MARKUSI 5 - Ghomala New Testament

Yeso yɛ̀ mu' mo nə́ mzhwenyə cwəpùŋ

¹ Wap lə ko nə yə́ mu' jʉɔ shyə lɑpʉə, nthʉ́m gúŋ pɑ Gerasa.

² Yeso lə pɑ̌ nthəm nthʉm kənu', mu' mo zhwenyə cwəpuŋ pɑ́ nə é wuŋ sɔ' pu e yu'tə. Mo bɔ lə nthəm m mthəsì.

³ E lə shwə̀ nthʉ́m mthəsì, sɔmmo lə piŋ bɑ́ bɑ ě ku' nə kwɑ́ e, kɑ dɑ́ pɑ́ gwɑ mtʉ̌ɔ ŋkwɑ e lə.

⁴ Nə pa' a lə bɑ pu lə lɑ mkəlo' pu a gwɑ́ mtʉ̌ɔ ŋkwɑ́ é mcʉmmcʉ̌m, e cwa gwɑ̀ mtʉ̌ɔ, biŋ bo' mkəlo', tə́ la' sɔmmo piŋ gə gʉ' nə nthɔm é.

⁵ E lə bɑ́ mtsʉ' bɑ m mɔkcʉ́, bɑ nthʉ́m mthəsì ba m kúŋgǒ, bɑ shwé, bɑ dɑ mwɔ' shàktə nɑ́ é.

⁶ E lə yɔ Yeso gʉə sʉəsʉə, ŋkhʉ́dʉ́, sɔ' bvʉ́ dzə e.

⁷ Shwé tɑ́ thə̀ gɑ: O ŋkwi kɑ bəm Yeso Mú Si tə Thə́ Kɛbəŋ? Gɑ ghɔm bu nə tsǒ Sí, kɑ́ paknyə a.

⁸ Nə pa' Yeso lə bɑwə gɔm bi e gɑ: Zhwenyə cwəpuŋ təm nə bɛ yə̌ŋ.

⁹ E lə həŋtə̌ é gɑ: Tso tsǔ bɑ wɑ? E pa' bi e gɑ: Tso tsɑ̌ bɑ́ jɔmyɔ̌m, nə pa' a bɑ pyə̌ yɔ́m.

¹⁰ E lə pǐŋ shəŋtə́ shwyɛ'nyə é gɑ́ e kɑ té wap nthʉ́m gùŋ.

¹¹ A lə́ nə pɑ̌ po'o mu' kà mgənɔ̀m pɑ tsʉ̌'u bɔ m nə ghəŋ kúŋgǒ bɑwə pfɑ́ mghé.

¹² Mzhwenyə cwəpuŋ bɔ lə cwyɛ'nyə Yeso gɔm gɑ: Cya wɔk nə mgənɔm, pyə ko nə pú.

¹³ E lə pǐŋ bi pú. Wap piŋ nthəm ŋkho nə mgənɔm, guŋ ka mgənɔm awɛ piŋ fɑ kúŋ nə mkəkəŋ bvʉ́tə nthʉm shyə lɑpʉə; wap lə bɑ gwɛ a mnɔm shǎ' pʉə, wap fá nthʉm shyə lɑpʉə.

¹⁴ Pɑ pyap mgənɔm bɔ lə khʉ̌ biŋ gɔ siŋ ywə bɔ nthʉm tisuŋ ba m nthʉm mla'. Pɔmnəŋ lə sɔ̌' jɔ ywə́ yə a lə təm a.

¹⁵ Wap lə́ sɔ' bə́ŋ Yeso, jɔ mo yə́ zhwenyə cwəpuŋ lɑ bɑ nə e a bɑ ě cwə́ si, bɑ e kwa dzə́, bɑ zhyənwə e sɔ' bi e, yʉ yə mzhwenyə cwəpuŋ yə pu ŋkhe gɑ jɔmyɔ́m lə bɑ nə e a. Wap lə pwɔk té' o.

¹⁶ Pɔ pyə wap lə yɔ pa' a lə nə shyə a lə siŋ wap ywə yə a lə cyə́ nə mo yə zhwenyə cwəpùŋ lə bɑ nə é a ba nə mgənɔm a.

¹⁷ Wap piŋ ntho' cwəlɔ nə cwyɛ'nyə Yeso gɑ e təm nə ca' tsap gɔ gʉə sʉəsʉə.

¹⁸ Yeso lə pɑ ŋkwɔ' nə ko nthʉm kənu', mo yə zhwenyə cwəpùŋ lə təm nə e a cwyɛ'nyə é həŋtə́ e gɑ e gɔ wuŋ bəŋ e.

¹⁹ Yeso kəŋnyə bi e, da' gɑ́ gɔm bi e gɑ: Ghɔ la' o, bəŋ pɔ pǔ, siŋ wap guŋ ywə awɛ yə́ Cyəpɔ gə nə o shyə́ m nə cɔ̌mmtso e a.

²⁰ Bɛ bɔ lə ghɔ́, ntho' nə cyanyə guŋ ywə awɛ yə Yeso gə nə e a nthʉ́m Dekapoli. Nwə pɑ̀ shyə́ guŋ pɔ awɛ.

