ROMA 9 - Ghomala New Testament

Mhɔ Israɛl pu nə ci e

¹ Nə Kristo, gɑ gɔmnwə nyənyɔ, ŋ tə́ shwanwə pɑ̀; tʉ́m tsɑ̌ nə Zhwenyə Dɔlɔ̌ ŋkwinthɛ̌ a:

² tʉ́m tsɑ̌ bɑwə jɛ a tə́ dhə̀, mɑ zhwiŋ pɑ nthʉ́m o,

³ Əŋ, gɑ̌ di' gɑ́ bi a pɑ simnyə, gɑ bi a pɑ Si hap a nə Kristo nə nwə mfɑ pɑ̌, gwya yɔk nə ŋkhənthú.

⁴ Wap pyə wap bɑ pɑ Israɛl a, wap pyə nə pɑ cwə̌ mú bɑ nwə yap, ghu'tə, mwakɔ, mco', nə sé Si, mka'nyə bɑ bi pú,

⁵ ba mtǎ, wap pyə Yeso nthəm nə pu shyə m nə bapnɑ a, yʉ́ yə e bɑ m dzə̀ nə guŋ ywə awɛ a, Si byanyə mama. Amɛn.

⁶ Tə́ a bɑ ghɔm Si ka cyətə fa' pɑpuŋ pɑ̀ nə pa' guŋ pɔ pyə wap bɑ gwya Israɛl a tə bɑ pɑ Israɛl pɑ̀.

⁷ Wap piŋ nə pɑ gwya Abraham, guŋ yap awɛ lə pɑ ŋkhənthú e pɑ. Gɛ̌, pu gɔ sɔ' ke pɑ́ pó Isak gɑ gwya o.

⁸ A po'o bɑ da'tə́ gɑ: Tə pó nə bap nɑ́ nə bɑ pó Si pɑ́; pu sɛ pɑ́ po mka'nyə pa' gwya pǒ Si a.

⁹ Nə pa' mka'nyə lə bɑ ghɔm tsɔ gɑ: Nə ŋkhɛ a cwəlɔ gu' po'o, gɑ̌ gɔ sɔ' piŋ sɔ', piŋ nə sɔ' bɑ Sara ghə ta' mú.

¹⁰ A tə́ bɑ da' po'o pɑ; ba Rebeka bɑ si, bɑ e lə shyə m nə́ Isak tá yɔk pɑ̀ tə́ fə̌ŋ;

¹¹ a piŋ nə pɑ̌ po'o, bɑ pu lə́ yɑ̌ tə wuŋ dzə́ po bɔ, wap yɑ tə ghə nwə pɑpuŋ kɑ nwə bɔkpɔ̌k lə, bɑ ywə yə Si jap a, bɑ ě da' bəmtə, ywə yə Si jap tə mo nthənyə e

¹² la' a pɑ shyə m nə mfa', bɑ shyə m nə Mo yə e shwɔ' mo; bɑ pu lě da' gɔm gɑ: Yə́ mo dzə gɔ sɔ' yu'nyə yə mo jʉm.

¹³ Nə pa' a bɑ pu lě bvə gɑ: Gɑ̌ bɑ gɑ̌ kuŋ Yakop biŋ bɔ Esau.

¹⁴ A po'o bɑ da'tə gɑ́ kɑ̀? Gɑ́ nə cyətə pɑ dəŋdəŋ bɑ nə Si lə? Gɛ̌!

¹⁵ Nə pa' e gɔm bi Mosɛ gɑ: Gɑ̌ gɔ sɔ' cɔmmtso mo yə́ gɑ̌ gɔ cɔmmtso myə a, zhwiŋ nə mo yə gɑ gɔ zhwiŋ nə e a.

¹⁶ A tə shyə m nə yə nə kuŋ mò kɑ m nə mfa' myə pɑ́, a shyə m nə cɔmmtso Si.

¹⁷ A po'o tə ywə yə pu lə və a gɔm bi Faraon gɑ: Gɑ̌ bɑ gɑ cwɔ' pɑ kwa' wə nə cyə m nə o da'tə yɑ tʉɔ, á piŋ bɑ po'o pu cyanyə tso tsǎ nə guŋ mtsʉ' awɛ dəmcǎ'.

