MARKUSI 13 - Ghomala New Testament

Yeso siŋ gɑ́ pu gɔ sɔ' sa'tə Dyə Si

¹ Cwə yə Yeso lə pɑ̌ nthəm Dyə Si a, mu' mukhʉ́ é ghɔm bi e gɑ: Ta yɔ də́ŋ mwɔ', yɔ dəŋ pa' pu ŋkwɑ́ ywə.

² Yeso ghɔm bi e gɑ: Ǒ yɔ tsə́ gwyəgwyə tsɑ́ tsyə pu ŋkwɑ́ a! Sɔm gwɔ' tə gɔ sɔ' cwə dəm sɔm pɑ̀. Pu gɔ sɔ' sa'tə guŋ e awɛ.

³ Yeso pu a Pɛtrɔ, ba Yakop, ba Yohane pu Andreya lə cwə dəm kuŋ mthə Olivə, dzə̌ Dyə Si, tsʉ' tsiŋ wap həŋtə e gɑ:

⁴ Siŋ wɔk cwə yə nwə bǎ gɔ sɔ' sɔ' a, ba mtiŋ myə a gɔ sɔ' la'tə gɑ tsə bǎ gɔ mi a.

Cwə nə to' gǒ'

⁵ Yeso to' nə ghɔm bi pu gɑ: Po pɔmtə gɑ sɔmmo kɑ́ ghə po hɔ́jyə̀,

⁶ bo'gwyə pɔ gɔ sɔ' lɑ tso tsɑ̌ sɔ', pɑ ghɔm gɑ: A bɑ a, ghə̌ pɔ jɔmyɔ̌m hɔ́jyə̀.

⁷ Po gɔ sɔ' yu' shù, pu pìŋ bɑ gɔmnwə nə shù. Po kɑ pwɔk. A puŋ gɑ tsə bɔ təm awɛ, da' gɑ a lə wuŋ bɑ nə mìŋ.

⁸ Nə pa' mu' guŋ gɔ sɔ' pɑ lo' yə mu' guŋ. Mu' Nəfo pɑ do' tsyə mu' nəfo. Cǎ' pɑ shʉ'nyə́ nə mtsʉ' jɔmyɔ̌m. Kəya' pɑ jɛ́; a gɔ sɔ' pɑ pɑ́ nə to' go' nə dzə́.

⁹ Po pɔmtə́. Pu gɔ sɔ' pɑ hɑ wɔ nə mdyə́ fyɛ' pu a msinagogə, pu pɑ shwɔ wɔ, bɑ fyɛ' wɔ dzə̌ mgɔpna' pu a mfomfo po'o nə thə́ a. A pɑ mtiŋ nə ŋkwithɛ bi pu.

¹⁰ Nə pa' a bɑwə shəŋ gɑ pu ləŋdzə siŋ Cùŋ pɑpuŋ bi gùŋ mgùŋ awɛ.

¹¹ Pu sɔ' bɑ dɑ́ wɔ nə gɔ m nə hɑ po'o, ka lam tsɔ wuŋ sɔ́ nə ywə yə pǒ gɔ kó ghɔm a; nə pa' ywə yə pu gɔ sɔ' hɑ bi po cwə o bɔ a, po ghɔm ya bɔ; nə pa' tə wɔ nə gɔ sɔ' ghɔm pɑ́, Zhwenyə Dɔlɔ̌ nə gɔ sɔ' ghɔm nə yɔ tsʉ'.

¹² Fɑ́ gɔ sɔ' hɑ fɑ́ nə vʉ̌. Ǎ ta hɑ mú nə vʉ̌; pǒ gɔ sɔ' fɛjʉ́m pɑ tsə́ wap ghə pu zhwə wap.

¹³ Guŋ pɔ awɛ gɔ sɔ' pɔ wɔ nə tso tsɑ̌. Tə́ mo yə ě tɔm tə nə miŋ a gɔ sɔ' vɔk.

Mɑ́ ghəghʉɔ

¹⁴ Po sɔ' jɔ́ Bɔkbɔ́k zhwìŋ nə tsʉ' yə e ka tə́ bɑ gɔ pɑ́ nə a pɑ: mo yə ě wə ŋkhe a cəŋtə ju' a: a sɔ' tə bɑ po'o, pɔ pyə wap Yudea a khʉ̌ gɔ dəm mkúŋ;

¹⁵ mo yə ě gɔ sɔ' pɑ m̀ zhəŋ dyə thə́ a kɑ fi'si, e kɑ nə̌ŋ ŋkho dyə é nə pe ywə.

¹⁶ Mo yə ě gɔ sɔ' pɑ m pé a kɑ pɑnyə jʉ̀m nə lɑ dzə e.

¹⁷ Ghəghʉɔ pɑjwǐ tsʉ̌m pu a mmʉə po nə tyɛ'dzʉ́ bɔ!

