EBRAIKA 5 - Ghomala New Testament

Yeso Kristo ŋkhamsi gwyə shɔmmtso

¹ Bǎ ya ŋkhamsi gwyə lə yə e nthəm cəcɑ̌ pɔmnəŋ a, pu jap e nə nwə pɔmnəŋ, nə nwə pɔmnəŋ pu a Si. Fa' tsyə́ bɑ nə pɑ hɑ ywə biŋ nuŋpwɔ' nə mhɔnwə pɔmnəŋ.

² Kwa' yʉ́ gɔ ku' nə yu' pɔ pyə a bɑ wap ka zhyənwə, bɑ hɔ məjyə á, nə pa' ba kwa' yʉ́ yə bɑ pwa ko nə e mghəŋghəŋ.

³ A piŋ shyə m nə pwa bɔ e pɑ gɔ pɑ nùŋpwɔ' nə mhɔnwə pɔmnəŋ nuŋpwɔ' bɑ nə myə́ mhɔnwə.

⁴ Sɔmmo tə shwɔ' nɑ́ é pɑ yʉ́ nə tsɔ gɑ fa' pɑ̀. Pu kwi fa' bɔ m̀ bi Si nə pa' yʉ nə ŋkhe mo, dəŋdəŋ pa' a lə pɑ̌ nə Aaron a.

⁵ A po'o tə Kristo látə́ shwɔ' nɑ e pɑ yʉ́ nə ghu'tə̀ nə pɑ ŋkhamsi gwyə pɑ́; e lə ŋkwi m bi mo yə e lə ghɔm bi e gɑ: O bɑ mú a, myə tyɛ' ɔ, gɑ̌ tsə o

⁶ dəŋdəŋ pa' tsɔ ghɔm gɑ̀: O bɑ́ ŋkhamsi mama nə yə̀ nthì Mɛlkisedek.

⁷ Yʉ́ nə lə bɑ nə cwə vɔk e dəmcǎ' bɑ hɑ mcwyɛ'nyə pu a nə pu'bǔ, dɑ cwe pu a shyətsə́ nə hɑ po'o bi mo yə a lə bɑ pɑ́ e vɔk e nə vʉ̌ a, et piŋ ju' mcwyɛ'nyə myə shyə m nə yə nə yu'nyə̀.

⁸ Ba pa' e lə bɑ pɑ Mú, e lə cyə̌ nə gǒ' ji'tə nə yu'nyə,

⁹ pa' e lə piŋ gɔ tə ŋkhəm a, e lě shʉ' nwə ywə vɔk mama bi pɔ pyə wap yu'nyə e a,

¹⁰ nə pa' a bɑ Si yap e gɑ ŋkhamsi gwyə́ nə yə nthi Mɛlkisedek.

Nə́ cəŋtə bvɔk pa' Mo Kristo a

¹¹ A wə sɔ' m̀ nə́ yəŋ nwə bɑ pɑ̌ ghə mghɔm nə te', bɑ nə nəŋ nthutə mnwə bɔ tʉɔ te' nə pa' po bɑ po zhi pɑ tə lo'nyə ju'nwə.

¹² Po lə bɑ gɔ pɑ mghɛ la'tə tə tyɛ̌', tə pǒ ja tyɛ' ɔ bɑwə shə́ŋ gɑ pu zhi'tə wɔ dzə pǒ mnwə̀ nə mghɔm Si. Pǒ bɑ po ghɔ tə biŋ bɑwə byap pɑ bʉɔ mú, nə tsʉ' ywətsʉ nthʉɔtʉɔ.

¹³ Mo yə e jɑwə núŋ pʉɔ a, pɑ́ e lə zhyə́ nə sɛnwə nə nwə dəŋdəŋ, nə pa' e bɑ pɑ mubwǎ.

¹⁴ Tə sɔ' m̀ nə mghətso, wap dzʉ́ ywətsʉ nthʉɔtʉɔ, nə pa' a bɑ wap cyə m nə vɔk yap jyə nə zhyə ywə pɑpuŋ ba ywə cwəpùŋ.