LUKASI 1 - Ghomala New Testament

Mthə́ nwə

¹ Pa' pɔ jɔmyɔ̌m lə to' nə və mnwə myə a lə cyə cəcɑ̌ pɑ a,

² bvə ywə yə pyə lə yu' bi pɔ pyə wap lə́ bɑ́ si tə fɑ cwə nə to', jɔ nwə bɔ, shʉ' mghɛ ŋkwinthɛ̌ nə́, bɑwə dɑ mghɔm bɔ sa dzʉ á,

³ a lə́ puŋ gɑ́ ŋ de mnwə nə́ pa' a pɑ nyənyɔ tə fɑ nə zhitə a, tə́ bvə bu nə ŋkhɛ dəŋdəŋ, wə tá Teofilə,

⁴ tə o nə jyə́ nyənyɔ nə mnwə myə pu siŋ o gɑ o zhyə a.

Aŋgəle siŋ gɑ́ pu gɔ tsə Yohane gɛ nu' pɔ shyə

⁵ A lə pɑ̌ nə́ cwə yə Herode lə́ bɑ́ fo pɑ Yudea á, mu' ŋkhamsi pɑ wə tso tsyə pɑ́ Sakaria, e pɑ́ nə kam Abia. Jwi é lə́ bɑ́ gwya mo Aaron, tso tsyə pɑ Elisapet.

⁶ Wap lə́ bɑ́ pɔ dəŋdəŋ dzə̌ Si, bɑ giŋ nə mco' Cyəpɔ nyənyɔ bɑ́ gə pa' Si shəŋ a.

⁷ Wap lə́ bɑ wap ka wim mú, nə pa' Elisapet lə́ bɑ́ ŋkhíŋ, bɑ wap vò.

⁸ A lə kəm nə cwə yə yə́ kam pɔ Sakaria lə́ bɑ́ gɔ fa' fà' Si a,

⁹ nthuŋ tsʉ́ e pa' mà mkamsi lə́ bɑ́ cwə o bɔ a, gɑ́ yʉ́ nə gɔ ko nə tsʉ' yə pu ntho phə̀ damnyəlamnyə nə shwyɛ'nyə Si dyə Cyəpɔ a.

¹⁰ Guŋ pɔ awɛ lə́ bɑ́ dzʉ cwə nə to ywə nə shwyɛ'nyə Si bɑwə shwyɛ'nyə Si.

¹¹ Aŋgəle cyəpɔ lə ŋwak dzə̌ Sakaria, nthiŋnyə nə́ ghəŋ pu tʉ̀ɔ, bəŋ tuŋmɔk nə ntho ywə damnyəlamnyə.

¹² Sakaria lə nə yɔ e, lam tsyə sɔ, e pwɔk.

¹³ Aŋgəle ghɔm bi é gɑ: Kɑ́ pwɔk m Sakaria, Si bɑ ě yu' mcwyɛ'nyə mǔ; jwi o Elisapet gɔ sɔ' tsə ta' mu mbɛ bu, o ke tso tsyə gɑ́ Yohane.

¹⁴ O gɔ sɔ' ŋwɛnyə nə é te', ba bo'gwyə pɔ ŋwɛnyə yap nə cwə yə pu tsə é a.

¹⁵ E gɔ sɔ' pɑ́ mo gwyə́ dzə̌ Cyəpɔ. E tə gɔ sɔ' pɑ́ nwə mlu' pɑ, kɑ bǎ kɑ́ ywə́ nwə yə a fɛnyə mo a lə, é lə nwə́. Pu gɔ sɔ' nə tsə é bɑ Zhwenyə Dɔlɔ̌ lo nə é.

¹⁶ E gɔ piŋ sɔ' lɑ bo'gwyə pɑ Israɛl nə sɔ' dzə̌ Cyəpɔ Si yap.

¹⁷ E gɔ sɔ' pɑ ghiŋ nə zhwenyə, ba gʉ' Elia, dzə̌ Si, yáp kwishwə cəcɑ̌ mtǎ pu a po pap; ghə pɑ tə yu'shwə ghə́ zhyənwə pɔ nyənyɔ. Po'o gɑ́ wap cʉ' pɔ pyə pu nyaptə wap bi Cyəpɔ a.

