ROMA 4 - Ghomala New Testament

Abraham gɛ piŋnthʉm

¹ Pɑ gɔ ghɔm gɑ́ kɑ́ nə Abraham tá yɔk pɑ̀? E lě gwim kɑ́ shyə m nə bap nɑ́?

² Abraham lə pé' e shyə m nə mfa' myə tə́ bɑ mo dəŋdəŋ bɑ bi a pɑ e ŋa' nɑ e, tə̀ gɛ̌ dzə̌ Si.

³ Nə pa' ŋwa'nyə gɔm gɑ́ kɑ? Abraham lə ghə piŋnthʉm nə Si, pu sɛ yə bɔ bi e pa' nwə dəŋdəŋ a.

⁴ Tə sɔ' m nə mo yə e fa' fa' a, mcwɔ'fa' tə bɑ́ pu sɛ m pa' gho' pɑ, pu sɛ m gɑ́ ywə yə a bɑ yə́ a.

⁵ Tə sɔ' m nə mo yə e ka fá' sɔm fá' a da' gɑ biŋ mo yə́ e dɑ gɛ mhɔ gə mo dəŋdəŋ a, pu sɛ piŋnthʉm pa' dəŋdəŋ a.

⁶ A po' o tə David jwɔp ŋwɛnyə mo yə́ Si sɛ e gɑ mo dəŋdəŋ tə cyə m nə mfa' myə a gɑ:

⁷ Mpuŋtsé bɑ pɔ pyə pu lɑ yap nə cyətə ghiŋ nə mco' shwyɛ' wap biŋ pfɔptə mhɔ map a.

⁸ Buŋtsě bɑ mo yə Cyəpɔ tə́ jɑwə sɛ́ mhɔ myə a pɑ́.

⁹ Ghɔm mka'nyə pɑpuŋ tsɔ gɑ po'o bɑ pɑ́ bi pɔ pyə́ pu vo wap a kɑ ba pɔ pyə pu ka vo wap a? Pyə gɔm gɑ: Pu lě sɛ piŋnthʉm Abraham bi e pa' dəŋdəŋ a.

¹⁰ Pu lə sɛ po'o cwəkʉ̌? Tə pu bvo e kɑ bɑ pu tsə vo e? Gɛ̌, tə pu bvo e, tə́ pu la' bvo e!

¹¹ Si lə hɑ mtiŋ nə́ vo mo bi e, a pɑ́ stam nə pɑ dəŋdəŋ yə e lə kwǐshyə m nə piŋnthʉm cwə yə pu lə jɑ tə́ vo e a; a pɑ́ po'o e zhi tá guŋ pɑ piŋ awɛ pyə́ wap lə bɑ pɔ bɑ pu ka vo wap a, po'o gɑ pu sɛ wap gɑ́ pɔ dəŋdəŋ,

¹² ba ta pɔ pyə pu vo wap, ba pyə wap nə pɑ̌ nə gwya pɔ pyə pu vo wap a biŋ bɑ giŋ nə mkwə tá yɔk pɑ Abraham pa' e lə giŋ nthʉm piŋnthʉm tə pu la' bvo e a.

¹³ Nə pa' a tə́ shyə m̀ nə́ mco' tə́ pu ka' bi Abraham ba m bi gwya e gɑ wap gɔ sɔ' kwi dzʉ̀ pa' tsə mcʉ' a pɑ̀; a lə shyə m nə dəŋdəŋ piŋnthʉm.

¹⁴ A pɑ́ gɑ́ pɑ tsʉ mcʉ́' shyə m nə mco', bɑ piŋnthʉm ka kwitə́ sɔmywə ba mka'nyə piŋ mǐ

¹⁵ nə pa' mco' hɑ yɛlúŋ; tsʉ' yə mco' tə nə a pɑ́, nə pɔptə mco' lə pɑ́ tsʉ'u.

¹⁶ A bɑ po'o tə pu pɑ̀ shyə pɑ m̀ nə́ piŋnthʉm tə́ bɑ dzʉmcʉ̌', gɑ a cyə a m nə̀ gho', po'o gɑ mka'nyə pɑ̀ pɑwə nə ŋkhənyə Abraham, tə da' nə pɔ pyə wap shyə m nə́ mco' a pɑ, ba m nə́ pɔ pyə wap shyə m nə piŋnthʉm Abraham tá guŋ yɔk pɑ awɛ a.

¹⁷ Nə pa' á bɑ pu lě bvə gɑ: Ŋ dě dɑ o gə tá pɔ jɔmyɔ̌m. E bɑ tá yɔk pɑ̀ dzə̌ Mo yə e lə pǐŋ e a, Si yə e gə pɔ pyə wap pfʉ a vɔk, e piŋ bɑ̀ gə ywə yə a la m bɑwə a, a pɑwə.

¹⁸ Mɔktə ba nə cwə yə bi a pɑ́ mo lə piŋ mɔk sɔmywə a, e lě biŋ, shyə m po'o ji tá pɔ jɔmyɔ̌m pa' ghɔm tsyə a gɔm gɑ: Gwya o gɔ sɔ' pɑ po'o.

¹⁹ E lě tə́ yɔ dəŋ gu'dzʉ́ tsyə bwa nə piŋnthʉm e, nə pa' a lə bɑ ě ghə gwɛ a gu' ŋkhə́, ba pa' nɑ e pu a vam Sara lə bɑ ǎ cu' pɑ pfə́ ywə a.

²⁰ E la tə zhʉ'nyə nə mka'nyə Si pɑ́; e lə pǐŋ ŋkhak pɑ tʉɔ nthʉm piŋnthʉm, bɑ gu'tə́ Si

²¹ jyə́ nyənyɔ gɑ ywə yə Si ŋkha'nyə a, e ghə tʉɔ nə gə a pəmtə̀.

²² A lə shyə m po'o tə pu sɛ bi e pa' nwə dəŋdəŋ a.

²³ A tə́ bɑ po'o da' bi e do e tə pu bvə gɑ́: Pu lě sɛ bi e;

²⁴ a bɑ́ ba m bi pɑ̀, wɔk pɑ̀ pyə piŋnthʉm yɔk pɑ̀ gɔ sɔ' sɛ́ a, nə pa' pɑ biŋ Mo yə e lə yam Yeso, Cyəpɔ yɔk pɑ nə vʉ̌ a,

²⁵ Mo yə pu lə hɑ e nə mhɔnwə mɔk pɑ̀ e piŋ jam nə vʉ̌ gɑ pɑ cʉ' pɔ dəŋdəŋ a.