MFA' MGHƐ NTHƏM 10 - Ghomala New Testament

Nə yɔ m nthʉ̌m Zhwenyə Kornəlio

¹ Mu' mo lə bɑ Kaesarea tso tsyə pɑ Kornəlio, e pɑ tadyə msəŋwi pɔ ŋkhə, pu pɑ ŋkhe yə kam msəŋwi bɔ gɑ Italia.

² E lə dɑ mku' biŋ, bɑ bwɔk Si pu a tuŋdyə é, bɑ hɑ ywə kwitə bi pɑ Yudea kwa' pɑpuŋ, bɑ shwyɛ'nyə Si guŋ mcwə awɛ.

³ A lə pɑ mu' tyɛ'dzʉ, nə mnam tá bwadzʉ e yɔ nthʉm zhwenyə kwa' pa' mo dɑ mnyə myə́ jɔ ywə a, jɔ aŋgəle Si ko dyə e, ŋkhe é jɔkzhɔk gɑ: Kornəlio!

⁴ Kornəlio le e dəŋdəŋ, nə lě bɑ bwɔk, gɔm gɑ: A kɑ Cyəpɔ? E ghɔm gɑ: Mcwyɛ'nyə mǔ pu a nə ghap tə kəŋ pu ǔ kəm dzə Cyəpɔ.

⁵ Cwəlɔ̌, təm pɔ wap ghɔ Yope dɑ Simon yə pu ŋkhe e gɑ Pɛtrɔ a nə sɔ̌'.

⁶ E wə mu' Simon yə e bɑ ntham gwɔp a bɑ shwə nə mu' dyə kəŋ shyə lɑpʉə.

⁷ Aŋgəle yə e lə ghɔmnwə bi Kornəlio a lə cwə tə gɔ̌, Kornəlio ke pɔ pɑpʉə nə pɔ pyə pu a pù lə bɑ̀ dyə a, biŋ gə ta' səŋwi, e pɑ dɑ mku' biŋ yə pu e lə fa' fɑ tə tyɛ' a.

⁸ E lə nə təm wap Yope, siŋ wap mtiŋ pa' wap gɔ nə ghiŋ a.

Nə yɔ m nthʉ̌m zhwenyə Pɛtrɔ

⁹ A lə pɑ yə mu' jʉ̀m dzʉ̌, wap ghiŋ tɑ bɑ ŋkhəm bəŋ tisuŋ, a pɑ bɑ Pɛtrɔ kwɔ' m nə zhəŋ dyə́ thə́ bɑ́wə́ shwɛ'nyə Si, a lə bɑ po'o nə gwɛ a mɔkcʉ.

¹⁰ Jikǔ' yɛ́ é, e pɑ shəŋ nə tsʉ ywə, pu pɑ gə ywə yə e gɔ tsʉ a, e wuŋ ŋkhó nthʉm nə yɔ tsʉ' m nthʉm zhwenyə.

¹¹ Jɔ kɛbəŋ ghyɛ': Mu' nthi ywə yə pɑ mo lə zhyə nə nə ghɔm a, mu' ywə pa' mɑ gheŋghěŋ kam dzə a nə mtɔk mapfʉə a fi' sɔ' bɔnyə dəmcǎ'.

¹² Guŋ mnɔm awɛ pyə wap giŋ mkwə pfʉə a, pyə wap fəŋ vam tsap si a, ba pyə wap ntha to kɛbəŋ a lə bɑ nthʉm kam dzə bɔ.

¹³ Mu' gi ghɔm bi Pɛtrɔ gɑ: Pɛtrɔ zhwətə wap pfɑ.

¹⁴ Pɛtrɔ ghɔm gɑ bi a lə pɑ pa' a m Cyəpɔ, nə pa' da m dzʉywə bɔkpɔ̌k kɑ ywə mviŋ lɑ nthʉm vɔk a.

¹⁵ Gi bɔ̌ lə kwi' gɔm bi e nə batə mcʉm bʉə gɑ: Ywə yə Si ghə a lɔ a, bi a pɑ o lə ghɔm gɑ a pɔk pɑ́.

¹⁶ Ywə bɔ̌ lə cyə po'o mcʉm ntha, tə biŋ bɑnyə m kɛbəŋ.

