MFA' MGHƐ NTHƏM 5 - Ghomala New Testament

Nwə Ananias pu Safira

¹ Mu' mbɛ tso tsyə pɑ Ananias pu jwi e Safira lə pɑ̌ kwishwə, fiŋ ca' tsap.

² Pu e piŋ bɑ́ kwishwə e lwɔ' mu' nə ŋkhap pě, tə dɑ bvʉ' nə gɔ jap dzə mghɛ nthəm.

³ Da' gɑ́ Pɛtrɔ ghɔm bi é gɑ: Ananias, nwə kɑ́ bɑ Sata lo nə tʉm tsǔ po'o? Ǒ cwanwə bi Zhwenyə Dɔlɔ̌ biŋ dwɔ' mu' nə ŋkhap pě.

⁴ O kě tə zhyə nə tak pě nəŋ tə fiŋ a? Kɑ nə fiŋ gə nə ŋkhap e pa' o kuŋ a? Nwəkɑ bɑ yəŋ nthi ŋkwɛnyə sɔ' nthʉm tʉm tsǔ? O tə shwanwə m bi pɔmnəŋ pɑ, o shwanwə m bi Si.

⁵ Ananias lə nə yu' mghɔm mɔ gɑ, bvʉ̌si pfʉ. Mɑ pwɔk ko nə guŋ pɔ awɛ pyə wap lə yu' yəŋ nwə a.

⁶ Ŋkhɛ́ mo lə sɔ' dzʉmtə é ŋkwa é nə gɔ nthəŋ.

⁷ A lə cyə gwɛ́ a m nam tá, jwi é kodyə tə zhyə ywə yə a nthəm a.

⁸ Pɛtrɔ həŋtə é gɑ: Siŋ a! Yəŋ kwa' dəŋ yə po fiŋ pé a lə? E ghɔm gɑ əŋ a dəŋ é.

⁹ A pɑ̀ po'o Pɛtrɔ piŋ gɔm bi e gɑ: Nwə kɑ bɑ po tɛ bɑ ŋkwishwə ŋkham Zhwenyə Cyəpɔ? Yu', mkwə pɔ pyə wap fɑ m nə təŋ dhə o a mɑ jyədyə̌. Wap gɔ kwa ba wə yǔ.

¹⁰ E lə wuŋ bvʉ dzə Pɛtrɔ npfʉ́. Ŋkhɛ mo lə nə kodyə jɔ e, bɑ ě pfʉ, wap kwa e nə gɔ nthəŋ é bəŋ dhə e.

¹¹ Pwɔk gwyə ko nə guŋ cu'tə pɑ piŋ ba m nə guŋ pɔ awɛ pyə wap lə yu' yəŋ nwə a.

Msya mghɛ nthəm

¹² Mtiŋ jɔmyɔm pu a msya lə bɑ nthəm cəcɑ̌ pɔmnəŋ shyə m nə bu mghɛ nthəm. Guŋ pɑ piŋ awɛ pɑ́ shwə nthʉm pə́ŋ Salomoŋ, bɑ ŋkwishwə.

¹³ Da' gɑ́ la' sɔmmo dyɛ' kuŋ nə tamtə nə pu, da' gɑ pɔmnəŋ pɑ go'tə wap.

¹⁴ Vəŋ pɔ jɔmyɔ̌m pɑ bɛ ba pɑ jwǐ pɑ shyə m nə piŋnthʉm jap jʉ̌m Cyəpɔ lɑ di lə kwi'.

¹⁵ Lɑ pu pɑ dɑ mghɛ gho sɔ' məjyə bɑ pu kwa wap nə mkodyə ba m nə pɛtə̀ po'o gɑ Pɛtrɔ nə cyə̌ cyə̀ŋnyə̀ e kwak mu' mo nə pu.

¹⁶ Pɔ tə jɔm lə nthəm jyə jyə gəŋnyə Yerusalɛm sɔ' bɑ wap kwa mghɛ gho ba pɔ pyə zhwenyə cwəpuŋ lə bɑwə baknyə wap a, a wap pɑ jɛtə gùŋ yap awɛ.

Nə ghəm mghɛ nthəm

¹⁷ A lə pá po'o luŋ ŋkhamsi gwyə pu a pɔ pyə pu a pu bɑ a: Pɑ Sadukai yɛ.

¹⁸ Wap ghə pú ghəm mghɛ nthəm nyə̀ŋ wap cɛ́ pɑ sɔsɔ̌.

¹⁹ Da' gɑ a pɑ mtsʉ́' aŋgəle Cyəpɔ cwɔ' mjyədyə̌ cɛ̌ gə wap tə́m, e ghɔm bi pu gɑ:

²⁰ Po ghɔ nthiŋnyə Dyə Si siŋ ghɔm vɔk tsɔ gɑ bi pɔmnəŋ.

²¹ Wap lə yu' ywə yə e gɔm a, dzʉ̌ nə lɔ wap wuŋ gɔ Dyə Si, bɑ ji'tə pɔmnəŋ. Ŋkhamsi gwyə pu a pɔ pyə́ lə sɔ', e ké Sanedrɛŋ, guŋ pɑ ya' shɛ pɑ Israɛl, biŋ nthəm gɑ pu ghɔ dyəcɛ̌ shəŋ mghɛ nthəm.

