MFA' MGHƐ NTHƏM 13 - Ghomala New Testament

Nə təm Barnabas pu Saulo

¹ A lə bɑ dyə̀ cu'tə pɔ Kristo Antiokia, shɑ pɑ mghɔ́m ghɔm Si ba pɑ la'tə nwə Si pɑ wə: Bɑ Barnabas, Simon yə pu ŋkhe e gɑ Niger, Lukios yə Kirena, Manahɛm yə pu Fo Herode lə̀ bɑ mso cwə bwa á, biŋ gə Saulo.

² A lə pɑ mu' tyɛ'dzʉ bɑ wap cu'tə bɑ gamtə Cyəpɔ, biŋ bɑ shwə tə tsʉ́ ywə, Zhwenyə Dɔlɔ̌ ghɔm gɑ: Pò tak Barnabas pu Saulo bəm nə fa' tsyə dɑ ké wap nə a.

³ A lə pɑ̌ po'o wap cwə tə tsʉ̀ ywə, biŋ shwyɛ'nyə Si cwəlɔ, jap bu thə pu, nthak wap, wap ghɔ.

⁴ Barnabas pu Saulo lə nə yɔ gɑ Zhwenyə Dɔlɔ̌ təm wap cwəlɔ, dzəŋ gɔ Səlʉkia, ŋkho kənu' gwyə, gɔ m Kipro, guŋ cəcɑ shyə.

⁵ Wap lə ko Salamina, siŋ ghɔm Si, dyə msinagogə pɑ Yudea. Pu a Yohane nə lə bɑ, e pɑ̀ ŋkwipǔ yap.

⁶ Wap lə twɔk guŋ guŋ cəcɑ shyə awɛ, ŋkhəm Pafos. Ŋkwyatə mu' gɛ kɛ, e pɑ gɔm gɑ e bɑ gɔm ghɔm Si. A lə bɑ yə Yudea tso tsyə pɑ Bar-Yeso.

⁷ E lə bɑ mo nə pɔ gɔpna' Sergio Polo. Mo bɑ e ghə zhyənwə. Gɔpna' bɔ lə kě Barnabas pu Saulo, bɑ shəŋ nə yu' ghɔm Si.

⁸ Da' gɑ gɛ kɛ Elima yə̌ŋ pa' tso tsyə lə nə nthutə a kɔ, bɑ shəŋ nə fɛ gɔpna' nə piŋnthʉm.

⁹ A lə pɑ po'o Zhwenyə Dɔlɔ̌ lo nə Saulo, yəŋ la'tə gɑ Polo. E le gɛ kɛ bɔ dəŋdəŋ

¹⁰ biŋ gɔm bi e gɑ: Wə yə a bɑ fʉ̌ pu a mfʉm lo nə o, wə mu Sata, gɛ bo nwə dəŋdəŋ, o tə gɔ tak nə sɔknyə məjyə Si nəŋ a.

¹¹ Tə́ yɔ, pu Cyəpɔ yap nə o, o gɔ vʉ fʉ̀, o lə piŋ jɔ nam tə ŋkhəm nə cwə yə pu piŋ gɔm a. Pɑ́ cwə o bɔ, jʉ̀m lə kwɑ e, e cʉ' bɑ dzamnyə pɑ ŋkwi tsʉ', bɑ shəŋ mo yə e gɔ la'tə e məjyə a.

¹² Gɔpna' lə nə yɔ nwə yə a shyə a, shʉ' gɛ piŋ, nə pa' ghɔm Cyəpɔ lə bɑ a cəŋtə ŋkhonyə e.

Ghɔm Polo Antiokia

¹³ Polo pu a mso pyə lə ko kənu' gwyə Pafos nə́ nə gɔ Pɛrge m Pamfilia. A pɑ po'o Yohane hap nə pu, bɑnyə m Yerusalɛm.

¹⁴ Sɔ' m nə pɑ Polo pu a mso pyə, wap lu Pɛrge, gɔ tə ŋkhəm Antiokia m Pisidia. A pɑ tyɛ' Sabat wap kodyə Sinagogə, shwə́si.

¹⁵ Pu lə miŋ nə ke Mco' ba Mghɔ́m ghɔm Si, mtadyə Sinagogə ghɔm bi pu gɑ: Mfɑ̌mfɑ, a pɑ gɑ̌ po ghə mghɔm nə nyəŋ gʉ́' po ghɔm bi pɔmnəŋ cwəlɔ.