¹⁸ Sakaria ghɔm bi aŋgəle gɑ: Gɑ̌ gɔ lɑ kɑ́ zhyə gɑ́ nwə yə o gɔm a, ǎ nyənyɔ? Gɑ̌ bɑ gɑ̌ vo, mgu'dzʉ jwi a piŋ bɑ́ bɑ ǎ ghɔ dzə.

¹⁹ Aŋgəle pa' bi e gɑ: Gɑ̌ bɑ́ Gapriya, gɑ̌ shwə bəŋ Si. E nthəm a gɑ sɔ' gɔm bu po'o, siŋ o yəŋ cuŋ pɑpúŋ.

²⁰ Cwəlɔ o gɔ zhi tə ghɔ̀m, o lə piŋ gɔm tə kəm tyɛ'dzʉ́ yə yəŋ nwə pəmtə a. Nə pa' ǒ tédʉ' nə ghɔm tsɑ̌ tsyə a gɔ sɔ' pəmtə a.

²¹ Pɔmnəŋ lə́ bɑ́ dzʉ́ byap Sakaria, nwə pɑwə shyə wap, nə tiŋ pa' e nə shwə tsʉ' to ywə a.

²² E lə təm dyə, bi a pɑ́ é lə ghɔmnwə jyə. Pɔmnəŋ zhyə gɑ e kodyə nə yɔ m nthʉm zhwenyə. E cʉ' bɑ gə pɑ nthinthi mtìŋ, shwə pɑ tə ghɔm.

²³ Myə́ mtyɛ' fa' lə́ mǐ, e pɑnyə la' é.

²⁴ A nə cwə muywə, jwi e Elisapet fə̀ŋ. Dʉmnyə nə mŋwə nthɔkə, bɑ gɔm gɑ:

²⁵ Si bɑ ě lɑ mnyə cɔmmtso dé a, nthé kuso nə m̀ dzə pɔmnəŋ.

Aŋgəle siŋ gɑ pu gɔ tsə̀ Yeso

²⁶ A lə pɑ̌ nə́ mŋwə nthɔkə, Si tə́m aŋgəle Gapriya nthʉm mu' tisuŋ Galilea, tso tisuŋ bɔ pɑ́ Nazarɛt,

²⁷ bəŋ mu' mú gò, bɑ mǒ ko nə é, tso tsyə́ pɑ Yosɛp, mo nə́ tuŋdyə́ David. Tsǒ gò bɔ lə́ bɑ́ Maria.

²⁸ Aŋgəle kodyə é gɔm gɑ: Ŋwɛnyə! Wə yə Si jɔ o pɑpuŋ a, po Cyəpɔ nə bɑ.

²⁹ Ghɔm tsɔ gɑ lə sɔlam Maria, tɑ e pɑ həŋtə gɑ: Yəŋ nthi ca'tə po'o bɑ́ da'tə gɑ́ kɑ̀?

³⁰ Aŋgəle ghɔm bi e gɑ: Kɑ́ pwɔk m Maria. O bɑ Si gho' o.

³¹ O gɔ pɑ tsʉ́m, tsə mú mbɛ, cwə̀ tso tsyə́ gɑ́ Yeso.

³² E gɔ sɔ' zhi tə', pu pɑ ŋkhe e gɑ Mú Si tə́ thə́ kɛbəŋ. Cyəpɔ Si gɔ sɔ' hɑ Nəfo tap e David bi é.

³³ E gɔ sɔ' pɑ́ fo mama nə gwya Yakop, yə nə sa' tə́ gɔ la' mi pɑ.

³⁴ Maria ghɔm bi aŋgəle gɑ: Yəŋ nwə gɔ cyə m gɑ́ kɑ tə́ pəmtə̌, nə pa' ŋ kha zhyə mbɛ a?