¹⁸ A pɑ́ gɑ e shɔmmtso mo yə ě kuŋ a, biŋ gə tʉm mo yə ě kuŋ a sɔk.

Si gə ywə yə e kuŋ a

¹⁹ Da' o gɑ o gɔ ghɔm gɑ́ tə ě biŋ da' gɑ kɑ́? Nə pa' bi a pɑ pu wɑ fəŋnyə nwə?

²⁰ Wə monəŋthə bɑ wɑ tə bi a pɑ́ po Si fəŋnyə ywə? Bi a pɑ ywə nyapnyap həŋtə mo yə́ e nyap ywə a gɑ: Nwə kɑ o nyap á a?

²¹ Bəm cǎ' tə bɑ ě ghə shɛ nə ca' tsyə nə́ nə bəm ywə mkwiŋ kɑ sobo ywə a?

²² A pɑ́ gɑ Si pɑ́ gɔ la'tə yɛluŋ e, piŋ ghə pu zhyə tʉɔ e, da' gɑ biŋ shəŋtə nthɔm nɑ e nə mkɔp yɛlúŋ, pɔ wap pɑ si gɔ wuŋ pi,

²³ biŋ gə po'o tə wap nə jyə́ dəŋ ghu'tə e, mkɔ̌p cɔmmtso, wap pyə e lə ləŋdzə́ nyaptə wap nə́ ghu'tə,

²⁴ wɔk pɑ̀ pyə e tə shwɔ́' wɔk pɑ pɑ́ da' cəcɑ̌ pɑ Yudea pɑ́, ba m cəcɑ̌ pɑ tə pɑ́ pɑ Yudea.

²⁵ A bɑ kwa' ywə yə e gɔm nthʉm ŋwa'nyə Ose a gɑ: Guŋ yə e la tə́ bɑ pɔ pɑ̌ a pɑ, ŋ gɑ gɔ ké e gɑ pɔ pɑ̌, mɔ yə e la tə́ bɑ ŋkhùŋ a pɑ, ŋ khe e gɑ ŋkhùŋ.

²⁶ A piŋ bɑ pɑ́ tsʉ' yə pu lə ghɔm bi pu gɑ: Po tə́ bɑ pɔ pɑ̌ pɑ́, pu ke wap gɑ pǒ Si yə e shwə nthʉɔ a.

²⁷ Esaya ghɔm yə́ nə pɑ Israɛl gɑ: Dəŋ pó pɑ Israɛl pɑ pɑ́ pa' dəŋ bvɛ shyə lɑpʉə a, bɑ pɑ́ bvʉ' e nə gɔ sɔ' vɔk;

²⁸ nə pa' Cyəpɔ gɔ sɔ' ghə ghɔm tsyə wuŋ cəŋtə́ guŋ bəmtə́ dəmca' a.

²⁹ A kwi' bɑ ywə yə Esaya lə tsə́ ghɔm a gɑ: Cyəpɔ mshwəshù lə pe' e bɑ tə tak gwya mo bi pɑ̀, bɑ pɑ lě ji pa' Sodɔm pu Gomora a.

³⁰ Pɑ gɔ miŋ gɑ kɑ? Pɑ gɔ miŋ gɑ: Pɑ tə pɑ́ pɑ Yudea pyə wap la tə shəŋ nwə dəŋdəŋ a pɑ́, wap lě jɔ, gɑ gɔm nwə dəŋdəŋ yə a fɑ nə piŋnthʉm a.

³¹ Tə́ Israɛl yə e lɑ bɑwə shəŋ mco' myə́ bi a pɑ́ a hɑ nwə dəŋdəŋ a lě tə cyə bəŋ mco'.

³² Nwə kɑ? Nə pa' nwə dəŋdəŋ bɔ wap la tə bɑwə byap m nə piŋnthʉm pɑ, wap lə bɑwə ŋkwɛ gɑ wap gɔ cyə m nə mfa' tə ghə. Wap lě sham nə gwɔ' fa'tə.

³³ Dəŋdəŋ pa' bɑ pu və gɑ: Yɔ gɑ̌ yap gwɔ' fa'tə Sion, ghǔ gwɔ' yə a gə mo vʉ̀si a; tə mo yə e piŋ e a bɑ sǒ tə́ gɔ sɔ' kù e pɑ́.