MFA' MGHƐ NTHƏM 8 - Ghomala New Testament

Dəŋdzə nə cwɔ'mkwə cu'tə pɔ Kristo

¹ Saulo lə bɑ mo nə pɔ pyə wap lə bɑwə biŋ vʉ Etiennə a. A lə to' pɑ̌ nə tyɛ'dzʉ bɔ, pu to' nə cwɔ' mkwə cwəpuŋ Yerusalɛm. Guŋ pɔ awɛ tə ně da' mghɛ nthəm lə sɛtə́ gɔ m jyə̀ Yudea pu a m Samaria.

² Shɑ pɑ bɛ pɑ lɑ mku' biŋ lə tə̌ŋ Etiennə biŋ dɔ e kwa' pɑpuŋ.

³ Nəŋ sɔ' m nə Saulo e pɑ sa'tə Cu'tə pɔ Kristo, bɑ ŋkho dyə dyə̌, nthé pɑ bɛ pu a pɑ jwǐ, ma'tə wap dyəcɛ̌.

⁴ Pɔ pyə pu lə sɛtə wap a lə́ bɑ gɔ jyə́ jyə̀, giŋ bɑ siŋ Cuŋ pɑpúŋ Ghɔm.

⁵ A lə pɑ po'o Filipo, pa' e lə tsəŋ gɔ nə mu' tisuŋ Samaria a, ko wə́ shyanyə Kristo.

⁶ Du pɔ pɑ ŋkwishwə, nthɔm ghɔm Filipo nə pa' pu lə bɑwə ju' nwə msya myə e lə gə á, biŋ bɑwə jɔ má.

⁷ A pɑ po'o bo'gwyə mzhwenyə cwəpuŋ pɑ nthəm nə pɔ pyə a lə bɑ ǎ ko nə pu a, nə təm bɑ shwé. Ba bo'gwyə mkhʉm pu a ŋkho'tə pɑ jɛ.

⁸ Kwa' mɑ ŋwɛ́nyə lə pɑ̀ nthʉm tisuŋ bɔ.

⁹ A lə́ nə pɑ po'o mu' mbɛ tsə pɑ nthʉm tisuŋ bɔ tso tsyə̀ pɑ́ Simon, e pɑ gə kɛ, a pɑ̀ sya pɔmnəŋ nthʉm guŋ Samaria awɛ. E lə gə po'o bɑ ŋkwɛ gɑ e bɑ kwa' gha' mo.

¹⁰ Guŋ pɔ awɛ pɑ jʉm e tə fɑ nə pɑkhʉ̌ gɔ ŋkhəm nə mghətso lɑ bɑ gɔm gɑ: Bɛ yəŋ gɑ bɑ gʉ' Si yə pu ŋkhe gɑ Gʉ' gwyə a.

¹¹ A pɑ gɑ́ wap lə bɑ́ jʉ̌m é po'o, bɑ a lə du gɑ e lə dɑ kɛ tsyə́ nə sya wap tə fɑ́ tə́ tyɛ'.

¹² Da' gɑ wap lə cwə̌ tə biŋ Cùŋ pɑpùŋ nə Nəfo Si ba nə tsǒ Yeso Kristo yə Filipo lə bɑwə gɔm a, guŋ yap awɛ kwishyə, pɑ bɛ ba pɑ jwǐ.

¹³ Ba Simon lə cʉ' yə biŋ Si, ŋkwi yə shyə, bɑ pɑ jʉm Filipo, bɑ jɔ mtiŋ gwyəgwyə pu a msya myə a lə bɑwə nthəm a, nwə pɑ shyə e.

¹⁴ Mghɛ nthəm pyə wap lə bɑ Yerusalɛm a lə nə yu' gɑ pɑ Samaria piŋ ghɔm Si, nthəm Pɛtrɔ pu Yohane wə.

¹⁵ Wap lə cwə tə ŋwak wə, shwyɛ'nyə Si nə pɑ Samaria gɑ wap kwi Zhwenyə Dɔlɔ̌.

¹⁶ Nə pa' Zhwenyə Dɔlɔ̌ lə jɑ́ tə wuŋ ŋkho nə sɔmmo yap, a lə bɑ wap kwi da' shyə nə tso Cyəpɔ Yeso.

¹⁷ Pɛtrɔ pu Yohane lə to' nə yap bǔ nə pɑ Samaria, wap pɑ ŋkwi Zhwenyə Dɔlɔ̌.

¹⁸ Da' gɑ Simon lə cwə tə jɔ̀ pa' mghɛ nthəm wə jap bu nə pɔ̀, wap kwi Zhwenyə Dɔlɔ̌ a, bhə́ ŋkhap bi pu gɔm gɑ:

¹⁹ Po hɑ tʉɔ bǎ bəm po'o gɑ pɔ pyə gɑ̌ yap bu nə pu a, wap kwi Zhwenyə Dɔlɔ̌.

²⁰ Pɛtrɔ ghɔm bi e gɑ: Tə la' po ŋkhàp o pəmtə pfʉ́, nə pa' o ŋkwɛ gɑ bi a pɑ pu lɑ ŋkhàp jò ywə yə Si hɑ bi mo tə kwǐ ŋkhap nə a.

