MATIO 7 - Ghomala New Testament

Ghəgha' ywə pu nthyə̀

¹ Ka po pɑ ji pɑ fyɛ̀', po'o gɑ pu kɑ fyɛ' wɔ;

² nə pa' pu gɔ sɔ' lə pɑ nthi fyɛ' yə po nə fyɛ' a nə fyɛ' wɔ, lɑ pɑ fo' yə po nə fo' a nə fo' wɔ.

³ Nwə kɑ́ o lé ghəgha' ywə yə a bɛtsə́ fɑ o a tɑ tə zhyə́ gɑ nthyə̀ bɛtsə o?

⁴ Kɑ́ o gɔ ghə m gɑ́ kɑ tə ghɔm bi fɑ o gɑ́ tiŋnyə nthé ghəgha' ywə yə a bɛtsə́ o a tə́ nthyə̀ pɑ bɛtsə o?

⁵ Wə mo dzɛbǔ, ləŋdzə nthé nthyə̀ bɛtsə́ o tɑ̀ jɔ tsʉ' pɑpúŋ nə nthé ghəgha' ywə bɛtsə́ fɑ o.

Nə hɑ tɔkcyə bi pǒ gənɔm

⁶ Ka po hɑ ywə dɔlɔ̌ bi mbvʉ̌, kɑ nə ma' mtɔkcyə mo bi pǒ gənɔm lɑ́, bwɔk gɑ wap kɑ́ nəŋtə biŋ fɛ nɑ tsap syatə wɔ.

Nə lǒ, nə cə̌ŋ, nə ko'tə jyədyə̌

⁷ Po ló, pú gɔ hɑ bi po; po cə́ŋ, pǒ gɔ yɔ, po ko'tə jyədyə̌, pu gɔ hé bi po.

⁸ Nə pa' mo yə e ló a ŋkwi, mo yə e cəŋ a yɔ, pu pɑ́ hé bi mo yə e ko'tə a.

⁹ A po'o bi a ya mo pɑ́ nə po yə mú e lo e ywətsʉ bɑ e gɔ hɑ gwɔ' bi a?

¹⁰ Kɑ bi a e lo e bapgu bɑ e gɔ hɑ́ nɔk bi é?

¹¹ A bi a dəŋ pa' bɑ po pɔk a po zhyə́ nə hɑ tsə pɑpuŋ bi pó pɔ, bɑ mcʉ̌m sʉ'ʉ nə Tá yɔ yə e kɛbəŋ a, pa' e gɔ hɑ tsə pɑpúŋ bi pɔ pyə wap ló bi e a?

¹² Po'o, bǎ yɑ ywə lə́ yə po shəŋ gɑ́ pɔmnəŋ ghə bi po a, kwa' wɔ ghə ya bi pú. A bɑ mcò', biŋ bɑ mghɔm mghɔm Si.

Pim jyədyə̌

¹³ Po ko dyə m nə pim jyədyə̌. Jyədyə̌ yə a gɔ m nə pi á bɑ ǎ sɛtə biŋ gʉ́ɔnyə; pɔ pyə́ a bɑ wap cyə m nə a yɔm té' o.

¹⁴ Tɑ́ jyədyə̌ vɔk bɑ a kɔ́k, məjyə piŋ ŋkhɔmtə, bɑ pɑ yɔ məjyə̀ bɔ ka yɔm.

Nthi thə́ m nthi mthɔ́m myə́

¹⁵ Pó pɔm mghɔm ghɔm Si cwanwə, pyə wap sɔ' bəŋ po pa' jʉ̀jʉ̀ á tə bɑ m nthʉm o bɑ mbvʉ́ gǒ pyə wap sim tsʉ' a.

¹⁶ Po gɔ zhyə wap pɑ nə nthɔm map. Pu ŋkhap nthɔm nthə́ nə nu' mlu' nə mka'tə a? Nəŋ bɑ ŋkhap figə nə thə júŋ a?

¹⁷ A bɑ po'o tɑ bǎ yá ta'thə pɑpuŋ a jam nthɔm pɑpuŋ; da'gɑ bǎ ya ta' thə yə gho ko nə a pɑ jam nthɔm cwəpuŋ.

¹⁸ Bi a pɑ ta'thə pɑpuŋ lə yam nthɔm cwəpuŋ kɑ ta'thə gogho lə yam nthɔm pɑpuŋ.

¹⁹ Bǎ ya ta' thə lə́ yə a tɑ́ jam nthɔm pɑpuŋ a pɑ, pú ŋkho', ma' mɔk.

²⁰ A po'o tə́ po pɑ́ gɔ lɑ pɑ nthɔm máp nə zhyə́ wáp.

Pɑkhʉ pyə nyənyɔ

²¹ Tə da' nə ghɔm bəm gɑ́: Cyəpɔ, Cyəpɔ! Nə gɔ ghə tɑ́ mo ko nə́ Nəfo kɛbəŋ pɑ. O gɔ ghə ywə yə Tá a kɛbəŋ shəŋ a.

²² Pɔ tə́ jɔm gɔ sɔ' tyɛ'dzʉ́ bɔ ghɔm bəm gɑ: Cyəpɔ, Cyəpɔ! Pyə lé tə lɑ tsó tsǔ gɔm ghɔm Si a? Dɑ tsó tsǔ jəŋ zhwenyə cwəpuŋ a? Dɑ tsó tsǔ nthé vəŋ msya a?

²³ Biŋ gɔm bi pú gɑ: Ŋ da m jyə wɔ, po lú bəŋ m̀ wɔ pɑ ghə mnwə cwəpuŋ!

Mba' mɑ bʉə

²⁴ A po'o tə bǎ ya mo lə́ yə é ju' mghɔm myə gɑ̌ gɔm á giŋ nə á, bɑ́ dəŋdəŋ pa' mu' mo jyə nwə yə e lə kwɑ pa' e dəm wǔ gwɔ' a.

²⁵ Bəŋ lú, mcɑ tsəŋ; fəfa cʉ' guŋ e awɛ vʉ nə pa' bɔ̌, da' gɑ́ a lə vʉ nə pá' to pa' bɔ̌ bɑ́ dəm wǔ gwɔ' a.

²⁶ Mo yə e nəŋ jú' mghɔm myə gɑ̌ gɔm a la' e ghiŋ nə a, bɑ́ pá' mu' ŋkhəŋkhʉɔ yə e ŋkwɑ pa' e nə bvɛ a.

²⁷ Bəŋ lú, mcɑ tsəŋ; fəfa cʉ', guŋ e awɛ vʉ̀ nə pà' bɔ̌, a vʉ, mkhʉm myə́ yɔm tɑ́.

Tʉɔ Yeso

²⁸ A lə pɑ́ tə Yeso miŋ nə ghɔ̀m mghɔm bɔ, ywə yə e ji'tə a cəŋtə́ ŋkhó nə pɔmnəŋ

²⁹ nə pá' e lə bɑwə ji'tə m pa' mo yə e ghə tʉɔ a, la' e zhi' m pa' pɑ zhyə mco' a pɑ́.