¹⁶ Polo lusi, nya pu e gɔm gɑ: Pɑ Israɛl, ba wɔ pɑ pwɔk Si po yu' a.

¹⁷ Si pɑ Israɛl pɔ̀ pɔk pɑ lə cwɔ' mtá pɔk pɑ̀. E lə ghə̌ wap zhi nthʉm guŋ Egipto, e piŋ dɑ gʉ' pu e nə nthe wap.

¹⁸ E lə khǐm wap ghakgo nə gwɛ a gu'dzʉ́ mghappfʉə.

¹⁹ Biŋ simnyə pɔ nə mgùŋ sɔmbʉə Kanaan, hɑ bi pu pa' tsə mcʉ' a,

²⁰ Guŋ mnwə bɔ awɛ lə cwə gwɛ a gu'dzʉ́ potɔ mkhə pfʉə; e piŋ hɑ mghɛ cya wap, tə gɔ ŋkhəm nə gɔm ghɔm Si Samuɛl.

²¹ Wap piŋ həŋtə pɑ fo, Si hɑ Saulo mu Kis, gwya mo Bɛnyamɛn bi pu. E sa' wap gu' mghappfʉə.

²² Si lə́ nə̀ te e, shwɔ' David nə gə fo bi pu. A bɑ nə é tə Si gɔm gɑ: gɑ̌ ho David mu Yese, kwa' mo pa' tʉm tsɑ shəŋ a, yə e gɔ sɔ' ghə guŋ ywə yə gɑ̌ ŋkhuŋ a.

²³ Nə ŋkhənyə e pa' Si lə ka' a, e lě gə Yeso təm bɑ gɛvɔk pɑ Israɛl.

²⁴ E lə́ nə sɔ', bɑ Yohane tamdzə e, gɔm nwə kwishyə pʉɔtʉm bi guŋ pɑ Israɛl awɛ,

²⁵ tə biŋ nə miŋ mfa' myə́ həŋtə gɑ: po ŋkwɛ gɑ gɑ̌ bɑ̀ wɑ? Ŋ tə bɑ mo bɔ pɑ. Da' gɑ mu' mo jʉ̌m m̀ bɑwə sɔ', bɑ ŋ ka ku'nyə nə kyɛ' ŋkhə mthap myə́.

²⁶ Mfɑ̌mfɑ́, kɑ po bɑ pɑ̀ pǒ Abraham, kɑ pǒ pɔ pyə wap bwɔk Si a lə, bɑ ghɔm ywə́ bvɔ́k tsɔ̀ gɑ bɑ tsɔk pɑ.

²⁷ Pɑ́ Yerusalɛm pu a mtadyə pap lě ŋkhəŋnyə Yeso; biŋ nə nyəŋ shɛ thə e, gə mghɔm myə mghɔm ghɔm Si myə pu ŋkhe guŋ mtyɛ' Sabat awɛ a pəmtə.

²⁸ Ba tə pa' wap la tə yɔ ywə yə bi a pɑ wap cyə m nə jwə e a, wap lə həŋtə bi Pilato gɑ e zhwə e.

²⁹ A piŋ bɑ po'o wap ghə guŋ ywə awɛ yə pu lə və nə e a pəmtə, wap fi' e thə ntha' bǔ, nyəŋ e ghʉm sì.

³⁰ Da' gɑ Si lě jám e nə vʉ cəcɑ̌ mpfə pɔ.

³¹ E piŋ da'tə nɑ e bi pɔ pyə pu a pu lə pəmtə fɑ Galilea gɔ Yerusalɛm nə mtyɛ'dzʉ jɔmyɔm a. Wap nə bɑ tyɛ' ɔ bɑ mghɛ ŋkwinthɛ̌ pyə́ dzə̌ pɔmnəŋ.

³² Ba wɔk yɔk pyə wə siŋ wɔ yəŋ Cuŋ pɑpuŋ: a pɑ gɑ mka'nyə myə a lə la' bɑ̀ bi mta pɔk pɑ a,

³³ Si ghə a cəŋtə bəmtə nə pɑ, pó pap, nə pa' e jám Yeso dəŋdəŋ pa' a bɑ pu və nə batə zhwɔp dɔlɔ̌ yɑpʉə a gɑ: O bɑ mù a, gɑ tsə o tyɛ' ɔ.

³⁴ Pa' Si jam e nə vʉ̌, e lə pɑ gɔ la'tə piŋ pì a, a bɑ ywə yə e lə la' gɔm a gɑ: Gɑ̌ gɔ la' hɑ pɔ dɔlɔ̌, kwa' pa' David nə bɑ nyənyɔ a.

