MFA' MGHƐ NTHƏM 23 - Ghomala New Testament

¹ Polo lə̀ le Sanedrɛŋ dəŋdəŋ gɔm gɑ: Mfɑ̌mfɑ́, gɑ̌ dɑ́ pɑ tʉ́m tə bya nə giŋ dzə́ Si tə́ ŋkhəm cwəlɔ.

² Da' gɑ Ananias, ŋkhamsi gwyə lə̀ ghɔm bi mkwipu pyə gɑ wap cwɔ Polo nə shwə e. Tɑ Polo ghɔm bi gɑ:

³ Si gɔ cwɔ pɑ wə̀ m fə́fə́ sak ywə! O bɑ̀ tsa' a nə lɑ mco' tə nə fyɛ' a, da' gɑ o nəŋtə mco' bɔ, gɔm gɑ pu cwɔ a.

⁴ Mkwipu lə ghɔm bi Polo gɑ: O jəmtə pa' ŋkhamsi gwyə Si.

⁵ Polo pa' bi pu gɑ: Mfɑ pɑ̀, ɑ kɑ bɑ ŋ khɑ zhyə gɑ e bɑ ŋkhamsi gwyə nə pa' ɑ bɑ pu lé bvə gɑ̀ o tə gɔ yəmtə tadyə pɔ pǔ pɑ̀.

⁶ Pa' a lə̀ bɑ Polo zhyə gɑ̀ cu'tə lə bɑ̀ mghəŋ bʉə: Pɑ Sadukai ba pɑ Farisai a, e cwé cəcɑ́ Sanedrɛŋ gɑ: Gɑ̌ bɑ Farisai, mu Farisai. A shyə̀ m nə nə́ piŋ nə yam nə vʉ̌ yə pɑ biŋ a, tə pú pɑ̀wə fyɛ' a.

⁷ Polo lə nə miŋ nə ghɔm po'o, shɛ́ wuŋ bvʉ̀ cəcɑ̌ pɑ Farisai pu a pɑ Sadukai, cu'tə ghaptə m ghə̌ŋ bʉə

⁸ nə pa' pɑ Sadukai gɔm gɑ nə yam nə vʉ̌ tə bɑ̀wə pɑ̀, ba aŋgəle pu zhwenyə lə pɑ̀wə, da' gɑ̀ pɑ Farisai pɑ biŋ gɑ a bɑwə.

⁹ Va' lə kǒ cəcɑ̌ pú. Shɑ́ pɑ zhyə́ mco' nə yə́ ghəŋ pɑ Farisai cəŋtə gɔm gɑ: Pyə ká yɔ ywə yə bɛ́ yəŋ hɔ a. Kɑ zhwenyə ghɔmnwə bi e? Kɑ aŋgəle lɑ ghɔmnwə bi e?

¹⁰ Va' lə pɑ gɔ pɑ́ m dzə, ta sa' msəŋwi pwɔk pa' pu syatə Polo, gɔm bi msəŋwi gɑ wap fi' sɔ' fəŋ Polo nthé e cəcɑ̌ pɔmnəŋ nə ŋkwɔ' m zhəŋ dyə thə́.

¹¹ A lə cwə bɑ́ mtsʉ́' Cyəpɔ sɔ' bi Polo gɔm bi e gɑ: Kaktʉɔ! O du m nə kwinthɛ nə nwə a Yerusalɛm. O gɔ ko ba Roma kwinthɛ pɑ̀ pa' a.

Pɑ Yudea tɛ nwə nə Polo

¹² Dzʉ̌ lə lɔ̌, pɑ Yudea tɛ, tə ŋkhɔmkɔ nə́ gɑ wap pɑ̀ tə zhwə Polo bɑ wap tə tsʉ̀ ywə pɑ́, wap lə nəŋ nwə sɔmywə.

¹³ Pɔ pyə wap lə nthɛ́ po' a lə bɑ̀ pɔ mghappfʉə tə ntwɔk.

¹⁴ Wap lə ghɔ jɔ mkamsi gwyə pu a mghətso gɔm bi pu gɑ: Pyə kɔmkɔ nyəŋ gɑ̀ pyə pɑ̀ tə zhwə Polo bɑ pyə tə gɔ tsʉ ywə pɑ́. Pyə lə nəŋ nwə́.

¹⁵ Sɔ' m nə yɔ ghəŋ pu a Sanedrɛŋ, po ghɔm bi tá sá' msəŋwi gɑ e piŋ dɑ Polo sɔ', po piŋ shəŋtə de yə nwə. Sɔ' m nə pyə, pyə tsə nyaptə gɑ e gɔ nə kodyə bɑ pyə e da' jwə e.

¹⁶ Da' gɑ yo' bɔ lə tam təŋ mú' fɑ Polo yə mjwǐ, mú mbɛ, e ghɔ nthʉɔ dyə ŋkhó dyə siŋ Polo.

