MFA' MGHƐ NTHƏM 21 - Ghomala New Testament

Polo pʉɔ m Yerusalɛm

¹ Pyə a pù lə hapnyə, pyə kó shyə, dé jyə Kos; dzʉ̌ lə nə lɔ́ bɑ pyə ko Rodos, biŋ gɔ tə ŋkho Patara.

² Pyə lə ko wə jɔ kənu' gwyə a pɑ̀wə gɔ m Fenikia ŋkho nə́.

³ Pyə lə ghɔ tə bɑ jɔ Kipro, biŋ fɛ̀ dɑ m Siria, ŋkho Tiro nthəm, a pɑ̀ tsʉ' yə kənu' gwyə lə bɑwə nthé pɔ nə a.

⁴ Pyə lə cwə̌ wə tyɛ'dzʉ sɔmbʉə, nə pa' pyə lə ko wə jɔ shɑ mghɛ zhi'tə nwə. Zhwenyə lə thənyə wap, wap ghɔm bi Polo gɑ e kɑ́ pʉɔ Yerusalɛm.

⁵ Dəŋ pa' pyə lə bɑ gɔ cwə́ wə́ a lə kǔ', pyə lú nə ghɔ̀, ntham məjyə̀, guŋ pɔ awɛ, pɑ jwǐ, ba pɑkhʉ̌ yap ghɔ shya wɔk nə dhə tisuŋ. Pyə a pu ko tsʉ'u ŋkham mkwi'tə si kəŋ shyə́ lɑpʉə shwyɛ'nyə Si.

⁶ Pyə a pu piŋ da'nyə cwəlɔ, pyə nə ko kənu' gwyə wap pɑnyə wə pú.

⁷ Pyə lə sa'shyə fɑ Tiro ŋkho Ptolemaida, sha'tə mfɑmfɑ, pyə a pu piŋ shwə̀ ta' tyɛ'dzʉ.

⁸ Dzʉ̌ lə lɔ̌ pyə ghɔ ŋkho Kaesarea, gɔ dyə́ Filipo, yə e lə bɑ mu' mo nə pɔ sɔmbʉə, bɑ siŋ Cuŋ pɑpuŋ biŋ shwə́ ywə́ é.

⁹ A lə bɑ ě ghə po pɑ jwǐ tə zhyə mbɛ papfʉə wap pɑ gɔm ghɔm Si.

¹⁰ Pyə lə na' nə cwə ywə́ nə pǒ mtyɛ'dzʉ́ mu' gɔm ghɔm Si nə tso Si fɑ Yudea sɔ̌', tso tsyə pɑ Agabo.

¹¹ E lə sɔ' jɔ wɔk, bé tap Polo nə ŋkwɑ bu myə́ pu a mkwə myə́ gɔm gɑ: Zhwenyə Dɔlɔ̌ ghɔm gɑ: Mbɛ yə yəŋ gɑ tap é a yɔ pa' pɑ Yudea gɔ ko Yerusalɛm kwɑ é piŋ hɑ é bi pɑ tə pɑ pɑ Yudea a yəŋ.

¹² Pyə lə yu' po'o, pyə a mfɑmfɑ nthʉm tisuŋ cwyɛ'nyə Polo gɑ̀ e kɑ pʉɔ Yerusalɛm.

¹³ A pá po'o e pa' bi pyə gɑ: nwə kɑ́ po lɔ̀ biŋ bɑ́ bwa tʉm tsɑ̌? Gɑ̌ e dá' bɑwə byap tə da' gɑ̀ pu kwɑ a pɑ̀, ba m nə pfʉ Yerusalɛm nə tso Cyəpɔ Yeso.

¹⁴ Pa' é lə kəŋnyə nə yù' bi pyə a, pyə la tə nə gɔ dzə pɑ̀. Pyə lə ghɔm da' gɑ̀ ywə yə Si wə shəŋ a pəmtə́.

¹⁵ Mtyɛ'dzʉ bɔ lə nə cyə̀, pyə miŋ nə nyaptə tsə tsɔk, bʉɔ gɔ Yerusalɛm.

