MATIO 2 - Ghomala New Testament

Mghɛ zhyə sɛ sɔ' jɔ Yeso

¹ Pú dzə́ Yeso Bɛtəlehɛm m Yudea, nə cwə fo Herode. Shɑ́ mghɛ zhyə́ sɛ fɑ ghəŋ nthəm nam ŋwak Yerusalɛm

² dzɑ́tə́ gɑ: Fo pɑ Yudea yə pu bɑwə tə́ dzə́ e a hɑ? Nə pa' pyə yɔ sɛ tsyə́ ghəŋ nthəm nam tə́ sɔ' m nə ghamtə e.

³ Fo Herode lə nə yu' mcuŋ bɔ, a va' e, ba guŋ Yerusalɛm awɛ.

⁴ E lə cu'tə guŋ mkamsi gwyəgwyə awɛ pu a guŋ pɑ zhyɛ mco' awɛ nthʉm guŋ, həŋtə́ wap tsʉ' yə pu lə gɔ la' tsə́ Mesia nə a.

⁵ Wap ghɔm bi e gɑ: M Bɛtəlehɛm m Yudea, nə pa' ywə yə gɔ̀m ghɔ̀m Si lə və a bɑ gɑ:

⁶ Wə Bɛtəlehɛm, cǎ' pɑ Yudea, o tə bɑ jʉɔjʉ̀m nə mtisuŋ pɑ Yudea pɑ; nə pa' Fo yə e gɔ sɔ' pɑ cya pɑ Israɛl pɔ pɑ̌ a gɔ sɔ' təm bu.

⁷ A lə pɑ po'o, fo Herode ghə pu ké mghɛ zhyə sɛ m càm e həŋtə wap kwa' cwə yə sɛ bɔ kɑ təm a,

⁸ tə biŋ nə təm wap Bɛtəlehɛm gɔm bi pu gɑ́: Po ghɔ shəŋtə həŋtə́ mcuŋ nə mu bɔ̌; cwə yə pɔ yɔ e a po ghə ŋ jyə, po'o gɑ ba myə̀ ghɔ gamtə e yɑ̌.

⁹ Wap lə yu' ghɔm fo cwəlɔ, ntham məjyə; sɛ tsyə wap kɑ yɔ̌ ghəŋ nthəm nam a ghiŋ bɑ dzə pu tə gɔ nthiŋnyə dəm tsʉ' yə mu bɔ lə bɑ nə a.

¹⁰ Wap lə nə yɔ sɛ cwəlɔ kwa' mɑ ŋwɛnyə ko nə pu.

¹¹ Wap lə kodyə, jɔ mú pu Maria map e; ŋkham mkwi'tə map dzə é, gamtə e, biŋ ntha' mpʉə map cwəlɔ, hɑ tʉ́ɔ gɔl, ba phə tʉɔdəŋ pú a mwɑ̌ tʉɔdəŋ bi e.

¹² Si lə cyə́ m nthʉm jʉm biŋ gɔm bi pu gɑ́ wap kɑ piŋ bɑnyə bəŋ Herode, wap lə cyə m nə mu' məjyə dyɛ' bɑnyə gǔŋ pú.

Nə ŋkhʉ gɔ Egipto

¹³ Mghɛ zhyə sɛ lə cwə́ tə gɔ̌, aŋgəle Cyəpɔ sɔ' bi Yosɛp m nthʉ̌m jʉ̀m gɔm bi e gɑ: Lusi dɑ mú pu map e ŋkhʉ gɔ Egipto, shwə wə tə ŋkhəm cwə yə gɑ ghɔm a, nə pa' Herode wə gɔ cə́ŋ mú nə zhwə e.

¹⁴ Yosɛp lə lusi pɑ mtsʉ' dɑ mú pu map e gɔ Egipto.

¹⁵ E lə cwə́ wə́ tə ŋkhəm cwə yə Herode lə pfʉ a, po'o gɑ ywə yə Cyəpɔ lə ghɔm shyə m nə gɔm ghɔm Si a, a pəmtə gɑ: Gɑ̌ ke mú a, nthé é Egipto.

Nə si'nyə pǒ Bɛtəlehɛm

¹⁶ Herode lə nə yɔ gɑ́ mghɛ zhyə sɛ fʉtə e, nwə pɔk e, e təm gɑ pu ghɔ Bɛtəlehɛm, ba m nthʉm guŋ e awɛ, jwətə guŋ pɔ awɛ tə ŋkhəm nə gu' pʉ́ə, dəŋ pa' mghɛ zhyə sɛ lə siŋ e a.

¹⁷ A pɑ po'o ywə yə Yeremia gɔm ghɔm Si lə ghɔm a, a pəmtə gɑ:

¹⁸ Pu yu' gi mo Rama, e pɑwə dɔ̌ biŋ bɑwə shwe; Lachɛl nə dɔ po pyə, la' e pɑwə biŋ gɑ mo zhwyətə e, nə pa' po pyə tə yɑwə pɑ́.

Nə fɑ Egipto

¹⁹ Herode lə cwə tə pfʉ́, aŋgəle Cyəpɔ sɔ' bi Yosɛp nthʉ́m jʉ̀m Egipto

²⁰ gɔm bi e gɑ: Lusi dɑ mú pú map e bɑnyə Israɛl; pɔ pyə wáp lə bɑ́wə shəŋ nə zhwə mu a pfʉ́tə.

²¹ Yosɛp lə lusi cwəlɔ dɑ mu pu map e, bɑnyə Israɛl,

²² da' gɑ́ e lə nə yu' gɑ Arkelao nə wə́ sa' guŋ pɑ Yudea nə yə tsʉ' tap e Herode, bwɔk nə ghɔ wə́; Si lə ghɔmnwə bi e m nthʉm jʉm, e lɑ m Galilea

²³ gɔ shwə nə mu' tisuŋ pu ke gɑ Nazarɛt po'o gɑ ywə yə mghɔm ghɔm Si lə la' gɔm a pəmtə gɑ: Pu gɔ sɔ' ké é gɑ yə Nazarɛt.