ROMA 8 - Nouveau Testament Doyayo

ROMA 8

¹ Yɛrɛ dɔgl-gbaak taa dood wɔ hi ɔks hi Yeesu Kristu matugo.

² Ya̧a̧nɛ, ꞋꞋMɔkil za̧a̧tigya maakdɔglꞋꞋ bɔ gi wook hin a ɔksil wɛ bɔ hi Yeesu Kristu gedu tuus zul mi tuus a ꞋꞋhinha̧a̧l hi wɔrk maakdɔglꞋꞋ du.

³ Bɛt hi zulɔ woo hinyɔ Muusa maakdɔgl ɗɛ̄ɛ̄ wook gɛ anyɔ doo hɛbtdi taan tɛŋko. Bɛt yaaz waaɔ mɔɔt bɔ a waal du. Yɔ waaɔ zaa, muulɔ riitin an doo hinha̧a̧lya hɛbtdi, an gi ha̧s hinha̧a̧lɛ. Wɛɛ Bɛt mat hinha̧a̧l hi dɔgl-gbaakɔ bɔ a waaɔ bɔ Yeesu muul du yɔ wɔrɔ.

⁴ Bɛt woo hin bɔ lab an wɛ dag gbɔnɔ wɛ woowoos rɔbɛ wɔ maakdɔglɔ bɔ ɛrɔ, wɛɛ yɔ wɛ ɛmbik an Bɛt Mɔkilɔ gig ha̧a̧ko, taa anyɔ doo hɛbtdi ha̧a̧ge.

⁵ Wɔ hi gi waak an doo hɛbtdi, hi mɔkig hinyɔ doo hɛbtdi gig ha̧a̧ko, wɛɛ wɔ hi waak anyɔ Bɛt Mɔkilɔ ha̧a̧ge, hi mɔkig hinyɔ Bɛt Mɔkilɔ gig ha̧a̧k giya.

⁶ Za̧a̧nyɔ gi mɔkig hinyɔ doo hɛbtdi gig ha̧a̧ko, gi wɔrɔ. Wɛɛ za̧a̧nyɔ gi mɔkig hinyɔ Bɛt Mɔkilɔ gig ha̧a̧ko, dag za̧a̧tigi hi boolumi.

⁷ Wɔ hi mɔkig hinyɔ doo hɛbtdi ha̧a̧ge, hi gi Bɛt lɔlɔhɛ̧ɛ̧nikyaadɛ, taa an hi fɔk hinyɔ Bɛt maakdɔglɔ raa, wɛɛ taa an hi ɗɛɛ fɔk be.

⁸ Yɔ anbɔ dood wɔ hi waak an doo hɛbtdi gi waako hí dɛ̄ɛ̄ an hi bɛs Bɛt gɛ.

⁹ Yɛrɛ nɛya, nɛ taa waak an doo hɛbtdi gi waako, Bɛt Mɔkilɔ gi gi waak a nɛ kpoos du hi rɔbo, nɛ waak an hinyɔ ha̧a̧g giya. Za̧a̧nɔ gi taan Yeesu Kristu Mɔkilɔ gi kpoos du gɛ, taa Yeesu doo ɔnɛ.

¹⁰ Kristu gi gi nɛ kpoos du, muul nɛ wɛɛ wɔrko a hinha̧a̧l dɔŋgo, wɛɛ mɔkil nɛ gi za̧a̧tili be a hinrɔbwook dɔŋgo.

¹¹ Wɛɛ gid Za̧a̧nyɔ rɛms Yeesu a wɔrkɛ teesdu Mɔkilɔ gi waak a nɛ kpoos du, Za̧a̧nyɔ rɛms Yeesu Kristu a wɔrkɛ teesdu gi wɛɛ gi gaa muul nɛ wɔrkil bɔ za̧a̧tigi hi Mɔkil yɔ gi waak a nɛ kpoos du tɛŋkɔ.

¹² Yɔ anbɔ, yɛ̧ɛ̧dɛ mi wɛ, hinza ɗɛ̄ɛ̄ an gi fɛ̧ɛ̧wɛ wɛ fɔ̀b hinyɔ doo hɛbtdi ha̧a̧g gɛ.

