MATIO 9 - Ghomala New Testament

Yeso yɛ mu' gɛ po'tə nɑ́

¹ Yeso lə́ piŋ ŋkho kənu', biŋ sa'shyə lɑpʉə, bɑnyə tisuŋ e.

² Pu lɑ mu' gɛ po'tə nɑ́ sɔ' bi e, bɑ pu kwa e dəm kodyə. Yeso lə yɔ piŋnthʉm yap, gɔm bi gɛ po'tə nɑ́ gɑ: Kaktʉɔ m mú a, pu lɑ mhɔ mǔ shwyɛ' o.

³ A lə́ pɑ po'o shɑ pɑ zhyə́ mco' pɑ gɔm cəcɑ̌ pú gɑ: Mbɛ yəŋ gɑ yəmtə Si.

⁴ Yeso lə́ zhyə́ pa' wap wə sɛ nthʉm tʉm pú a gɔm gɑ: Nwə́ kɑ́ po ghə mɔ gɑ nthi mkwɛnyə́ cwəpuŋ nthʉm tʉm pó?

⁵ A ghɔ nə́ nə ghɔm gɑ: Pu lɑ mhɔ mǔ nə shwyɛ' o, pu nə ghɔm gɑ: Lusi gǐŋ, bɑ ya yɛ̀?

⁶ Po'o! Tə́ po nə́ jyə gɑ́ tʉɔ bɑ bi Mú mo dəmcǎ' nə lɑ mhɔ pɔmnəŋ nə shwyɛ' wap, e ghɔm bi gɛ po'tə nɑ́ gɑ: Lusi ŋkwa kodyə o nə gɔ la' o!

⁷ Bɛ bɔ lə lusi gɔ la' e.

⁸ Pɔmnəŋ lə nə́ yɔ po'o bwɔk, biŋ gu'tə́ Si pa' e hɑ yə bɔ nthi tʉɔ̀ bi pɔmnəŋ a.

Pa' Yeso ŋkhe Matio a

⁹ Yeso lə lǔ tsʉ'u, biŋ nə cyə jɔ mu' mbɛ pu pɑ ŋkhe é gɑ Matio. Bɑ e cwə́si dyə ma' shwɔp. Yeso ghɔm bi e gɑ: Yap jʉ̌m m̀, Matio lusi jap jʉm é.

¹⁰ Pú Yeso lə́ pɑ́ tɑpe dyə e, pɑ kwi shwɔ̀p pu a mghɛ mhɔ jɔmyɔ̌m sɔ' pu a pɑkhʉ Yeso pɑ yap Si.

¹¹ Pɑ Farisai lə nə yɔ po'o, gɔm bi pɑkhʉ̌ Yeso gɑ: Nwə kɑ́ tá yɔ pu a pɑ kwi shwɔ̀p ba mghɛ mhɔ pəmtə dzʉ́ywə?

¹² Da'gɑ́ Yeso yu' gɔm gɑ: Tɑ́ pɑ nɑ nthʉ̀ɔ nə shəŋ gəgɛ pɑ̀, mghɛ ghó nə shəŋ e.

¹³ Po ghɔ ji'tə nwə nə ywə yə yəŋ nwə nthutə a gɑ: Ywə yə gɑ̌ shəŋ a, a bɑ́ cɔmmtso, a tə bɑ nə nuŋpwɔ' pɑ́. Nə pa' ŋ da tə sɔ' m nə ké pɔ dəŋdəŋ pɑ́, ŋ də sɔ' m nə ké mghɛ mhɔ.

Yeso nə nwə zhwiŋ

¹⁴ Pɑkhʉ̌ Yohane lə sɔ' jɔ Yeso gɔm bi e gɑ: Nwə kɑ́ wɔk pyə a pɑ Farisai pɑ́ shwə tə tsʉ̌ywə, la' pɑkhʉ pǔ pɑ shwə yap tə tsʉ̌ywə?

¹⁵ Yeso ghɔm bi pú gɑ: Bi a pɑ msǒ la'nwə pyə pú gó wap la'nwə á zhwiŋ nə cwə yə tá la'nwə cəcɑ̌ pu a? Da' gɑ tyɛ'dzʉ́ wə yə pu gɔ té tá la'nwə cəcɑ̌ pu a? A gɔ pɑ́ tyɛ' o bɔ, wap zhwiŋ.

¹⁶ Sɔmmo tə dɑ pak dzə́ sə ntham bvo dzə pɑ́. Nə pa' bɑ pak dzə́ bɔ gɔ fəŋ dzə, a piŋ ŋkhi pɑ́ bɔkbɔk e.

¹⁷ Pu tə nyəŋ mlu' sə nthʉm mvo nthǔ' pɑ́, tak po'o bɑ mvo nthǔ' gɔ vyətə, mlu' pfyə́, pú pi mnthu'. Pu nyə́ŋ mlu' sə́ pɑ nthʉm mnthu' sə́, guŋ e awɛ cwə pɑpuŋ.

