MFA' MGHƐ NTHƏM 17 - Ghomala New Testament

Nə yɔgǒ' Tesalonika

¹ Polo pu Silas lə cyə m Amfipoli ba m Apolinya, ŋwak Tesalonika tsʉ' yə pɑ Yudea lə bɑ wap ghə Sinagogə yap nə a.

² Pa' a lə bɑ mà bi Polo a, e lə ghɔ jɔ wap nə msabat mənthá tə ya', bɑ siŋ wap mghɔm; bɑ shyə m nə Mŋwa'nyə dɔlɔ̌,

³ bɑ nthútə biŋ da'tə gɑ Mesia lə bɑ gɔ yɔgo' piŋ yam nə vʉ̌, biŋ gɔm gɑ: Mesia bɔ bɑ Yeso yə gɑ bɑwə siŋ wɔ a.

⁴ Shɑ́ pɑ Yudea lə pǐŋ, jap jʉm Polo pu Silas, ba vəŋ pɑ Grikia pɑ ghamtə Si, ba bo'gwyə́ mkam pɑ jwǐ.

⁵ Da' gɑ pyə shɑ pɑ Yudea lə yɛlúŋ, shù'tə mcúŋ pyə wap lə jwɔk yap pɑ məjyə a, shyə́ pɔmnəŋ, ma' và' tisuŋ; gɔ dyə Yasoŋ nə cəŋ Polo pu Silas, dɑ wap gɔ dzə cu'tə, pu fyɛ' wap.

⁶ Wap lə pɑ tə yɔ Polo pu Silas dɑ Yasoŋ pu a shɑ mfɑ̌mfɑ́ gɔ dzə pɑ ya'shɛ tisuŋ shwé gɔm gɑ: Pɔ pyə wap bva' dzʉ́ awɛ a pɔ tsɔ'ɔ

⁷ bɑ Yasoŋ nyəŋ wap dyə. Guŋ pɔ́ pɔ́ gɑ̀ bɑwə nthé pɑ bya nə Kasa, bɑwə gɔm gɑ mu' fo wə, tso tsyə pɑ Yeso.

⁸ Cwè tsap lə kwak pɔmnəŋ ba pɑ ya'shɛ,

⁹ wap ghɔm gɑ Yasoŋ pu a pyə shɑ pɔ hɑ ywə nə nthʉcwyə tə pu tak wap nəŋ.

Pu lɑ wap pɑpúŋ Berea

¹⁰ Mfɑmfɑ lə ghə Polo pu Silas ghɔ pɑ mtsʉ̀' m Berea. Wap lə ko Berea gɔ Sinagogə pɑ Yudea.

¹¹ Pyə bɔ pɑ Yudea lə ghə mku' shyə́ pyə Tesalonika, dɑ tʉm pɑpuŋ nə ŋkwi ghɔm. Bɑ guŋ mtyɛ'dzʉ awɛ bɑ de nthʉm Mŋwa'nyə bi a ghɔm bɑ pɑ kwa' po'o a.

¹² Pɔ tə jɔm cəcɑ̌ pu lə cʉ' pɑ piŋ, ba mkam pɑ jwǐ Grikia, ba pɑ bɛ kwa' vəŋ e.

¹³ Da' gɑ pɑ Yudea Tesalonika lə nə yu' gɑ Polo ko Berea siŋ ghɔm Si, biŋ sɔ' bɑ m wə ma' và' cəcɑ̌ pɔmnəŋ.

¹⁴ Da' gɑ mfɑ̌mfɑ́ lə wuŋ gə Polo ghɔ tɑ ŋkhəm shyə lɑpʉə, a cʉ' Silas pu Timotio wə́.

¹⁵ Pɔ pyə Polo lə bɑ bi pu a lə ghɔ tə ŋkhəm Atenya. Shya Polo, nə pɑnyə e ghɔm bi pu gɑ wap ghɔm bi Silas pu Timotio gɑ wap sɔ' m gʉ̌' ŋkwiatə e.

Polo pu a pɑ sɛnwə̀

¹⁶ Polo lə nə pyap wap Atenya nwə pɑ shyə e nə yɔ gɑ mkətwɔk lə bɑ ǎ ló tisuŋ bɔ.

¹⁷ E lə bɑ siŋ pɑ Yudea ghɔm dyə sinagogə, ba m bi gúŋ pyə shɑ pɑ ghamtə Si, ba guŋ mtyɛ'dzʉ awɛ dəm sim bǎ bi wɑ̌lɑ́.