¹³ Gid nɛ waak an hinyɔ doo hɛbtdi ha̧a̧ge, nɛ wɔrɔ. Wɛɛ gid nɛ gbɔŋk muul ɗɔkum wɔ hi Bɛt Mɔkilɔ, nɛ́ za̧a̧.

¹⁴ Dood wɔ Bɛt Mɔkilɔ gihi kaŋk a gbɔnɔ rɔb du hi gi Bɛt waat sɛw.

¹⁵ Wɛɛ nɛ́ dāg gbaar mɔkil an nɛ wɛɛ nɛ waa a hoob du gɛ. Nɛ dag Bɛt Mɔkilɔ yɔ gisɛ gok an wɛ el Bɛt a Aba, raakɔ a Baaba!

¹⁶ Hɔɔ, Bɛt Mɔkilɔ ta̧a̧ mɔkil wɛ hi zulɔ: a wɛ gi Bɛt waato.

¹⁷ Nɛ gid wɛ gi Bɛt waato, wɛ gi Bɛt rɔɔsɔ dakya ma, wɛ gi dakya ɔksi hi Yeesu Kristu; wɛɛ gid wɛ ya̧a̧ryɔ̧k hi giya, wɛ waa hi gii a gi gbɔlums du hɛw.

¹⁸ Mi mɔk ya̧a̧rhant wɔ wɛ gi yɔ̧ko a ɔ̧tigi zulɛ rı̄ı̄ an hi gogsin gbɔlums yɔ gɔ gi zaa gi wɛɛ gi mitsɛ gɛ.

¹⁹ Hinwɔ Bɛt kim sɛw hi kɔm hi ook Bɛt wāātɔ wɔ midigya̧ hi gbɔlumsɛ hi ha̧a̧tig gbɔɔltɔnɔ.

²⁰ Ya̧a̧nɛ waal gi a hintɔs tɛŋkɔ wɛɛdisɛ. Taa an ha̧a̧ gii hi zulɔ, Bɛt gii gbaage a hinɔ gedu.

²¹ Yɔ anbɔ Bɛt gaa mɔkil-gbaaki: ɔ̧tza hinyɔ Bɛt kimɔ gi pidɔ, hi tuus zulɔ a tɛŋk ha̧tirgoya bɔ gig wa̧a̧k gbaarums du gedu, yɔ gɔ gi wɛɛ gi dag Bɛt wāātɔ wɔ zulya̧ tuusig gbɔlums bɔ ɔ̧nɛ.

²² Yɔ anbɔ wɛ mɛɛ a yɛɛl amntɔnɔ tuur ɓɔryɔ, waal du sɛw gi hekugo, gi kosgumn kɛŋko an nis gi kɛŋk waagulik kosgumnɛ.

²³ Waal du gii kpɔd gɛ, wɛɛ hɛw, wɛɛ yɔ wɛ gin Bɛt Mɔkilɔ wɛ yɛɛl wɛ dag a Bɛt gaasɔ bɔ gedu; wɛɛ hɛw wɛ gi hekig wɛ kpoos du, wɛ gi oonik an Bɛt gi pidɛ gi za̧a̧s muul wɛ, gi wɛɛnɛ waatɔ ɛns hi rɔbo.

²⁴ Yɔ wɛ gbaak mɔkil wɛ a wɛ́ za̧a̧ ro wɛ́ za̧a̧. An wɛ gbaak mɔkil wɛ a hinyɔ gɔ wɛ gbɛn geha, hinɔ taa mɔkilgbaak ma; hinyɔ wɛ gbɛnko, gi an wɛ wɛɛ wɛ wāal ɓɛ ya?

²⁵ Yɛrɛ gid wɛ gbaak mɔkil wɛ a hinyɔ wɛ gbɛn gɛ hage, yɔ anbɔ, wɛ oog hi hinmɔŋki.

²⁶ Gbunɔ yɔ wɛ gi dood hɔntil gii Bɛt Mɔkilɔ gi gisɛ zaak ɗaako a wɛ hɔntil bɔ gedu; yɔ wɛ mɛ̄ɛ̄ Bɛt zɔ̧k anyɔ rii gɛ ya̧a̧nɛ. Yɔ anbɔ, Bɛt Mɔkil hi zulɔ gisɛ Bɛt zɔ̧ko hi hekil yɔ hi ɗɛɛ an gɔ hi dɔg gɛ.

