EFESO 3 - Ghomala New Testament

Si ghə́ Polo zhyə́ nwə cyə́ zhyənwə

¹ A po'o tə myə, Polo, gɛ cɛ̌ Yeso Kristo, bi po, pɑ tə pɑ pɑ Yudea...

² Po la' pe' ju' bǎ gho' yə Si hɑ bəm nə pó tə́ ywə yə e lə yap a pəmtə á,

³ ju' pa' a lə cyə m̀ nə nə́ ghə mo zhyə́, myə zhyə mnwə cyə Zhyə́nwə dəŋdəŋ pa' gɑ shwɔtə mthə myə́ bi po a.

⁴ Po gɔ nə ke ŋwa'nyə a, yɔ dəŋ pa' gɑ nə jyə nwə cyə́ zhyənwə Yeso a.

⁵ Nwə cyə Zhyənwə bɔ si bɑ e lě tə ghə pɑ cwədzə̀ zhyə́ ya pa' e da'tə cwəlɔ shyə m̀ nə Zhwenyə bi mghɛ nthəm dɔlɔ̌, ba bi mghɔm ghɔ̀m Si a.

⁶ Ba pɑ tə pɑ́ pɑ Yudea bɑ pu piŋ wap nə tsə mcʉ', dɑ wap gə mkam nɑ́ nə ta' nɑ́, nthamtə́ wap nə ta' mka'nyə nə Yeso Kristo, shyə́ m̀ nə Cùŋ pɑpuŋ.

⁷ Si bɑ e lě dɑ á nə gə gɛfa' nə bɑ a shyə m nə tʉɔ e nə́ gho'.

⁸ Myə yə́ gɑ̌ bɑ jʉɔjʉ̀m nə guŋ mzhʉɔjʉ̀m pɔ dɔlɔ̌ awɛ a, Si bɑ e lě go' a, dɑ a gə gɛ siŋ mɑ fʉ' gwyə́ Kristo bi pɑ tə pɑ́ pɑ Yudea.

⁹ Biŋ da'tə pa' Si gə nwə cyə zhyənwə yə e lə la' dʉm pɑ nə é tə fɑ tə tyɛ' a, a pəmtə a.

¹⁰ A po'o tə́ tə fɑ cwəlɔ, pɑ Sa' pu a Mtʉ̀ɔ kɛbəŋ shyə m nə Cu'tə pɔ Kristo jyə́ nthinthi mfʉ́ Si,

¹¹ Shyə m nə mka'nyə mama myə e gə́ a pəmtə̀ nə Yeso Kristo Cyəpɔ yɔk pɑ̀ a.

¹² Nə Kristo, pɑ shyə m̀ nə piŋnthʉm nə é gə nə fʉ'tə nɑ tsɔk pɑ̀ hɑ bə́ŋ é tə pwɔk sɔmywə.

¹³ A po'o tə gɑ̌ wə gɔm bi po gɑ́ ka po tak mɑ gǒ' gwyə yə gɑ wə jɔ nə po a ghə po pwa. A bɑ yɔ ghu'tə.

Zhyə ŋkhuŋnyə̀ Kristo

¹⁴ A po'o tə gɑ̌ wə ŋkham mkwitə dzə̌ Tá,

¹⁵ yʉ yə́ tsǒ bǎ ya tuŋdyə́ lə́ nthəm pɑ bi, kɛbəŋ bɑ m dəmcǎ' lə.

¹⁶ É ghɔ gɔ́ shyə m nə dəŋ ghu'tə e, nyəŋ gʉ' nə po shyə m nə́ Zhwenyə, po'o gɑ mo nthʉ̌m nɑ pɑ nthʉɔ tʉ́ɔ, gɔ pɑ́ dzə.

¹⁷ E ghə Kristo ghɔ bɑ shwə́ nthʉm tʉ̀m po shyə m nə piŋnthʉm; po kwigɛ́ biŋ bɑ ŋkwɑ nthʉ̀m ŋkhuŋnyə̀.

¹⁸ A po ghə gʉ' nə ju' pu a pyə shɑ́ pɔ dɔlɔ̌ dəŋ pa' a bɑ nthə e yɔm, lɔm e yɔm, dəŋ nthə e pa' a bɑ ǎ sak gɔ thə́ biŋ shú gɔ si...

¹⁹ Biŋ jyə́ ŋkhuŋnyə̀ Kristo yə a bɑ ǎ cyə́ guŋ zhyə̌nwə awɛ, po'o gɑ Si ghɔ dó nə po.

²⁰ Ghu'tə pɑ bi mo yə a bɑ ě ku' nə ghə gùŋ ywə awɛ shyə m nə tʉɔ e yə a bɑ nə pɑ a, gə tɑ nthwɔk dəŋ yə pɑ do bi biŋ sɛ a.

²¹ Ghu'tə pɑ bi e nthʉm Cu'tə pɔ Kristo bɑ m nə Yeso Kristo nə gùŋ mwɔ̌dzʉ́ awɛ, nə mgu'nəgu'. Amɛn.