MFA' MGHƐ NTHƏM 11 - Ghomala New Testament

Mcùŋ Pɛtrɔ Yerusalɛm

¹ Mghɛ nthəm pu a mfɑ̌mfɑ́ pyə wap lə shwə Yudea a lə yu' pa' pu gɔm gɑ ba pɑ tə pɑ́ pɑ̌ Yudea kwi Ghɔm Si a.

² Pɛtrɔ lə pʉɔ tə ŋkho Yerusalɛm cwəlɔ, pu a pɑ piŋ Si pyə a lə bɑ pu vo wap pɑ nthɛshwə̀.

³ Wap pɑ gɔm bi e gɑ: O ko dyə pɔ pyə a bɑ pu ka vo wap a tə pu a pu tsʉ ywə.

⁴ A pɑ po'o Pɛtrɔ piŋ ntho' pa' a lə pɑ̌ a, tɑ fɑ nə cwiŋ e, siŋ wap nə mzhə̀ŋ gɑ:

⁵ Ŋ də pɑ̌ tisuŋ Yope bɑwə shwyɛ'nyə Si, jɔ m nə yɔ nthʉm zhwenyə, jɔ mu' nthi ywə yə pɑ́ mo lə zhyə nə ghɔm a, mu' ywə pa' mɑ gheŋghěŋ pak dzə a pɑwə fi' fɑ kɛbəŋ nə mtɔk mapfʉə, sɔ' tə́ ŋkhəm bəm.

⁶ Ŋ də lě ywə bɔ dəŋdəŋ, diŋtə, jɔ́ nthinthi mnɔm mkwə pfʉə pyə wap dəmcǎ', mnɔm gó, pyə wap fəŋ vam tsap pɑ si a, ba pyə wap ntha to kɛbəŋ a

⁷ biŋ ju' gi mo ghɔm bəm gɑ: Pɛtrɔ, zhwə pfɑ.

⁸ Ba' gɑ: gɛ̌ m Cyəpɔ! Nə pa' sɔm bɔkbɔk ywə kɑ ywə mviŋ lɑ nthʉm vɔk a la m ŋkho shwə m̀.

⁹ Gi bɔ kwi' gɔm batə mcʉm bʉə tɑ́ kɛbəŋ gɑ: Ywə yə Si lɔnyə ya á, kɑ ghɔm gɑ a bɔkbɔk e!

¹⁰ A lə ghə pɑ po'o mcʉm nthà, bɑnyə kɛbəŋ.

¹¹ A wuŋ bɑ pɑ cwə o bɔ̌, pɔ pɑtá ŋwak dyə tsʉ' yə pyə lə bɑ̀ nə a, bɑ pu nthəm wap fɑ m Kaesarea.

¹² Zhwenyə ghɔm bəm gɑ pyə a pu ghɔ tə zhʉ'nyə. Mfɑ pɔk pɑ̀ pɔ gɑ nthɔk lə ghɔ shya a. Pyə a pu lə ko dyə Kornəlio.

¹³ E siŋ wɔk pá' e kɑ yɔ̌ aŋgəle e ghɔm bi e gɑ: Təm mo e ghɔ Yope ŋkhe Simon yə pu ŋkhe é ga Pɛtrɔ a.

¹⁴ E gɔ siŋ o mnwə myə a gɔ lɑ nə vɔk nə sɔ' bu ba m bi guŋ tuŋdyə o awɛ a.

¹⁵ Ŋ də nə ŋa'shwə a Zhwenyə Dɔlɔ̌ wuŋ fi' sɔ' nə pu pá' a lə sɔ' nə pɑ nə cwə nə jitə a.

¹⁶ A pɑ̀ po'o ŋkhamtə pa' Cyəpɔ lə ghɔm gɑ: Yohane lə nu' pɔ shyə, pu gɔ nu' wɔ nthʉm Zhwenyə Dɔlɔ̌.

¹⁷ A pɑ gɑ Si hɑ gho' e bi pɔ pɔ̌ pyə wap biŋ Yeso Kristo a, pa' e lə hɑ bi pɑ̌ a, bɑ gɑ̌ bɑ wɑ tə kɔ pa' Si gɔ ghə ywə a.

¹⁸ E lə ghɔm po'o pɔ pyə wap lə bɑ si ju' e a lɛtə cwəlɔ gu'tə́ Si gɑ: A yɑ bɑ Si hɑ nə pʉɔtʉ̌m ŋkho nə vɔk ba bi mguŋ pɑ tə pɑ́ pɑ Yudea.

Nə to' cu'tə pɔ Kristo Antiokia

¹⁹ A lə́ nə pɑ̌ po'o bɑ pɔ pyə paknyə yə a lə təm pa' pu lə zhwə Etiennə a lə sɛtə wap a, bɑ wap lě gɔ tə ŋkho Fenikia, ba m Kipro pu Antiokia tə ghɔm mcuŋ pɑpuŋ bi sɔmmo tə ne da' pɑ Yudea.

²⁰ Da' gɑ shɑ pɔ cəcɑ̌ pu pyə wap lə bɑ́ pɑ Kipro ba pɑ Kirena a lə ko Antiokia gɔm Cuŋ pɑpuŋ Yeso Cyəpɔ.

²¹ Cyəpɔ pɑ ŋkwitə wap, tə dəŋ pɔ pyə wap lə yapjʉ̌m Cyəpɔ biŋ e a pɑ gɔ dzə.

²² Cu'tə pɑ piŋ yə a lə bɑ Yerusalɛm a lə nə yu' mɔ mcuŋ, nthəm Barnabas Antiokia.

²³ E lə ŋwak tsʉ'u, nə yɔ pa' gho' Si wə fa' a, ŋwɛ́nyə, biŋ shwi'tə bi pu gɑ wap la nə Cyəpɔ tə nthʉm tʉm pu.

²⁴ Barnabas lə́ bɑ mo dəŋdəŋ, Zhwenyə Dɔlɔ̌ ba piŋnthʉm pɑ bɑ a lonyə nə e. A lə cyə m po'o kwa' mɑ vəŋ pɔ yap jʉ̌m Cyəpɔ.

²⁵ Barnabas lə lu cwəlɔ gɔ Tarso nə cəŋ Saulo.

²⁶ E lə́ yɔ e, pu e ghɔ Antiokia, shwə wə tá' gu'dzʉ̌, bɑ fa' nthʉm cu'tə pɑ piŋ, biŋ bɑ ji'tə pɔmnəŋ. A lə bɑ Antiokia tə pu to' nə ké pɑ piŋ gɑ pɔ Kristo.

²⁷ A lə pɑ̌ nə mtyɛ'dzʉ bɔ mghɔm ghɔm Si fɑ Yerusalɛm dzəŋ Antiokia.

²⁸ Mu' mo nə pu, pu pɑ ŋkhe e gɑ Agabo, cyə m nə́ Zhwenyə gə pu zhyə́ gɑ kwa' mɑ kəya' Si gɔ vʉ dəmcǎ' awɛ, kəya' bɔ lə təm nə cwə fo Klaudia.

²⁹ Mghɛ zhi'tə nwə yap gɑ wap gɔ təm ywə́ nə ŋkwitə mfɑmfɑ pyə wap lə bɑ Yudea a, dəŋ e bǎ ya mo a ku'nyə nə ghə a.

³⁰ Wap lə ghə po'o nthəm bi mghətso, shyə m nə bǔ Barnabas pu Saulo.