²⁷ Bɛt yɔ gi seek a kpoos wɛɛdisɛ, mɛɛ hinyɔ Mɔkilɔ ha̧a̧g ɛrko. Ya̧a̧nɛ Bɛt Mɔkilɔ gi zɔ̧bsig dood wɔ hi gi Bɛt ɔnɛ anyɔ Bɛt gig ha̧a̧ko.

²⁸ Wɛ mɛɛ ɔ̧nɛ a Bɛt gi woonik hin sɛw anyɔ gi woosig dood wɔ ha̧a̧hi a ge hinrɔbo, dood wɔ elihi an hinyɔ da mɔkɔ an gi woo.

²⁹ Ya̧a̧nɛ da yɛɛl sɛ̧ɛ̧hi, da gbaahi nɛ dordi an hi fɔ waawal muutɔ hi wɛɛ an giya, an kuudu waawal gi wɛɛ hinda gbɔɔl a yɛ̧ɛ̧dɛ ɔ̧ɔ̧ kitɛ tees du.

³⁰ Wɛɛ dood wɔ Bɛt gbaahi nɛ biitir anbɔ be, wɛɛ el hii hɛw. Wɛɛ dood wɔ elihi be, ta̧a̧hi an dood riitɛ a gi muutdu, gaahi gbɔlumsɔ bɔ ya̧nɛ.

³¹ Gi an wɛ dɔg nɔ ma a hin wɔrɔ hi gbaŋgi? Bɛt gisɛ ɗaako, bɔ gi ɓaas zulɔ a wɛ gbaŋg nɔ?

³² Bɛt ā̧a̧n waaɔ mɔɔt bɔ gɛ, gaaz an gi wɔr a wɛ kal sɛw. Ri gi taa nɛ an gi gaawɛ hin sɛw hi gii gɛ?

³³ Bɔ gi gɛ̧ɛ̧n dood wɔ Bɛt sɛ̧ɛ̧hi dɔglɛ? Bɛt gii ta̧a̧hi an dood rɔbɛ!

³⁴ Bɔ gi matinihi dɔglɛ? Yeesu Kristu wɔrɔ. Wɔr kpɔd gɛ, wɛɛ rɛml dɔɔ a bɛtha da ɗɔɔt a Bɛt naanrɔbo, wɛɛ gisɛ Bɛt zɔ̧ko!

³⁵ Bɔ gi gɛ̧ɛ̧nɛ Kristu ha̧a̧tigɔ? Gi gi ya̧a̧rhant ya, zɛksili ya, ya̧a̧kɛtili ya, tɔs ya, ya̧a̧rums ya, hoobha̧nt lɛl ya, wɔrk ya ri?

³⁶ Hɔɔ, Bɛt ɗɛɛrwolɔ raa: a Waar i, hi giwi gbɔŋk ɔ̧t bed a mɔ dɔŋgo. Hi giwi seek an tam wɔ gɔ hi ka̧hi a gbɛɛriklɛlɛ.

³⁷ Yɛrɛ a hin wɔrɔ lab duge sɛw, wɛ ɗɛɛ hin wɔrɔ wɛ daarihilɛl da̧a̧da̧, hi za̧a̧nyɔ ha̧a̧g hi wɛɛ tɛŋkɔ.

³⁸ Ya̧a̧nɛ, mi mɛɛ rɔbtɔnɔ: a wɔrko, zaabe za̧a̧tigi, zaabe Bɛt walɛsɛrɛ , zaabe tɛŋk gbɔlɛ zaadɛ, zaabe hinwɔ hi gi ɓɔryɔ, zaabe hinyɔ gi zaako,

³⁹ zaabe tɛŋk zaadɛ, zaabe hɔɔtigi, zaabe duki, zaabe hinza wɔ Bɛt ki̧hi sɛw, hí ɗɛ̄ɛ̄ an hi gɛ̧ɛ̧wɛ hi Bɛt ha̧a̧tigɔ yɔ fu̧u̧ a Waar wɛ Yeesu Kristu ge gɛ.