EFESO 6 - Ghomala New Testament

¹ Pɑkhʉ́, po pɑ́ ju'nyə bi pɑ tsə́ wɔ shyə m nə Cyəpɔ, a bɑ ywə yə a bɑ dəŋdəŋ a.

² Ghə mku' tɔ pu mɔ, a bɑ dzə̀ mco' myə a bɑ pu ka' mcwɔ'fa' nə a:

³ po'o tə́ o pɑ pɑpuŋ biŋ shwə mgu' jɔmyɔ̌m dəmcǎ'.

⁴ Wɔ pɑ tsə pǒ, ka po pɑ dwɔp lúŋ po pɔ, da' gɑ po kwyə wap nə ŋkhɛ bɑ nə nthɔ̌k myə́ a fɑ bi Cyəpɔ a.

⁵ Wɔ mkwɔ́, po yu'nyə bi mtá pɔ pyə dəmcǎ', nə yu'nyə bɑ bwɔk biŋ bɑ sə́ŋ, gə tʉ́m pɑpuŋ m̀ pa' bi Kristo a.

⁶ Po kɑ ghə m pa' pu wə dé wɔ a, gə po'o m gɑ po puŋ mo a; po ghə m pa' mkwɔ Kristo pyə wap səŋnyə́ nə ghə ywə yə Si shəŋ a.

⁷ Po fa' nə tʉm pɑpuŋ pa' cwə yə po fa' m bi Cyəpɔ a, po kɑ ghə m pa' po fa' m bi monəŋ a.

⁸ Pǒ zhyə: Ywə pɑpuŋ yə mo ghə a, e gɔ la' kwyatə ya bəŋ Cyəpɔ, kɑ e bɑ pɑ ŋkwɔ kɑ e tə bɑ ŋkwɔ a lə.

⁹ Ba wɔ yɔ mtá mkwɔ, po ghə yɔ pɑ́ po'o nə pú. Po tak paptə nəŋ pǒ zhyə́ gɑ nə pú ba nə po Tá bɑ kɛbəŋ, nə ghə kyə́ lə nə́ŋ bɑ dzə e nə sɔm mò.

Shù piŋnthʉm

¹⁰ Nə nə́ mǐŋ, po ghə gʉ' m̀ nə Cyəpɔ, gʉ' nthʉɔtʉɔ yə a bɑ yə́ a.

¹¹ Po kwa dzə́ shù Si tə a ghə po ku' nə cyə Sata nə mgənyə mnwə myə́.

¹² Pɑ tə́ bɑwə do' pɑ mu' mo shù pɑ̀, pɑ do' pɑ sa', mtʉɔ ba nə hya yəŋ dzʉ́ jʉ̌m, do' mzhwenyə nwə cwəpuŋ myə́ a bɑ́ kɛbəŋ a.

¹³ A po'o tə po tɔm dzə́ shù Si tə a sɔ' bɑ nə tyɛ'dzʉ́ bɔkpɔk po kɑ wuŋ bvʉtə si, po ku' nə tiŋnyə thə́ nə cwə yə pǒ ghə guŋ ywə awɛ a.

¹⁴ Po lusi! Nyənyɔ pɑ tap yɔ, dəŋdəŋ pa' dzə shù yɔ a,

¹⁵ mnthap pɑ mkwə po bɑ nə kʉ́dʉ̌ nə siŋ cùŋ pɑpúŋ hwítə̀.

¹⁶ Po ghə kwa' kʉ'shù piŋnthʉm, a gɔ ghə po pimɔk guŋ mkǔŋgó mɔk sata.

¹⁷ Po kwi co' ywə vɔk, ba nyə Zhwenyə, yəŋ la'tə gɑ́ Ghɔ̀m Si.

¹⁸ A Zhwenyə pɑ shya mcwyɛ'nyə mɔ nə guŋ mghə̌ŋ awɛ, shya ywə yə pǒ do á nə guŋ mcwə awɛ; po pɑ dɑ yɔ lwɔksɛ nə shwyɛ'nyə Si tə pwa nə thə́ pɔ dɔlɔ̌.

¹⁹ Ba m nə m̀ yɑ̌: A ghɔm pɑ shwə̌ m̀ nə pɑ nə siŋ nwə cyə zhyənwə Cùŋ pɑpuŋ tə pwɔk.

²⁰ Cùŋ pɑpúŋ yə gɑ̌ bɑ gɛ nthə̌m nə́, bɑ pu cəŋ a nə́. Gɑ̌ gɔ, pa' a bɑ nwə nə m̀ a, pɑ siŋ yá bɔ tə pwɔk.

Mcuŋ Polo

²¹ Gɑ wə shəŋ gɑ ba wɔ yɔ zhyə́ pa' gɑ̌ wə nə bɑ a, jyə́ ywə yə gɑ̌ gə̀ a. Tikiko, fɑ́ yə gɑ̌ ŋkhùŋ e a, yʉ̀ yə e bɑ gɛfa' nyənyɔ m nə Cyəpɔ a gɔ siŋ wɔ guŋ mcuŋ awɛ.

²² Gɑ̌ shəŋtə nthəm e pɑ gɑ́ e sɔ' siŋ wɔ tsʉ' yə pyə̌ kəm nə a, biŋ nyəŋ gʉ' nə po.

²³ Hwitə̀ pɑ bi mfɑ̌mfɑ, ba ŋkhùŋnyə̀ pu piŋnthʉm shyə m̀ nə Si Tá ba m̀ nə Cyəpɔ Yeso Kristo.

²⁴ Gho' pɑ bi guŋ pɔ awɛ pyə́ wap ŋkhùŋ Cyəpɔ yɔk pɑ Yeso Kristo a pu a ŋkhùŋnyə̀ tə kwyəpnyə a.