YOHANE 10 - Ghomala New Testament

Ghɔ̀m tə tútə byap dzə́

¹ Kwa' nyənyɔ nyənyɔ gɑ̌ siŋ wɔ gɑ mo yə e nthak jyə̀ ka dzə́ nəŋ ja' m nə mu' ghəŋ pé tə́ ŋkho ka dzə a, mo bɔ bɑ́ shuŋ biŋ bɑ́ samshwə.

² Tə́ mo yə e shyə m jyədyə̌ tə́ ŋkho ka a, mo bɔ bɑ́ byap dzə.

³ Mo yə é dé jyədyə̌ a, gyɛ' jyədyə̌ bi e. Mjʉ̀jʉ̀ jyə́ gi e; mjʉ̀jʉ̀ pyə wap bɑ tsyə a, e ŋkhe bǎ ya lə pɑ mtsǒ, biŋ dɑ wap nthəm pé.

⁴ E shwə tə́ nthe wap awɛ, bɑ dzə̀, wap yap jʉm e, nə pa' a bɑ wap zhyə gi é.

⁵ Bi a pɑ́ wap lə yap jʉm gʉɔ pɑ̀; wap gɔ khʉ é khʉ, nə pa' wap tə jyə gi mghʉɔ pɑ.

⁶ Yeso lə́ ghɔ̌m tsɔ ghɔ̀m tə tútə̀ bi pú, da' gɑ́ la' wap yu' kwa' ywə yə e lə́ bɑwə gɔm a.

⁷ Yeso piŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ́ gɑ̌ bɑ́ jyədyə̌ mjʉ̀jʉ̀.

⁸ Guŋ pɔ awɛ pyə wap lə sɔ' m dzə̌ m̀ a bɑ mcúŋ, biŋ bɑ msamshwə, da' gɑ́ mjʉ̀jʉ̀ lě tə́ yu' gi yap pɑ̀.

⁹ Gɑ̌ bɑ́ jyədyə̌, mo yə e cyə m nə m̀ a, bɑ e gɔ sɔ' vɔk, e gɔ pɑ̀ kə́ká, yɔ ywətsʉ.

¹⁰ Shwǔŋ sɔ' yə pɑ̀ nə zhʉ̀, nə zhwə, kɑ nə ghə a pi lə; tə́ gɑ̌ sɔ' po'o gɑ́ pɔmnəŋ ghə vɔ̀k, biŋ shəŋtə gə a yɔm.

¹¹ Gɑ̌ bɑ́ byap dzə́ pɑpúŋ: Byap dzə́ pɑpùŋ hɑ vɔk e nə thə́ jʉ̀jʉ̀ tsyə́.

¹² Mo yə e fa' yə pɑ́ ŋkhap e, la' e pɑ kwa' byap dzə, la' mjʉ̀jʉ̀ pɑ́ tsyə a, shwə tə́ jɔ bvʉ́ gǒ, gwa' mjʉ̀jʉ̀, ŋkhʉ; bvʉ́ gǒ lɑ́ tsʉ' sɛtə mjʉ̀jʉ̀.

¹³ A bɑ gɑ́ e fa' yə pɑ ŋkhǎp, bɑ mjʉ̀jʉ̀ ka ghə də̀ŋ bi e.

¹⁴ Gɑ̌ bɑ byap dzə pɑpuŋ. Gɑ̌ bɑ gɑ̌ zhyə́ jʉ̀jʉ̀ tsɑ̌, jʉ̀jʉ̀ tsɑ̌ piŋ jyə́ a,

¹⁵ dəŋdəŋ pa' Tá a bɑ ě zhyə́ a, biŋ jyə́ Tá a á, biŋ bɑ́ hɑ vɔ̀k á nə mjʉ̀jʉ̀.

¹⁶ Gɑ̌ bɑ gɑ̌ ghə shɑ́ mjʉ̀jʉ̀ pyə wap tə́ wuŋ bɑ nthʉm ka dzə yəŋ a pɑ̀, ba pyə bɔ yap, bɑ́ gɔ cya wap yap; wap gɔ sɔ' yu' gi a, á ka dzə piŋ bɑ pɑ yɑmu', ba byap dzə piŋ bɑ pɑ yɑmu'.

¹⁷ Tá ŋkhuŋ a nə pa' gɑ̌ hɑ vɔk a tə́ biŋ ŋkwi.

¹⁸ Tə́ sɔmmo nə́ ŋkwi bəm pɑ̀, pɑ́ myə̀ nə hɑ. Gɑ̌ bɑ gɑ̌ ghə tʉ̀ɔ nə nthak, biŋ gə tʉɔ nə biŋ ŋkwi: A pɑ́ mco' myə gɑ ŋkwi bi Tá a lə.

¹⁹ Mghɔm mɔ gɑ lə piŋ ŋkwi' gaptə pɑ Yudea.

²⁰ Bo'gwyə pɔ pɑ̀ gɔm gɑ: Zhwenyə cwəpuŋ bɑ̀ nə e, zhyənwə e tə yɑ̌wə pɑ́, nwə kɑ́ po pɑ̀wə jú' ywə yə e gɔm a.