¹⁸ Po cwyɛ'nyə Si gɑ a kɑ sɔ' bɑ ŋkhàp ŋʉm.

¹⁹ Nə pa' mtyɛdzʉ́ bɔ gɔ sɔ' pɑ mtyɛ' ghəghʉɔ yə a la m bɑ tə fɑ pa' Si lə la' nyaptə dzʉ a tə ŋkhəm tyɛ' ɔ, a lə nəŋ bɑ gɔ la'tə piŋ pɑwə pɑ́.

²⁰ A ka pɑ́ gɑ́ Cyəpɔ ghə gɑ tyɛ'dzʉ bɔ sɔ' shwanyə cwanyə a, bɑ sɔmmo tə gɔ sɔ' vɔk pɑ́. Da' gɑ a cyə m nə pɔ̀ pyə e lə cwɔ' wap a e ghə gɑ mtyɛ'dzʉ́ bɔ sɔ' shwanyə.

²¹ A pɑ́ po'o, bi a pɑ mo ghɔm bi po gɑ Kristo m tsɔ'ɔ, kɑ m gɑ é m tsi' é lə ka po piŋ.

²² Pɑ mkristo nə fʉtə pu a pɑ mghɔm ghɔm Si nə fʉtə gɔ sɔ' təm jyəjyə̀, pɑ ghə mtíŋ pu a nthinthi msya, nə ghə pɔ jɔmyɔ̌m hɔjyə, ba shɑ pɔ pyə pu lě shi wap a.

²³ Tə́ sɔ' m nə po, po pɔmtə́ nə pa' gɑ̌ siŋ wɔ gùŋ ywə awɛ.

Pa' Mú mo gɔ sɔ' a

²⁴ A gɔ sɔ' pɑ nə mtyɛ'dzʉ bɔ, tə bɑ ghəghʉɔ yə̌ŋ cyə, a nam sonyə́, mɑŋwə́ pi,

²⁵ msɛ́ to' nə pɑ fɑ kɛbəŋ bvʉtə́ si, mtʉ̀ɔ kɛbəŋ cʉ'nyə́.

²⁶ A pɑ́ po'o pú yɔ Mú mo e sɔ' nthʉ́m mlwa, nthʉ́m guŋ mtʉ̀ɔ awɛ pu ghu'tə.

²⁷ A pɑ po'o, é tə́m pɑ aŋgəle wap ghɔ nə guŋ dzʉ mghəŋ pfʉ̀ə awɛ nə dhə́ sicǎ' ba m nə dhə kɛbə̀ŋ, shu'tə pɔ pyə́ pyə e lě shi wap a.

Ywə yə thə nthɔm thə da'tə a

²⁸ Po yu' fó' yə̌ŋ yə gɑ̌ dɑ nə́ thə nthɔm thə́ a. Bú myə́ shwə tə ntwɔp, tə mhwə pɑ nthəm nə́, po zhyə gɑ́ cwə dzʉ́ pɑpúŋ wə sɔ̌'.

²⁹ A dəŋdəŋ po'o tə ba wɔ la'tə jɔ mnwə bɔ sɔ̌', po zhyə gɑ Mú mo ghɔptə́, gɑ ě jyədyə̌ po.

³⁰ Kwa' nyənyɔ gɑ̌ siŋ wɔ gɑ pɔ nə yəŋ wɔ̌dzʉ́ tə gɔ cyə tə gúŋ mnwə bɔ awɛ sɔ' pɑ́.

³¹ Kɛbəŋ pu cǎ' gɔ sɔ' mi, tə mghɔm mə tə́ gɔ sɔ' mi pɑ́.

³² Da' gɑ́ sɔ' m nə tyɛ'dzʉ́ bɔ, kɑ cwə dzʉ̌ bɔ̌ lə, sɔmmo ka zhyə, ba pɑ aŋgəle kɛbəŋ, ba Mú, tə ně da' Tá.

Po ti tə tǐ

³³ Po pɔmtə́, po ti tə tǐ nə pa' po ka zhyə cwə yə́ a gɔ sɔ' pɑ yá a.

³⁴ A shwə pa' mu' mo yə e gɔ m tə́m a: E nə ghɔ nthak la' tsyə, hɑ fa' bi mghɛ fa' pyə, biŋ jap byap jyədyə̌ gɑ e pɑ byap tə tǐ.

³⁵ Po ti tə tǐ nə pa' po ka zhyə cwə yə gɛ lǎ' gɔ sɔ' a: Kɑ bwadzʉ̌, kɑ tə́ŋ mtsʉ̌', kɑ cwə yə ko' nthuŋ, kɑ fɔkdzʉ̌ lə.

³⁶ Po pɔmtə gɑ e kɑ vo'nyə wɔ vo'nyə, nə sɔ' po pɑwə dí.

³⁷ Ywə yə gɑ̌ gɔm bi po a, gɑ gɔm bi gùŋ pɔ̀ awɛ: Po ti tə ti.