MATIO 28 - Ghomala New Testament

Yeso yam nə vʉ̌

¹ Sabat lə cyə̌, a pɑ mɑ mpʉm dzʉ́ nə dəŋdzə tyɛ'dzʉ́ nə gap dzʉ, Maria yə Makdala pu yə mu' Maria ghɔ jɔ thəsì Yeso.

² A lə pɑ po'o cǎ' cʉ'nyə té' o: Aŋgəle Cyəpɔ fi' fɑ thə kɛbəŋ sɔ' ŋkhəŋnyə gwɔ' shwə́ dəm o.

³ E lə bɑwə hwə pa' pəpa' bəŋ a, dzə tsyə piŋ bɑwə fɔk pa' mwe bəŋ a.

⁴ Pɑ pyap thəsì lə pwɔk tə shʉ' pa' pɔ pyə wap pfʉ a.

⁵ Da' gɑ aŋgəle lɑ ghɔm gɔm bi pɑjwǐ gɑ: Ka po pwɔk. Gɑ̌ zhyə gɑ́ po shəŋ Yeso yə pu kɑ kam e thə́ bɛnyəpɛnyə a.

⁶ E tə̌ tsɔ'ɔ pɑ̀ nə pa' a bɑ e yam nə vʉ̌ pa' e lə ghɔm a. Po sɔ' jɔ tsʉ' yə a kɑ bɑ e nuŋ nə a.

⁷ Po khʉdʉ gɔ gɔm bi pɑkhʉ pyə gɑ: E yam nə vʉ̌. Po kwyatə e Galilea; po gɔ ko wə yɔ e. Gɑ siŋ wɔ.

⁸ Wap lə wuŋ nthəm thəsì, bwɔk, da' gɑ́ ŋwɛnyə ŋkhʉdʉ gɔ nə siŋ pɑkhʉ̌ pyə́. Cùŋ bɔ.

⁹ A lə pɑ̌ po'o Yeso piŋ sɔ' pu a pu yu'tə e ghɔm bi pu gɑ: Gɑ̌ ca'tə wɔ. Wap lə sɔ' nthɔm mkwə myə́, ŋkham mkwi'tə dzə e.

¹⁰ A pɑ po'o Yeso ghɔm bi pu gɑ: Ka po pwɔk, po ghɔ siŋ mfɑ pɑ̌ gɑ wap gɔ ghɔ Galilea; a tsʉ' yə wap gɔ yɔ a nə a.

¹¹ Cwə yə pɑjwǐ lə pɑ məjyə a, shɑ pɔ nə́ pɑ pyap sɔ' tisuŋ siŋ mkamsi gwyəgwyə guŋ mnwə myə a shya.

¹² Wap pu a mghətso lə cu'tə cwəlɔ, shɔm hɑ ŋkhap bi msəŋwi tə a yɔm,

¹³ gɔm bi pu gɑ: Po ghɔm gɑ: Pɑkhʉ pyə ke sɔ' mtsʉ', pyə pɑwə di wap zhʉ e.

¹⁴ Bi a pɑ a tam təŋ gɔpna', bɑ pyə gɔ ghə e lɛtə, pyə piŋ gə tə e lə ghə́ sɔmywə nə po.

¹⁵ Wap lə kwi ŋkhap, gə pa' pu gɔm bi pu a; nwə bɔ bɑ ǎ sɛ cəcɑ̌ pɑ Yudea tə ŋkhəm tyɛ' ɔ.

Yeso nthəm pɑkhʉ̌ pyə

¹⁶ Sɔ' m nə pɑkhʉ shwɔp a mu' mgham, wap lə ghɔ Galilea, nə kúŋ yə Yeso lə ghɔm gɑ wap ghɔ nə a.

¹⁷ Wap lə nə yɔ e, ŋkham mkwi'tə si da' gɑ shɑ pɔ zhʉ'nyə.

¹⁸ Yeso sɔ' bəŋ pu gɔm bi pu gɑ: Tá hɑ guŋ tʉ̀ɔ bəm awɛ kɛbəŋ ba m dəmcǎ'.

¹⁹ Po ghɔ, dɑ guŋ mguŋ awɛ gə pɑkhʉ, bɑ nu' wap shyə nə tsǒ Tá ba Mù, ba Zhwenyə Dɔlɔ̌.

²⁰ Bɑ ji'tə wap nə tɔm guŋ ywə awɛ yə gɑ jap bi po a. Sɔ' m nə m̀ pɑ gɔ pəmtə pɑ́ pɑ tə kəm nə cwə yə dzʉ̌ gɔ mi a.