MFA' MGHƐ NTHƏM 20 - Ghomala New Testament

Polo cyə Grikia pu Makedonya gɔ Troas

¹ Paknyə lə cwə tə̀ mǐ Polo ke mghɛ zhi'nwə, hɑ kaktʉɔ bi pu. Biŋ da'nyə wap, tə ntham məjyə Makedonya.

² E lə kəka nə yə bɔ ghəŋ awɛ, hɑ kaktʉɔ bi mfɑ̌mfɑ́; gɔ tə ŋkhəm Grikia,

³ shwə̀ wə̀ nə mŋwə́ tá. Cwə yə e lə pɑ̀ gɔ ko shyə lɑpʉə ghɔ Siria a, pɑ Yudea ko cu'tə cwəpuŋ nə e. E yap cwəlɔ gɑ̀ e gɔ piŋ cyə́ m Makedonya.

⁴ Mso ghiŋ pyə pyə pu a pu lə bɑ a, lə bɑ Sopater mu Piro, yə Berea, Aristarko pu Sekundo pɑ̀ Tesalonika, Gayo yə Dɛrbe pu Timotio;

⁵ pɔ pɔ gɑ̀ lə tamdzə, ŋkho Troas byap wɔk.

⁶ Sɔ' m nə pyə, bɑ tyɛ' Paska lə cyə̌ tə pyə lù guŋ Filipo, ŋkho kənu' gwyə; a cyə mtyɛ'dzʉ mənthɔ̀ tə pyə kwyatə wap Troas, biŋ nthiŋnyə wə nə ta' gap dzʉ́.

Polo yam Etiko Troas

⁷ A lə pɑ̌ nə dəŋdzə tyɛ'dzʉ́ nə gapdzʉ́, pyə cu'tə bɑ bo'nyə msɛ. Pa' dzʉ lə bɑ gɔ lɔ Polo ghɔ a, e lə ghɔmnwə bi mfɑ̌mfɑ́ a sak tə ŋkhəm teŋ mtsʉ̌'.

⁸ Mlámbù lə bɑ nə yə zhəŋ dyə thə́ yə pyə lə bɑ pyə cu'tə nə a.

⁹ Mú mu' səm tsò tsyə̀ pɑ Etiko yə a lə bɑ̀ e cwə nə kə̌ŋ shwə fǎdyə́ a, lə ti tə ŋʉ̌', Polo yɑwə gɔmghɔ́m. Lwɔk lə ghə mù bɔ fɑ nə zhəŋ dyə́ yɑtá bvʉ́ si, pu nə ghɔ m nə pʉ' e bɑ e pfʉ́.

¹⁰ Polo lə wuŋ fi' cwəlɔ gɔ bəŋ é, ŋkwa e nə bu myə́ gɔm gɑ: Ka po tsɔp nɑ tsɔ, e ka pfʉ̀.

¹¹ Polo lə piŋ ŋkwɔ' thə̀ cwəlɔ, bo' msɛ, pfɑ, biŋ gɔm nwə tə ŋkhəm fɔkdzʉ, gɔ̌.

¹² Sɔ m nə́ mù mbɛ, pu lɑ é nthʉɔnthʉɔ nə bɑnyə, a pɑ kwa' nə hɑ kaktʉɔ.

Polo Mileto

¹³ Pyə lə tamdzə cwəlɔ, ŋkho kənu' gwyə nə gɔ Asos tsʉ' yə pyə lə gɔ lɑ Polo nə a, nə pa' a lə bɑ ě cyə m məjyə̀ dəmcǎ' pa' e lə yǎp nə́ nə gɔ wə́ a.

¹⁴ Polo lə kwyatə wɔk Asos, pyə kwa e nthʉm kənu' gwyə pyə a pu ghɔ m Mitilene.

¹⁵ Pyə lə kǒ wə́, dzʉ̌ lɔ̀ pyə lɑ kənu' gwyə gɔ tə ŋkhəm Kios; a lə pɑ̀ yə mu' jʉ̀m dzʉ̌, pyə cyə Samos, a piŋ nə cyə ta' tyɛ'dzʉ pyə tiŋnyə Trogilion tə ŋwak Mileto.

¹⁶ Polo lə yap gɑ e tə gɔ tiŋnyə pɑ̀, nə pa' e lə bɑwə do'nyə, shəŋ nə kəm Yerusalɛm nə tyɛ' Pantekɔtə

Polo la'nyə̀ Mileto

¹⁷ Polo lə ko Mileto ŋkhe mghətso cu'tə pɔ Kristo Efeso.

¹⁸ Wap lə kwyatə e, e ghɔm bi pu gɑ: Po zhyə́ pa' ghiŋ tsɑ̌ lɑ pɑ̌ cəcɑ̌ pó tə fɑ tyɛ'dzʉ́ yə ŋ də ŋwak Azia a.

