MARKUSI 4 - Ghomala New Testament

Ghɔm tə tutə dzə ywə́

¹ Yeso lə kwi' nthó' nə zhi'tə pɔmnəŋ ywə m sə́ kəŋ shyə lɑpʉə. Pɔmnəŋ lə cu'tə bəŋ e kwa' vəŋ e, tə e kwɔ' shwə nthʉm kənu' dəm shyə lɑpʉə. Guŋ dú pɔ awɛ lə bɑ m dəmcǎ', bɑwə shʉ́ m nə shyə́.

² E lə zhi'tə wap ywə tə ǎ yɔm m nə́ ghɔm tə tútə. E lə zhi'tə wap gɔm gɑ:

³ Po yú', yɔ, mu' dzəywə́ lə təm bɑ dzə́ ywə.

⁴ Pa' e lə pɑ dzə́ ywə́ a, mu' gwya ywə lə vʉ̌ gìŋnyə məjyə; pǒmsə́ŋ sɔ' pfɑ́.

⁵ Mu' vʉ nə tsʉ' mwɔ', tsʉ' la' cǎ' ghyɛ' bɑ nə́; a lə wuŋ sa' nə pa' a lə bɑ ca' ka ghyɛ' ŋkho si a.

⁶ Nàm lə cwə̌ tə́ sa', a pónyə̀, jak gɛ, jə́m.

⁷ Mú' lə kwi' bvʉ́ nthʉ́m mjuŋ; mjǔŋ kwɔ', fám e, e lə yám nthɔm.

⁸ Mu' vʉ nə ca' pɑpúŋ, sa' biŋ nə kwyə, jám mthɔm, mghǎm ntha nə ta', ba mgham nthɔ̌k nə tà', ba ŋkhə́ nə tà'.

⁹ Yeso lə piŋ gɔm gɑ: Mo yə́ ě ghə mtə́ŋ nə jú' a yú'.

Ywə yə a gə tə Yeso ghɔm ghɔ̀m tə́ tutə a

¹⁰ Cwə yə Yeso lə tə́m cəcɑ̌ pɔmnəŋ tə bɑ́ tsʉ' tsiŋ a, pɔ pyə wap lə bɑ́ bəŋ e a, ba pɔ shwɔppʉ́ə mghǎm to' nə həŋtə́ e nwə nə ghɔm tə tútə.

¹¹ E pɑ̀ gɔm bi pu gɑ: A bɑ pu hɑ nə zhyə nwə cyə́ zhyənwə Nəfo Si bi po, da' gɑ sɔ' m nə pɔ pyə wap m dzʉ̌ a, guŋ mnwə awɛ pɑ́ pɑ nə ghɔm tə́ tútə.

¹² Po'o gɑ wap lé wap lə yɔ́, biŋ jú' wap lə yú' bwɔk gɑ wap kɑ pʉɔtʉ́m pu lɑ mhɔ map shwyɛ' wap.

¹³ E lə ghɔm bi pu gɑ: Po ka yu' ghɔm tə́ tùtə tsɔ̌! Tə́ po gɔ yu' guŋ myə shɑ mghɔm tə tútə m gɑ́ kɑ?

Nə tútə ghɔm tə tútə dzə̀ywə

¹⁴ Mo yə e dzə̀ ywə a dzə Ghɔm.

¹⁵ Yɔ pɔ pyə wap bɑ giŋnyə məjyə a, tsʉ' yə pu dzə́ Ghɔm nə a, a bɑ pɔ pyə wap ju' Ghɔm, Sata wuŋ sɔ' biŋ nthé ghɔm tsyə pú dzə́ nə́ pú a.

¹⁶ Bɑ́ nə pɔ pyə wap bɑ tsʉ' mwɔ' a: Pɔ bɔ ju' Ghɔm, guŋ dɑ ŋwɛnyə nə kwí,

¹⁷ da' gɑ́ la' mŋɛ pɑ́ nə pú, bɑ yáp pɔ̀ pɑ cwə o bɔ; ghəghʉɔ kɑ nə cwɔ' mkwə nə Ghɔm lə cwə́ tə sɔ̌', wap wuŋ bvʉ́tə si.

¹⁸ Pyə pu dzə m nthʉ̌m mjúŋ á, a pɑ́ pɔ pyə wap ju' Ghɔm,

¹⁹ da' gɑ́ nə zhwiŋ dzʉ̌, fʉtə fʉ', pu a ghi'nyə sɔ' ŋkho nə e, famnyə Ghɔm bɔ, a lə yám nthɔm.

²⁰ Pɔ pyə pu tsə̀ wap nə ca' pɑpuŋ a wap ju' Ghɔm, ŋkwi ghɔm bɔ, jam mthɔm mgham ntha nə ta', ba mgham nthɔk nə ta', ba ŋkhə nə ta'.

Lambù ba fo' nə fó' ywə́

²¹ E lə ghɔ̌m bi pu gɑ: Lambù sɔ' gɑ pú nyəŋ m nthʉm cə́ŋ kɑ m kəsǐ kodyə? Pu tə nthʉ́ m dəm kwɔ' lambù a?

