MFA' MGHƐ NTHƏM 4 - Ghomala New Testament

Pɛtrɔ pú Yohane dzə́ pɑ ya' shɛ́

¹ Cwə yə́ Pɛtrɔ pu Yohane lə pɑwə gɔm nwə bi pɔmnəŋ a, mkamsi, ba tádyə dé Dyə Si ba pɑ Sadukai sɔ' bəŋ pu.

² Nwə lə́ bɑwə bɔk wap nə yɔ gɑ wap wə nthɔk pɔmnəŋ, ba nə nwə yə wap lə bɑwə gɔm nə Yeso gɑ mpfə pɔ jam nə vʉ̌ a.

³ Wap lə ghə pu ghəm wap nyəŋ dyəcɛ̌, wap ti pɑ dyə cɛ tə dzʉ lɔ́, nə pa' a lə bɑ́ bwadzʉ̌ lə.

⁴ Cəcɑ̌ pɔ pyə wap lə yu' ghɔm bɔ̌ a, pɔ tə jɔ́m lə pǐŋ. Pɑ piŋ lə bɑ gwɛ a pɔ sha'tɔ.

⁵ Dzʉ lə lɔ̌, guŋ mthədzə awɛ, pu a mghətso, ba pɑ zhyə́ mco' pyə wap lə bɑ́ Yerusalɛm a cu'tə.

⁶ Hana ŋkhamsi gwyə lə bɑ si, ba Kaifa, gə Yohane pu Aleksandrə ba guŋ pɔ awɛ nə mtuŋdyə mkamsi gwyəgwyə.

⁷ Wap lə ghə pu lɑ Pɛtrɔ pu Yohane sɔ' dzə̌ pú. Wap həŋtə wap nwə gɑ: Po shyə m nə ya tʉ̀ɔ kɑ m nə tsǒ wɑ tə gə yəŋ gɑ nwə?

⁸ Zhwenyə Dɔlɔ̌ lə lo nə Pɛtrɔ e ghɔm bi pu gɑ:

⁹ Wɔ mthə́dzə guŋ ba mghətso, po bɑwə fyɛ' wɔk tyɛ' ɔ gɑ pyə ghə nwə pɑpuŋ bi ŋkho'tə, gɑ pyə ghɔm pa' a shyə tə bɛ yəŋ gɑ vɔk a.

¹⁰ Guŋ yɔ̀ awɛ, ba guŋ pɑ Israɛl awɛ zhyə́ gɑ a shyə m nə tso Yeso Kristo yə Nazarɛt yə po lə́ kamtə e thə bɛnyəpɛnyə, Si piŋ jám é nə vʉ̌ a, tə bɛ yəŋ gɑ yə e dzə po a yɛ.

¹¹ Yʉ Yeso bɔ nə bɑ gwɔ̀' yə wɔ pɑ pə́m pà' lə wa' a, bɑ ǎ zhi gwɔ' phə pa'.

¹² Sɔmywə vɔ̀k tɑ́ bɑ nə sɔmtsʉ' pɑ́ tə ně da' nə Yeso Kristo. Nə pa' sɔm mu' tso tə to kɛbəŋ tsyə pu hɑ bi pɔmnəŋ bi a pɑ a kwitə wɔk pɑ nə hɑ vɔk bi pɑ a pɑ́.

¹³ Wap lə yɔ mtiŋ pa' Pɛtrɔ pu Yohane wə nə shəŋtə gɔm nwə a, biŋ jɔ gɑ a pɔ bɑ wap ka zhi'tə ywə dəŋ ywə, bɑ pɔ tə pu jyə wap, nwə cyə wap. Wap zhyə̀ gɑ pu a Yeso lə ghǐŋ,

¹⁴ wap lə lě mo yə e lə bɑ bəŋ pu a bɑ e cəŋtə jɛ̌, la' wap piŋ jyə̀ ywə yə wap gɔ ghɔm a.

¹⁵ Wap lə ghɔm gɑ pu te Pɛtrɔ pu Yohane Sanedrɛŋ hɑ pé, biŋ sɛ́ cəcɑ̌ pu

¹⁶ bɑ həŋtə gɑ: Pɑ gɔ ghə la m pɔ pɑ? Nə pa' wap nə gə mɔ gɑ msya nwə tə bɑ guŋ Yerusalɛm zhyə awɛ bi a pɑ pɑ̀ lə kə́ŋnyə.

¹⁷ A puŋ gɑ́ pɑ ghə gɑ́ a kɑ piŋ sa pé cəcɑ̌ pɔmnəŋ. Pɑ gɔ paptə wap, wap kɑ piŋ ŋkhe tso bɔ dzə̌ sɔmmo.

¹⁸ Wap lə piŋ ŋkhe wap dyə, sho' bi pu nə piŋ ŋkhe kɑ nə piŋ ji'tə tso Yeso lə́.

