2 PƐTRƆ 1 - Ghomala New Testament

Ca'tə

¹ Myə Simon Pɛtrɔ, gɛfa' biŋ bɑ gɛ nthə̌m Yeso Kristo, bi pɔ pyə́ wap lě shyə m̀ nə dəŋdəŋ Si ba Yeso Kristo gɛvɔk pɔ ŋkwi piŋnthʉm m də̀ŋ pa' yɔk pɑ a:

² A gho' pu hwítə sɔ' bi po kwa' dù é shyə́ m nə́ nə zhyə Si ba Yeso Cyəpɔ yɔk pɑ̀.

Vɔk mo Kristo

³ Tʉɔ Si bɑ ǎ hɑ guŋ ywə awɛ yə a shə́ŋ nə vɔk ba nə́ nə lɑ mku' biŋ a bi pɑ, nə pa' a bɑ ě ghə pɑ zhyə́ mo yə e ŋkhe wɔk pɑ shyə́ m nə ghu' e ba nə gʉ' e nə gɛfa'.

⁴ A cyə́ m̀ nə́, nwə pɑpuŋ gwyə yə pu lə ka'nyə bi pɑ a, pu hɑ ya bi pɑ; po'o gɑ po cyə m̀ nə́ po a Si tamtə́ nə́ Si pa' é nə bɑ a, bɑ pu té wɔ nə vɔk bipi yə ghi'nyə dzʉ́ hɑ a.

⁵ Po pìŋ shyə m̀ po'o shu'tə guŋ gʉ' yɔ awɛ, po kwi' mà pɑpuŋ nə piŋnthʉm yɔ, po kwi' nə zhyə́ nə mà pɑpuŋ.

⁶ Po kwi' nə tɔm nɑ tsɔ́ nə nə́ zhyə, ŋkwi' nə cəŋtə nthɔm nə nə tɔm nɑ tsɔ́, ŋkwi' nə nə́ lɑ mku' bíŋ nə́ nə cəŋtə nthɔm.

⁷ Po kwi' nwə msó cəcɑ̌ mfɑ́ nə nə́ lɑ mku' bíŋ, biŋ ŋkwi' ŋkhùŋnyə̀ nə nwə msó cəcɑ̌ mfɑmfɑ̀.

⁸ Nə pa' po ghə gùŋ mmà pɑpuŋ mɔ̌ tə a yɔm, po cəŋtə́ fǎ nə zhyə Cyəpɔ yɔk pɑ Yeso Kristo.

⁹ Nə pa' mo yə́ mma pɑpuŋ bɔ yak bi a bɑ fʉ̀, e pɑwə məmtə́ məjyə̀: Bɑ ě tʉɔnyə gɑ́ a bɑ pu lě shu' e nə mhɔ myə́ myə dzə̀.

¹⁰ A po'o mfɑmfɑ́, po kaktʉɔ nə cəŋtə nthɔm yɔ pa' Si lə kě wɔ a, ba m̀ pá' é lə cǐ wɔ a; po ghə po'o bɑ pɑ́ po lə la' bvʉtə́ sí.

¹¹ A gɔ pɑ po'o tə́ Si sɔ' hɑ nə ko nə́ Nəfo mama Cyəpɔ yɔk pɑ bíŋ bɑ gɛvɔk wɔk pɑ Yeso Kristo.

Nə tɔm ghɔm mghɛ nthəm

¹² Gɑ̌ wə sɛ nə pɑ ŋkhamtə́ yá bi po guŋ mcwə awɛ, ba tə pa' a bɑ pǒ zhyə́ yá biŋ bɑwə shə́ŋtə́ nthɔm nə cwə nə nwə nyənyɔ yə cwəlɔ a,

¹³ gɑ̌ yɔ gɑ a nwə dəŋdəŋ nə pɑ jam wɔ nə cwə yə jɑ̌ pɑ dəmcǎ' a,

¹⁴ nə pa' cwə nə hapnyə ghɔptə pa' Cyəpɔ yɔk pɑ Yeso Kristo gə jyə́ a.

¹⁵ Da' gɑ́ gɑ̌ gɔ cəŋtə́ nyaptə, po'o gɑ cwə yə gɑ̌ ghɔ a, po cʉ' gə sɔ guŋ mcwə awɛ nə pɑ ŋkhamtə́ ywə yə po ji'tə a.

¹⁶ Nə pa' pyə lá tə shyə m̀ jʉ̀m tsə pomkəfeli tə́ gə po zhyə tʉɔ ba nə sɔ' Cyəpɔ yɔk pɑ Yeso Kristo pɑ̀, pyə lə́ shyə m nə pa' pyə lə́ lɑ̀ mnyə mɔk jɔ nthʉm ghu' e a.

¹⁷ Nə pa' a bɑ Si Tá lé hɑ mku' pu a ghu' bi e nə cwə yə́ gi lə fɑ̌ bi Si gɔm bi e gɑ: Mo yə̌ŋ bɑ́ Mú a yə gɑ̌ ŋkhuŋ e te' a, mo yə a buŋ bəm nə cwɔ' e a.

¹⁸ Gi bɔ, ba kwa' wɔk lə yǔ' a fɑ kɛbəŋ, nə cwə yə pyə a pú lə bɑ́ dəm kúŋ dɔlɔ̌ a.

¹⁹ A biŋ nə pɑ̌ po'o ghɔm mghɔm ghɔm Si pɑ ywə nthʉɔtʉɔ yə po gɔ tʉ́ mnyə mɔ nə́ pa' lambu ŋkhyɛ' kyɛ' yə a ŋkhyɛ' nthʉm tsʉ' jʉm, ŋkhyɛ' tə dzʉ lɔ́, sɛ dedzʉ̌ sa' nthʉm mtʉ́m mɔ́.

²⁰ Po lə́ŋdzə shəŋtə́ jyə́: sɔm ghɔ̀m gɔm ghɔ̀m Si tsyə ǎ nthʉm ŋwa'nyə a tə bɑ tsyə mò pɑ̀.

²¹ Nə pa' tɑ́ mkwɛnyə monəŋthə nə hɑ ghɔm bí gɔm ghɔ̀m Si pɑ́. Zhwenyə Dɔlɔ̌ nə gə tə pɔmnəŋ ghɔmnwə yə a fɑ m̀ bi Si a.