³⁵ Aŋgəle pa' bi e gɑ: Zhwenyə Dɔlɔ̌ gɔ sɔ' pɑ́ nə́ o, gʉ' Si thə kɛbəŋ pɑ pfɔptə o. A shyə m po'o tə́ mu yə o gɔ sɔ' tsə e á pɑ Dɔlɔ̌, pu pɑ ŋkhe é gɑ Mú Si.

³⁶ Zhyə gɑ́ fɑ o Elisapet yə a bɑ e vo a kě fəŋ tə ǎ wə́ bɑ́ mŋwə nthɔkə pa' e pɑ tsʉm á, yʉ yə pu lə́ ŋkhe é gɑ ŋkhiŋ mjwǐ a,

³⁷ nə pa' sɔmywə yə a cyə Si a, a tə̌ wə pɑ́.

³⁸ Maria ghɔm gɑ; gɑ̌ bɑ́ ŋkwɔ Cyəpɔ. Ywə yə o gɔm nə m̀ a pəmtə! Aŋgəle ghɔ.

Maria ghɔ wə́ Elisapet

³⁹ Maria lə lǔ pɑ́ cwə o bɔ, bʉɔ m gʉ̌' gɔ nə mu' tisuŋ Yudea

⁴⁰ ŋkho dyə Sakaria; sha'tə Elisapet.

⁴¹ Elisapet lə nə yu' ca'tə Maria, mú ŋaknyə vam é, e lonyə nə Zhwenyə Dɔlɔ̌.

⁴² E cwe tə thə́ gɔm gɑ: O bɑ mjwǐ byanyə cəcɑ̌ pɑ jwǐ, Mu yə e vam o a, pɑ mu byanyə.

⁴³ A shyə m gɑ́ kɑ̀ tə́ má Cyəpɔ a piŋ nə́ sɔ' bəŋ m̀?

⁴⁴ Nə pa' gɑ̌ nə yu' gi ca'tə o, mú a ŋaknyə vam m̀, ŋwɛnyə́.

⁴⁵ Buŋtsě bɑ́ mjwǐ yə e piŋ a, nə pa' ywə yə Cyəpɔ gɔm bi a gɔ sɔ' pəmtə.

Zhwɔpshyə Maria

⁴⁶ Maria ghɔm gɑ: Lam tsɑ ghamtə Cyəpɔ

⁴⁷ ba zhwenyə a ŋwɛnyə nə Si gɛvɔk a.

⁴⁸ E le ŋkwɔ e yə e fi' nɑ e hɑ si a; tə fɑ́ cwəlɔ guŋ pɔ nə guŋ mwɔ dzʉ awɛ gɔ ghɑ pɑ ke a gɑ buŋtse mjwǐ.

⁴⁹ Nə pa' Gʉ' gwyə bɑ e ghə msya nə m. Tsó tsyə bɑ dɔlɔ̌.

⁵⁰ Puŋnthʉm e bɑ́ nə pɔ pyə wap bwɔk e a mzhəŋ mzhə̀ŋ.

⁵¹ E lě dɑ gʉ' bu myə́ nə́ sa'tə mghɛ ŋa'nɑ.

⁵² E lě ŋkwɔktə mfomfo nə́ mkwɔ' map, ŋa' pɔ pyə wap fi' nɑ hɑ Si a hɑ thə́.

⁵³ E lě gə mghɛ jikǔ' cʉ́' pɑ ghə ywə, mghɛ ywə pʉɔ shʉ' mpəŋ.

⁵⁴ E lě ŋkwitə Israɛl ŋkwɔ e. E lě ŋkhamtə cɔmmtso e.

⁵⁵ Pa' e lə ka' bi mta pɔk pɑ Abraham, ba gwya e nə guŋ mcwə awɛ.

⁵⁶ Maria pu Elisapet lə cwə gwɛ a mŋwə tá. E pɑnyə la' é.

Nə tsə́ Yohane nu'pɔ shyə

⁵⁷ Cwə yə Elisapet lə bɑwə gɔ tsə́ a lə kǔ', e tsə́ mú mbɛ.

⁵⁸ Mghɛ dhə dyə pu a mfɑ pyə lə nə yu' gɑ́ Cyəpɔ cɔmmtso myə́, pu a pu ŋwɛnyə.

