MATIO 19 - Ghomala New Testament

Mghɔm Yeso nə́ nə zhəŋ mjwǐ

¹ Cwə yə́ Yeso lə́ miŋ nə ghɔmmnwə a, dú Galilea gɔ Yudea nə yə mu' jʉɔ Yurdɛŋ

² pɔmnəŋ jɔmyɔ̌m lə́ bɑ jʉ̀m e, e piŋ bɑ́ jɛ́ wap tsʉ'ʉ.

³ Pɑ Farisai ghɔ bəŋ e dəŋtə e gɔm gɑ: A bɑ pu piŋ gɑ bi a pɑ mbɛ zhəŋ jwi e bǎ nə kə́ a?

⁴ Yeso pa' gɑ: Po ká ké gɑ nə́ nə́ to' Nyap dzʉ́ lə̀ ghə wap Mbɛ pu mjwǐ,

⁵ biŋ gɔm gɑ: A shyə̀ m po'o mbɛ pɑ́ gɔ sɔ' təm nə tap e ba nə map e, piŋ kwɑ́ m nə jwi e, wap pɑ́pʉə piŋ bɑ́ pɑ́ ta' bapnɑ́ yɑmu'.

⁶ A bɑ́ po'o wap lə́ piŋ bɑ́ pɑpʉə pɑ, wap bɑ pɑ ta' bapnɑ yɑmu'. A po'o tə́ ywə yə Si tamtə a mo kɑ́ haptə.

⁷ Pɑ Farisai piŋ gɔm bi Yeso gɑ: Nwə kɑ́ bɑ Mosɛ lě bvə gɑ pu pɑ́ hɑ ŋwa'nyə nə jəŋ mjwǐ cwə nə zhəŋ mjwǐ?

⁸ Yeso ghɔm bi pu gɑ: A lə shyə m nə pa' a bɑ́ tʉm tsɔ sɔk gɑ́ kùŋ a, tə̀ Mosɛ piŋ gɑ po pɑ́ jəŋ pɑ jwǐ pɔ. Da' gɑ́ nə́ nə́ to' a lá tə́ bɑ̀ po'o pɑ.

⁹ Gɑ ghɔm bi po gɑ: Mo zhəŋ jwi e tə a bɑ́ pɑ́ da' nə nwə nə ka thə a biŋ ŋkho mu' mjwǐ bɑ e ghə ghap.

¹⁰ Pɑkhʉ pyə ghɔm bi e gɑ: A pɑ́ gɑ́ vɔk mbɛ bəŋ mjwǐ nthʉm lɔmdyə bɑ m pa' a, bɑ a ka kwitə nə lɔmdyə̌.

¹¹ E ghɔm bi pu gɑ: Guŋ pɔ awɛ tə́ ju' ghɔm tsɔ pɑ̀ tə né da' pɔ pyə a hɑ gɑ́ wap yù' a.

¹² Nə pa' shɑ́ msʉ̌ pɔ si bɑ mmʉ́ə pap nə́ dzə wap. Shɑ̀ mkwì piŋ bɑ yap bɑ pɔmnəŋ nə dɑ wap gə mkwi; shɑ́ piŋ bɑ́ bɑ pɑ́ wap nə dɑ nɑ tsap gə mkwi dù nə́ Nəfo kɛbəŋ. Jú'yǔ' yú'.

Yeso nyəŋ byanyə nə pǒmkəcɔk pó

¹³ A lə́ pɑ́ po'o pɔmnəŋ lɑ pǒmkəcɔk pó nə sɔ' bi Yeso gɑ́ e nyəŋ byanyə nə pú, biŋ shwyɛ'nyə Si. Pɑkhʉ̌ Yeso pɑ jəŋ wap.

¹⁴ Yeso ghɔm gɑ: Po tak pomkəcɔk pó pɑ́ nəŋ, ka po kɔ gɑ́ wap kɑ sɔ' bəm, nə pa' Nəfo kɛbəŋ bɑ bi pɔ pyə wap pɑ́ pa' wap a.

¹⁵ Yeso lə yap bǔ nə pú cwəlɔ dú tsʉ'u gɔ̌.

