MFA' MGHƐ NTHƏM 6 - Ghomala New Testament

Nə ci pɔ sɔmbʉə

¹ A lə pɑ́ cwə o bɔ, dəŋ pɑkhʉ̌ pɑ ŋkwi'. Pɑ Elenistə to' nə ghɔmtə nə́ pɑ Ebraika nə pa' pu lə bɑ dʉɔnyə mpfɔk pap nə cwə nə ghap ywətsʉ nə tyɛ'dzʉ.

² Mghɛ nthəm shwɔppʉə mgham ke guŋ pɑkhʉ̌ awɛ nə mɑ cu'tə gwyə gɔm gɑ: A ka puŋ gɑ pyə tak fa' Si nəŋ nə fa' ywətsʉ.

³ Mfɑ̌mfɑ́ po ghɔ pɑ cəcɑ̌ po shəŋ pɔ sɔmbʉə, pɔ dəŋdəŋ pyə Zhwenyə ba zhyənwə lo nə pu a, pyə yap wap nə fa' mfa' bɔ.

⁴ Tə̀ sɔ' m nə pyə, pyə gɔ pɑ lɑ nə cwyɛ'nyə Si ba fa' Ghɔm nə ghɔ dzə.

⁵ Guŋ cu'tə awɛ lə piŋ mkwɛnyə bɔ: Pu cwɔ' Etiennə, ta' mbɛ bɑ piŋnthʉm ba Zhwenyə Dɔlɔ̌ lo nə e, shwɔ' Filipo, ba Prokor ba Nikanor pu Timon ba Parməna biŋ gə Nikola yə Antiokia yə e lə kǒ nə mà pɑ Yudea tə biŋ a.

⁶ Pu lə la'tə wap bi mghɛ nthəm, shwyɛ'nyə Si, jap bu thə pu.

⁷ Ghɔm Si lə bɑ ŋkwyə, dəŋ pɑkhʉ̌ pɑ ŋkwi' té' o Yerusalɛm, kwa' vəŋ mkamsi pɑ ju'nyə nə piŋnthʉm.

Nwə Etiennə

⁸ Gho' ba tʉɔ lə lo nə Etiennə, e pɑ́ nthé msya, ba mtiŋ gwyə́ cəcɑ̌ pɔmnəŋ.

⁹ Da' gɑ a lə cyə m nə mnwə bɔ, pɔ pyə wap lə bɑ nə Sinagogə pɑ təm ŋkwɔ, pu a pɔ nə guŋ Kirena, ba Aleksandria, pɑ kilikia ba pɑ Azia to' fəŋnyə pu a Etiennə.

¹⁰ Tə wap yɔ gɑ bi a pɑ wap lə tsɔp zhyənwə pu a Zhwenyə yə a lə bɑ nə mghɔm myə́ a.

¹¹ Wap thənyə pɑ bɛ gɑ wap ghɔm gɑ: Pyə yu' e ghɔm ghɔ̀m nə́ jəmtə́ nə Mosɛ ba m nə Si.

¹² Wap lə cu'tə pɔ, mghətsó ba pɑ zhyə mco'. Gəm Etiennə tə e jyə, dɑ e nə gɔ Sanedrɛŋ

¹³ ŋkho tsʉ̌', gə́ mghɛ kwinthɛ cwanwə. Wap ghɔm gɑ: Bɛ yəŋ gɑ bɑ̀wə gɔm bɔkbɔk mghɔ̀m nə tsʉ' dɔlɔ̌ ba nə mco'.

¹⁴ Nə pa' pyə yu' pa' e gɔm gɑ yəŋ Yeso yə Nazarɛt gɔ sa'tə tsɔ' gɑ, piŋ kwyəpnyə mkhɛ mnwə myə Mosɛ lə hɑ bi pyə a.

¹⁵ Guŋ pɔ awɛ pyə wap lə bɑ wap cwə dyə Sanedrɛŋ a lə bɑ wap tʉ mnyə map nə Etiennə wap lə yɔ sə e a pɑwə hwə pa' sə aŋgəle.