋkhùŋ a tə shyə́ pɔ pɔŋ gɑ́ lə? E pa' bi e gɑ: Əŋ m Cyəpɔ, o bɑ ǒ zhyə́ gɑ́ gɑ̌ ŋkhùŋ o. Yeso piŋ gɔm bi e gɑ: Khim pó jʉ̀jʉ̀ pɑ̌.

¹⁶ Yeso lə kwi' gɔm bi e batə mcʉ̌m bʉ́ə gɑ: Simon mú Yohane tə́ o ŋkhúŋ a lə́? E pa' bi e gɑ: Əŋ m Cyəpɔ, ǒ bɑ ǒ zhyə gɑ́ gɑ̌ ŋkhùŋ o. Yeso ghɔm bi e gɑ: Pɑ́ gɛ pyap jʉ̀jʉ̀ tsɑ̌.

¹⁷ E lə kwi' gɔm bi e batə mcʉ̌m nthá gɑ Simon mú Yohane tə́ o ŋkhùŋ a lə́? Simon lə́ yɛ̌lúŋ pa' e həŋtə e batə mcʉ̌m nthá gɑ o ŋkhùŋ a lə́? Biŋ gɔm bi e gɑ: Cyəpɔ, wə yə́ ó bɑ ǒ zhyə́ guŋ ywə awɛ a, ǒ zhyə́ pɑpuŋ gɑ́ gɑ̌ ŋkhùŋ o. Yeso piŋ gɔm bi e gɑ: Khim jʉ̀jʉ̀ tsɑ̌.

¹⁸ Kwa' nyənyɔ nyənyɔ gɑ̌ ghɔm bu, cwə yə́ o lə́ bɑ mú səm a, o pɑ́ jwé tap o, bɑ gɔ tsʉ' yə o kuŋ a; cwə yə o gɔ sɔ' vo a, o pɑ ŋkhá' bú mǔ, mu' mo nə zhwe tap o, bɑ dɑ o gɔ tsʉ' yə o ka kuŋ a.

¹⁹ Yeso lə́ gɔm po'o bɑ nə da'tə nthi vʉ̌ yə Pɛtrɔ lə bɑ gɔ sɔ' nə ghu'tə Si a; e lə ghɔ́m ghɔm bɔ biŋ ŋkwi' gɔm bi Pɛtrɔ gɑ: Yap jʉ̌m m̀.

Mukhʉ̌ ŋkhuŋnyə Yeso

²⁰ Pɛtrɔ lə fɛ̌ nɑ́ e jɔ mukhʉ̌ yə́ Yeso lə ŋkhuŋ e a jʉm e. Mo yə e lə pɔ nɑ e nə kəkɔp e cwə yə́ wap lə́ bɑwə dzʉ́ywə a gɔm bi e gɑ́: Cyəpɔ mo yə e bɑwə gɔ hɑ o bɑ wɑ?

²¹ Pɛtrɔ lə yɔ e, gɔm bi Yeso gɑ: Sɔ' m nə e, e gɔ sɔ' pɑ m gɑ́ kɑ?

²² Yeso pa' bi e gɑ́: Ŋ ŋkhuŋ gɑ e pɑ́ pɑwə tə̌ ŋ da' sɔ̌', bɑ a gɔ ghə la m wə̀? Sɔ' m nə wə, yap jʉ̌m m̀.

²³ A lə́ fɑ nə́ ghɔm tsɔ gɑ tə pu pɑ gɔm cəcɑ̌ mfɑ mfɑ́ gɑ mukhʉ̌ bɔ tə́ gɔ la' pfʉ́ pɑ́. Tə a pɑ́ nyənyɔ gɑ Yeso la tə ghɔm bi e gɑ́ e tə́ gɔ la' pfʉ́ pɑ́; da' gɑ́ e lə shəŋtə gɔm m gɑ́: Ŋ da ŋkhuŋ gɑ e pɑ́ pɑwə tə̌ ŋ da' sɔ̌' bɑ a gɔ ghə la m wə̀?

²⁴ Mukhʉ̌ bɔ nə ŋkwinthɛ̌ nə mɔ mnwə, biŋ bvə má; bɑ pyə̌ nəŋ jyə́ gɑ mkwinthɛ myə́ bɑ pa' nyənyɔ shəŋ a.

²⁵ Yeso lə́ ghə̌ shɑ mnwə tə ǎ yɔ́m: tə bi a pɑ́ pu lə pé'e bɑ gɔ və pɑ yɑmu' yɑmu' bɑ guŋ dzʉ̌ awɛ gɔ kɔk nə pa' bi a ŋwa'nyə yə pu gɔ və nə á gɔ ko nə a.