LUKASI 24 - Ghomala New Testament

Yeso yam nə vʉ̌

¹ A lə pɑ̌ nə dəŋdzə tyɛ'dzʉ nə gapdzʉ, kwa' mɑfɔkdzʉ̌ pɑjwǐ bɔ ghɔ thəsì pu a mwɑ myə wap lə nyaptə a.

² Wap lə yɔ bɑ pu keŋnyə gwɔ' dzə thəsì,

³ wap ko nthʉm o, da'gɑ la' wap yɔ pfə Cyəpɔ Yeso.

⁴ Pa' nwə lə pɑ̌ shyə wap a, wap wuŋ nə yɔ jɔ pɔ pɑpʉə dzə pu bɑ wap kwa dzə dəŋnyələŋnyə.

⁵ Wap lə pwɔk shʉ m sǐ; da' gɑ pɔ bɔ ghɔm bi pu gɑ: Nwə kɑ po cəŋ mo nthʉɔ cəcɑ̌ mpfə pɔ́?

⁶ E tə tsɔ' pɑ, é bɑ e yam. Po kamtə nthi pa' e lə nə gɔm bi po cwə yə e lə jɑ Galilea a.

⁷ Pa' e lə gɔm gɑ: A puŋ gɑ pu hɑ Mú mo nə bǔ mghɛ bo, pu kwé e thə́ bɛnyəpɛnyə, e yám nə batə tyɛ'dzʉ yɑtá.

⁸ Wap lə kamtə mghɔm myə́.

⁹ Wap lə fɑ̌ thəsì cwəlɔ, siŋ guŋ ywə awɛ bi pɔ shwɔp yɑmu' mgham ba m bi guŋ pyə shɑ pɔ awɛ.

¹⁰ A lə bɑ Maria Makdala ba Yohana, bɑ Maria ma Yakop. Pyə shɑ mso pap lə ko siŋ mghɛ nthəm.

¹¹ Mghɔm bɔ lə pɑ nə mnyə́ map bɑwə hwə a tsə yɔjʉm, la' wap piŋ ywə yə pɑ jwǐ gɔm a.

¹² A lə pɑ po'o Pɛtrɔ lusi ŋkhʉdʉ gɔ thəsì bɔnyə jɔ pɑ mbak dzə́. Nə ghɔ nə yə ghəŋ nwə pɑ shyə é nə ywə yə a nthəm a.

Məjyə Emaʉs

¹³ A lə piŋ bɑ pɑ tyɛ'dzʉ bɔ, shɑ pɔ pɑpʉ̌ə cəcɑ̌ pu pɑ gɔ m nə mu' guŋ yə pu ŋkhe gɑ Emaʉs nə nthə́ jyə mnam mɑbʉə nə ghɔ Yerusalɛm.

¹⁴ Giŋ bɑ gɔm nwə nə mnwə bɔ myə a kɑ təm a cəcɑ̌ pu.

¹⁵ Pa' wap lə pɑ gɔm lə fəŋnyə́ a, Yeso pɑ kwa' yʉ́ lə kwyatə wap, pu a pu pɑ cʉ̌m jyə.

¹⁶ Da' gɑ bɑ mnyə map cɑnyə nə zhyə e.

¹⁷ E lə ghɔm bi pu gɑ: Yə po giŋ fəŋnyə dəŋ po'o a bɑ kɑ? A lə pɑ̌ po'o wap tiŋnyə bɑwə shʉ cwəpuŋ.

¹⁸ Mu' mo nə pú, tsó tsyə́ pɑ Kleopas pa' bi e gɑ: Ja o da' mo yə e Yerusalɛm nə tyɛ'dzʉ yəŋ gɑ, bɑ e ka zhyə́ mnwə myə a shyə a lə?

¹⁹ E həŋtə wap gɑ: A kɑ? Wap pa' bi e gɑ: Nwə nə Yeso yə Nazarɛt yə e lə bɑ gɛ ghɔmnwə Si, bɑ e tʉɔ nə mfa' myə́, ba nə ghɔm tsyə dzə Si ba m dzə guŋ pɔ awɛ,

²⁰ pa' mkamsi pɔk pyə gwyə, ba mtadyə pɔk kɑ hɑ e nə vʉ̌, ŋkham e thə bɛnyəpɛnyə a.

²¹ Bɑ pyə lə́ bɑwə ŋkwɛ gɑ e lə bɑ mo yə e lə́ bɑ gɔ kwi Israɛl a. A piŋ bɑ po'o bɑ pa' mnwə bɔ təm a a cwəlɔ mtyɛ'dzʉ mɑntha',

²² bɑ shɑ pɑjwǐ pyə pyə a pu bɑ a kě sɔlam tsɔk, nə pa' wap kɑ ghɔ thəsì mɑfɔkdzʉ̌

²³ biŋ ŋkho wap lə yɔ pfə e, sɔ' gɔm gɑ pɑ aŋgəle ŋwak bi pu, gɔm bi pu gɑ e bɑ pɑwə.

²⁴ Shɑ mso pɔk kɑ ghɔ yap thəsì, ŋkho jɔ ywə yə pɑjwǐ kɑ ghɔm a a pɑ́ nyənyɔ da' gɑ la' wap yɔ e.

²⁵ Yeso ghɔm bi pu gɑ: Pɑ tə ghə zhyənwə, tʉ̌m bɑ́ ǎ tsonyə nə piŋ nwə yə mghɛ ghɔm ghɔ̀m Si lə ghɔm a!