⁵⁹ A lə nə́ kəm tyɛ'dzʉ hɔ̌m pu sɔ' m nə́ vo mú, pu pɑ́ gɔ ké tso tsyə́ gɑ Sakaria, nə tsǒ tap e

⁶⁰ map e ghɔm gɑ: Pu gɔ ke é gɑ Yohane.

⁶¹ Pu ghɔm gɑ: Sɔmmo tə̌ nə́ tuŋdyə o tsó tsyə pɑ́ Yohane pɑ̀.

⁶² Wap lə lɑ mtiŋ həŋtə ta mú pa' pu gɔ ke tso mú a.

⁶³ Sakaria lə́ kwi tɑ̌fi ŋwa' nə gɑ: Tso tsyə bɑ Yohane. A zhʉ̌m pɔmnəŋ.

⁶⁴ Shwə é lə́ wuŋ gyɛ', tʉm é kyɛ' e to' nə ghɔmnwə, go'tə Si.

⁶⁵ Pɑ giŋnyə tsʉ'u pwɔk, pu pɑ shyanyə mnwə bɔ kuŋ Yudea awɛ.

⁶⁶ Bǎ wɑlə lə́ yu' nwə bɔ bɑ ŋkhamtə, lə́ bɑ gɔm gɑ: Yəŋ mú gɔ sɔ' pɑ́ m gɑ́ kɑ? Mtʉɔ Si cəŋtə bɑ nə e.

Zhwɔpshyə Sakaria

⁶⁷ Zhwenyə Dɔlɔ̌ lə lo nə tap e Sakaria e ghɔm ghɔ̀m Si gɑ:

⁶⁸ Byǎnyə bi Cyəpɔ, Si pɑ Israɛl, nə pa' e sɔ' ŋkwi pɔ pyə.

⁶⁹ E hɑ gɛvɔk pɔ bi pɑ, shyə nə́ tuŋdyə́ fo David ŋkwɔ e.

⁷⁰ Ywə yə e lə la' shyə m nə shwə mghɛ ghɔm ghɔ̀m tsyə́ cwə dzə̀ gɔm a,

⁷¹ ywə vɔk yə a ŋkwi wɔk pɑ bi mghɛ bo pɔk pɑ a.

⁷² E la'tə cɔmmtso e bi mta pɔk pɑ, ŋkhamtə kɔ tsyə pu a pu lə wɑ á, kɔ dɔlɔ̌,

⁷³ e ka' bi Abraham ta yɔk pɑ gɑ́

⁷⁴ cwə yə e gɔ sɔ' te wɔk pɑ dyə mkwɔ a pɑ pɑ́ fá' bi e tə pwɔk.

⁷⁵ Bɑ giŋ dzə e, dɔlɔ̌, dəŋdəŋ, nə guŋ mtyɛ'dzʉ vɔk mɔk pɑ awɛ.

⁷⁶ Sɔ' m nə wə mubwǎ, pu gɔ sɔ' ké o gɑ gɔ̀m ghɔm Si tɑ́ thə́ kɛbəŋ. Nə pa' o gɔ sɔ' pɑ ghiŋ dzə Cyəpɔ nyaptə məjyə e.

⁷⁷ Ghə pɔ pyə́ zhyə́ ywə vɔk shyə m nə́ nə lɑ mhɔ map shwyɛ' wap!

⁷⁸ A bɑ́ nwə cɔmmtso Si yɔk pɑ. Tə́ nam fɑ thə́ ŋkhyɛ' wɔk pɑ.

⁷⁹ A ŋkhyɛ' pɔ pyə wap lə bɑ wap cwə nthʉm jʉm vʉ a, da'tə wɔk pɑ məjyə hwitə

⁸⁰ Sɔ' m nə́ mú bɔ̌, é lə́ pɑ̌ kwyə, bɑ́ gə gʉ' nə zhwenyə e. E lə cwə̌ ghakgo tɑ́ ŋkhəm tyɛ'dzʉ yə e lə la'tə nɑ́ e bi Israɛl a.