MATIO 24 - Ghomala New Testament

Yeso siŋ gɑ́ pu gɔ sɔ' sa'tə Yerusalɛm

¹ Yeso lə təm Dyə Si cwəlɔ bɑ́ gɔ̌. Pɑkhʉ̌ pyə lə sɔ̌' bəŋ e bɑ da'tə e nthi pa' pu nə bəm Dyə Si a.

² Yeso lɑ ghɔm gɔm bi pu gɑ: Po ka yɔ guŋ e bǎ awɛ a? Kwa' nyənyɔ gɑ siŋ wɔ gɑ́ sɔm gwɔ' tə gɔ sɔ' cwə dəm mu' tsɔ'ɔ pɑ. Pu gɔ sɔ' sa'tə guŋ e awɛ.

³ Cwə yə e lə́ cwə́si kuŋ mthə bɛ a, pɑkhʉ̌ pyə sɔ' bəŋ é m càm gɔm bi e gɑ: Siŋ wɔk cwə yə a gɔ sɔ' pɑ́ po' a, ba mtiŋ myə a gɔ sɔ' la'tə yù cwə a, ba cwə yə dzʉ̌ gɔ mi a.

Ghəghʉɔ yə a gɔ sɔ' təm tə́ dzʉ̌ mi a

⁴ Yeso pa' bi pu gɑ: Po pɔmtə gɑ́ ka sɔmmo kɑ̀ ghə po hɔ́jyə̀

⁵ Nə pa' pɔ̀ tə jɔm gɔ sɔ' lɑ tso tsɑ̌ nə sɔ' pɑ̀ ghɔm gɑ: Myə̀ nə́ bɑ Kristo. Wap gɔ sɔ' ghə pɔ jɔmyɔm hɔ́jyə̀.

⁶ Po gɔ sɔ' yu' shù, pú piŋ bɑ gɔmnwə nə shù. Po kɑ pwɔk. A puŋ gɑ tsə bɔ təm awɛ, da' gɑ a lə wuŋ bɑ́ nə́ miŋ.

⁷ Nə pa' mu' guŋ gɔ sɔ' pɑ lo' yə mu' guŋ. Mu' Nəfo pɑ do' tsyə mu' nəfo; kəya' gɔ sɔ' təm bapbǎp, ba cǎ' cʉ'nyə bapbǎp.

⁸ Guŋ e bɔ awɛ gɔ sɔ' pɑ́ pɑ nə to' go' nə dzə.

⁹ Pu gɔ sɔ' nyeŋ wɔ nə gǒ', pɑ zhwətə wɔ, guŋ pɑ́ tə pɑ pɑ Yudea pɑ bɔ wɔ nə tso tsɑ̌.

¹⁰ A gɔ sɔ' pɑ po'o pɔ jɔmyɔm pfʉtə́, wap pɑ hɑ nɑ tsǎp wap wap cəcɑ̌ pú pa' mghɛ bo a, piŋ pɑ pɔnyə cəcɑ̌ pú.

¹¹ Mfʉtə mghɔm ghɔm Si gɔ sɔ' təm pɑ́ ghə pɔ jɔmyɔm pi.

¹² Mnwə cwəpuŋ jɔmyɔ̌m gɔ sɔ' ghə ŋkhuŋnyə pɑ mimmim cəcɑ̌ pɔmnəŋ;

¹³ da' gɑ́ mo yə e kaktʉɔ tə ŋkhəm nə miŋ a gɔ sɔ' vɔk.

¹⁴ Pu gɔ sɔ' siŋ Cùŋ pɑpuŋ yəŋ nə Nəfo nthʉm guŋ dzʉ̌ awɛ. A pɑ mkwinthɛ bi pɑ tə pɑ́ pɑ Yudea. Tɑ dzʉ̌ mi.

¹⁵ Cwə yə́ po gɔ sɔ' yɔ Bɔkbɔk zhwiŋ tsʉ' yə gɔm ghɔm Si Dania lə ghɔm a bɑ ě cwə́ nə tsʉ' dɔlɔ̌ – ŋkhékě cəŋtə ju'! –

¹⁶ A pɑ́ cwə o bɔ pɔ pyə wap Yudea a, ŋkhʉ gɔ m dəm mkuŋ gó;

¹⁷ mo yə e gɔ sɔ' pɑ́ m zhəŋ dyə thə́ a, kɑ fi' gɑ e gɔ m dyə lɑ ywə́.

