EBRAIKA 8 - Ghomala New Testament

Ŋkhamsi gwyə́ yɔk pɑ̀

¹ Kwa' nwə gwyə nə nwə yə pyə̌ gɔm a, a shəŋtə́ bɑ ŋkhamsi gwyə yəŋ yə pɑ gə e, yʉ́ yə a bɑ ě cwə nə ghə́ŋ tʉɔ nə léŋfo fo Si kɛbəŋ á,

² e fa' mfà' myə tsʉ' u nthʉm nthap dɔlɔ̌ nthap nyənyɔ yə Si nə ŋkwɑ̀ a, la' pɑ́ yə pɔmnəŋ nə ŋkwɑ́ a pɑ́.

³ Bɑ̌ yá ŋkhamsi gwyə lə́ bɑ pú yap e gɑ e pɑ nuŋpwɔ' biŋ hɑ ywə hɑhɑ̌, a pɑwə shəŋ bi é gɑ́ e ghə ywə yə é gɔ hɑ́ a.

⁴ Kristo lə pe' bɑ pɑ dəmcǎ', bɑ e tə́ bɑ́ bǎ ŋkhamsi pɑ́, nə pɑ pyə shɑ bɑ Si pyə mco' pɑ Yuda jap wap a bɑ nuŋpwɔ.

⁵ Da' gɑ pɔ bɔ fa' yap pɑ bi mu hwə ywə yə a bɑ kɛbəŋ a, dəŋdəŋ pa' Si lə kamtə́ bi Mosɛ nə cwə yə e bɑ gɔ kwɑ nthap a, e ghɔm bi e gɑ: Yɔ, o gɔ ghə guŋ ywə awɛ pɑ̀ pa' yə ŋ də la'tə o dəm kuŋgǒ a.

⁶ A nyənyɔ gɑ fa' tsyə a bi Yeso a bɑ kwa' tsyə gwyə nə pa' e bɑ giŋkǎm kwa' nə kɔ̀ pɑpúŋ tsyə nə wà shyə m nə mka'nyə̀ pɑpúŋ a.

Nə sìŋ nə kwyəpnyə kɔ̀

⁷ A lə pe' tə dəŋdzə kɔ pɑ tə bya, bɑ nə lɑ mu' kɔ batə yɑpʉə ŋkwyəpnyə lě tə́ pɑwə.

⁸ Da' gɑ Si bɑ ě tébya nə pu nə pa' e gɔm gɑ: Yɔ, shɑ mtyɛdzʉ́ wə sɔ̌' yə pyə a tuŋdyə́ Israɛl ba tuŋdyə́ Yuda gɔ wa mu' kɔ sə a.

⁹ A lə pɑ m pa' kɔ tsyə́ pyə a mtá pap lə wa, nə tyɛ'dzʉ́ yə ŋ də tɔ̌m pu yap dɑ wap nə nthəm Egipto a pɑ. Nə pa' kwa' wap lě tə tɔm kɔ tsɑ̌, ba myə yɑ̌ ŋ dě nthak wap nə́ŋ. Cyəpɔ nə gɔm po'o.

¹⁰ Nə pa' yɔ kɔ tsyə a gɔ sɔ' tamtə wɔk pyə a tuŋdyə Israɛl a nə tyɛ'dzʉ́ bɔ a tsɔ gɑ. Cyə pɔ nə gɔm po'o: Gɑ̌ hɑ mco' mə̌ nthʉm mkwɛnyə̀ map. Gɑ̌ gɔ sɔ' və ma nthʉm mtʉm map. Gɑ̌ gɔ sɔ' zhi Si yap wap zhi pɔ pɑ̌.

¹¹ Sɔmmo nə pu tə gɔ sɔ' cəŋ nə zhi'tə yə la' pú kɑ fɑ e lə ghɔm gɑ zhyə Cyəpɔ pɑ. Nə pa' gùŋ yap awɛ gɔ sɔ' zhyə a, tə fɑ́ nə mo ŋkho' kəm nə́ gətso.

¹² Nə pa' ŋ tə gɔ sɔ' ghyɛ' cok nə hɔ̀ map pɑ̀. Ŋ də piŋ ŋkhamtə mhɔnwə map.

¹³ E nə ghɔmnwə nə kɔ sə́, dɑ tsyə dəŋdzə gə tsyə bvò; a piŋ bɑ po'o, ywə yə a ji yə bvo, bɑ bvó a bɑ ywə yə a bɑwə gɔ mi a.