²¹ Da' gɑ̀ shɑ́ pɔ pɑ́ gɔm yap m gɑ: Ghɔm tsɔ tə́ ghɔm mo yə zhwenyə cwəpuŋ nə e a pɑ̀; zhwenyə cwəpuŋ tə́ gyɛ' mnyə mo pɑ̀.

Pɑ Yudea kwi' ŋkhəŋnyə́ Yeso

²² Pú lə pɑ̌ ŋkhap ŋʉm, bɑ Yerusalɛm bɑwə ŋwɛnyə nə ŋkhamtə́ pa' pu lə cwɔ' Dyə Si a.

²³ Yeso lə bɑ Dyə Si, bɑwə giŋtə nthʉm pəŋ Salomoŋ.

²⁴ Pɑ Yudea lə́ tsam e nyəŋ tùŋ gɔm bi e gɑ: O gɔ kyə wɔk thə́ po'o tə kəm sǒ? O pɑ Kristo, o siŋ wɔk sɔsɔ̌!

²⁵ Yeso pa' bi pu gɑ: Gɑ̌ siŋ wɔ, la' po piŋ. Mfa' myə gɑ̌ gə nə tsǒ Tá a a bɑwə ŋkwinthɛ̌ a;

²⁶ da' gɑ́ po ka piŋ a, nə pa' po tə bɑ nə́ mjʉ̀jʉ̀ tsɑ̌ pɑ́.

²⁷ Mjʉ̀jʉ̀ tsɑ̌ ju' gi a, biŋ bɑ jyə wap. Wap pɑ̀ jap jʉ̌m m̀.

²⁸ Biŋ bɑ hɑ vɔk mama bi pú; wap tə́ gɔ la' pfʉ pɑ́, a sɔmmo lə nəŋ ŋkwi wap nə bu mə̌.

²⁹ Tá a yə e hɑ wap bəm a bɑ e ghu' shyə guŋ ywə awɛ, a piŋ bɑ bi a pɑ́ sɔmmo lə kwi ywə pu e.

³⁰ Pyə Tá a bɑ pɑ́ yɑmu'.

³¹ Pɑ Yudea lə pǐŋ ŋkwi' bé mwɔ' nə tamtə́ é.

³² Da' gɑ́ Yeso piŋ gɔm gɑ: Gɑ̌ ghə po yɔ vəŋ mfa' pɑpuŋ myə a fɑ bi Tá a. Pǒ gɔ lɑ mwɔ' tamtə́ a nə ma nə mfa' bɔ?

³³ Pɑ Yudea pa' bi e gɑ: Pyə tə́ dɑ mwɔ' nthamtə́ o nə fa' pɑpuŋ pɑ́. Pyə dɑ mwɔ' nthamtə́ o nə́ nə yəmtə Si; nə pá' wə yə o bɑ pɑ̀ monəŋ a, o bɑwə dɑ nɑ o gə́ Si.

³⁴ Yeso pa' bi pu gɑ: A tə́ bɑ pú lě bvə nə mco' mɔ gɑ: Gɑ̌ ghɔm gɑ: Po bɑ msi a?

³⁵ Mco' ŋkhe pɔ pyə Si lə́ shyə m nə́ pu gɔmnwə a gɑ msǐ. A nəŋ bɑ po'o bi a pɑ sɔmmo lə kwyəpnyə ywə yə pu lě bvə a.

³⁶ Po gɔm bi mo yə Si jwɔ' é biŋ nthəm é nthʉm dzʉ́ a gɑ: O yəmtə Si, nə pa' gɑ̌ piŋ gɑ́ gɑ̌ bɑ Mú Si a.

³⁷ A pɑ gɑ́ ŋ tə̌ wə fa' mfà' Tá a pɑ́, po pɑ ŋkhəŋnyə a kəŋnyə́.

³⁸ Da' gɑ́ a pɑ gɑ́ gɑ̌ wə fa' mfà' bɔ, bɑ̀ po pɑ́ tə piŋ a piŋ, po piŋ mfa' bɔ; a cyə m po'o tə po zhyə́, biŋ shəŋtə jyə́ gɑ́ Tá bɑ bəm dəŋdəŋ pa' gɑ̌ bɑ bi Tá a.

³⁹ A lə pɑ̌ po'o, wap kwi' shəŋ nə ghəm é, da' gɑ e təm nə bu map.

⁴⁰ Bɑnyə nə yə mu' jʉɔ Yurdɛŋ, tsʉ' yə Yohane lə to' nə nu' pɔ shyə nə a, bɑ shwə tsʉ'u.

⁴¹ Pɔ tə jɔm pɑ sɔ' bi e, biŋ bɑ gɔm gɑ: A nyənyɔ gɑ Yohane la tə́ té sɔm mtiŋ msya, da' gɑ́ guŋ ywə awɛ yə e lə ghɔm nə bɛ yəŋ á lə́ bɑ nyənyɔ.

⁴² Wap lə piŋ bɑ vəŋ é nə piŋ é.