¹⁸ Mo yə e gɔ sɔ' pɑ m pě a kɑ pɑnyə jʉ̀m nə lɑ dzə́ e.

¹⁹ Ghəghʉɔ pɑ jwǐ tsʉm pu a mʉəmvə̀ nə tyɛ'dzʉ́ bɔ!

²⁰ Po cwyɛ'nyə gɑ po kɑ sɔ' bɑ gɔ ŋkhʉ cwə ŋʉ́m kɑ tyɛ' Sabat lə.

²¹ Kwa' tiŋ ghəghʉɔ yə a gɔ sɔ' pɑ tyɛ' o a, a la m bɑwə tə́ fɑ pa' pu ghə dzʉ̌ a tə́ gɔ ŋkhəm tyɛ' ɔ, a lə nəŋ gɔ la'tə pɑwə pɑ́.

²² Mtyɛ'dzʉ bɔ ka pɑ gɔ sɔ' cwanyə cwanyə a bɑ sɔmmo tə́ gɔ sɔ' vɔk pɑ́; da' gɑ a cyə m nə mci pɔ̀, mtyɛ'dzʉ bɔ ghɔ sɔ' cwanyə cwanyə.

²³ A pɑ́ po'o, bi a pɑ́ mo ghɔm bi po gɑ: Kristo mtsɔ'ɔ kɑ m gɑ e mtsi'i lɑ, ka po piŋ.

²⁴ Nə pa' Kristo nə fʉtə pu a mfʉtə́ mghɔm ghɔm Si gɔ sɔ' təm pɑ ghə mtiŋ pu a msya tə́ shɑ pɔ hɔ məjyə tə́ bɑ mci pɔ̀.

²⁵ Tə́ gɑ̌ ləŋdzə gə́ gɑ́ po zhyə́.

Cwə yə Mu mo gɔ sɔ' sɔ' a

²⁶ Pú la' gɔm bi po gɑ: E yəŋ gɑ m ghǎk gó, ka po ghɔ tsʉ'ʉ. Kɑ m gɑ: E yəŋ tsʉ' tsìŋ, ka po piŋ.

²⁷ Nə pa' dəŋdəŋ pa' pəpa' bə̀ŋ nthəm ghəŋ nthəm nam ŋwɛ ŋkhəm bi nam a, a gɔ sɔ' pɑ nə Mú mo pɑ́ po'o nə cwə yə e gɔ sɔ' a.

²⁸ Tsʉ' yə pfə ywə nə a, mghə́m mpfə tsə́ shu'tə tsʉ'.

²⁹ Ghəghʉɔ tyɛ'dzʉ́ bɔ gɔ sɔ' nə cyə̀, a nam sonyə, mɑŋwə́ pi, msɛ fɑ kɛbəŋ bvʉ́tə́, guŋ mtʉɔ kɛbəŋ cʉ'nyə.

³⁰ A pɑ́ po'o mtiŋ Mu mo təm kɛbəŋ, a guŋ gwya monəŋ dəmca' tsɔp kəkɔp yap jɔ pa' Mu mo fɑ kɛbəŋ dəm mlwa a bɑ gʉ̌' lo nə e a, bɑ e ghu'.

³¹ E gɔ sɔ' təm pɑ aŋgəle pyə́ pu a mthɛ gwyə́gwyə́, wap cu'tə pɔ pyə pu ci wap nə dzʉ́ msak pfʉ̀ə a.

³² Po yu' fo' nə thə nthɔmthə, bú myə́ shwə tə́ ntwɔp tə́ gə mhwə, po zhyə gɑ́ shwɔ'dzʉ̌ wə sɔ̌'.

³³ Dəŋdəŋ po'o, ba wɔ la' tə́ jɔ mtiŋ bɔ po zhyə gɑ́ Mù mo ghɔptə bəŋ po, gɑ e jyədyə̌ po.