²¹ Yu tsʉ' kɑ yu ywə lɑ tə̌ nə ywə yə a wə shyə tsɔ' a pɑ́, nə pa' tʉm tsǔ tə dəŋdəŋ dzə̌ Si a.

²² Kwyəpnyə nə tʉm shɔkcɔk tsǔ, biŋ shwyɛ'nyə Si. Mu'cwə e lɑ mkwɛnyə cwəpuŋ myə a sɔ' nthʉm tʉm o a nə shwyɛ' o.

²³ Nə pa' gɑ wə jɔ gɑ́ o nthʉm bɔkbɔk nwə dzəzə ba m̀ nthʉm mgwɑ mnwə cwəpuŋ.

²⁴ Simon piŋ ba' gɑ: Pɑ kwa' wɔ nə cwyɛ'nyə Cyəpɔ nə m̀ po'o gɑ sɔmywə yə po gɔm a kɑ sɔ' nə m̀.

²⁵ Pɛtrɔ pu Yohane lə cwətə hɑ ŋkwinthɛ̌, biŋ gɔm ghɔm Cyəpɔ cwəlɔ, bɑnyə Yerusalɛm giŋ bɑ siŋ Cúŋ pɑpuŋ bi mpfə́ la' jɔmyɔ̌m Samaria.

Filipo pu ŋkho nthɛ fo Etiopia

²⁶ Aŋgəle Cyəpɔ ghɔm bi Filipo gɑ: Lusi gɔ m mto dzʉ nə məjyə yə a dzəŋ fɑ Yerusalɛm gɔ Gaza a, a wə bɑ a ghaknyə cwəlɔ.

²⁷ Filipo lə wuŋ dusi gɔ. A nə pɑ̌ po'o, mu' sʉ̌ mo yə́ Etiopia gɛfa' Kandakos Mɑfo Etiopia, ŋkho nthɛ Mɑfo yə e lə̀ bɑ e ghɔ Yerusalɛm nə ghiŋ piŋnthʉm

²⁸ pɑ məjyə bɑnyə m la' e, bɑ e cwə dəm kɑlik bɑwə ŋkhe ŋwa'nyə gɔm ghɔm Si Esaya.

²⁹ Zhwenyə ghɔm bi Filipo gɑ: Ghɔ ŋkwyatə́ kɑlik yɑ.

³⁰ Filipo khʉdʉ̌ ŋkwɔ' nə, ju' pa' sʉ̌ mo bɔ wə ŋkhe ŋwa'nyə gɔm ghɔm Si Esaya a, biŋ gɔm bi e gɑ: Tə́ o bɑwə ju' ywə yə o wə ŋkhe a kwa' pɑpuŋ lə?

³¹ E pa' bi e gɑ, gɑ gɔ yu' m gɑ́ kɑ̀, bi a pɑ gɑ́ ŋ ka ghə mo yə e gɔ tutə bəm a? E lə ghɔm po'o cwəlɔ ŋkhe Filipo gɑ e kwɔ' shwə bəŋ é.

³² Tsʉ' ŋwa'nyə yə e lə bɑwə ŋkhe a bɑ gɑ: Dəŋdəŋ pa' jʉ̀jʉ̀ yə pu wə dɑ e gɔ m nə wa é a dəŋdəŋ pa' mu jʉ̀jʉ̀ tə gi dzə̌ pɔ pyə wap wə ŋkhəm é a a bɑ dəŋdəŋ po'o tɑ e tə ŋa' shwə e pɑ.

³³ Yə nə fi' nɑ hɑ si lě gə e pi shɛ́. Wɑ̌ gɔ la' ghɔmnwə nə pɔ nə yə́ wɔdzʉ́? Nə pa' bɑ pu le nthé vɔk e nə dəmca' a.

³⁴ Sʉ̌ mo lə piŋ gɔm bi Filipo gɑ: Sə́só, gɔm ghɔ̀m Si gɔm po'o nə wɑ? Pɑ nə é kɑ nə mu' mǒ.

³⁵ Filipo cwɔ' shwə é, ntho' nə tsʉ' ŋwa'nyə bɔ nə siŋ e Cuŋ pɑpuŋ Yeso.

³⁶ Pu a pu lə pəmtə gɔ̌ tə ŋkhəm nə mu' kəŋ shyə, Sʉ̌ mo piŋ gɔm gɑ: Yɔ shyə̌ yəŋ gɑ; kɑ wə ŋkhɔ pa' gɑ kwishyə a?

^37-38 E lə ghɔm gɑ pu lɑ kɑlik e nthiŋnyə wap pɑpʉə tsəŋ shyə, Filipo pu Sʉ̌ mo. Filipo nu' e shyə.

³⁹ Wap lə cwə tə nthəm shyə, Zhwenyə Cyəpɔ kwa Filipo nə gɔ la' Sʉ̌ mo piŋ jɔ e, da' gɑ nə ghɔ cwəlɔ giŋ bɑ ŋwɛnyə.

⁴⁰ Sɔ' m nə Filipo, e lə yɔ bɑ m Azoto, biŋ bɑ giŋ bɑ siŋ Cuŋ pɑpúŋ nthʉm guŋ mtisuŋ awɛ, biŋ gɔ m Kaesarea.