FILIPO 1 - Ghomala New Testament

Ca'tə̀

¹ Myə Polo pyə Timotio, mkwɔ Yeso Kristo, bi guŋ pɔ dɔlɔ̌ awɛ nə Yeso Kristo pyə wap Filipo a, bi pɑ lé wap pu a mghɛ fa' pap:

² A gho' ba hwitə̀ pɑ bi po shyə m̀ nə Si Tá yɔk pɑ̀ ba m̀ nə Cyəpɔ Yeso Kristo.

Mfa' gho' pu cwyɛ'nyə

³ Guŋ mcwə awɛ myə gɑ̌ ŋkhamtə́ wɔ a, gɑ̌ hɑ pa'lə́ bi Si a;

⁴ nə pa' nə guŋ nə cwyɛ'nyə yə gɑ̌ shwyɛ'nyə nə po awɛ a, gɑ dɑ pɑ́ ŋwɛnyə̀ shwyɛ'nyə́.

⁵ Gɑ̌ dɑ ŋwɛnyə shwyɛ'nyə́ po'o, a cyə m̀ nə́ dəŋ pa' po lə nə fa' yɔ́ nə Cuŋ pɑpúŋ tə fɑ́ nə́ dəŋdzə́ tyɛ'dzʉ́ gɔ ŋkhəm cwəlɔ a.

⁶ Gɑ̌ cəŋtə́ jyə́ gɑ: Mo yə e lə to' fa' pɑpúŋ nə po a gɔ lɑ nə ghɔ dzə̀ tə la' myəŋ nə tyɛ'dzʉ́ Yeso Kristo.

⁷ A bɑ nwə dəŋdəŋ bəm gɑ́ myə ghə tʉ́m pɑpuŋ nə guŋ yɔ awɛ, nə pa' po bɑ pɑ́ nthʉm tʉm m, wɔ pyə́ gɑ̌ nə pɑ dyəcɛ̌ piŋ pɑ lo'shù gɑ pu cəŋtə́ nthɔm Cùŋ pɑpúŋ po pɑ nthamtə yɔ nə gho' yə Si gə nə m̀ a.

⁸ Əŋ, Si bɑ ŋkwinthɛ̌ a gɑ́ gɑ̌ byɛ'tə wɔ guŋ yɔ awɛ nthʉm ŋkhuŋnyə Yeso Kristo.

⁹ Mcwyɛ'nyə mə̌ bɑ́ gɑ kùŋnyə yɔ pɑ gɔ pɑ́ dzə̀, po'o gɑ po zhyə nə yɔ biŋ jyə́ nwə nyənyɔ,

¹⁰ tə́ jyə́ ywə yə a bɑ ǎ ku'nyə̀ a, po'o gɑ́ po sɔ' bɑ dɔlɔ̌, pu lə kyak wɔ nə sɔmywə nə tyɛ'dzʉ́ Kristo.

¹¹ A pɑ́ tyɛ' o bɔ bɑ pǒ lo nthɔ́m nwə dəŋdəŋ myə a sɔ' bi pɑ̀, shyə́ m̀ nə Yeso Kristo nə́ nə gu'tə Si biŋ jwɔp tso tsyə́ a.

Polo dyəcɛ̌ pu nə ghɔ dzə nə Cùŋ pɑpúŋ

¹² Mfɑ̌mfɑ́, gɑ̌ shəŋ gɑ́ po zhyə gɑ́ nwə yə a nthəm nə m̀ a bɑ ǎ ghə pɑ gɑ́ Cùŋ pɑpuŋ ghɔ dzə̀.

¹³ Nə pa' nə gùŋ buŋdyə̌ awɛ ba nə guŋ mtsʉ' awɛ cwəlɔ pu cəŋtə́ jyə́ gɑ́ pu gəm a po'o nə Kristo,

¹⁴ ba bo'gwyə mfɑ̌ pyə cɛ a hɑ kaktʉɔ bi pu a wə nthégʉ' nə nə́ siŋ Ghɔm nə gɔ pɑ́ dzə̀ tə pwɔk sɔmywə.

¹⁵ A nyənyɔ gɑ́ shɑ pɔ gə po'o m nə ghi'nyə pu a twɔ'nyə, da' gɑ́ pyə̀ shɑ́ pɑ́ sìŋ Kristo pɑ́ kwa' nə mkwɛnyə pɑpúŋ.

¹⁶ Pɔ bɔ̌ fa' po'o m nthʉm ŋkhùŋnyə̀. Wap bɑ wap zhyə́ gɑ́ gɑ̌ bɑ́ tsɔ'ɔ gɑ́ bɑwə do' gɑ Cùŋ pɑpùŋ ghɔ dzə̀.