¹⁹ Dɑ lɑ nə fi'nɑ hɑ si pu a shyə̀tsə fa' bi Cyəpɔ nthʉm mləŋtə pu a cu'tə cwəpùŋ yə pɑ Yudea lə ŋkho nə m̀ a.

²⁰ Ŋ da tə wak sɔmywə yə a lə bi a pɑ̀ a kwitə wɔ a; ŋ də siŋ Cúŋ, ji'tə wɔ dəm sim bɑ m tsʉ' cam.

²¹ Mkwinthɛ mə̌ lə bɑ nə ghɔm bi pɑ Yudea ba bi pɑ Grikia gɑ wap kwyəpnyə, shʉ' pɔ Si, biŋ Cyəpɔ yɔk pɑ̀ Yeso.

²² Cwəlɔ, gɑ̌ wə bɑ̀ gɛ cɛ̌ Zhwenyə, bɑ̀ məjyə̀ nə ghɔ m Yerusalɛm. Ŋ khɑ zhyə ywə yə́ a wə̀ bɑ̀wə byap a.

²³ Da' gɑ nə guŋ mtisuŋ awɛ Zhwenyə Dɔlɔ̌ bɑwə siŋ a gɑ gwɑ̀ mtʉ̌ɔ pu a ghəghʉɔ wə byap a.

²⁴ Ŋ tə yɑwə nyəŋ bɑ sɔm dəŋ nə vɔk a pɑ. Ywə yə gɑ shəŋ a wə bɑ da' gɑ dɑ fa' tsyə Cyəpɔ Yeso lə hɑ bəm a nə ŋkwinthɛ̌ nə mcuŋ pɑpuŋ nə gho' si a, gɔ tə ŋkhəm nə pɑpuŋ.

²⁵ Gɑ̌ wə jyə kwa' pɑpuŋ gɑ̀ wɔ pyə ŋ də siŋ wɔ nwə Nəfo a, tə gɔ la'tə kwi' yɔ sə̀ a pɑ̀.

²⁶ Bi a pɑ̀ gɔm cwəlɔ dzə po sɔsɔ̌ gɑ gɑ̌ pɑ dɔlɔ̌ nə mcyə mɔ.

²⁷ Ŋ khɑ lɑ msənyə gə sɔmywə pɑ̀. Gɑ̌ siŋ wɔ guŋ ywə yə Si lə yap a awɛ.

²⁸ Po wim nɑ̀ tso pɑpuŋ biŋ gwim ka dzə̀ yə Zhwenyə Dɔlɔ̌ dɑ wɔ gə pɑ pyap a. Po khim Cu'tə po Si yə e lə lɑ̀ mcyə myə́ jó a.

²⁹ Gɑ zhyə́ pɑpuŋ gɑ cwə yə gɑ gɔ ghɔ a, mbvʉ̌ go shɔ́kcɔ̌k gɔ ko cəcɑ̌ po, ka dzə lə vɔk wap.

³⁰ Mghɛ ghɔm cwəpuŋ gɔ təm pɑ cəcɑ̌ po fəŋ mghɛ zhi' nwə yap jʉ̌m pú.

³¹ Po ti tə tì bɑ ŋkhamtə gɑ̀ nə dzʉ̀ gu' tá mtsʉ' ba m mɔkcʉ, da tə pwa nə lɑ̀ shyətsə́ nthɔk bǎ ya mo lə nə po.

³² Cwəlɔ gɑ̌ tak wɔ bi Si ba m nə ghɔm gho' tsyə́ tsyə a bɑ ǎ ghə gʉ' nə ŋkwɑ̀ biŋ gə guŋ pɔ dɔlɔ̌ awɛ sɔ' dzʉ m cʉ' Si a.

³³ Ŋ dě tə ghi'nyə ŋkhap, kɑ gɔl, kɑ dzə sɔmmo lɑ.

³⁴ Bǔ mɔ gɑ, pa' po nə̀ jyə́ a, lé hɑ ywə yə a lə jak ǎ bəm ba m bi mso pɑ̌.

³⁵ Ŋ də bɑ guŋ mcwə awɛ bɑ da'tə wɔ gɑ́ pu jɔgo' po'o tə ŋkwitə pɔ bwapwǎ, biŋ bɑ̀ ŋkhamtə ghɔm tsyə́ Cyəpɔ Yeso lə ghɔm a, gɑ́ nə hɑ bɑ ǎ ŋwɛnyə shyə nə kwi.

³⁶ Mghɔm mɔ gɑ lə mǐ, pu a pù kam mkwi'tə si, shwyɛ'nyə Si.

³⁷ A nə mi guŋ yap awɛ lɔ̀, bvʉtə nə Polo nthɛtə e.

³⁸ Lɔ́ tsap lə dù pa' e lə ghɔm gɑ wap tə gɔ la' tə piŋ yɔ sə é a pɑ́. Wap lə lɑ́ e nə gɔ tə nə kənu' gwyə shya.