¹⁷ Cwə yə Pɛtrɔ lə pɑ shəŋ nə zhyə ywə yə yəŋ nə yɔ m nthʉ̌m zhwenyə yə e jɔ a da'tə a, pɔ pyə Kornəlio lə təm wap a, wap ghiŋ bɑ həŋtə dyə Simon ŋwak shwə̀ kə̀ŋ.

¹⁸ Wap lə kě, həŋtə bi a Simon yə pu ŋkhe e gɑ Pɛtrɔ a shwə̀ dyə̀ bɔ a.

¹⁹ Pɛtrɔ lə̀ jɑ wə sɛ́ nwə pɑ nə yɔ m nthʉ̌m Zhwenyə yə e jɔ a, tə Zhwenyə ghɔm bi e gɑ: Yɔ, pɔ pɑpʉə wə shəŋ o.

²⁰ Wuŋ fi' pu a pu ghɔ, kɑ pwɔk sɔmywə nə pa' myə̀ nə nthəm wap.

²¹ Pɛtrɔ lə fǐ', gɔ bəŋ pɔ bɔ̌, gɔm bi pu gɑ: Gɑ̌ yəŋ, gɑ̌ bɑ mo yə po shəŋ e a. Pǒ sɔ' m nə nwə kɑ?

²² Wap pa' bi e gɑ: Kornəlio, yə e bɑ tádyə̌ msəŋwi pɔ ŋkhə, bɑ mo dəŋdəŋ bɑ bwɔk Si, pɑ Yudea pɑ ŋkhuŋ e guŋ yap awɛ a nə nthəm wɔk. Ta' aŋgəle dɔlɔ̌ ghə e zhyə̀ gɑ e gɔ ghə o sɔ' dyə́ e, e yu' o, o siŋ e mcùŋ nə Ghɔm.

²³ Pɛtrɔ ghə wap ko dyə, e hɑ tsʉ' bi pu nə ti. Dzʉ lə lɔ̌ pu a pu ba shɑ mfɑ pɑ Yope ghɔ.

²⁴ A piŋ di bɑ yə mu' jʉ̀m dzʉ̌ wap kəm Kaesarea. A lə nə pɑ̀ po'o Kornəlio pɑ̀wə byap wap, bɑ ě ké guŋ ŋkhənyə e ba mso pyə awɛ.

²⁵ Cwə yə Pɛtrɔ lə pɑ sɔ' a, Kornəlio ghɔ məjyə, pu e yu'tə, e vʉ dzə e, sé e,

²⁶ Pɛtrɔ ghɔm bi e gɑ: Lusi, gɔm po'o, bʉ' e si, biŋ gɔm bi e gɑ, ba myə̀ yɑ̌ gɑ bɑ pɑ mo.

²⁷ Pu e lə ghǐŋ bɑ shɔmnwə tə ŋkhəm dyə Kornəlio, Pɛtrɔ nə yɔ dəŋ pɔ pyə wap dyə a,

²⁸ gɔm gɑ: Po zhyə gɑ a bɑ bi yə Yudea bɑ kwa' nə zhwə e, gɑ pu gʉɔ na' shwə̀ ŋkwi tsʉ'. Da' gɑ sɔ' m nə m̀ Si dú m nə ghə gɑ jyə gɑ pu la tə́ bɑ gɔ ghɔm gɑ́ sɔmmo bɑ mo bɔkpɔ̌k kɑ təlɔ̀ pɑ.

²⁹ A ywə yə a gə tə o ke a, guŋ sɔ' pa tə ghə dziŋ a. Da' gɑ cwəlɔ gɑ̌ wə shəŋ nə zhyə ywə yə o gɔm gɑ a sɔ' nə a.

³⁰ Kornəlio pa' bi e gɑ: A cwəlɔ dzʉ tyɛ' tá pa' bɑ̌ dyə́ ŋkhɛ a cwəlɔ, nə mnam tà bwadzʉ̌, bɑ shwyɛ'nyə Si, gùŋ nə yɔ mu' mɑ mo, dzə tsyə pɑ̀wə dəŋnyələŋnyə ŋwak dzə m̀,

³¹ gɔm bəm gɑ: Si yu' mcwyɛ'nyə mǔ m Kornəlio, ba mfa' kwitə mǔ pɑ bɑ a kəm dzə e.

³² Təm mo gɑ e ghɔ Yope ŋkhe Simon yə pu ŋkhe é gɑ Pɛtrɔ a gɑ e sɔ' tsɔ'ɔ. E dyə Simon gɛfa' nə gwɔp kəŋ shyə lɑpʉə pa' gʉɔ a.