³⁴ Kwa' nyənyɔ gɑ siŋ wɔ gɑ́ pɔ nə wɔ̌dzʉ̀ yəŋ tə̀ gɔ sɔ' cyə tə́ mnwə bɔ sɔ' pɑ́.

³⁵ Kɛbəŋ pu cǎ' gɔ sɔ' mi, tə́ mghɔm mə̌ tə gɔ la' mi pɑ.

Sɔmmo ka zhyə tyɛ' e

³⁶ Da' gɑ́ sɔ' m nə tyɛ'dzʉ́ bɔ, ba nə cwə dzʉ̌ bɔ, bɑ sɔmmo ka zhyə́, kɑ pɑ aŋgəle kɛbəŋ, kɑ Mú lɑ́, sɔmmo, tə́ ně da' Tá yʉ̀ dò e.

³⁷ Dəŋdəŋ pa' a lə pɑ nə cwə Noe a, nwə Mu mo gɔ sɔ' pɑ́ pɑ po'o.

³⁸ Nə pa' dəŋdəŋ pa' a lə pɑ nə cwə dzʉ̌ yə dɔmnyə bəŋ mwé lə jɑ tə wɛ dù a, pu pɑ́ dzʉ́, biŋ nwə́, bɑ ŋkho m jwǐ biŋ bɑ hɑ m jwǐ lɔmdyə tə́ ŋkhəm nə tyɛ'dzʉ yə Noe lə kǒ kənu' a,

³⁹ pɔmnəŋ lə pɑwə shɔ́m sɔmywə, tə́ dɔmnyə bəŋ mwé lù ŋkwa wap nə gɔtə awɛ: tyɛ' nə sɔ' Mù mo gɔ sɔ' pɑ̀ po'o.

⁴⁰ A gɔ sɔ' pɑ cwə o bɔ pɑbɛ pɑpʉə pɑ́ pé pu lɑ tá' mo nthak ta' mo

⁴¹ pɑjwǐ pɑpʉə gɔ sɔ' pɑ ləŋ msɛ, pu lɑ ta' nthak ta'.

⁴² Po pɑ̀ di tə́ ti nə pa' po ka zhyə tyɛ'dzʉ́ yə Cyəpɔ gɔ sɔ' sɔ' nə a.

⁴³ Po zhyə gɑ́ gɛ lǎ' lá' pé' e bɑ jyə cwə yə shwǔŋ gɔ sɔ' nə̀ a, ba e di tə ti, e lə tak dyə e shwuŋ tù pɑ.

⁴⁴ A po'o tə̀ ba wɔ yɔ pɑ́ byap nə pa' Mu mo gɔ sɔ' pɑ nə cwə yə po kɑ zhyə a.

Gɛfa' nyənyɔ́

⁴⁵ Wɑ́ bɑ gɛfa' nyənyɔ, jyənwə yə tap e jap e dzə́ la' é nə pɔ gɑ e pɑ́ ŋkhim wap nə́ cwə yə e jap á?

⁴⁶ Buŋtsé gɛfa' bɔ yə tap e gɔ nə sɔ' e pɑwə fá' fa' bɔ a.

⁴⁷ Gɑ̌ siŋ wɔ kwa' nyənyɔ gɑ tap e gɔ lɑ e nə ghə tadyə nə guŋ tsə tsyə awɛ.

⁴⁸ Da' gɑ́ gɛfa' cwəpuŋ bɔ ghɔm nthʉm tʉm e gɑ: Ta á gɔ nə sɔ' cwə

⁴⁹ biŋ ntho' pɑ nə cwɔ msǒ fa' pyə, bɑ dzʉ́ biŋ nwə pu a mnwə̌ mlu',

⁵⁰ bɑ tá gɛfa' bɔ gɔ sɔ' nə tyɛ'dzʉ yə e tə́ wə byap e a pɑ, nə cwə yə é ka zhyə a;

⁵¹ a zhəŋ e, yap e nə tsʉ' mtsɛbú, tsʉ' yə lɔ̀ pu a nə pfɑ msùŋ bɑ́ nə a.