MARKUSI 14 - Ghomala New Testament

Pu tɛ́nwə nə Yeso

¹ A lə jɑwə́ jak tyɛ'dzʉ́ yɑpʉə a pɑ́ tyɛ' Paska pu ŋwɛnyə msɛ̌ tə kwɔ' msɛ̌; mkamsi gwyəgwyə pu a pɑ zhyə́ mco' pɑwə shəŋ pa' wap gɔ ghə tə lɑ fʉ́ ghəm Yeso zhwə é a.

² Wap lə bɑwə gɔm gɑ: A kɑ́ pɑ cwə ŋwɛ́nyə bwɔk gɑ a kɑ ma' và' cəcɑ̌ pɔmnəŋ.

Mu' mjwǐ lɑ mwɑ́ jwɔ' Yeso Betanya

³ Yeso lə pɑ̌ Betanya dyə Simon gɛ ka'pap, wap pɑ́ tɑpe, mu' mjwǐ lɑ dúŋ mwɑ̌ tʉ́ɔdəŋ, mwɑ́ damnyəlamnyə, mwɑ nardu tə mo ŋi'nyə sɔ̌'. Shwɔ' dúŋ mwɑ̌ bɔ, pfyə thə Yeso.

⁴ A lə pɔ̌k shɑ pɔ, wap pɑ gɔm cəcɑ̌ pú gɑ: Pú bi mɔ mwɑ̌ po'o gɑ́ kɑ̀?

⁵ Pu é jyə nə fiŋ mwɑ̌ bɔ nə tsə bɛ ŋkhətá, hɑ ŋkhap bɔ bi mpə̌ŋ. Wap lə ghɔ̌m po'o bɑ jɛlúŋ nə mjwǐ bɔ.

⁶ Da' gɑ́ Yeso ghɔm bi pú gɑ: Po tak é nə́ŋ; pǒ baknyə é gɑ kɑ̀. Ywə yə e gə nə m a bɑ fa' pɑpúŋ.

⁷ Po a mpə̌ŋ nə gɔ pəmtə pɑ pɑ́ guŋ mcwə awɛ, bi a pɑ́ po ghə nwə pɑpuŋ bi pú. Tə́ sɔ' m nə m pɑ lə ghɔ pəmtə pɑ pɑ́ guŋ mcwə awɛ pɑ́.

⁸ Ywə yə a kɑ́ bɑ bi a pɑ́ e ghə a, ě ghə̀: A po'o bɑ ě ləŋdzə jwɔ' pfə á tə pu la' nthəŋ a.

⁹ Gɑ̌ siŋ wɔ kwa' nyənyɔ gɑ́ nə gùŋ mtsʉ' awɛ myə pu gɔ la' siŋ Cùŋ pɑpuŋ nə́ nthʉm dzʉ́ a, pu gɔ la' pɑ ghɔm ywə yə é gə a nə kamtə é.

Pa' Yuda nthɛmnɛ nə Yeso a

¹⁰ Yuda Iskariɔt, mu' mo nə pɔ shwɔppʉə mgham lə ghɔ̌ jɔ mkamsi gwyəgwyə nə hɑ Yeso bi pú.

¹¹ Wap lə nə yu' po'o, ŋwɛnyə, ŋkha' gɑ wap gɔ hɑ ŋkhap bi e. Yuda pɑ shəŋ cwəlɔ pa' e gɔ ghə tə hɑ e bi pú kwa' nə cwə pɑpúŋ a.

Nə nyaptə Paska

¹² A lə pɑ̌ nə dəŋdzə tyɛ'dzʉ msɛ tə kwɔ' msɛ̌, tyɛ'dzʉ́ yə pu lə jwə po jʉ̀jʉ̀ nə Paska a, pɑkhʉ̌ Yeso ghɔm bi e gɑ: Ǒ wə shə́ŋ gɑ́ pyə ghɔ nyaptə tsʉ' m hɑ o nə dzʉ́ Paska?

¹³ E lə tə̌m shɑ pɑkhʉ̌ pyə pɑpʉə, gɔm bi pu gɑ: Po ghɔ tisuŋ; po a mu' mbɛ gɔ yu'tə bɑ ě kwa ghʉɔ shyə.

¹⁴ Po yap jʉm e, biŋ tsʉ' yə ě ko nə a po ghɔm bi gɛ lǎ' bɔ gɑ: Tá ghɔm gɑ: Twɔ'dyə́ a yə gɑ̌ gɔ tsʉ́ Paska nə, pyə a pɑkhʉ̌ pɑ̌ a hɑ?

¹⁵ E gɔ la'tə wɔ ta' twɔ'dyə̌ zhəŋ thə́ bɑ ǎ ghyɛ'nyə, tsə dyə pɑ nthʉm o, bɑ pu nyaptə. A tsʉ' yə po gɔ nyap gùŋ ywə awɛ nə́ bi pɑ á.

