TITO 3 - Ghomala New Testament

Mfa' pɑ pǐŋ

¹ Kamtə́ bi guŋ pɔ awɛ gɑ wap gɔ pɑ yu'nyə pɑ fyɛ', yu'nyə pɑ sa' guŋ, gɑ wap gɔ pɑ yu'shwə̀, pɑ nə cwə̌ pɑ pyap nə ghə fa' pɑpuŋ,

² wap lə yəmtə́ sɔmmo, pɑ wɛ́tə́ msa'shɛ, pɑ la'tə nə yɔ mo pɑpúŋ, pɑ la'tə nə guŋ mcwə awɛ hwitə nə guŋ pɔ awɛ.

³ Nə pa' ba wɔk pɑ̌, pɑ lə́ bɑ dzə̀ bɑ mfʉmnyə́ pɔ, bɑ mtʉɔthə́, pɔ bipǐ, bɑ mkwɔ ŋwɛnyə̀ bap nɑ́ nthinthi, bɑ bvɔk nə tʉm shɔkcɔ̌k ba ghi'nyə, bɑ̀ pɔ bɔkpɔk, bɑ bɔ́nyə cəcɑ̌ pɑ̀.

⁴ Da' gɑ nə yɔ puŋthʉm Si gɛvɔk wɔk pɑ̀ ba ŋkhùŋnyə e nə pɔmnəŋ lě gə

⁵ e vɔk wɔk pɑ̀, la' e vɔk wɔk pɑ m nə mfa' dəŋdəŋ myə pɑ̀ gə a pɑ̀, e lə bvɔk wɔk pɑ m nə cɔ̌mmtso e, shyə m nə́ nə sɔk wɔk pɑ, m nə tsə nə tsə sə ba nə kwyəpnyə yə a shyə m nə zhwenyə Dɔlɔ̌ a.

⁶ Si bɑ ě sɛ Zhwenyə bɔ pɑ dú e nə pɑ shyə m nə Yeso Kristo gɛvɔk wɔk pɑ;

⁷ po'o gɑ́ a cyə m nə gho' e pɑ pɑ́ pɔ dəŋdəŋ biŋ shyə m̀ nə́ nə mɔktə bɑ pɑ tsʉ́ mcʉ̌' vɔk mama.

⁸ Ghɔm tsɔ gɑ bɑ ǎ ku' pa' pɑ mo yap tʉ̌m nə a, biŋ bɑwə shəŋ gɑ o cəŋtə jyə tsa bɔ, po'o gɑ guŋ pɔ awɛ pyə a bɑ wap yap piŋnthʉm yap nə Si a kaktʉɔ nə fa' mfà' pɑpuŋ nə gɔ dzə̀. Yɔ ywə yə a pùŋ biŋ ŋkwitə bi pɔmnəŋ a yɑ̌.

⁹ Da' gɑ wɛtə́ mcə̌ŋnwə pɔpɔ ba nə sɛ nwə ŋkhənyə̀ pu a msa'shɛ́ pu a mfəŋnyə nə nwə mco', a bɑ a ka kwitə biŋ bɑ pɑ̀ pɔpɔ.

¹⁰ Mo yə e shəŋnyə yə pɑ́ da' nə ta' nwə yɑmu' a, pak e, da' gɑ̀ nə pak e bɑ ǒ ləŋdzə nthɔk ta' cʉ̌m ba mcʉ̌m bʉ́ə.

¹¹ O zhyə gɑ́ mo bɔ bɑ ě hɔ məjyə, bɑ hɔnwə, bɑ m̀ pɑ̌ nyəŋ shɛ thə e pɑ yʉ́.

Nthɔk pu ca'tə

¹² Cwə yə́ gɑ̌ gɔ təm Artema kɑ Tikiko bu a, o kaktʉɔ nə sɔ' ŋkwyatə a Nikopoli. A tsʉ' yə gɑ jap gɑ́ gɑ gɔ cwə wə́ nə kap ŋʉ́m a.

¹³ Cəŋtə́ dé nwə nə nwə ghiŋ Zena gɛ zhyə mco' pu Apolos po'o gɑ sɔmywə kɑ yak bi pú.

¹⁴ Ba pɔ pɔk pɑ̀ gɔ zhi'tə nə pɑ fa' mfà' pɑpúŋ po'o gɑ wap yap pu nə mfa' myə ǎ wə do'nyə a. Po'o gɑ wap kɑ pɑ tə ghə nthɔm.

¹⁵ Guŋ pɔ pyə pyə a pu bɑ a ca'tə o. Ca'tə pɔ pyə wap ŋkhuŋ wɔk pɑ nthʉ́m piŋnthʉm a. Gho' pɑ̀ bi guŋ yɔ awɛ.