Yeso yɛ̀ mu' mjwǐ biŋ jám mú go mu' ŋkham

¹⁸ Yeso lə́ pɑ́ gɔm bi pú po'o, mu' ŋkhám sɔ' bəŋ e, ŋkhám mkwi'tə myə́ si gɔm bi e gɑ: Mú a yə mjwǐ pfʉ pɑ cwəlɔ. Da' gɑ sɔ' jap pu nə é e vɔk.

¹⁹ Yeso lə́ lusi, pu a pɑkhʉ pyə́ jap jʉm e.

²⁰ Wap lə pɑ gɔ, mu' mjwǐ gho mcyə pɑ nə e tə fɑ gu' shwɔppʉə mgham təm m jʉ́m, sho' pú nə mto dzə́ Yeso.

²¹ Nə pa' mjwǐ bɔ lə bɑwə gɔm nthʉm tʉm é gɑ: Ŋ gɔ sho' pú nə dzə́ e bɑ gɑ gɔ vɔk.

²² Da' gɑ Yeso lə fɛ́ nɑ́ e, jɔ e gɔm bi e gɑ: Kaktʉɔ m go a! Piŋnthʉm o vɔk o. Mjwǐ bɔ lə wuŋ bvɔk pɑ cwəo.

²³ Yeso lə́ nə́ ŋwak dyə ŋkhǎm bɔ̌, jɔ pɑ túŋdúŋ pu a zhəzhəŋ pɔmnəŋ gɔm gɑ:

²⁴ Po təm; go yɑ́ ka pfʉ, e bɑwə diti; pɔmnəŋ piŋ bɑ jəmtə é.

²⁵ Pú lə cwə tə nthe pɔmnəŋ dyə, Yeso kó dyə́ nthɔm pú mú gò, e yàm.

²⁶ Mcùŋ bɔ sɛ̀ nə ghə̌ŋ tsʉ'u bɔ awɛ.

Yeso yɛ mfʉ́ pɑ́pʉ́ə

²⁷ Cwə yə Yeso lə pɑ gɔ a, shɑ mfʉ̀ pɑpʉ́ə yapjʉ̀m e bɑ shwé gɑ: Cɔmmtso mɔk m Mú David!

²⁸ Yeso lə kodyə́ cwəlɔ, mfʉ bɔ fʉ'tə nɑ tsap sɔ' bəŋ e, e piŋ gɔm bi pu gɑ: Po kwɛ gɑ bi a pɑ́ gə ywə bǎ a? Wap ghɔm bi e gɑ əŋ m Cyəpɔ.

²⁹ A pɑ po'o e co' pu nə mnyə map gɔm gɑ: A nwə yə po wə shəŋ a pəmtə nə piŋnthʉm yɔ.

³⁰ Mnyə map lə ghyɛ̌'. Yeso piŋ gɔm shɔkcɔk bi pu gɑ: Pɔm gɑ sɔmmo kɑ zhyə.

³¹ Da' gɑ́ wap lə́ wuŋ nə təm dyə gɔm nwə é nə guŋ ghəŋ tsʉ'u awɛ.

Yeso yɛ tə ghɔm

³² Wap lə́ nə́ təm pu lɑ mu' təghɔm, zhwenyə cwəpuŋ pɑ́ nə e sɔ' bi Yeso.

³³ E lə zhəŋ zhwenyə cwəpuŋ nə́ tə ghɔm bɔ, e to' nə ghɔmnwə. Pɔmnəŋ pɑ́ ŋwɛnyə nə́, bɑ gɔm gɑ: pu la m jɔ nwə po'o nthʉm guŋ Israɛl.

³⁴ Da' gɑ pɑ Farisai pɑ́ gɔm gɑ: E shyə a m nə tadyə mzhwenyə cwəpuŋ jəŋ mzhwenyə cwəpuŋ.

Mtso pɔmnəŋ ŋkhu Yeso

³⁵ Yeso lə́ giŋ nə guŋ mtisuŋ pu a m nə guŋ mla' awɛ, bɑ ji'tə pɔmnəŋ dyə sinagogə pú, bɑ siŋ cuŋ pɑpuŋ nə Nəfò, biŋ bɑ́ jɛ́ guŋ mghɛ gho pu a guŋ mkhʉm awɛ.

³⁶ Yeso lə nə yɔ pɔmnəŋ, mtso map kú e nə pa' a lə bɑ wap pwa, gʉ' lə piŋ jɑ nə pú, wap pɑwə shwə pa' jʉ̀jʉ̀ tə gɛ pyap wap a.

³⁷ A pɑ́ po'o, Yeso ghɔm bi pɑkhʉ pyə gɑ: Tsə́ lɑ nyəŋ dyə yɔm pe, mghɛ fa' kɔk.

³⁸ Po cwyɛ'nyə Ta tsə dɑlɑ gɑ e cya mghɛ fa' nə tsə dɑlɑ tsyə́.