ROMA 5 - Nouveau Testament Doyayo

ROMA 5

¹ Nɛ yɔ Bɛt seewɛ an dood riitɛ a gi muutdu a wɛ ɗɔbsig dɔŋgo, wɛ gin boolum gɔ hi gii a Waar wɛ Yeesu Kristu dɔŋgo.

² A Yeesu dɔŋgo, hi ɗɔbsig wɛ, wɛ ɗɛɛ an wɛ dag gbɔnɔ talk a gɛmsillɛl yɔ wɛ erk gedu a Bɛt dɔŋdi yɔ za̧a̧sɛ ya̧a̧r tɔs. Hinyɔ giwɛ hat gaako, yɔ wɛ gin mɔkil a wɛ́ dag Bɛt gbɔlumsɔ bɔ wɛnɛ giya.

³ Gii kpɔd gɛ, wɛ gi dak hat hɛw a wɛ zɛksil du, yɔ anbɔ wɛ mɛɛ be a zɛksil gi kamz hinmɔŋki,

⁴ hinmɔŋk be gi kamz ɗɛɛti, ɗɛɛt be gi kamz mɔkil-gbaaki.

⁵ Mɔkil-gbaak bɔ gɔ maat doo gɛ, anyɔ Bɛt Mɔkilɔ gaawɛ Bɛt ha̧a̧tigɔ tal giwɛ kpoos du.

⁶ Yɔ tɛŋk wɛ rı̄ı̄ nɛ an wɛ woo hinza ket gɛ an wɛ ɔɔ hinha̧a̧lɛ, Kristu wɔr a dood bɔbtin zulɛ a ɔ̧tyɔ hi dɛ̧ɛ̧ gedu.

⁷ Ɓaaɓa an doo gi wɔr a doo yɔ rii gi zulɛ. Kinsa doo za kɔ̀t yɔ wɔr a doo rɔb za dɔŋg be.

⁸ Yɛrɛ Bɛt gisɛ ha̧a̧tig ɔ̧ɔ̧n zuunik anyɔ Kristu wɔr wɛ zulɛ yɔ wɛ gi nɛ hinha̧a̧lyaadɛ gii kete.

⁹ Yɛrɛ gid wɛ gi dood riitɛ a Bɛt muutdu a Kristu ga̧a̧mɔ bɔ gubr gi dɔŋgo, yɔ anbɔ, hinyɔ daarlɛl gbɔɔltɔnɔ gii gi za̧a̧sɛ a Bɛt nɔɔtigɔ bɔ gedu.

¹⁰ Nɛyɔ wɛ da wɛ gi nɛ Bɛt lɔlhɛ̧ɛ̧nikyaadɛ kete, nɛ wɛ wɛɛ sa̧a̧mɔ a waaɔ bɔ wɔr a wɛ kal gi dɔŋg ma mi? Nɛ yɔ anbɔ, hinyɔ daar bɔrɔ lɛl gbɔɔltɔnɔ, yɔ wɛ gi sa̧a̧mɔ ɓɔri ma giya waaɔ bɔ za̧a̧tigɔ gii gi za̧a̧sɛ.

¹¹ Wɛ́ dāg hat a hin bɔrɔ gedu kpɔd gɛ, wɛ dag a ɔksig wɛ bɔ gedu hi Bɛto a Waar wɛ Yeesu Kristu yɔ wɛɛnɛ Bɛt saamɔ gi dɔŋgo.

¹² Ya̧a̧nɛ, anyɔ hinha̧a̧l gul a waal du a doo gbun bɔ nuŋgɔ a Àdamu gi dɔŋgo, wɔrk taz gɔ a hinha̧a̧l dɔŋgo, yɔ anbɔ wɔrk bɛbr naanɔ gɔ dood zulha sɛw anyɔ dood sɛw hi gɔ hinha̧a̧lɛ.