Mú səm gɛ ywə́

¹⁶ A lə pǐŋ bɑ, mu' mbɛ sɔ' bəŋ Yeso gɔm bi e gɑ: Ta, gɑ̌ gɔ ghə gɑ́ kɑ pɑpuŋ tə́ ghə vɔk mama?

¹⁷ Yeso ghɔm bi e gɑ: Nwəkɑ́ o həŋtə a nwə̀ nə̀ ywə pɑpuŋ? Da' ta' mo nə́ bɑ́ mo pɑpuŋ. O pɑ́ shəŋ nə pɑ́ nthʉm vɔk, o pɑ ŋkhyəp mco'

¹⁸ E həŋtə́ Yeso gɑ: Má mco'? Yeso pa' gɑ: Kɑ zhwə mò. Kɑ ghə́ ghàp. Kɑ zhʉ̀. Kɑ kwinthɛ cwanwə̀.

¹⁹ Ghə mku' tɔ̌ pu mɔ̌. Nə́ nɑ miŋ. O kúŋ mo yə e bəŋ o a pa' o ŋkhuŋ thə́ nɑ o a.

²⁰ Mú səm bɔ ghɔm bi e gɑ: Gɑ́ zhyə̀ guŋ e bǎ awɛ. A wə biŋ jak a kɑ?

²¹ Yeso ghɔm bi e gɑ: O pɑ́ shəŋ nə pɑ́ dɔlɔ̌ o ghɔ fiŋ guŋ tsə́ tsyə o ghə awɛ, hɑ bi mpə̌ŋ, tə sɔ' gə fʉ́' thə kɛbəŋ. Biŋ sɔ' jap jʉ̌m m̀.

²² Mu səm bɔ lə yu' ghɔm tsɔ, sə é fi' e ghɔ, nə pa' a lə́ bɑ e ghə tsə tɑ́' a.

²³ Yeso piŋ gɔm bi pɑkhʉ pyə gɑ: kwa' nyənyɔ gɑ siŋ wɔ gɑ̌ a gɔ sɔ' tʉɔ bi gɛ ywə́ nə ko nə Nəfo kɛbəŋ.

²⁴ Gɑ piŋ kwi' siŋ wɔ gɑ, a yɛ̀ bi kamelo nə cyə nə fǎ dàp syap shyə pa' bi a pɑ gɛ ywə ko nə̀ Nəfo Si a.

²⁵ Pɑkhʉ pyə́ lə nə yu' ghɔm tsɔ̌, a cyə wap, wap pɑ́ gɔm gɑ: Tə́ a po'o wɑ́ ghɔ sɔ' vɔk?

²⁶ Yeso lə le wap dəŋdəŋ gɔm gɑ: Ywə yə a shyə̀ pɔmnəŋ a tə́ shyə Si pɑ́.

²⁷ Pɛtrɔ lə́ lɑ ghɔm gɔm gɑ: Pyə le ŋthak guŋ tsə awɛ jap jʉm o. Tə́ a gɔ sɔ' pɑ́ nə́ pyə pɑ́ m gɑ́ kɑ?

²⁸ Yeso ghɔm bi e gɑ: Kwa'nyənyɔ gɑ ghɔm bi po gɑ: Cwə yə pu gɔ sɔ' ghə guŋ ywə awɛ msə a, cwə yə Mu mo gɔ sɔ' cwə́ dəm kwɔ' wu'tə̀ é a, wɔ pyə po lə yap jʉ̌m m̀ a, po cwə nə mkwɔ' shwɔppʉə mgham, bɑ́ sa' mtuŋ dyə Israɛl shwɔppʉə mgham.

²⁹ Biŋ bɑ bi a bǎ wɑlə́ pɑ́ bɑ e lé nthak la' tsyə, mfɑ pyə́ pyə pɑ bɛ ba pyə pɑ jwǐ, tap e, map e, pó pyə, kɑ be myə́ po' nə tso tsɑ̌ bɑ e gɔ sɔ' kwi tsə bɔ tə a yɔm piŋ kwi ba vɔk mama.

³⁰ Bo'gwyə pɑ dzə̀ gɔ sɔ' cʉ' pɑ jʉ̀m, a pɑ jʉ̀m cʉ' pɑ dzə̀.