MFA' MGHƐ NTHƏM 15 - Ghomala New Testament

Shɛ nə vó mo Antiokia

¹ Shɑ pɔ lə fɑ Yudea dzəŋ, nyəŋ thə mfɑ̌mfɑ́ gɑ: po pɑ tə ghə pu vo wɔ pa' mco' Mosɛ gɔm a bɑ po tə gɔ sɔ' vɔk pɑ́.

² A lə pɑ̌ po'o, shɛ təm, fəŋnyə gwyə ko cəcɑ̌ Polo ba Barnabas pu a pɔ bɔ̌. Pu ghɔm jap gɑ Polo pu Barnabas ba shɑ pɔ pʉ́ɔ gɔ Yerusalɛm jɔ mghɛ nthəm pu a mghətsó nə shɛ bɔ.

³ A lə pɑ po'o, cu'tə pɑ piŋ Antiokia cya wap. Wap lə cyə Fenikia, ba m Samaria, bɑ siŋ mfɑmfɑ pa' pɑ tə pɑ pɑ Yudea bʉɔtʉm tsap a, wap pɑ ŋwɛnyə.

⁴ Wap lə ŋwak Yerusalɛm, cu'tə pɑ piŋ, mghɛ nthəm ba mghətso lɑ wap. Wap piŋ siŋ wap ywə yə pu a Si lə pəmtə gə a.

⁵ Shɑ pɑ piŋ pyə wap lə təm m cəcɑ̌ pɑ Farisai lə nyəŋ yap gɑ pu vo pɑ tə pɑ pɑ Yudea pyə wap biŋ a, biŋ jap gɑ wap zhyə mco' Mosɛ.

⁶ Mghɛ nthəm ba mghətso lə cu'tə nə yɔ nwə nə nwə bɔ.

⁷ Pu lə pɑ fəŋnyə nwə bɔ nə gɔ pɑ m dzə tə Pɛtrɔ ghɔm gɑ: Mfɑ́mfɑ, po zhyə gɑ tə fɑ nə mtyɛ'dzʉ nə ntho', Si lə cwɔ' a, shyə m nə shwə a tə gə pɑ tə pɑ pɑ Yudea wə po yu' ghɔm Cuŋ pɑpuŋ tə shʉ' pɑ piŋ.

⁸ Si yə e bɑ ě zhyə mtʉm pɔ a, lě ŋkwinthɛ̌ yap, hɑ Zhwenyə Dɔlɔ̌ bi pu dəŋdəŋ pa' e lə hɑ̌ bi pɑ a.

⁹ E lə shyə̀ a m nə piŋnthʉm tə́ shu' tʉm tsap, tə ghə ŋkhyɛ'nyə cəcɑ̌ pu.

¹⁰ Pa' a bɑ po' a, nwə kɑ pɑ ghɔ ləŋtə Si nə́ nyəŋ kəlo' yə mtà pɔk pɑ, ba wɔk pɑ ka kwa jyə́ a nthuŋ mghɛ zhi' nwə?

¹¹ Pɑ kwi' biŋ gɑ a lə shyə a nə nə gho' Cyəpɔ Yeso tə pɑ vɔk dəŋdəŋ pa' wap a.

¹² Guŋ pɔ awɛ nthʉm cu'tə lə lɛtə gɑ kǎm. Ju' pa' Barnabas pu Polo siŋ wap mtiŋ pu a msya myə Si shyə́ m nə pu gə wə́ pɑ tə pɑ́ pɑ Yudea.

¹³ Wap lə ghɔm awɛ, Yakop lɑ yə ghɔm gɔm gɑ mfɑmfɑ po yu':

¹⁴ Simon du m si nə kamtə bi pɑ pa' tə fɑ pɑ́ nə nə ntho', Si ghɔ cəcɑ̌ mguŋ pɑ tə pɑ pɑ Yudea shwɔ' mu' guŋ nə tso tsyə a.

¹⁵ Nwə yəŋ bə̀mtə nə ghɔm mghɔm ghɔm Si, nə pa' bɑ pu le bvə gɑ:

¹⁶ A gɔ sɔ' pɑ po'o a biŋ sɔ' ŋkwɑ nthap David yə a lə vʉ a. Gɑ gɔ sɔ' piŋ kwɑ mkhʉ̀m myə a shʉ' nə a, pu' a tiŋnyə thə́.

¹⁷ Tə fɑ po'o bvʉ' pɔ cəŋ Cyəpɔ pu a guŋ mguŋ awɛ myə tso tsɑ̌ bɑ nə a. Yə̌ŋ bɑ ywə yə Cyəpɔ gɔ̀m a, e bɑwə gə mka'nyə myə́ pə́mtə,

¹⁸ mka'nyə myə pu lə zhyə tɑ fɑ tə tyɛ' a.

¹⁹ Gɑ piŋ yɑ gɑ ka pɑ̀ cwɔptə mkəlo' dzə̌ pɑ tə pɑ pɑ Yudea pyə wap fɛ tʉm tsap de Si a.

²⁰ Pɑ və bi pu da' gɑ wap pwɔk mviŋ mkətwɔk, ba nwə ghap, ba nə báp yə e fám a, ba mcyə.