¹⁶ Pɑkhʉ̌ pyə lə lǔ gɔ tisuŋ, ŋkho jɔ guŋ ywə awɛ pa' e la' gɔm a, biŋ nyaptə tsʉ' yə wap gɔ tsʉ́ Paska nə a.

Yeso siŋ gɑ pu tɛ́mnɛ́ myə́

¹⁷ A lə pɑ̌ bwadzʉ̌, Yeso sɔ' pu a pɑkhʉ̌ pyə́.

¹⁸ Pu a pu lə pɑ̌ tɑpe bɑ́ dzʉ́ ywə, e lɑ ghɔ̌m gɔm gɑ: Kwa' nyənyɔ gɑ̌ siŋ wɔ gɑ mu' mo nə po gɔ̀ hɑ á, mo yə pyə̀ e wə dzʉywə a.

¹⁹ Sə́ guŋ yap awɛ lə fǐ', bǎ ya mo lə nə pú pɑ gɔm bi e gɑ: A bɑ a?

²⁰ E ghɔm bi pú gɑ: A mu' mo nə pɔ shwɔppʉə mghǎm yə pyə e gɔ pəmtə́ nyəŋ pu nthʉm kɛ a.

²¹ Nə pa' Mu mo gɔ ghɔ pɑ́ pa' pu lə və nə é a; tə́ ghəghʉɔ bi mo yə pu gɔ cyə m nə e tə hɑ Mu mo a. Dzə lə́ bɑ bi mo bɔ gɑ pu kɑ tsə é.

Nə tʉ ywə tsʉ́ dɔlɔ̌

²² Wap lə pɑ̌ dzʉywə e pé msɛ̌ nyəŋ byanyə nə́ bo' hɑ bi pu gɔm gɑ: Yə̌ŋ bɑ́ bap nɑ́ a.

²³ Biŋ ŋkwa nthu', go'tə Si nə hɑ bi pu, wap nwə guŋ yap awɛ.

²⁴ E ghɔm bi pu gɑ: Yə̌ŋ bɑ mcyə́ mə̌, mcyə kɔ myə pu pfyə nə thə́ pɔ jɔmyɔ̌m a.

²⁵ Kwa' nyənyɔ gɑ̌ siŋ wɔ gɑ́ ŋ tə́ gɔ la' tə kwi' nwə́ mɔ mlù' nthɔm mthə pɑ tə kəm tyɛ'dzʉ yə gɑ̌ gɔ la' piŋ nwə m sə́ nthʉm Nəfo Si a.

Nə siŋ gɑ Pɛtrɔ gɔ kəŋnyə e

²⁶ Wap lə miŋ nə zhwɔp mzhwɔp gho'tə̀ nthəm gɔ kúŋ mthə́ Olivə.

²⁷ Yeso ghɔm bi pú gɑ: Guŋ yɔ awɛ, pǒ gɔ vʉtə si nə pa' bɑ pu lě bvə gɑ: Gɑ̌ gɔ sɔ' cwɔ' byap dzə, mjʉ̀jʉ̀ sɛtə́.

²⁸ Da' gɑ́ gɑ̌ gɔ cwə tə yám nə vʉ̌, tamdzə̌ po Galilea.

²⁹ Pɛtrɔ ghɔm bi e gɑ: Wap vʉtə pɑ wɛ bɑ ŋ tə́ gɔ vʉ pɑ́!

³⁰ Yeso ghɔm bi e gɑ: Kwa' nyənyɔ, gɑ siŋ o, kwa' wə̀, mtsʉ' tyɛ' ɔ, ko' gɔ nə tǔŋ mcʉm bʉ̌ə, bɑ ǒ kəŋnyə a mcʉm nthá.

³¹ Da' gɑ́ Pɛtrɔ cəŋtə biŋ gɑ́: A pɑ pɑ́ gɑ pu gɔ pəmtə́ pfʉ́, bɑ pɑ ŋ də kəŋnyə́ o. Ba guŋ yap awɛ lə bɑwə gɔm pɑ po'o.

Yeso Gətsemane

³² Wap lə ŋwak nthʉm mu' pé yə pu ŋkhe gɑ Gətsemane a, Yeso ghɔm bi pɑkhʉ̌ pyə gɑ: Po cwə́ tsɔ'ɔ gɑ shwyɛ'nyə Si.

³³ E lə lɑ̌ Pɛtrɔ, Yakop ba Yohane pu a pu ghɔ. E lə tǒ' nə pwɔk, bɑ jwiŋ.

³⁴ Gɔm bi pu gɑ: Lam tsɑ̌ wə jwiŋ tə bɑ pɑ vʉ̌. Po cwə tsɔ'ɔ bɑ di tə tì.