¹⁸ Pu a pɑ sɛnwə pɑ Epikuria ba pɑ Stoikia lə pɑ̌ shɔmnwə, shɑ pɔ nə pu pɑ gɔm gɑ yəŋ zhwya ghɔ́m da'tə gɑ kɑ? Pyə shɑ pɔ pɑ gɔm gɑ a gɔ pɑ mu' siŋ nwə msi dyɛ'. Polo lə bɑwə siŋ nwə Yeso, ba nə yám nə vʉ̌.

¹⁹ Wap lə ghəm é, dɑ é gɔ dzə Areopago həŋtə é gɑ: Bi a pɑ pyə zhyə́ nwə nə yəŋ kam sə yə o bɑwə sa'a?

²⁰ Nə pa' o bɑwə dɑ mnwə sə́ baknyə mtəŋ mɔk, pyə wə́ shəŋ nə zhyə ywə yə a bɑ yá a.

²¹ Nə pa' guŋ pɑ Atenya awɛ, ba mghʉɔ pyə wap lə shwə́ wə́ a lə jwɔk gɔ́m ghɔm biŋ bɑ nthéŋ pɑ mtə̌ŋ nə mcuŋ sə.

²² Polo lə tiŋnyə thə́ dzə Areopago gɔm gɑ: Pɑ Atenya, gɑ̌ yɔ wɔ nə guŋ mghəŋ awɛ, po pɑ kwa' pɑ piŋ Si.

²³ Nə pa' gɑ̌ pɑ giŋtə nə məjyə, jɔ mcwyəp mɔ, gɑ yɔ mu' cwyəp bɑ pu və nə gɑ: Bi si yə pu ka zhyə e a. Ywə yə po gamtə yá tə zhyə̌ yá a, a ywə yə gɑ̌ sɔ' nə siŋ wɔ a.

²⁴ Si yə e lə pə̌m dzʉ́ ba guŋ tsə tsyə́ a nthʉ̀m o a, yʉ̀ yə e bɑ Cyəpɔ kɛ́bə̀ŋ ba cǎ' a ka ghə nə cwə nə dyəsi yə pu dɑ bù tɑ nə bəm a.

²⁵ Ba fa' tsyə lə pɑ̀ shəŋ bu monəŋ, pa' cwə yə mu' ywə́ jak e a, yʉ́ yə e hɑ vɔk pu Zhwenyə pu a guŋ ywə awɛ a.

²⁶ E le shyə m nə ta' mbɛ́, bəm guŋ pɔ̀ awɛ po'o gɑ wap cwə nə guŋ dəm sica' awɛ. E lə jap mcwə dzʉ̀ tɑ kwyəpnyə, ja' dhə̀ tsʉ' yə mo gɔ kəm nə a.

²⁷ Po'o gɑ mo cəŋ Si. Mu'cwə e nə yɔ e məmtə́ məmtə, yʉ̀ yə e tə nəŋ bɑ gʉə sʉəsʉə nə sɔmmo nə pɑ a pɑ́.

²⁸ Nə pa' pɑ bvɔk, ŋaknyə, biŋ bɑwə pɑ nə e, dəŋdəŋ pa' shɑ mghɛ zhwɔp pɔ lə́ gɔm a: nə pa' pɑ bɑ gwyá e.

²⁹ Po'o pa' pɑ̌ bɑ gwya Si a, pɑ lá tə́ bɑ gɔ kwɛ gɑ Si hwə́ tʉɔ gɔl kɑ tʉɔ ŋkhap, kɑ gwɔ' tʉɔdəŋ yə mo ŋthɔmtə tɔmtə dɑ və ŋkhəm a pɑ.

³⁰ Po yɔ, cwəlɔ, Si ka sɛ́ fʉ̀mnyə̀ pɔmnəŋ, e wə siŋ gɑ guŋ pɔ awɛ, nə guŋ mtsʉ' awɛ ŋkwyəpnyə.

³¹ Nə pa' a bɑ e yap ta' tyɛ'dzʉ yə é gɔ sɔ' fyɛ' dzʉ nthʉm dəŋdəŋ, cyə m nə mo yə e shwɔ' e a, pa' e jam e nə vʉ̌ a nə shəŋtə da'tə mtiŋ bi guŋ pɔ awɛ.

³² E lə cwə̌ tə gɔm gɑ: nə yam nə vʉ̌, shɑ pɔ yəmtə e, pyə shɑ pɔ ghɔm gɑ: Pyə gɔ tì tə piŋ yù' o nə́ nə mu' cʉm.

³³ A pɑ po'o Polo təm cəcɑ̌ pu.

³⁴ Da' gɑ shɑ pɔ la nɑ tsap nə Polo, shʉ' pɑ piŋ; mu' mo lə bɑ cəcɑ̌ pɔ bɔ̌ tso tsyə pɑ Denis, mo nə Areopago, ba mu' mjwǐ tso tsyə pɑ Damaris, ba shɑ pɔ.