APOKALIPSƏ 1 - Ghomala New Testament

Mthə́ nwə̀

¹ Ywə yə Yeso gə pu zhyə́ a: Si nə hɑ ywə bɔ bi e po'o gɑ e nə da'tə ywə yə a məjyə bɑwə sɔ' a bi mghɛ fa' pyə́. E lə́ təm aŋgəle é bi Yohane, gɛfa' e, gɑ́ e ghə pu zhyə́.

² Yohane biŋ gɑ́ guŋ ywə awɛ yə e jɔ a bɑ́ Ghɔm Si biŋ bɑ́ mkwinthɛ nə Yeso Kristo.

³ Mo yə́ e ŋkhe ba pɔ pyə wap ju' mghɔm mghɔm ghɔm Si biŋ nthɔm ywə yə a bɑ pu və nthʉ́m o a bɑ́ mpuŋtsé nə pa' cwə wə bɑ a ghɔptə́.

Tsʉ' yə pu shya ŋwa'nyə nə a

⁴ Yohane bvə bi mcu'tə pɔ Kristo sɔmbʉə myə a Asia a: Gho' ba hwitə́ pɑ́ bi po, fɑ bi mo yə e bɑ́, mo yə́ e lə́ bɑ́, mo yə ě wə sɔ' a, fɑ bi mzhwenyə sɔmbʉə myə ǎ dzə leŋfo e a,

⁵ ba m bi Yeso Kristo, ŋkwinthɛ̌ nyənyɔ, thə́sə mú nə pɔ vʉ́, mú mfo dəmcǎ'. Ghu'tə pu tʉɔ pɑ̀ bi mo yə e ŋkhuŋ wɔk pɑ, dɑ mcyə́ myə ŋkwi wɔk pɑ bi mhɔ a,

⁶ biŋ dɑ́ wɔk pɑ gə nəfo mkamsi bi Si tap e a, nə mgu' nə gu', Amɛn.

⁷ Yɔ́, ě wə sɔ' cəcɑ̌ mlwa, a guŋ mnyə awɛ yɔ é, ba pɔ pyə wap lə swɔp e a: Nə pa' guŋ gwya monəŋ dəmcǎ' gɔ sɔ' pɑ lɔ, cyə pɑ m nə é. Amɛn!

⁸ Gɑ̌ bɑ́ Alfa ba Omega; Cyəpɔ Si nə gɔm po'o. Mo yə e bɑ́, mo yə e lə́ bɑ́, biŋ bɑwə sɔ' a, Nthʉɔtʉɔ.

Nə yɔ nthʉm zhwenyə Patmos

⁹ Myə̀, Yohane fɑ yɔ biŋ bɑ so yɔ nthʉm go' mləŋtə, nthʉm nəfo ba nə kaktʉɔ nthʉm go' jʉ̌m Yeso, ŋ də́ bɑ Patmos nthʉm guŋ tùŋ shyə, bɑ a shyə m nə Ghɔm Si ba m nə kwinthɛ Yeso.

¹⁰ A lə pɑ̌ nə tyɛ'dzʉ́ Cyəpɔ, Zhwenyə cù a, ju' gi mo nthʉɔtʉɔ jʉ̌m m̀ pa' pu nthuŋ nthɛ a, a pɑwə gɔm gɑ:

¹¹ Ywə yə o wə jɔ a, və nthʉ́m ŋwa'nyə biŋ shya bi mcu'tə pɔ Kristo sɔmbʉə myə ǎ Efeso, ba Smirna, ba Pergamo, Tiatira, Sardɛs, Filadɛlfia, ba m Laodikia lə.

¹² Ŋ də fɛ nɑ a nə́ le gi yə a lə́ bɑwə gɔm nwə bəm a; cwə yə ŋ də fɛ nɑ á, jɔ mkwɔ' lambu tʉɔ gɔl sɔmbʉə;

¹³ ba mu' mo pɑ́ cəcɑ̌ mkwɔ' lambu bɔ pa' mú mo a. Mo bɔ lə́ bɑ e kwa sʉəsʉə dzə, jwé tap gɔl tə nə zhəŋ kəkɔp e;

¹⁴ thə́ e pu a mnəŋ thə myə́ lə bɑwə fɔk pa' mnəŋ jʉ̀jʉ̀ fəfə á, pa' mlwa fə̀fə̀ a, ba mnyə́ myə́ pɑwə shwə́ pa' gwámɔk hwéhwě a;

¹⁵ mkwə myə lə bɑwə hwə tʉ́ɔ tsyə pu nə nyap kwɛ pǔ yə tʉɔdəŋ a, bɑ pu lɑ mɔk sɔ̌k, ba gi e pɑwə shwə pa' zhwya shyə lɑpʉə a.

¹⁶ A lə́ bɑ ě wim msɛ́ sɔmbʉə nə pú tʉɔ e mu' nyə mcɔk bʉ̌ə pɑwə nthəm shwə e. Sə́ e lə́ bɑwə dəŋnyə pa' nam mɔkcʉ́ a.

¹⁷ Ŋ də nə yɔ e po'o, bvʉ́ nə mkwə myə pa' mo npfʉ́pfʉ̌ a, da' gɑ e yap pú é yə tʉɔ nə m̀ gɔm gɑ: Kɑ́ pwɔk, gɑ bɑ Də́ŋdzə biŋ bɑ́ Jʉɔjʉ̀m,

¹⁸ bɑ mo yə e bɑ nthʉɔ a; ŋ də pfʉ̌, tə́ gɑ̌ bɑ yəŋ bɑ́ pɑ nthʉɔ nə guŋ mcwə awɛ; mkǐ vʉ́ ba myə́ nəfo vʉ́ bɑ pɑ́ bəm.

¹⁹ Və ywə yə o jɔ a, ywə yə a bɑ́, biŋ bɑ ywə yə a gɔ sɔ' sɔ' a.

²⁰ Sɔ' m nə nwə cyə́ zhyənwə yə a bɑ ǎ tʉmnyə jʉ̀m msɛ́ sɔmbʉə myə́ o jɔ nə pú tʉɔ a ba jʉ̀m mkwɔ' lambù gɔl a, a pɑ́ gɑ: Msɛ́ sɔmbʉə bɑ́ pɑ aŋgəle mcu'tə pɔ Kristo sɔmbʉə. Mkwɔ' lambù pɑ mcu'tə pɔ Kristo sɔmbʉə.