²⁶ Kristo la tə bɑ gɔ yɔgo' po'o tə ko nə ghu'tə e a?

²⁷ E lə piŋ ntho' nə Mosɛ, ba nə guŋ mghɛ ghɔm ghɔ̀m Si awɛ, bɑ nthutə ywə yə a lə bɑwə dé e a nthʉm gùŋ Mŋwa'nyə awɛ.

²⁸ Wap lə ghɔ̌ tə bɑ ŋkhəm bəŋ guŋ yə wap lə gɔ m nə a, Yeso ghə pa' e shyəcyə a,

²⁹ wap cwyɛ'nyə gɔm gɑ: Pɑ cwə, nə pa' bwadzʉ wə sɔ̌', bɑ ya'dzʉ̌ cyə. E lə ko nthʉm tisuŋ bɔ nə cwə.

³⁰ Cwə yə pu a pu lə pɑ tɑpe a, e pé msɛ, nyəŋ byanyə nə, bo' hɑ bi pu.

³¹ Mnyə map ghyɛ', wap piŋ jyə́ e, e wuŋ bi dzə̌ pú.

³² Wap ghɔm cəcɑ̌ pu gɑ: Tʉm tsɔk pu katə bɑwə ŋkhə nthʉm o məjyə cwə yə e la' bɑwə nthútə ŋwa'nyə bi pu a?

³³ Wap lə wuŋ gɔ pɑ cwə o bɔ, bɑnyə Yerusalɛm jɔ pyə shɑ pɔ shwɔp yɑ mu' mgham, bɑ wap cu'tə pu a pyə shɑ mso pap

³⁴ wap ghɔm bi pu gɑ: A bɑ nyənyɔ, Cyəpɔ bɑ e yam nə vʉ̌, nə pa' a bɑ e ŋwak bi Simon.

³⁵ Wap piŋ siŋ wap yap ywə yə a la' shyə məjyə a, ba pa' e la' bo' msɛ wap zhyə́ e a.

Yeso ŋwak bi pɔ shwɔp yɑmu' mghǎm

³⁶ Wap lə pɑ̌ gɔm po'o, kwa' yʉ́ ŋwak bi pu gɔm gɑ: Hwitə pɑ́ bi po.

³⁷ Wap cwɔ', ŋkwɛ gɑ wap yɔ ghɛnyə́ mo.

³⁸ E ghɔm bi pu gɑ: Nwə kɑ́ nwə va' wɔ̌? Nwə kɑ po kwɛ yɑ nthi nwə nthʉm tʉm pǒ?

³⁹ Po yɔ bu mə̌ pu a mkwə mə̌. A bɑ pɑ kwa' myə̀. Po kwak a, po le a tə́ jɔ, zhwenyə tə bɑ ě ghə bapnɑ pu a mkwě pa' po wə jɔ bɑ gɑ̌ ghə a pɑ́.

⁴⁰ E lə nə ghɔm po'o da'tə bu myə́ pu a mkwə myə́ bi pu.

⁴¹ Pa' ŋwɛnyə lə́ bɑ nə pu tə la' wap wuŋ biŋ a, nwə yɑwə shyə wap cyə a, e lɑ ghɔm bi pu gɑ: Po ghə ywə pfɑpfɑ̀ si tsɔ' a?

⁴² Wap lə hɑ po' bapgu nthoto bi e,

⁴³ e lə kwǐ pfɑ pɑ dzə̌ pu.

⁴⁴ Biŋ gɔm bi pu gɑ: Yə̌ŋ bɑ ywə yə ŋ də ghɔm bi po cwə yə pɑ lə bəmtə bɑ a: Ywə yə pu lə və nə m̀ nthʉm mco' Mosɛ, nthʉm ŋwa'nyə mghɔm ghɔm Si, ba nthʉm mzhwɔp dɔlɔ̌ a pəmtə.

⁴⁵ A lə pɑ po'o e ghyɛ' zhyə̌nwə yap nə́ nə̀ ju' ywə yə pu lə və a.

⁴⁶ Biŋ gɔm bi pu gɑ: A bɑ pa' pu lə və a: Kristo gɔ sɔ' yɔgo', yam nə vʉ nə batə tyɛ'dzʉ yɑtá.

⁴⁷ Pu pɑ dɑ tso tsyə́ gɔm nwə pʉɔtʉm ba nwə nə lɑ mhɔnwə pɔmnəŋ shwyɛ' wap bi guŋ mguŋ awɛ tə ntho' fɑ Yerusalɛm.

⁴⁸ Po nə̌ŋ bɑ mkwinthɛ nə.

⁴⁹ Sɔ' m nə m, gɑ gɔ təm ywə yə Tá a lə ka'nyə a bi po. Sɔ' m nə po, po cwə pɑ nthʉm tisuŋ tɑ̌ tʉɔ fɑ́ thə́ kɛbəŋ ŋkho nə po.

Yeso kwɔ' kɛbə̀ŋ

⁵⁰ E lə lɑ̌ wap gɔ tə ŋkho Betanya, bʉ' bu myə́ thə́, nyəŋ byanyə nə pu.

⁵¹ Cwə yə e lə pɑ nyəŋ byanyə nə pu a, hap nə pu, ŋkwɔ' m kɛbəŋ.

⁵² Sɔ' m nə pu, cwə yə wap lə ghamtə e a, bɑnyə m Yerusalɛm, nthʉm ŋwɛnyə.

⁵³ Wap lə biŋ bɑ guŋ mcwə awɛ bɑ pɑ Dyə Si bɑ gamtə Si.