¹³ Hinha̧a̧l tal a waaldu yɔ maakdɔgl da taa ket giya. Yɛrɛ, yɔ maakdɔgl da taa nɛ kete, Bɛt da ɓɛ̄r hinha̧a̧l gɛ.

¹⁴ Hɔnɛyɔ Adamu ginɛ za̧a̧nyɔ gɔ gi zaa rittinsɔ, ha̧tir Bɛt ya̧a̧ɔ, woo hinha̧a̧lɛ, wɔrk dag tɛŋk gɔ a dood wɔ hí hā̧tir Bɛt ya̧a̧ɔ an Adamu gɛ hɛw hi zulha sɛw, tuur a Muusa ge.

¹⁵ Yɛrɛ Adamu hin-a̧a̧bɔ rı̄ı̄ an hi goksin gaasyɔ Bɛt gaawɛ gii gɛ. Dood kittɔnɔ hi wɔr a hinha̧a̧l yɔ doo gbun da gɔ gi dɔŋgo. Bɛt gɛmsilɔ tɛŋk daar hinha̧a̧l tɛŋkɔ daar gbɔɔltɔnɔ, an gaas yɔ Bɛt gaa a dood kittɔnɔ, a doo gbun ge, gɛ a Yeesu Kristu gɛmsilɔ bɔ gi dɔŋgo.

¹⁶ Bɛt gaasɔ bɔ daarin doo gbun hinha̧a̧lɔ tɛŋko. Bɛtdɔglɔgbaak bɔ a hin-a̧a̧b yɔ doo gbun da woo hage, hin-a̧a̧b bɔ mat dood sɛw. Yɛrɛ dood kittɔnɔ hi woo hin-a̧a̧bi, wɛɛ Bɛt gáásɔ ya̧a̧rtɔs rɔb bɔ wɛɛnihi hinrɔb wookyaadɛ.

¹⁷ Hi rɔbo, doo gbun hin-a̧a̧bɔ gɔy an wɔrk gi dag tɛŋko a doo gbun bɔrɔ gi dɔŋgo. Yɛrɛ a doo za gbun dɔŋg ro, gɛ Yeesu Kristu, dood wɔ hi dag Bɛt gɛmsilɔ gbɔɔlɛ hi Bɛt gaasɔ yɔ wɛɛnihi dood riitɛ gi muutdu ya̧a̧rtɔs hi dag wááto hi za̧a̧tigi. Hinɔ daar hinha̧a̧l tɛŋkɔ daarɔ.

¹⁸ Mi dɔg a dood sɛw hi wɛɛ hin-a̧a̧bwookyaadɛ a doo gbun yɔ gɔ hin-a̧a̧b gi dɔŋgo. Yɔ anbɔ Bɛt gii wɛɛ gi tuts dood zulya̧ aakil du sɛw gi wɛɛ gi gaahi za̧a̧tig a doo gbun yɔ woo hinyɔ rii gi dɔŋgo.

¹⁹ Dood kittɔnɔ hi wɛɛ hinha̧a̧l-yaadɛ anyɔ doo gbun ha̧tir hinyɔ Bɛt raa. Yɔ anbɔ Bɛt gi ta̧a̧ dood kittɔnɔ anyɔ doo gbun kɛms Bɛt tɔnɛ.

²⁰ Maakdɔgl wɛɛ midɔ an hi tɔɔs hinha̧a̧lɛ. Yɛrɛ hinha̧a̧l hi hɔŋgɔ, Bɛt gɛmsilɔ gi wɛɛ gi hɔŋgɔ gi daarlɛl be.

²¹ Anyɔ hinha̧a̧l gin nɛ tɛŋk dood zulha a wɔrk dɔŋgo, yɔ anbɔ Bɛt gɛmsilɔ tɛŋkɔ gi waak hinrɔb wooki gi midig za̧a̧tig faa yɔ wɛ dag a Waar wɛ Yeesu Kristu dɔŋgo.