¹⁷ Pyə shɑ́ pɔ bɑwə dɑ pɑ́ zhwenyə twɔ'nyə tə́ nə siŋ Kristo. Yap ywə yə a hɑ̀ gu' bi pu a tə́ pɑpuŋ pɑ́; wap bɑwə́ ŋkwɛ́ gɑ́ wap gɔ ghə cɛ́ a cəŋtə́ dzɑ́ a.

¹⁸ Da' gɑ́ a tə́ shɛ pɑ́? Nwə̌ wə bɑ́ gɑ́ kɑ́ nə mkwɛnyə cwəpùŋ kɑ myə pɑpuŋ lə pú siŋ Kristo bi pɔmnəŋ. A ywə yə gɑ̌ ŋwɛnyə nə nə́ gɔ dzə̀ a.

¹⁹ Nə pa' gɑ̌ zhyə gɑ́ ywə bɔ gɔ sɔ' miŋ nə ywə vɔk á, shyə m nə mcwyɛ'nyə mɔ ba m̀ nə zhwenyə Yeso Kristo.

²⁰ Kwa' pa' gɑ̌ wə nə byap ba nə́ yɑ mɔktə a, sǒ tə́ gɔ sɔ' kú a pɑ́, nə pa' gɑ̌ wə shəŋtə́ jyə nə pa' cwəlɔ nɑ a gɔ nyə́ŋ dəŋ nə Kristo cyə m nə vɔk a kɑ nə vʉ́ tsɑ̌ lə́.

²¹ Nə pa' sɔ' m nə́ m̀, vɔk bɑ Kristo vʉ̌ nə́ŋ bɑ bəm bɑ yɑ pè.

²² Da' gɑ́ a pɑ̀ gɑ́ nə vɔk dəmcǎ' po'o gɔ ghə gɑ́ fa' ghɔ́ dzə̀, bɑ ŋ kha zhyə yə ghə̌ŋ yə gɑ gɔ cwɔ' a

²³ Gɑ si cwəlɔ mnwə mɑbʉə pɑwə fəŋnyə a: gɑ bɑwə sʉm nə ghɔ gɑ pyə Kristo pɑ bəmtə bɑ, a pɑ kwa' yə gɑ̌ wə dəŋdzə shəŋ a,

²⁴ da' gɑ shyə m nə thə́ yɔ dzə̀ pɑ gɑ shwə pɑ dəmcǎ'.

²⁵ A po'o tə bɑwə jyə gɑ́ ŋ tə gɔ wuŋ ghɔ pɑ́, gɑ́ gɑ gɔ pɑ cwə pɑ bəŋ po, guŋ yɔ awɛ po'o gɑ po kaktʉɔ nə piŋnthʉm, ba nə ŋwɛnyə̀ nthʉ́m piŋnthʉm.

²⁶ Po'o gɑ a cyə m nə m̀ cwə yə gɑ̌ pɑnyə bə́ŋ po a, yɔ nə ghu'tə Yeso Kristo ghɔ dzə̀.

Nə lo' tə pwa

²⁷ Da' gɑ́ po vɔk nthi vɔk yə a ku'nyə nə Cuŋ pɑpúŋ Kristo a, po'o gɑ ŋ dá sɔ́' pɑ́ nə yɔ wɔ́ kɑ nthak tak lə, nwə yə pɑ́ ju' pu ghɔm nə po a, a pɑ́ pɑ́ gɑ́ pǒ wə nthɔm a tʉɔ nthʉm ta' zhwenyə yɑmu', bɑwə bəmtə́ dɑ ta' tʉ̌m tsɑmu' do' kwa' pa' ǎ pùŋ nə piŋnthʉm nə Cuŋ pɑpúŋ a;

²⁸ po lə piŋ gɑ mghɛ bo hɛ wɔ nə sɔmywə, a pɑ́ bi pu bɑ mtiŋ gɑ wap gɔ simnyə, biŋ bɑ bi po bɑ mtiŋ ywə vɔk yɔ́: a fɑ m bi Si

²⁹ nə pa' a bɑ Si ghə gho' nə po shyə m nə Kristo tə da' gɑ pǒ piŋ é pɑ, ba m gɑ́ po yɔgo' nə e.

³⁰ Bɑ do' pɑ nthi shù yə po jɔ́ ŋ bɑwə do'; bɑ pǒ nəŋ jyə gɑ́ gɑ ŋ gɔ tə kwi' lo' a.