ROMA 16 - Nouveau Testament Doyayo

ROMA 16

¹ Mi gisin yaak siŋg wɛ Febe yɔ gi Bɛt woosɗaakya a Yeesu fɔkya wɔ hi tees du a Kɛŋkeriya, ha̧a̧mi

² an nɛ zeg a Waar Yeesu nuŋg du anyɔ bɛrɔ a Bɛt doodɔ gbaŋgi, an nɛ wɛɛ nɛ ɗaasige a hinyɔ ha̧a̧g gedu sɛw. Ya̧a̧nɛ da ɗaas dood kittɔnɔ, ɗaas mii hi zul mi hɛw.

³ Boon nis bɔ Piriskila hi waltɔ Akilas, dood wɔ hi woo Bɛt woosɔ hi mii lɛlgbunu a Kristu nuŋg du,

⁴ hi gaa zulya̧ wɔrko an hi za̧a̧s kol mi, mi taahi baanik mi gbunu, dood wɔ hi taa Yahuduya gɛ Yeesu fɔkya ɔksilya̧ wɔ sɛw hi baanihi.

⁵ Boon Yeesu fɔkya wɔ hi mɔksig hi raa du. Boon saam mi rɔb bɔ Hepanɛtus yɔ wɛɛ Yeesu Kristu ɗɔbsigya doosi a Aaziya hɛbtdu.

⁶ Boon Mariyama yɔ woosin woos gbɔɔltɔnɔ.

⁷ Boon Adronikus hi Zuniyas, nɛsɛ mi wɔ, hi da hi ginɛ a luknɔ du hi mii lɛlgbunu, wɔ hi gi dood gbɔlɛ a tɔmsyaadɛ teesdu, hii dosum Kristu ɗɔbsugɔ.

⁸ Boon saam mi rɔb Ampilas yɔ wi ɔks hi gii a Waar Yeesu nuŋg du.

⁹ Boon Urbɛn yɔ gɔ gi wootingo woos hi wɛɛ a Kristu nuŋg du, hi saam mi rɔb Itaskis.

¹⁰ Boon Apeelɛs yɔ mɔm ya̧a̧rhant gi zuun ɗɔbsugɔ woosɛ a Kristu nuŋg du. Boon dood wɔ hi gi a Aritobulus raa du.

¹¹ Boon nɛs mi Hirodiyɔn. Boon dood wɔ hi gi a Narkis raa du hi ɗɔbsig Waar Yeesu.

¹² Boon Terefena hi Tirifosa, nɛɛd wɔ hi gi wook Waar Yeesu woosɛ. Boon nis bɔ Pɛris, saam wɛ rɔb yɔ woos Waar Yeesu woos gbɔɔltɔnɔ.

¹³ Boon Rufus yɔ Waar Yeesu sɛ̧ɛ̧ge, hi nɔɔtɔ yɔ gi an nààmi hɛw.

¹⁴ Boon Asiŋgirid, hi Filigɔn, Hɛrmɛs, Patorobas, Hɛrmas hi yɛ̧ɛ̧dɛ wɔ hi gi hi hii sɛw.

¹⁵ Boon Filoga hi Zuuliya hi Nɛɛrus hi siŋtɔ, hi Olimpus, hi Bɛt doodɔ zaadɛ wɔ hi gi hi hiya.

¹⁶ Bootinnɛ bɛttɔnɔ hi yɛ̧ɛ̧dums hat gaattɔnɔ. Kristu fɔk-yaadɛ ɔ̧ɔ̧ a lɛl wɔ hi mɔksig ge sɔmsɔm sɛw hi boon du.

¹⁷ Mi gin zɔ̧ko, yɛ̧ɛ̧dɛ mi wɛ, oon zul nɛ hi dood wɔ hi taa ɛmbik an hingok rɔb bɔ hi da hi goksinɛ, hi gɔk gɛ̧ksil a nɛ teesdu hi wɛɛ hi matig dood hinha̧a̧l du. Hɛmlinɛ hi!

¹⁸ Dood wɔrɔ lab hi taas Waar wɛ Kristu wooko, hi mɔkig buu ya̧a̧n kpɔd, hi maatig dood ɗaktil wɔ hi ya̧a̧hɛmnti, hi gihi sɔɔtugo an kpoosya̧ gi zɛmrɔ.

¹⁹ Nɛnɛ be, dood sɛw hi mɛɛ tɔnnɛlaki, ya̧a̧nɛ mi dag hat nɛ zulha. Yɛrɛ ha̧a̧m an nɛ wɛɛ hinmɛɛkyaadɛ dubtɛ a rɔbgɔk du, wɛɛ ha̧a̧m an nɛ kɔm an dood wɔ hi mɛɛ hin gɛ a hinha̧a̧l gbaŋgi.

²⁰ Kuudu kaasi Bɛt yɔ gi gaak boolumi gi namr Saydanu a nɛ dɔɔ du. An Waar wɛ Yeesu Kristu gɛmsilɔ gi gi hi nɛya.

²¹ Timɔte yɔ wi wootingo woos elo, hi nɛsɛ mi Lukeyus hi Yasɔn, hi Sosipatɛr hi boon du.

²² Mii Teritiyus mi boon a Waar Yeesu nuŋg du, mii bi̧i̧ hinyɔ Pol ha̧a̧g raak a ɗɛɛrwol yɛrɛ gedu.

²³ Gayus, rɔbɛzekya mi yɔ Yeesu fɔkya hi mɔksig gi lɛl du boonɛ. Erastus, tusgbaakya bɔ a waal gbɔɔl du hi yɛ̧ɛ̧ wɛ Kawartus hi boonɛ. [

²⁴ An Waar wɛ Yeesu Kristu gɛmsilɔ gigi hi nɛɛ sɛw. Aanbɔ! ]

²⁵ Yɛwɛ baan Bɛto, gii ɗɛɛ an gi gaan tɛŋk gi ɗaasin a gbɔnɔ du, anyɔ nɛ lag Dɔgl Rɔb yɔ mi dɔk a Yeesu Kristu zulɛ. Dɔgl Rɔb bɔ da yaat nɛ amntɔnɔ.

²⁶ Yɛrɛ dɔgl yaatilya bɔ miid ma. Bɛtya̧a̧kɛŋkya wɔ hi tuus dɔglɔ a ɗɛɛrwol wɔ hi bi̧i̧ gedu anyɔ Waar Bɛt yɔ gi waak faa da raahi hi dɔks dood dɔ̧ɔ̧t sɛw dɔglɔ an hi fɔbɔ hi ɗɔbsige.

²⁷ Gbɔlums gi a Bɛt yɔ gi hinmɛɛkya dubt gi gbunu a Yeesu Kristu nuŋg du faa! Àanbɔ!