³⁵ E lə na' gɔ dzə̀, bvʉsi biŋ bɑ shwyɛ'nyə Si gɑ a pɑ gɑ́ pɑ cwə bɔ cyə m gʉ́ə sʉəsʉə nə e.

³⁶ E lə bɑwə gɔm gɑ: Aba, Ta, sɔmywə tə shyə o pɑ́, ghɔ́ bak nthu' yəŋ nə m̀. Tə́ tə ywə yə myə̀ nə shəŋ a pɑ́, ywə yə wə nə ŋkhuŋ a!

³⁷ E lə sɔ̌' biŋ jɔ wap, wap pɑwə di; e ghɔm bi Pɛtrɔ gɑ: Simon o wə di tsʉ̌! O ka ghə bǎ gʉ' nə di tə tì nə ta' nam yɑmu'.

³⁸ Po ti tə ti, bɑ shwyɛ'nyə Si po'o gɑ po kɑ vʉ̀ nə tʉɔ mləŋtə̀. Zhwenyə wə bɑ ě ghə kaktʉɔ, da' gɑ́ bapnɑ pwá.

³⁹ E lə kwi' du bəŋ pu gɔ ŋkwi' shwyɛ'nyə Si gɔm pɑ́ ywə yə e la' jì gɔm a.

⁴⁰ Biŋ ŋkwi' nə sɔ' wap pɑwə di, nə pa' lwɔk lə bɑ ǎ lo nə mnyə map a. La' wap zhyə ywə yə wap gɔ ghɔm bi e a.

⁴¹ E lə pǐŋ sɔ' batə mcʉ̌m nthá, gɔm bi pu gɑ: Po ti nə gɔ dzə̀ bɑ hwitə́. Nwə mì. Cwə̌ ku'. Yɔ, pu hɑ Mu mo nə́ bǔ pɔ cwəpuŋ.

⁴² Po lúsi! Pɑ ghɔ̌! Yɔ! Mo yə e hɑ a wə sɔ'.

Nə ghəm Yeso

⁴³ E lə pɑ gɔm po'o, pɑ cwə o cwə o Yuda mu' mo nə pɔ shwɔppʉə wuŋ ŋwak pu a msə̌ŋwi bɑ wap wim mnyə́ mcɔk pu a mwya; bɑ mkamsi gwyə́gwyə́ pu a pɑ zhyə mco' ba mghətso nə nthəm wap.

⁴⁴ A lə bɑ́ pu a mo yə e lə bɑ́ gɔ hɑ e a nyaptə, e ghɔm bi pu gɑ: Mo yə gɑ gɔ núŋ mgho' myə́ a po zhyə gɑ́ a yʉ́, po ghəm e, dɑ e nə gɔ.

⁴⁵ E lə wuŋ ŋwak gɔm gɑ: Rabi! Biŋ núŋ mgho' myə́.

⁴⁶ Pyə shɑ pɔ yap bǔ nə e, gəm e.

⁴⁷ Mu' mo nə pɔ pyə wap lə bɑ́ tsʉ'u a, té nyə́ e nə nɔk gɛfa' ŋkhamsi gwyə, ja' tə́ŋ e.

⁴⁸ Yeso lɑ ghɔ̀m gɔm bi pu gɑ: Pǒ lɑ mnyə pu a mwya nə sɔ' nə ghəm a pa' pu gɔ nə samshwə a.

⁴⁹ A kɑ bɑ́ guŋ mtyɛ'dzʉ́ awɛ bɑ́ cəcɑ̌ po, bɑ Dyə Si, bɑ ji'tə́ wɔ, po lə ghəm a. Da' gɑ a bɑ po'o tə ywə yə pu lə və á a pəmtə́.

⁵⁰ Guŋ pɔ awɛ lə wa' e ŋkhǔ.

⁵¹ Mu' mú səm da' pak dzə nə pɑ nə e lə yap jʉm e, pu ghəm e.

⁵² Da' gɑ e tak pak dzə e bi pú ŋkhʉ̌ kəcyəŋ e.

Yeso dzə Sanedrɛŋ

⁵³ Wap lə lɑ̌ Yeso gɔ ywə ŋkhamsi gwyə́. Mkamsi gwyə pu a mghətso ba pɑ zhyə́ mcò' lə cu'tə guŋ yap awɛ.

⁵⁴ Pɛtrɔ lə yap jʉ̌m pú, tə́ bɑ giŋ tə gʉə sʉəsʉə, gɔ tə ŋkhəm la' ŋkhamsi gwyə. E lə cwə̌ cəcɑ̌ mghɛ fa', bɑ jwɔk mɔk.

⁵⁵ Mkamsi gwyəgwyə pu a gùŋ Sanedrɛŋ awɛ lə bɑwə shəŋ ywə yə pu gɔ ghɔm nə Yeso tə nə ya' shɛ é gɑ pu zhwə e a, pu lə yɔ.