²¹ Tə fɑ tə tyɛ', Mosɛ lě gə́ Mghɛ ghɔmnwə nthʉm guŋ mtisuŋ awɛ, nə pa' pu ŋkhe ŋwa'nyə e nə guŋ mtyɛ' Sabat awɛ mdyə Sinagogə.

²² Cu'tə pɑ piŋ pu a mghɛ nthəm, ba mghətso lə́ pɑ ŋkwishwə jap gɑ wap gɔ cwɔ' pɔ cəcɑ̌ pú təm wap Antiokia pu a Polo ba Barnabas. Wap lə cwɔ' Yuda yə pu biŋ ŋkhe e gɑ Barnabas a, ba Silas pɔ pyə a lə bɑ mfɑ̌mfɑ́ yap tʉm nə pu a.

Ŋwa'nyə cu'tə Yerusalɛm

²³ Ŋwa'nyə yə pu lə hɑ bi pu a bɑ gɑ: Mghɛ nthəm, ba mghətso pu a mfɑ̌mfɑ́ ca'tə mfɑ̌mfɑ́ pyə wap nthəm m nə pɑ tə pɑ pɑ Yudea a, pyə wap Antiokia, ba m Siria, ba m kilikia a.

²⁴ Pyə kɑ yu' gɑ shɑ pɔ pɔk kě sɔ' baknyə biŋ bva' mzhwenyə mɔ pu a mghɔm map. Tə sɔmmo nə lə́ nthəm wap pɑ.

²⁵ Pyə ké bɑ ŋkwishwə, shwɔ' pɔ pyə́ pyə nthəm wap bi po pu a Polo ba Barnabas.

²⁶ Pɔ pyə a bɑ wap hɑ vɔk yap nə tso Cyəpɔ Yeso Kristo a.

²⁷ A po'o tə pyə tə́m Yuda pu Silas bi po gɑ pɑ kwa' wap siŋ wɔ pɑ m shwə pa' po gɔ nə ghiŋ a.

²⁸ Zhwenyə Dɔlɔ̌ ba wɔk yɔ gɑ a ka puŋ gɑ pu lɑ sɔmywə hya wɔ tə ně da' ywə yə bi a pɑ po lə cyətə ghə a:

²⁹ Gɑ po pwɔk nə pfɑ bap yə pu nə nuŋpwɔ' pɑ tə pɑ pɑ Yudea, jyə mcyə, ba fǎm bap ba nwə ghap. Po zhyə tsə bɔ kwa' pɑpuŋ bɑ a pùŋ. A cʉ' pɑ po'o.

³⁰ Pɔ pyə pu lə təm wap a, lə la'nyə cwəlɔ, dzəŋ gɔ Antiokia, shu'tə pɑ piŋ hɑ ŋwa'nyə bi pu.

³¹ Pu lə̀ ké ŋwa'nyə bɔ, ŋwɛnyə nə kaktʉɔ yə a lə bɑwə hɑ a.

³² Yuda pu Silas pyə pu lə təm wap, wap piŋ bɑ mghɔm ghɔm Si a, lə hɑ kaktʉɔ bi pù, nthʉ nthəm nə pù.

³³ Pu a pù lə na' shwə, biŋ nə hapnyə cwəlɔ, mfɑ̌mfɑ́ ghɔm gɑ wap pɑnyə nə hwitə̀ bəŋ pɔ pyə wap lə təm wap a. [

³⁴ ]

³⁵ Da' gɑ Polo pu Barnabas wuŋ Antiokia pu a shɑ pɔ tə jɔm pɑ́ ji'tə pɔ, bɑ siŋ Cuŋ pɑpuŋ nə ghɔm Cyəpɔ.

Polo pu Silas ghɔ nə piŋ de mfɑmfɑ́

³⁶ A lə nə cwə muywə Polo ghɔm bi Barnabas gɑ: Pu pɑnyə bǎ nə yá tisuŋ lə yə pu lə siŋ ghɔm Cyəpɔ nə a; pu ghɔ jɔ dhə tsʉ' yə wap nə a.

³⁷ Barnabas lə pɑ shəŋ nə lɑ Yohane yə pu ŋkhe é gɑ Markusi a.

³⁸ Da' gɑ Polo lə piŋ nə pìŋ dɑ mo yə e lə kəŋnyə Pamfilia gɑ ka pu a pu pəmtə fa' a nthəm jʉm pu a, nə gə so fa' yap.

³⁹ A lə ko fəŋnyə̀. Fə̌ŋnyə gha' bǔ tə Polo pu Barnabas hapnyə, ba ya mo a lɑ m nə yə məjyə. Barnabas lə lɑ̌ Markusi, pu e ko kənu' gwyə dɑ m Kipro.

⁴⁰ Sɔ' m nə Polo e lə lɑ Silas pu e nə ghɔ, mfɑ̌mfɑ́ tak wap nə gho' Cyəpɔ.

⁴¹ Polo lə kǎ Siria, ba m kilikia, bɑ hɑ kaktʉɔ bi mcu'tə pɔ Kristo.