Nə́ yɛ mu' mjwǐ. Gò Yairos yám nə vʉ̌

²¹ Yeso lə́ lɑ̌ kənu' sa' tə́ ŋkho nə yə mu' jʉɔ, dú pɔ cu'tə bəŋ é. E lə́ bɑ kəŋ shyə.

²² Mu' mo nə mtadyə sinagogə tso tsyə́ pɑ Yairos lə nə yɔ Yeso, bvʉ́ nə mkwə myə́

²³ biŋ shəŋtə shwyɛ'nyə gɔm gɑ: Mú go a yə ŋkho' wə gɔ pfʉ́, sɔ' jap bú nə é, é vɔk, bɑwə́.

²⁴ Pu Yeso lə ghɔ̌; vəŋ du pɔ lə bɑ́ jʉ́m e bɑwə nthənyə.

²⁵ Mu' mjwǐ lə bɑ si bɑ gɛ gho tə fɑ́ nə gu'dzʉ́ shwɔppʉ́ə mghǎm, mcyə pɑ nthəm nə e.

²⁶ E lə́ bɑ e yɔgo' té' nə mbú mgəgɛ, sim guŋ ywə yə a lə bɑ ě ghə a awɛ, e lə yu' hwítə; gho e pɑ gɔ pɑ m dzə̀.

²⁷ Mɑmjwi bɔ lə yu' guŋ ywə awɛ yə pu lə gɔm nə Yeso a, sɔ̌' cəcɑ̌ pɔmnəŋ, nthəm m jʉ̀m, ŋkwak dzə e.

²⁸ Nə pa' e lə bɑwə sɛ gɑ: Ŋ da' gɔ ŋkwak bǎ da' mdzə myə́, bɑ gɑ gɔ vɔk.

²⁹ A lə wuŋ bɑ́ pɑ́ cwə o bɔ mcyə ya' nə təm nə é, e yu' nthʉ́m nɑ́ e gɑ́ ě yɛ̀ nə gho é.

³⁰ Yeso lə wuŋ ju' gɑ́ mu' gʉ' təm nə e. E lə fɛnyə̀ nɑ́ e cəcɑ̌ pɔmnəŋ biŋ gɔm gɑ: Wɑ̌ ŋkwak mdzə mə̌?

³¹ Pɑkhʉ̌ pyə lə ghɔm bi e gɑ: O bɑwə jɔ vəŋ pɔ pu pɑwə nthənyə ó, o həŋtə gɑ wɑ kwak a m gɑ́ kɑ?

³² Da' gɑ e lé giŋnyə e nə yɔ mo yə e lə ghə nwə bɔ a.

³³ A lə pɑ̌ po'o mjwǐ bɔ, pwɔk, səŋ gɑ taktak, bɑwə jyə́ ywə yə a lə təm nə e a, sɔ' bvʉ́ nə mkwə myə́, siŋ e guŋ nwə awɛ nyənyɔ.

³⁴ Tə́ Yeso ghɔm bi e gɑ: Go a, piŋnthʉm o vɔk o; ghɔ nə hwítə̀, jɛ́ nə guŋ ghó o awɛ.

³⁵ E lə pɑ̌ gɔm po', shɑ́ pɔ fɑ́ ywə tadyə sinagogə sɔ' gɔm bi e gɑ: Gò o pfʉ́, o gɔ nəŋ piŋ paknyə́ Tá gɑ́ kɑ̀?

³⁶ Da' gɑ́ la' Yeso lɑ tsɔ ghɔm sɛ sɔmywə, gɔm bi tádyə̌ sinagogə gɑ: Kɑ́ pwɔk, piŋ piŋ.

³⁷ A lə piŋ bɑ po'o, e lə́ piŋ gɑ́ sɔmmo yap jʉm e tə ně da' Pɛtrɔ pu Yakop ba Yohane fɑ Yakop.

³⁸ Wap lə ŋwak dyə tadyə̌ sinagogə. Yeso yɔ mɛnyə̀, pɔmnəŋ pɑwə dɔ̌, biŋ bɑwə shwe tə́ thə́.

³⁹ E lə́ kǒdyə́ gɔm bi pu gɑ: Yəŋ mɛnyə pu a lɔ̀ bɑ gɑ́ kɑ̀? Mu bɑ e ka pfʉ́, e di ti.

⁴⁰ Wap pɑ jə̀mtə é. Da' gɑ́ e lə tě guŋ pɔ awɛ dyə́, dɑ da' tá mú pu map e, ba pɔ pyə wap lə bɑ jʉm e a, pu a pu ko tsʉ' yə mú lə́ bɑ nə a.

⁴¹ E lə tɔm pǔ mú, gɔm bi e gɑ: Talita kumi, a pɑ́ nthútə́ gɑ: Mú go, gɑ̌ ghɔm bu, yǎm.

⁴² Mú mjwǐ bɔ lə wuŋ dusi ntho' nə ghìŋtə, nə pa' a lə bɑ e ghə gu' shwɔppʉ́ə mghǎm. Nwə lə cyə̌ guŋ yap awɛ cwə o bɔ.

⁴³ Yeso piŋ shəŋtə́ sho' bi pu gɑ sɔmmo kɑ́ zhyə biŋ gɔm gɑ́ pu hɑ ywətsʉ bi mu mjwǐ.