⁵⁶ Nə pa' pɔ jɔmyɔ̌m lə bɑwə sɔ' gɔm nthinthi mnwə nə é, da' gɑ́ a pɑ́ mcwanwə nə pa' a la tə bɑwə hwənyə pɑ́.

⁵⁷ Shɑ pɔ lə lǔsi bɑ nthʉ́ nwə thə́ e bɑ gɔm gɑ:

⁵⁸ Pyə lə yu' pa' e gɔm gɑ: Myə̀, gɑ̌ gɔ sa'tə Dyə Si yəŋ yə́ pu lə lɑ bú ŋkwɑ a, piŋ kwɑ́ mu' nə tyɛ'dzʉ́ tsɑ ta yə a tə́ gɔ pɑ́ fa' bú mo a pɑ́.

⁵⁹ Tə́ ba tə po'o, wap la tə pɑ́ ŋkwishwə nə mghɔm map.

⁶⁰ Ŋkhamsi gwyə́ lə lǔsi cəcɑ̌ cu'tə pɔmnəŋ həŋtə́ Yeso gɑ: O tə́ ba' sɔmywə nə mnwə mɔ myə pu gɔm nə o a pɑ a?

⁶¹ Da' gɑ e lə ghɔm sɔmywə, e lə pa' sɔm nwə̀. Ŋkhamsi gwyə́ lə kwi' həŋtə́ e gɑ: O bɑ́ Kristo Mú Si byanyə a?

⁶² Yeso ghɔm bi e gɑ: Gɑ̌ bɑ e. Pǒ gɔ yɔ́ Mú mo bɑ ě cwə nə ghəŋ tʉɔ Si Nthʉɔtʉɔ, e sɔ' nthʉm mlwa fɑ kɛbəŋ.

⁶³ A lə pɑ̌ po'o ŋkhamsi gwyə́ khi dzə́ e gɔm gɑ: Pɑ̌ biŋ bɑwə shə́ŋ ya nthi ŋkwǐnthɛ?

⁶⁴ Pǒ yu' mcap. Pǒ yɔ gɑ kɑ̀? Guŋ yap awɛ lə nyə̌ŋ shɛ́ thə́ e gɑ́ ě ku' pa' bi a pɑ pu zhwə é a.

⁶⁵ Shɑ pɔ lə to' nə́ thə́tə mtǐ nə e; bɑ sam sə́ e, biŋ bɑ shwɔ é lə bɑ gɔm gɑ: Tú mo yə e shwɔ o a. Mghɛ fa' lə lɑ̌ mfé nə dɑ e.

Pɛtrɔ kəŋnyə Yeso

⁶⁶ Pa' Pɛtrɔ lə bɑ zhəŋ si shwədyə̌ a, mu' gɛfa' ŋkhamsi gwyə yə mjwǐ lə sɔ̌',

⁶⁷ jɔ Pɛtrɔ e pɑwə jwɔk mɔk, e lé é gɔm bi é gɑ: Ba wə yǔ, po yə́ Nazarɛt, Yeso nə bɑ!

⁶⁸ Da' gɑ Pɛtrɔ kəŋnyə gɔm gɑ: Ŋ ka zhyə́, ŋ də nəŋ bɑwə ju' ywə yə ǒ wə gɔm a. E lə ghɔm po'o nthəm gɔ m jʉ̀m dzʉ̌ nə shwədyə̌, shwə tsʉ' u.

⁶⁹ Gɛfa' mjwǐ lə pǐŋ ŋkwi' jɔ e biŋ gɔm bi pɔ pyə́ wap lə bɑ tsʉ'u a gɑ: Mo yə́ gɑ bɑ mo yap.

⁷⁰ Da' gɑ Pɛtrɔ kwi' ŋkhəŋnyə. A lə nə cyə mu ywə pɔ pyə wap lə bɑ tsʉ'u a piŋ gɔm bi Pɛtrɔ gɑ: Ǎ nyənyɔ gɑ o bɑ mo yap, o bɑ́ ba yə Galilea.

⁷¹ Da' gɑ Pɛtrɔ to' nə kɔ mkɔ bɑ gɔm gɑ́ ŋ ka zhyə bɛ bɔ yə pǒ gɔm e a.

⁷² E lə pɑ̌ gɔm po'o ko' wuŋ nthuŋ nə batə mcʉ̌m bʉə. Pɛtrɔ piŋ ŋkhamtə́ ghɔm tsyə́ Yeso la' gɔm bi e a gɑ́: Ko' gɔ nə tǔŋ mcʉm bʉə bɑ ǒ kəŋnyə a mcʉm ntha. E lə wuŋ nthəm cwəlɔ bɑ dɔ̌.