MFA' MGHƐ NTHƏM 16 - Ghomala New Testament

Polo pu Silas nyəŋ Timotio nə pú

¹ Polo lə ghɔ tə ŋkhəm Dɛrbe ba m Listra. Mu' gɛ zhi'nwə lə bɑ̀ wə tso tsyə pɑ Timotio, mú mu' mjwǐ Yudea, gɛ piŋ tap e pɑ yə Grikia.

² Mfɑ̌mfɑ́ pyə wap lə bɑ Listra ba m Ikonya á lə́ gɔm nwə nə é pɑ̀ pɑpuŋ.

³ Polo lə pɑ shəŋ nə lɑ e pu e ghɔ, bvo é, bɑ bwɔk pɑ Yudea pyə wap lə bɑ tsʉ' u a. Nə pa' a lə bɑ̀ guŋ yap awɛ zhyə́ gɑ́ tap e lə bɑ yə Grikia.

⁴ Nə guŋ mtisuŋ awɛ myə Polo pu Silas lə shyə nə a, wap lə siŋ wap ywə yə mghɛ nthəm pu a mghətso Yerusalɛm lə yap a, biŋ bɑ həŋtə gɑ pu ghiŋ pɑ́ po'o.

⁵ Mcu'tə pɑ piŋ lə bɑ ŋkwyə nə piŋnthʉm. Də̀ŋ e pɑ ŋkwi' mtyɛ́'mtyɛ̌'.

Pu ke Polo Makedonya

⁶ Polo pu Silas lə ghɔ̌ Frugia ba m Galata, bɑ Zhwenyə Dɔlɔ̌ kɔ́ gɑ ka wap siŋ Ghɔm Azia.

⁷ Wap lə ŋwak dhənyə pɑ Misia, dəŋtə nə ghɔ m Bitinya, da' gɑ Zhwenyə Yeso lə piŋ.

⁸ A lə pɑ po'o wap cyə Misia, dzə́ŋ gɔ Troas.

⁹ A lə pɑ̀ mu' mtsʉ', Polo yɔ nə yɔ m nthʉ̌m zhwenyə, jɔ yə Makedonya bɑ e tiŋnyə thə bɑwə shwyɛ'nyə e gɑ: Cyə m Makedonya sɔ' ŋkwitə wɔk.

¹⁰ A lə cyə m nə yɔ m nthʉm zhwenyə yə Polo lə yɔ a, pyə wuŋ shəŋ nə ghɔ Makedonya nə pa' pyə lə zhyə̀ nyənyɔ gɑ Si ke wɔk gɑ pyə ghɔ wə́ siŋ cuŋ pɑpuŋ.

Lidia pʉɔ tʉ́m tsyə́

¹¹ Pyə lə ko kənu' gwyə Troas, dɑ̀ m nə ghə̌ŋ Samotrake, dzʉ̀ lɔ́, pyə kəm Neapolis,

¹² dù wə̀ gɔ guŋ Filipo yə a lə bɑ tisuŋ gwyə̀ nə pfəla' Makedonya a, bɑ ntho' bi pɑ Roma a. Pyə lə na' shwə nthʉm tisuŋ bɔ.

¹³ A lə pɑ̌ tyɛ' Sabat, pyə təm tisuŋ bɔ, giŋ geŋnyə mu' shyə́, tsʉ' yə pyə bɑwə sɛ gɑ pyə gɔ yɔ tsʉ' mcwyɛ'nyə tsʉ'u a; pyə lə ko tsʉ'u shwəsi cwəlɔ, gɔm nwə bi pɑjwǐ pyə wap lə bɑ wap cu'tə tsʉ'u a.

¹⁴ Mu' nə pɑjwǐ bɔ, tso tsyə pɑ Lidia, e pɑ nthɛ́ dzə nə̌m, bɑ yə Tiatira bɑ biŋ Si; e lə těŋ mtə̌ŋ nə pyə, nə pa' a lə bɑ Cyəpɔ ghyɛ' tʉm tsyə nə ghɔm Polo.

¹⁵ E lə cwə tə ŋkwishyə pu a guŋ dyə e awɛ, nə ké wɔk gɑ pyə sɔ' dyə e gɔm gɑ: Pa' po yɔ gɑ gɑ piŋ Cyəpɔ a, po sɔ' shwə̀ la' m̀. E lə thənyə wɔk, pyə piŋ.

Pu ghəm Polo biŋ nəŋ e

¹⁶ A lə pɑ mu' tyɛ'dzʉ pyə pɑ gɔ m tsʉ' mcwyɛ'nyə, mu' mu go gɛfa', zhwenyə gɔ́m pɑ nə e, e sɔ' nthɑ wɔk. Mpǐŋ mghɔm gɔm myə é lə gɔm a lə gə ŋkhǎp pɑ ŋkho pʉə mtǎ fa' pyə tə jɔm.

¹⁷ E lə bɑ pɑ jʉ̀m kwə pyə a Polo gùŋ mcwə awɛ bɑ shwè gɔm gɑ: Pɑ bɛ pɔ gɑ bɑ mghɛ fa' Si tɑ thə. Wap bɑwə siŋ məjyə nə gɛvɔk.

¹⁸ E lə ghə pɑ po'o nə mtyɛ'dzʉ jɔmyɔm. A lə pɑ po'o, Polo yɔ kəkɔ fɛ nɑ e gɔm bi zhwenyə bɔ gɑ: Nə tso Yeso Kristo, gɑ̌ ghɔm bu gɑ́ o təm nə mjwǐ yɑ. Zhwenyə wuŋ nthəm nə e pɑ cwə o bɔ.