²² Mghɛ fa' pyə pu lə təm wap a, lə ko dyəcɛ̌ la' wap yɔ wap. Wap lə pɑnyə gɔm gɑ:

²³ Pyə ko jɔ dyəcɛ̌ bɑ pu cəŋtə jo', ba pɑ pyap pɑ́ pɑ jyədyə̌; da' gɑ pyə cwɔ' jyədyə̌ ŋkho dyə̀ pyə lə yɔ́ sɔmmo dyə́.

²⁴ Tadyə̀ byap Dyə Si ba mkamsi gwyəgwyə lə nə yu' mcuŋ mɔ gɑ, nwə cyə wáp nə mghɛ nthəm, wap lə zhyə pa' a nə shyə a.

²⁵ Da' gɑ́ mu' mo sɔ' siŋ wap gɑ: Yɔ́ pɔ pyə po kɑ nyə̌ŋ wap dyəcɛ̌ a pɔ thə Dyə Si bɑ́wə ji'tə pɔmnəŋ.

²⁶ A lə pɑ po'o tadyə byap Dyə Si lɑ mghɛ fa' pu a pu ghɔ Dyə si dɑ mghɛ nthəm pɑ̀ gɑ zhyə̀ nə sɔ', nə pa' wap lə bɑwə bwɔk gɑ pɔmnəŋ kɑ lɑ mwɔ' nthamtə wap a.

²⁷ Wap lə lɑ̌ wap sɔ' Sanedrɛŋ; ŋkhamsi gwyə təŋtə wap gɑ:

²⁸ Pyə kɑ cəŋtə sho' bi po gɑ ka po kwi' ji'tə tsǒ bǎ? A yəŋ bɑ po lɑ mzhi' nwə mɔ sa Yerusalɛm; po bɑ́wə shəŋ gɑ mcyə bɛ̀ bǎ ko nə pyə!

²⁹ Da' gɑ̀ Pɛtrɔ pu a mghɛ nthəm ghɔm gɑ: Mo gɔ yu'nyə m bi Si, tə m bi pɔmnəŋ pɑ̀.

³⁰ Si mta pɔk pɑ bɑ ě yám Yeso yə po kɑ cəŋ e nə́ thə jwə e a.

³¹ Si bɑ e lɑ pu tʉɔ e ŋa' e pa' Mu Fò, biŋ bɑ gɛvɔk pɔ a. Po' gɑ Israɛl kwyəpnyə, pu lə mhɔ̀ myə́ shwyɛ' e.

³² Pyə bɑ mghɛ kwinthɛ nə mnwə bɔ̌, wɔk, ba Zhwenyə Dɔlɔ̌ yə Si hɑ́ bi pɔ pyə wap ju'nyə e a.

³³ Wap lə yu' ghɔm tsɔ gɑ, luŋ yap sə̀, wap piŋ sɛ nə zhwə mghɛ nthəm.

³⁴ Da' gɑ mu' mo lusi Sanedrɛŋ bɑ̀ mo nə pɑ Farisai, tso tsyə pɑ́ Gamaliɛl bɑ́ Tádyə nə́ mco', bɑ guŋ pɔ awɛ kùŋ e; gɔm gɑ pu na' dɑ mghɛ cɛ́ nthəm mu ywə,

³⁵ biŋ gɔm gɑ: Pɑ Israɛl, po pɔmtə nə ywə yə po gɔ ghə nə pɔ pɔŋ gɑ a.

³⁶ Nə cwə dzʉ̌ yəŋ gɑ, pu kɑ yɔ Teʉdas təm, bɑ gɔm gɑ e bɑ kwa' Mo, gwɛ a pɔ ŋkhəpfʉə cʉ́m jʉ̀m ě; pu kě jwə é guŋ pɔ pyə wap kɑ tam jʉ̀m é a sɛ́tə.

³⁷ Pu piŋ jɔ Yuda yə Galilea təm yə cwə yə pu lə bɑwə sɛ́ pɔ a. Fəŋtə vəŋ pɔ jʉ̀m é; ba yʉ́ yə kě npfʉ, guŋ pɔ pyə wap kɑ tam jʉ̀m é a sɛtə.

³⁸ A po'o tə gɑ gɔm bi po gɑ ka po kwi' jap jʉ̀m pɔ pɑ̌, pɑ tak wap nəŋ wap ghɔ. A pɑ gɑ́ mkwɛnyə map kɑ mfa' map lə fɑ m bi pɔmnəŋ bɑ a gɔ mi pɑ dǒ e,

³⁹ nəŋ bɑ gɑ́ a fɑ m bi Si, bɑ bi a pɑ po lə ghə tə a mi pɑ̀. Po pɔmtə gɑ ka po à Si lo' shù! Wap lə piŋ ywə yə e gɔm a,

⁴⁰ ŋkhe mghɛ nthəm gə pu lɑ nthé nə shwɔ wap, biŋ sho' bi pu gɑ ka wap kwi' ŋkhe tso Yeso nə́ŋ wap.

⁴¹ Mghɛ nthəm lə nə təm Sanedrɛŋ bɑ ŋwɛnyə̀ pa' Si yɔ gɑ wap ku' pa' bi a pɑ wap yɔgǒ' nə tso Yeso a.

⁴² Wap lə bɑ nə gùŋ mtyɛ' dzʉ awɛ Dyə Si, pa' mdyə map a, wap lə pɑ bwa nə zhi'tə ba nə ghɔm mcuŋ Yeso Kristo.