³⁵ A ywə yə a gə e piŋ gɔm nə mu' tsʉ' gɑ: O tə̀ gɔ la' tàk Dɔlɔ̌ o e simnyə pɑ̀

³⁶ A nəŋ bɑ po'o bɑ David yə e lə bɑ gɛfa' nə yə cwə dzʉ̌ nə ŋkhɛ pa' Si nə jap nwə e a lě pfʉ́, pu təŋ e cəcɑ̌ mtá pyə, e simnyə.

³⁷ Tɑ́ mo yə Si jám e nə vʉ̌ a ka zhyə nə simnyə.

³⁸ Po zhyə cwəlɔ gɑ a shyə pɑ m nə e tə pu siŋ wɔ nwə nə lɑ mhɔ mo shwyɛ' e, yəŋ nə pɑ́ dəŋdəŋ yə po lě tə yɔ́ yá nə mco' Mosɛ a.

³⁹ A shyə m nə e tə́ bɑ bi bǎ ya mo lə yə e piŋ a.

⁴⁰ Po pɔmtə gɑ ghɔm mghɔm ghɔm Si kɑ pəmtə nə po gɑ:

⁴¹ Wɔ mghɛ ŋa' nɑ, po yɔ, po pwɔk, simnyə! Cwə yə po yɑ pɑwə a, gɑ̌ gɔ ghə mu' fa' pəmtə fa' tsɑ̀ tsyə mo lə siŋ wɔ siŋ bɑ po la tə piŋ a.

⁴² Pù lə tə̌m cwəlɔ, shwyɛ'nyə Polo pu Barnabas gɑ wap ti nə yə mu' Sabat biŋ gɔm nwə pɑ nə nwə bɔ.

⁴³ Pu lə cwə́ tə haptə, shɑ pɑ Yudea ba shɑ mghʉɔ pyə wap lə piŋ a cya Polo pu Barnabas. Pu a pu lə pɑ shɔmnwə wap cwi'tə bi pu gɑ wap tɔm gho' Si kwa' pɑpuŋ.

⁴⁴ Yə mu' Sabat lə sɔ', guŋ po awɛ tisuŋ cu'tə nə yu' ghɔm Cyəpɔ.

⁴⁵ Pɑ Yudea lə nə yɔ dəŋ vəŋ pɔ bɔ, luŋ yap sə́. Polo piŋ bɑ gɔm nwə wap yə́mtə yə́mtə.

⁴⁶ Polo pu Barnabas sɑ́tə nɑ tsap gɔm bi pu gɑ: Pu kɑ bɑ gɔ ləŋdzə ghɔm ghɔm Si tsɔ gɑ bi po. Pa' pǒ kəŋnyə biŋ jɔ pɑ wɔ gɑ po ka ku'nyə nə vɔk mama á, pyə gɔ fɛ cwəlɔ ghɔ m nə pɑ tə pɑ pɑ́ Yudea.

⁴⁷ Nə pa' ywə yə Cyəpɔ gɔm pi pyə a bɑ gɑ: Gɑ̌ bɑ gɑ̌ lɑ o gə ŋkha' guŋ, po'o gɑ o lɑ ywə vɔk nə gɔ tə ŋkhəm dhə̀ dzʉ́.

⁴⁸ Pɑ tə pɑ pɑ́ Yudea lə nə yu' po'o, ŋwɛnyə, nyəŋ dəŋ nə ghɔm Cyəpɔ, guŋ pɔ awɛ pyə wap lə zhyə́ gɑ a bɑ pu ká' vɔk mama bi pu a zhí pɑ piŋ.

⁴⁹ A pɑ po'o ghɔm Cyəpɔ lɑ guŋ mghəŋ tsʉ' o bɔ awɛ.

⁵⁰ Da' gɑ pɑ Yudea ma' paknyə cəcɑ̌ mkam pɑ jwǐ ba mkam tisuŋ, ji nə cwɔ'mkwə Polo pu Barnabas cwəpuŋ nə jəŋ wap gǔŋ pú.

⁵¹ Polo pu Barnabas lə tsɔp vɔp tsap nə mkwə map cwəlɔ gɔ m Ikonya.

⁵² Sɔ' m nə mghɛ zhi'nwə, ŋwɛnyə ba Zhwenyə Dɔlɔ̌ lo nə pú.