¹⁶ Mghɛ zhi'nwə pyə wap lə fɑ Kaesarea bɑ gɔ yap m Yerusalɛm pyə a pu a, lə lɑ̀ wɔk gɔ dyə Mnason yə Kipro mu' mo nə dzə mghɛ zhi'nwə.

Polo yɔ Yakop Yerusalɛm

¹⁷ Pyə ko Yerusalɛm mfɑ̌mfɑ́ lɑ kwa' tʉm pɑpuŋ tə́ nə́ dɑ wɔk.

¹⁸ Dzʉ lə lɔ̌ pyə a Polo ghɔ ywə Yakop. Tsʉ́' yə gúŋ mghətso awɛ lə bɑ nə a.

¹⁹ Polo lə ca'tə wap biŋ siŋ guŋ mfa' awɛ myə Si shyə́ m nə e gə nə gǔŋ pɑ tə pɑ pɑ Yudea a, pɑ m zhəŋ.

²⁰ Pɔ pyə wap lə bɑ̀wə ju' nwə yə e gɔm a lə hɑ ghu'tə bi Si, biŋ gɔm bi Polo gɑ: Fɑ yɔk, o yɔ dəŋ vəŋ pɑ piŋ pyə wap cəcɑ̌ pɑ Yudea a, guŋ yap awɛ nəŋ bɑ pɑ́ pɔ pyə wap ŋkhaktʉɔ nə mco' a.

²¹ A nə́ pɑ̀ po'o bɑ wap tsə yu' ywə yə pú bɑ́wə gɔm nə o a: Gɑ ywə yə o bɑwə ji'tə pɔ a bɑwə gə́ gɑ́ pɑ Yudea pyə wap shwə cəcɑ̌ pɑ tə pɑ pɑ Yudea a wap wa' mco' Mosɛ, wap lə piŋ bɑ bvo po pap pɑ́, wap lə piŋ giŋ nə ŋkhɛ mco'.

²² Pù gɔ ghə m gɑ̀ kɑ̀? Wap gɔ yu' gɑ o tsɔ'ɔ.

²³ Ghə ywə yə pyə gɔ ghɔm bu a. Pyə̌ ghə pɔ̀ pápfʉ̀ə tsɔ'ɔ bɑ wap lě ŋkhà' mka'nyə bi Si.

²⁴ Lɑ wap pu a pú pə́mtə́ dɔ́nyə́ nɑ tsɔ, a wə nə ghə ywə nə dɔ́nyə̀ bi guŋ yap awɛ, wap gɔ cwə tə kəm mthə màp, pu zhyə̀ gɑ guŋ ywə awɛ yə pu gɔm nə o a tə bɑ̀ nwə pɑ; gɑ ba wə yǔ bɑwə giŋ nə mcò'.

²⁵ Sɔ' m nə pɑ tə pɑ pɑ Yudea pyə́ wap shʉ' pɑ piŋ a, pyə kě bvə bi pu gɔm gɑ: Po kɑ pfɑ bap tsə pwɔ' pɑ tə pɑ pɑ Yudea, kɑ mcyə bap yə e fám a lə, kɑ ghiŋ cwəpuŋ lɑ.

²⁶ A lə pɑ̀ nə yə mù' jʉ̀mdzʉ̌, Polo lə pɑ bɛ bɔ pú a pú to' nə lɔnyə nɑ tsap. E lɑ ghɔ Dyə Si nə ghɔm tyɛ'dzʉ yə mlɔ́nyə̀ gɔ nə mi wap hɑ bǎ yə ywə nə gamtə Si ya mo a nə pu a.

Nə ghəm Polo Dyə́ Si

²⁷ Tyɛ'dzʉ batə sɔmbʉə lə nə́ mi, pɑ Yudea nə ghəŋ Azia, pyə wáp lə tyəŋ Polo Dyə Si a, cyə́ guŋ pɔ awɛ biŋ jap bú nə e.