²² Nə pa' sɔmywə yə ǎ tʉmnyə tə la' pu pɑ gɔ zhyə́ a tə̌ wə́ pɑ́, sɔmywə yə ǎ tʉmnyə̀ tə la' pu pɑ gɔ la' zhyə a a tə̌ wə pɑ́.

²³ Mo yə e ghə mtə́ŋ nə ju' a e yú'.

²⁴ E lə ghɔm bi pu gɑ: Po pɔmtə nə ywə yə́ po ju' a. Fo' yə po nə fo' a tə́ pu gɔ sɔ' nə fo' wɔ, piŋ hɑ bi po tə́ a yɔm.

²⁵ Nə pa' mo yə e ghə ywə a pu gɔ sɔ' hɑ ywə bi e, piŋ sɔ' nə mo yə e ka ghə ywə a, pu kwi bɑ yə muywə yə a bɑ bi é a.

Gwya ywə yə a sa' dǒ e a

²⁶ E lə ghɔm gɑ: Nəfo Si hwə pa' mu' mo yə e ma' gwya ywə si a.

²⁷ Kɑ e di ti, kɑ giŋ ghiŋ, kɑ a bɑ pɑ mtsʉ̌' kɑ a bɑ pɑ mɔkcʉ lə, bɑ gwya ywə bɔ sa' biŋ ŋkwyə́ tə gɛ jyə́ sɔmywə nə́.

²⁸ Cǎ' gə pɑ dò é ghě sa', gə cwɔ' e, biŋ gə nthɔm myə́.

²⁹ Msɛ̌ nəŋ shwə́ tə ŋkwyə́, pu yap nyə́ nə shwa nə́, nə pa' a bɑ cwə nə lɑ tsə́.

Sɔm thə́ tsə́ sɔ́k

³⁰ E lə ghɔm gɑ: Nəfo Si bɑ pa' kɑ́ ywə a? Pɑ gɔ lɑ tsa ghɔm tə tútə la'tə pa' a bɑ a?

³¹ A bɑ pa' sɔm thə́ tsə́ sɔ́k a. Pu nə tsə̀ si bɑ ǎ kɔk shyə gùŋ gwya ywə awɛ nthʉm dzʉ́.

³² Da' gɑ́ pu shwə tə́ dzə̌, a kwɔ' gɔ thə́ tə shyə gúŋ mthə́ jap awɛ, biŋ gə bú myə́ a zhi tə́ pǒmsə́ŋ to kɛbəŋ pɑ gə mkɔ map nə ciŋnyə e.

Nə zhi'tə ywə nə ghɔm tə́ tútə

³³ E lə́ lɑ̌ nthinthi mghɔm tə tutə́ nə siŋ Ghɔm bi pu nə dəŋ yə wáp lə́ bɑ wap ku'nyə nə yu' a.

³⁴ E lá tə́ gɔm nwə bi pu tə lɑ pɑ́ ghɔm tə́ tutə gɔm pɑ́, da' gɑ bɑ nthútə́ guŋ e awɛ bi pɑkhʉ̌ pyə́.

Yeso ghə fʉ́m lɛtə́

³⁵ A lə pɑ̌ tyɛ' o bɔ, bɑ bwadzʉ̌, Yeso ghɔm bi pɑkhʉ̌ pyə́ gɑ: Pɑ cyə́ gɔ nə yə́mu' jʉɔ.

³⁶ Wap lə təm cəcɑ̌ pɔmnəŋ, dɑ Yeso nthʉm kənu' yə e lə bɑ nthʉm o a, pu a shɑ́ mkənu' nə lə bəmtə́ bɑ́.

³⁷ Mu' mɑ fʉ́m fəfa lə wuŋ nthəm dəm shyə. A lə bɑwə ŋkwá shyə nə ntham kənu', tə shyə́ pɑ́ gɔ ló nthʉm kənu' bɔ.

³⁸ Yeso pɑ jʉ̀m dəm hya bɑwə dí. Wap lə yam e gɔm bi gɑ: Ta a tə wə gə sɔmywə nə o gɑ pɑ pfʉtə́ a?

³⁹ E lə́ yǎm, baptə́ fəfa biŋ gɔm bi shyə lɑpʉə gɑ: Nǎ'! Lɛtə́! Fəfa mì, tsʉ' wuŋ dɛtə́ gɑ kǎm.

⁴⁰ Yeso ghɔm bi pú gɑ: Nwə kɑ́ po pwɔk tə́ pa' a? Po jɑ tə́ wuŋ gə́ piŋnthʉm a?

⁴¹ Mɑ pwɔk lə́ ko nə́ pú, wap piŋ bɑ gɔm cəcɑ̌ pú gɑ: Yə̌ŋ bɑ́ wɑ́, tə́ ba fəfa pu a shyə lɑpʉə yu'nyə̀ e?