MFA' MGHƐ NTHƏM 24 - Ghomala New Testament

Tertulo putə Polo

¹ A lə nə cyə dzʉ́ tyɛ' tɔ̀ Ananias ŋkhamsi gwyə pu a mghətso ba mu' Tertulo, giŋjyə̀, wap tsəŋ gɔ Kaesarea bùtə Polo bi gɔpna'.

² Pù lə ké é cwəlɔ, Tertulo to' nə ghɔmnwə nə e gɔm gɑ: Feliksə tá tʉɔdəŋ! A cyə m nə wə, ba nə́ nə piŋ gə ŋkhɛ nwə yə o gə nə́ nə nyaptə pɔmnəŋ á, pyə pɑ̀wə shwə kwa' nə hwitə.

³ A nə guŋ mtsʉ' awɛ, nə guŋ mcwə awɛ cwəlɔ pu pɑ̀wə go'tə o nə mnwə pɑpuŋ bɔ.

⁴ Da' gɑ nə cyə́tə ywɔk baknyə o pɑ̀ te'te', gɑ̌ wə shwyɛ'nyə gɑ o lɑ tʉ̀m cɔmmtso yə a bɑ̀ bu a tə nə jù' ywə yə gɑ gɔ ghɔm a.

⁵ Pyə ké jɔ bɛ yəŋ gɑ e pɑ̀ kwa' ywə cwəpuŋ, bɑ̀wə ma' paknyə cəcɑ̌ guŋ pɑ Yudea awɛ nthʉm dzʉ́, biŋ bɑ́ tadyə́ cu'tə va' pɑ Nazarɛt.

⁶ E kɑ lə́ŋtə ba nə viŋ Dyə́ Si tə pyə ghəm é [

⁷ ]

⁸ O gɔ nə təŋtə e yɔ gɑ guŋ ywə awɛ yə pyə gɔm a bɑ̀ pɑ̀ nyənyɔ.

⁹ Pɑ Yudea lə piŋ gɑ guŋ mnwə bɔ awɛ bɑ̀ pɑ̀ dəŋdəŋ po'o.

Polo pa' nwə̀

¹⁰ Gɔpna' lə hɑ ghɔm bi Polo e ghɔm gɑ: Gɑ zhyə́ gɑ tə fɑ nə mgu'dzʉ jɔmyɔm wə nə bɑ gɛ ya' shɛ́ guŋ pyə. A cyə m po'o tə bɑ gɔ tɛ nwə bu a tə pwɔk.

¹¹ O le bɑ o gɔ yɔ gɑ́ a ka wuŋ ntwɔk tyɛ'dzʉ shwɔppʉə mghǎm pa' ŋ khɑ pʉɔ Yerusalɛm nə ghamtə Si a.

¹² Sɔmmo ka tə yɔ a Dyə Si, kɑ dyə msinagogə, kɑ m tisuŋ lɑ pyə mo pɑwə nthɛshwə, kɑ bɑwə shyə pɔmnəŋ lə.

¹³ Pɔ́ pɔ gɑ ka ku' nə la'tə gɑ nwə yə wap wə gɔm nə m̀ á nyənyɔ.

¹⁴ Ywə yə gɑ zhyə a bɑ gɑ̀ gɑ bɑ̀wə fa' bi Si mtá pɔk pɑ m nə Jyə yə́ wap bɑwə ŋkhe m gɑ cu'tə va' a. Gɑ̌ biŋ guŋ ywə awɛ yə a bɑ pu və nthʉm Mco' ba nthʉm ŋwa'nyə mghɔm ghɔ̀m Si a;

¹⁵ Gɑ̌ gə mɔktə nə sǐ ba wap yap gɑ pɔ dəŋdəŋ ba pɔ tə pɑ dəŋdəŋ gɔ sɔ' yam nə vʉ̌.

¹⁶ A ywə yə á gə tə bɑ ŋkhaktʉɔ gɑ gə tʉm tə bya dzə̌ Si ba m dzə pɔmnəŋ.

¹⁷ Mgu'dzʉ̌ yɔm lə cyə̌, bɑnyə Yerusalɛm nə hɑ ywə nə ŋkwitə bi pɔ pɑ̌ ba ywə hɑhɑ̌.

¹⁸ A pɑ̀ po'o tə̀ pu yɔ a Dyə Si, bɑ̀ gɑ miŋ nə sɔk vɔk a; nə yɔ a po'o tə a bɑ́ bɑ pɔmnə̌ŋ cu'tə kɑ ma' va' lə.

¹⁹ Da' gɑ shɑ pɑ Yudea fɑ Azia. Wap e kɑ bɑ gɔ sɔ' putə a bu, bi a pɑ gɑ̀ wap lə yɔ ywə yə wap gɔ la' a nə a!

²⁰ Tak po'o, pɔ pɔ gɑ ghɔm ywə yə wap kɑ̀ yɔ bɑ gɑ ghə a pɔk nə pa' pu kɑ fyɛ' a dzə̌ Sanedrɛŋ a.

²¹ Kɑ á nə̌ŋ bɑ pɑ da' nə shwə ghɔm tsyə ŋ khɑ tyəŋnyə thə dzə pu shwé gɑ: nə nə́ yam nə vʉ̌ tə pu bɑwə fyɛ' a nə tyɛ' ɔ?

²² Feliksə yə a lə bɑ̀ ě cəŋtə jyə́nwə nə Jyə̀ bɔ a lə nə lwɔ' shɛ́ gɔm gɑ: Gɑ gɔ ti fyɛ' shɛ́ yɔ tyɛ' yə tá sa' msəŋwi tsəŋ sɔ́' a.

²³ E lə ghɔm bi tádyə msəŋwi ŋkhə gɑ́ e lɑ Polo gɔ nyəŋ cɛ, da' gɑ tə́ tə pɑ de e pɑ́ te', e kɑ nəŋ ŋkhɔ bi sɔmmo nə pɑ fa' nə e.

Polo dyəcɛ̌

²⁴ Shɑ mtyɛ'dzʉ́ lə cyə̌, Feliksə pu jwi e Drusila yə e lə́ bɑ̀ yə Yudea a pɑ. E ghə pu ké Polo gɑ e sɔ' siŋ wap nwə nə nə piŋ Kristo Yeso.

²⁵ Da' gɑ pa' wap lə ko biŋ bɑ gɔm nwə pɑ nə nwə dəŋdəŋ, ba nə nə kyəp nɑ, ba nə nə́ fyɛ' yə a lə bɑwə gɔ sɔ' a, Feliksə pwɔk, ja' ghɔm Polo gɔm bi e gɑ: nə cwəlɔ, ghɔ̌. Ŋ gɑ̌ gɔ ti tə piŋ ké o.

²⁶ E lə bɑ̀wə cəŋtə mɔktə gɑ Polo gɔ hɑ ŋkhap bi e. A cyə m po'o e ké e mcʉ̀m mcʉ̌m pu e pəmtə.

²⁷ A lə nə cyə gu' pʉə Porkio Festo kwyəpnyə Feliksə bɑ shəŋ nə puŋ pɑ Yudea nthak Polo dyəcɛ̌.