²⁸ Wáp lə bɑwə shwé gɑ: Pɑ Israɛl, po kwitə́ wɔk. Yɔ mo yə é bɑ̀wə nthé shù nə pɔ pɔk pɑ, ba m nə mco' mɔk pɑ, ba nə tsɔ'ɔ yəŋ gɑ yə pɑ nɑ a, shyə́ m nə ywə yə é bɑwə ji'tə nə guŋ mtsʉ' awɛ bi guŋ pɔ̀ awɛ a yə̌ŋ. E bɑ̀ e lɑ ba pɑ Grikia ŋkho Dyə Si, po'o nə jəmtə yəŋ tsʉ' dɔlɔ̌.

²⁹ A lə̀ bɑ̀ wap yɔ̌ wap pù Trofimo yə Efeso tisuŋ, bɑ̀wə ŋkwɛ gɑ e lɑ e ŋkho Dyə Si.

³⁰ Guŋ tisuŋ awɛ lə tə̌m, pɔmnəŋ piŋ sɔ' kwa' vəŋ e. Pù ghəm Polo biŋ fəŋ e nə nthəm Dyə Si, biŋ gùŋ jo' mjyədyə̌.

³¹ Cwə yə pu lə pɑ shəŋ nə zhwə Polo, mcuŋ ŋwak ywə tá sa' msəŋwi gɑ guŋ Yerusalɛm awɛ si bɑ a va'.

³² E lə wuŋ shu'tə msəŋwi pu a pɑ tadyə́ sa' pɔ ŋkhə pu a pù ghɔ nə pwa pɔ. Wap lə nə yɔ tá sa' msəŋwi pu a msəŋwi, wap lə piŋ shwɔ Polo.

³³ Tà sa' msəŋwi lə ghɔ bəŋ Polo cwəlɔ, gəm e, gɔm gɑ̀ pu lɑ gwɑ mtʉɔ mɑbʉ́ə nə shəŋ e. E lə pɑ̌ shəŋ nə zhyə mo yə e bɑ e, ba ywə yə e gə a.

³⁴ Da' gɑ a ghɔ cəcɑ̌ pɔmnəŋ sɔmmo lə ghɔm yə́ a hwənyə yə́ yəmu' mo yə e bəŋ e a. A cyə m nə zhwyanyə bi a pɑ tadyə̌ sa' msəŋwi lə yu' sɔm nwə nyənyɔ. E ghɔm gɑ pu lɑ Polo nə gɔ nthʉ̀ɔdyə̌.

³⁵ Cwə yə Polo lə ghɔ tə ŋkho nə zhəŋ mkwə̀ ŋkwɔ' nə ŋkho dyə a, pɔmnəŋ nyɔnyə̀ nyɔ̌nyə́ tə msəŋwi cʉ' ŋkwa Polo kwa.

³⁶ Nə pa' guŋ pɔ awɛ lə bɑ̀ jʉm e bɑwə shwe gɑ: Pu zhwə e! Pu zhwə e!

³⁷ Pu lə pɑ̀ tə bɑ̀ gɔ nyəŋ Polo nthʉɔdyə e ghɔm bi tadyə msəŋwi gɑ: Bi a pɑ gɔm shwə nwə bu a? E pa' bi e gɑ, a bɑ o zhyə ghɔm pɑ Grikia a?

³⁸ E piŋ həŋtə e gɑ: Wə né tə bɑ yə Egipto yə e kɑ thə́nyə gwɛ a pɔ sha' pfʉə, pɑ tʉɔthə́ bi Roma, fəŋ wap nə gɔ ghakgo a pɑ a?

³⁹ Polo ghɔm gɑ: Myə̀ lə? Gɑ̌ bɑ yə Yudea, yə Tarso m Kilikia, mù e tisuŋ yə ɑ bɑ̀ a ghə tso a. Sə́so, piŋ gɑ gɔm nwə bi pɔmnəŋ.

⁴⁰ Pu lə̀ pìŋ bi Polo gɑ̀ e ghɔmnwə. E tiŋnyə nə mzhəŋ ŋkwɔ' nə ŋkho nthʉɔdyə, dɑ pú é gə mtiŋ bi pɔmnəŋ gɑ wap lɛtə́, wap lɛtə gɑ kǎm. Polo lɑ ghɔm Ebraika gɔm bi pu gɑ.