¹⁷ Polo lə́ ké mu' ta' tadyə sa' pɔ ŋkhə gɔm bi e gɑ, lɑ mu səm yəŋ gɑ gɔ bəŋ tá sa' msəŋwi. E ghə nwə yə e gɔ siŋ e a.

¹⁸ Ta sa' pɔ ŋkhə lə lɑ́ səm bɔ nə gɔ bəŋ tá sa' msəŋwi gɔm bi e gɑ: Gɛ cɛ́ Polo ké á gɔm gɑ̀ ŋ dɑ̀ səm yəŋ sɔ' bu. Ě ghə̀ ywə yə é gɔ siŋ o a.

¹⁹ Tá sa' msəŋwi lə tɔm pǔ mù bɔ, pu e ghɔ jʉ̀m, e həŋtə e gɑ: Yə o gɔ siŋ a bɑ kɑ?

²⁰ Mù səm bɔ ghɔm bi e gɑ: Pɑ Yudea tɛ gɑ wap gɔ həŋtə o gɑ dzʉ̌ lɔ́ o lɑ̀ Polo sɔ' Sanedrɛŋ gɑ pu piŋ shəŋtə de yə nwə, a pɑ́ yo'.

²¹ Da' gɑ̀ pɔm tə vʉ̀ nə yo' bɔ; nə pa' wap si tə bɑ pɔ mghappfʉə pyə wap si gɔ sù e a. Nə pa' wap yap tə ŋkhɔmkɔ nə gɑ wap pɑ tə zhwə Polo bɑ wap tə gɔ tsʉ̀ kɑ nwə̀ ywə pɑ́. Wap e da' jap po' o tə bɑwə byap pɑ pa' o piŋ a.

²² Tá sa' msəŋwi lə nə la'nyə mù səm bɔ̌ gɔm bi e gɑ: Kɑ̀ siŋ sɔmmo gɑ o ghə tə ŋ jyə nwə yo' yap.

Nə cya Polo Kaesarea

²³ Tá sa' msəŋwi lə ké pɑ sa' pɔ ŋkhə pɑpʉ́ə gɔm bi pu gɑ: Po nyaptə msəŋwi pɔ ŋkhəpʉə, gə́ pɑ kwɔ' leŋ pɔ mgham nthɔk, gə mkwipu pap ŋkhəpʉə pu a pu pyap nə ghɔ Kaesarea nə mnam vʉ̌' bwadzʉ̌.

²⁴ Po nyaptə ba ywə yə a gɔ kwa Polo nə ghɔ tə kəm bəŋ gɔpna' Feliksə tə sɔmywə gə e a.

²⁵ Tá sa' msəŋwi lə və ŋwa'nyə bi gɔpna' Feliksə gɔm gɑ:

²⁶ Klaudios Lusias bi gɔpna' gwyə Feliksə gɑ̌ ca'tə!

²⁷ Pɑ Yudea kɑ ghəm bɛ yəŋ yə gɑ wə shya e bu a bɑ gɔ zhwə́ e tɑ dɑ msəŋwi ŋkwi e bi pu, bɑ gɑ̌ yu' gɑ̀ é bɑ́ mú e Roma.

²⁸ Ŋ khɑ pɑ̌ shəŋ nə zhyə kwa' ywə yə pu gɔm gɑ e hɔ á, gə pù fyɛ' e dzə Sanedrɛŋ.

²⁹ Ŋ khe jɔ gɑ ywə yə wap butə e nə a bɑ fəŋnyə nə mco' map, da' gɑ́ sɔm nwə lə pɑ̀ nə tə bɑ́ pɑ́ nwə vʉ́ kɑ gwɑ mtʉɔ lə.

³⁰ Pa' ŋ khɑ yu' gɑ́ pu wə nthɛ nə zhwə́ bɛ bɔ a, gɑ́ wə nə cya e bu po' o, bɑ gɑ ghɔm bi pɑ putə e gɑ wap putə e m bu.

³¹ Msəŋwi lə ghə pa' pu lə ghɔm bi pu a, dɑ Polo gɔ tə ŋkhəm Antipatri pɑ mtsʉ'.

³² Dzʉ̌ lə lɔ̌, Polo pu a pɑ kwɔ' mleŋ nə ghɔ, msəŋwi piŋ jʉ̀m nthʉɔdyə̌.

³³ Pɑ kwɔ' mleŋ lə ghɔ tə ŋkho Kaesarea, hɑ ŋwa'nyə bi gɔpna', biŋ da'tə ba Polo bi e.

³⁴ Gɔpna' lə kě ŋwa'nyə, biŋ həŋtə gɑ Polo nthəm nə yɑ ghəŋ guŋ lə̀. Pu siŋ e gɑ́ ghə̌ŋ Kilikia.

³⁵ E ghɔm bi Polo gɑ: Gɑ gɔ ti yu' o nə cwə yə ba pɑ putə o sɔ' tə bɑ̀ si a. Biŋ gɔm gɑ pu lwɔ' Polo nthʉm buŋ dyə Herode.