³³ Pɑ cwə o bɔ, gɑ e guŋ nthəm gɑ pu sɔ' ŋkhe o, o nəŋ shəŋtə ŋkhuŋ a, sɔ' po'o ŋkwyatə wɔk. Cwəlɔ, pyə pɔ gɑ dzə o awɛ nə yu' ywə yə Cyəpɔ gɔm bu gɑ o siŋ wɔk a.

Ghɔm Pɛtrɔ ywə Kornəlio

³⁴ Pɛtrɔ ŋa' shwə é gɔm gɑ: Gɑ̌ zhyə cwəlɔ nyənyɔ gɑ Si tə ŋkhyak mo pɑ

³⁵ ba m gɑ bǎ nə ya guŋ lə, mo yə ě pwɔk e, biŋ bɑ gə nwə dəŋdəŋ a, e ŋkhuŋ e.

³⁶ E lě shya ŋkhʉɔ e bi pɑ Israɛl: Cuŋ pɑpuŋ hwitə̀ shyə m nə Yeso Kristo, yʉ́ yə é bɑ Cyəpɔ guŋ pɔ awɛ a.

³⁷ Pǒ zhyə́: nwə bɔ bɑ ǎ sa guŋ Yudea awɛ, bɑ a lə to' Galilea, fɑ nə kwǐshyə yə Yohane lə́ shyanyə a.

³⁸ Yəŋ Yeso yə Nazarɛt, po zhyə́ pa' Si lə lɑ Zhwenyə Dɔlɔ̌ ba tʉɔ nə jwɔ' e a. E lə cyə nə guŋ mtsʉ' awɛ pa' gənwə pɑpuŋ a. E lə jɛ guŋ pɔ awɛ pyə sata lə bɑ e kwɑ wap a, nə pa' pu Si lə nə bəmtə bɑ.

³⁹ Pyə bɑ mghɛ kwinthɛ nə guŋ fa' tsyə́ awɛ nthʉm guŋ pɑ Yudea, ba m Yerusalɛm, yʉ yə wap lə ciŋ e thə nə bvɑnyə e a,

⁴⁰ Si yám é nə vʉ̌ nə bàtə dzʉ tyɛ̀' tá gə gɑ e la'tə nɑ e,

⁴¹ da' gɑ́ tə m bi gùŋ pɔ awɛ pɑ́, da' m bi mghɛ kwinthɛ pyə Si lə ləŋdzə shwɔ' wap a, bi wɔk pyə pyə a pu lə tsʉ̌ ywə biŋ nwə̀ ywə tə bɑ ě yam nə vʉ̌ a.

⁴² E le gɔm bi pyə gɑ pyə ghɔ shyanyə bi gùŋ pɔ awɛ, biŋ bɑ ŋkwinthɛ̌ gɑ Si bɑ e cwɔ' e nə gə gɛ fyɛ' pɔ mtʉɔ ba pɔ pyə wap lě pfʉ a.

⁴³ Mkwǐnthɛ́ gùŋ mghɔm ghɔm Si awɛ bɑ pɑ nə e gɑ: A shyə m nə tso tsyə́ pu lɑ mhɔ mo yə e piŋ e a nə shwyɛ' e.

⁴⁴ Pɛtrɔ lə pɑ gɔm po'o, Zhwenyə Dɔlɔ̌ sɔ' nə pɔ pyə wap lə yu' ghɔm a

⁴⁵ nwə pɑ shyə mghɛ piŋ pyə a lə bɑ pu vo wap a, pyə wap lə sɔ' shya Pɛtrɔ a, nə pa' nə hɑ Zhwenyə Dɔlɔ̌ ko ba m nə guŋ pɑ tə pɑ́ pɑ Yudea a.

⁴⁶ Wap lə bɑ́wə ju' pɔ bɔ, wap pɑ gɔm mghɔm, bɑ jwɔp nə ghu' Si. Pɛtrɔ piŋ dɑ ghɔm

⁴⁷ gɔm gɑ: Bi a pɑ mo kəŋnyə kwishyə bi pɔ pyə a bɑ wap kwi Zhwenyə Dɔlɔ̌ pa' wɔk pɑ a?

⁴⁸ E lə ghɔm gɑ wap kwishyə nə tso Yeso Kristo, wap piŋ həŋtə e gɑ pu a pu na' shwə nə shɑ mtyɛ'dzʉ.