¹⁹ Mta pyə lə nə yɔ pa' fʉ' yə wap kɑ bɑwə byap a mi a, gəm Polo pù Silas fəŋ wap nə gɔ nə tsʉ' yə pu fyɛ' shɛ́ nə dəm sim a, dzə pɑ ya' shɛ́.

²⁰ Wap lə la'tə wap bi pɑ ya'shɛ́ gɔm gɑ: Pɔ pɔ gɑ wə ma' paknyə nthʉm tisuŋ pyə. Wap bɑ pɑ Yudea.

²¹ Bɑwə da'tə shɑ mkhɛ nwə myə bi a pɑ wɔk pɑ Roma lə piŋ kɑ biŋ giŋ nə a.

²² A pɑ́ po'o, lǎ' ŋkheŋtə wap; pɑ ya'shɛ́ ghə̀ pu tɔk dzə nə pu, wap ghɔ̀m gɑ́ pu lɑ ka'cyə shwɔ wap.

²³ Wap cəŋtə shwɔ wap, ma' wap cɛ́. Gɔm bi byap dyəcɛ̌ gɑ e pyap wap kwa' pɑpuŋ.

²⁴ Pa' wap gɔm bi e po'o a, e lɑ mghɛ nthəm nə gɔ tɑ nə mu' túŋ tsʉ' dyə̀ cɛ̌ shəŋ wap nə mkəlo' nə mkwə map.

²⁵ A lə pɑ nə gwɛ a téŋ mtsʉ̌' Polo pu Silas pɑ shwyɛ'nyə Si, biŋ bɑ jwɔp ghamtə Si. Pyə shɑ̀ mghɛ cɛ́ pɑ ju' pa' wap wə jwɔp a.

²⁶ Pu lə wuŋ nə yu' cǎ' cʉ'nyə tɑ mto dyəcɛ̌ nəŋnyə. Guŋ jyədyə̌ awɛ wuŋ he pɑ cwə o bɔ, mgwɑ mghɛ cɛ́ cɑtə nə mkwə map.

²⁷ Byap cɛ́ lə vonyə, jɔ bɑ guŋ mjyədyə̌ cɛ́ awɛ ghyɛ́'; e lə kwɛ́ gɑ guŋ mghɛ cɛ́ khʉ̀, bé nyə e bɑ gɔ nə zhwə nɑ́ e.

²⁸ Tɑ́ Polo cwé tə thə gɑ: Kɑ ghə sɔm nwə cwəpuŋ nə nɑ o. Pyə̌ pɑ si awɛ.

²⁹ Byap cɛ́ lə həŋtə ŋkha', deŋ ntham dyə, nə vʉ nə mkwə Polo pu Silas bɑ səŋ.

³⁰ Biŋ nthé wap dyə cwəlɔ, gɔm bi pu gɑ: Mcyəpɔ gɑ̌ gɔ ghə gɑ kɑ̀ tə̀ vɔk?

³¹ Wap ghɔm bi e gɑ piŋ Cyəpɔ Yeso, pu a tuŋdyə o sɔ' bvɔk.

³² Polo pu Silas lə siŋ ghɔm Cyəpɔ bi byap cɛ̌ pu a pɑ dyə e.

³³ Byap cɛ́ lə lɑ́ wap gɔ pɑ mtsʉ' bɔ, sɔk mfiŋ map, guŋ ŋkwishyə pu a guŋ pɔ pyə awɛ tə piŋ byap sɔmywə.

³⁴ E lə lɑ Polo pu Silas bʉɔ cwəlɔ gɔ dyə e, ŋkhim wap, pu a pu ŋwɛnyə nthʉm tuŋdyə pa' wap piŋ Si a.

³⁵ Dzʉ lə nə́ lɔ, pɑ ya' shɛ́ təm mco' pap gɑ wap ghɔ gɔm bi byap cɛ́ gɑ: Nəŋ pɔ pɑ̌.

³⁶ Byap cɛ lə siŋ Polo cuŋ bɔ gɑ: pɑ ya'shɛ́ təm gɔm gɑ pu nəŋ wɔ. Pa' a pɑ po' a po təm gɔ nə hwitə!

³⁷ Da' gɑ Polo ghɔm gɑ: Wap ké gə pu cwɔ wɔk dəm sim tə fyɛ' wɔk wɔk pyə pyə̌ bɑ po pɑ Roma, biŋ nyəŋ wɔk cɛ. Wap bɑwə shəŋ nə nəŋ wɔk pɑ̀ m jʉ̀mjʉ̀m a? Bi a lə pɑ̀ pa'! Pɑ̀ kwa' wap nə sɔ' nəŋ wɔk.

³⁸ Mcò' pɑ ya'shɛ́ lə ghɔ siŋ pɑ ya'shɛ́ pa' Polo gɔm a. Wap nə yu' gɑ Polo bɑ mù e Roma bwɔk

³⁹ biŋ sɔ' dó gɑ wap wa' mhɔ map, biŋ nə nə̌ŋ wap gɔm gɑ wap fɑ nthʉm tisuŋ nthəm.

⁴⁰ Polo pu Silas lə cwə tə nthəm cɛ cwəlɔ, gɔ ywə Lidia, jɔ mfɑ̌mfɑ́, hɑ kaktʉɔ bi pu tə gɔ̌.