¹⁹ Da' gɑ Pɛtrɔ pu Yohane pa' bi pu gɑ: Ywə dəŋdəŋ dzə Si bɑ pɑ nə yu' shwə yɔ kɑ nə yu' kwa' yə Si? Po yap pa' po yap a!

²⁰ Tɑ bi a pɑ pyə lə lɛtə nə ywə yə pyə jɔ biŋ ju' a.

²¹ Pu lə paptə wap mcʉ́mmcʉ̌m, da' gɑ jak ywə yə pu gɔ cyə m nə nə́ nyəŋ shɛ thə pu a, nthak wap nəŋ. Bɑ́ bwɔk pɑ pɔmnəŋ nə pa' guŋ pɔ awɛ lə bɑwə gu'tə Si nə ywə yə a lə cyə a.

²² Bɛ yə e lə yɛ́ msya yɛ̀ po' a lə bɑ e ghə gu'dzʉ mghappfʉə tə ntwɔk.

Cu'tə mcwyɛ'nyə̀

²³ Pu lə cwə tə nthak Pɛtrɔ pu Yohane nə́ŋ wap ghɔ nthɑ mso pap, siŋ wap ywə yə mkamsi gwyəgwyə pu a mghətso gɔm bi pu a.

²⁴ Pu lə yu' ywə yə wap gɔm a; guŋ pɔ awɛ tamtə gɔm bi Si gɑ: Ta, wə nə lə nyaptə kɛbəŋ pu cǎ', ba shyə lɑpʉə pu a tsə tsyə a nthʉm o a.

²⁵ O lě shyə m nə Zhwenyə Dɔlɔ̌ nyəŋ mghɔm mɔ gɑ shwə ta yɔk David gɛfa' o gɑ: Guŋ guŋ jwyanyə kɑ pu a mfa' pɔpɔ pɔmnəŋ?

²⁶ Mfo mfo ghə ŋkwishwə, mtadyə cu'tə, wap cʉ' ta' ywə yɑmu' tə lo' Cyəpɔ pu Kristo e.

²⁷ A nyənyɔ gɑ a bɑ wap cu'tə nthʉm tisuŋ yəŋ: Herode, Pontio pilato, pu a guŋ mguŋ awɛ, bɑ guŋ pɔ awɛ cʉ́m jʉ̌m Yeso, gɛfa' o yə Dɔlɔ̌, yə o lə zhwɔ' e a.

²⁸ Wap ghə guŋ ywə yə pǔ o pu a mkwɛnyə mǔ lə ləŋdzə jap á, a pəmtə.

²⁹ Cwəlɔ m Cyəpɔ, yɔ pa' wap wə baptə mghɛ fa' pǔ, hɑ gʉ' bi pu gɑ wap cəŋtə nə gɔm Ghɔm tsǔ.

³⁰ Siŋ pǔ m Ta, mgho yɛ̌, mtiŋ pu a msya təm shyə m nə tso Yeso gɛfa' o yə dɔlɔ̌.

³¹ Wap lə mǐŋ nə cwyɛ'nyə Si, dyə yə wap lə bɑ nthʉm o a cʉ'nyə; Zhwenyə Dɔlɔ̌ lo nə pu awɛ, wap pɑ shəŋtə gɔm ghɔm Si.

Vɔk nthamtə

³² Vəŋ du pɔ pyə wap lə cʉ' pɑ piŋ a lə́ bɑ wap ghə pɑ ta' tʉ̌m tsɑ mu', ba ta' zhwenyə yɑmu'. Sɔmmo lə piŋ jɔ sɔm yə́ ywə pa' yə a pɑ. Wap lə́ biŋ bɑ nthamtə guŋ ywə awɛ tamtə.

³³ Tʉɔ gwyə pɑ́ bɑ́ nə ŋkwinthɛ̌ nə yam nə vʉ Cyəpɔ Yeso yə mghɛ nthəm lə gɔm a, mɑ gho' pɑ cəcɑ̌ guŋ yap awɛ nə fà' fɑ́ bi Si.

³⁴ Sɔmmo cəcɑ̌ pu la tə bɑ bə́ŋ pɑ, nə pa' pɔ pyə wap lə bɑ wap ghə mbe kɑ mpa' lə lə bɑ́ fǐŋ, bɑ dɑ ŋkhap e nə sɔ'

³⁵ jap dzə mghɛ nthəm, bǎ ya mo lə pɑ biŋ ŋkwi pɑ ywə yə a ku'nyə nə e a.

³⁶ A lə pɑ po'o bɑ Yosɛp yə mghɛ nthəm lə ŋkwi' ŋkhe é gɑ Barnabas, a pɑ̀ da'tə gɑ mo yə e hɑ kaktʉɔ a, pɑ̀ bɑ e ghə pé. E lə bɑ mo nə tuŋdyə pɑ Levi, ba yə Kipro.

³⁷ E lə fiŋ pě é, dɑ ŋkhap nə gɔ jap dzə mghɛ nthəm.