ROMA 15 - Nouveau Testament Doyayo

ROMA 15

¹ Wɛɛ tɛŋkya wɛ, yɛwɛ ɗaas dood hɔntil wɔ hɔntilya̧ pɛɛko. Bɔwɛ tɛ hinyɔ bɛsɛ.

² Wɛ gbunu gbunu, yɛwɛ ɓɛɛ an wɛ gɔ nawɛza kpoosɔ gi harige, an wɛ ɗaasig gi rek doosɛ a Bɛt gbɔnɔ du.

³ Kristu hi zulɔ wāā a hinyɔ bɛsig gi dɔŋg gɛ, waa an hinyɔ Bɛt ɗɛɛrwolɔ raa a Waar Bɛto, niit wɔ dood hi gim niik hi wɛɛz be zulha.

⁴ Nɛ yɔ anbɔ hinyɔ hi bi̧i̧ nɛ doos sɛw a Bɛt ɗɛɛrwol du, hi bi̧i̧ nɛ a wɛ dɔŋg an wɛ mɛɛ wɛ gok hinmɔŋki hi muul wɛ ɓaasigi hi Bɛtdɔglɔ wɛ dag mɔkil wɛ gbaak a Bɛt ge.

⁵ An Bɛto Za̧a̧n hinmɔŋk gaakya hi muulɓaasigya bɔ gi gaan tɛŋk nɛ ɗɔɔt rɔbtɔnɔ hi kpoos nɛ gbunu, anyɔ Yeesu Kristu ha̧a̧ge,

⁶ an nɛ sɛw nɛ ɔks ya̧a̧ gbunu nɛ baan Bɛt yɔ gi Waar wɛ Yeesu Kristu Baatɔ.

⁷ Yɔ anbɔ zebtinnɛ rɔbtɔnɔ anyɔ Kristu zewɛ rɔbtɔnɔ, an nɛ gaa Bɛt gbɔlumsɛ.

⁸ Ya̧a̧nɛ, mi raasinɛ: a Kristu da wɛɛ nɛ Yahuduya wɔ woosya ya̧a̧n an gi zunsihi a Bɛt raa rɔbo, wɛɛ an gi da̧a̧s hinyɔ Bɛt raa a gi woos baaya̧ hiya,

⁹ wɛɛ an dood wɔ hi taa Yahuduya wɔ hi mɛɛ nɛ Bɛt gɛ, hi baan Bɛt a gi ya̧a̧rmɛɛk dɔŋgo, anyɔ Bɛt ɗɛɛrwolɔ raa a yɔ anbɔ, be baanumɔ a dood wɔ hi taa Yahuduya gɛ hi teesdu, be wɛɛ be ɛɛhinɛ an be ɗɔbs nuŋg mɔ.

¹⁰ Hi wɛɛ hi raa ɓɛ: Nɛɛ dood wɔ nɛ mɛɛ Bɛt gɛ, dagin hat hi Bɛt doodɔ!

¹¹ Wɛɛ raa ɓɛ: nɛɛ dood wɔ nɛ mɛɛ Bɛt gɛ sɛw, baanin Waar Bɛto, an dood dɔ̧ɔ̧t sɛw hi baanige.

¹² Esaya raa hɛw: a za̧a̧n za gi fu̧u̧zig a Yɛsa dɔ̧ɔ̧t du gi zaa, gi ɗund gi wɛɛ waar a dood dɔ̧ɔ̧t wɔ hi taa Yahuduya gɛ hi zulha, hi gbaa mɔkilya̧ a ge.

¹³ An Bɛto, Za̧a̧nyɔ gi gaak mɔkil-gbaaki, gi gaan hat gbɔɔlɛ hi boolum rɔbo a nɛ ɗɔbsig du, kpoos nɛ gi hi̧i̧s hin wɔrɔ sɛw, an nɛ gbaa mɔkil nɛ gi tɔɔ du hi Bɛt Mɔkilɔ tɛŋkɔ.

¹⁴ Yɛ̧ɛ̧dɛ mi wɛ, mii hi zul mi mi mɛɛ rɔbtɔnɔ a nɛɛ nɛ wook hinyɔ rii giya, nɛ wɛɛ nɛ mɛɛ hinyɔ Bɛt ha̧a̧g sɛw, hinza wagin gɛ. Nɛ ɗɛɛ an nɛ goktin Bɛt dɔglɛ.

¹⁵ Nɛ yɔ anbɔ mi bi̧i̧sin dɔgl zaadɛ gaattɔnɔ a ɗɛɛrwol mi bɔ gedu, an nɛ mɔk nɛ mɛɛ hinyɔ nɛ da nɛ goko. Mi woo anbɔ a gɛmsil yɔ Bɛt gaam gi dɔŋgo,

¹⁶ yɔ wɛɛnim Yeesu Kristu woosɔya a dood wɔ hi taa Yahuduya gɛ hi tees du. Mi gi wook Bɛtdɔgl woosɔ an dood wɔ hi taa Yahu-duya gɛ hi wɛɛsig dood ɔnɛ, hi wɛɛs Bɛt an maakgaas rɔb yɔ ta̧a̧, gaas yɔ Bɛt Mɔkilɔ gaasige.

¹⁷ Anyɔ mi ɔks hi Yeesu Kristu, mi ɗɛɛ an mi tɔɔs zul mi a woos yɔ mi woosig Bɛt gedu.

¹⁸ Ya̧a̧nɛ an mi dɔg dɔgl za dɔɔmi hoobha̧a̧mha̧. Gɛ mi dɔk hinyɔ Kristu woo hi dɔgl mi dɔk bɔ hi waabil mi bɔ an mi kamz dood dɔ̧ɔ̧t wɔ hi mɛɛ Bɛt gɛ hi laksig tɔnɛ,

¹⁹ hi tɛŋk yɔ gɔ hi woon gɛrs hintuusingoya hi gɛrs gbɔlɛ zaadɛ, hi Bɛt Mɔkilɔ tɛŋkɔ. Yɔ anbɔ mi da̧a̧s Kristu Dɔglɔ Rɔb dɔkɔ yɛɛl a Urusalima hi waal zaadɛ wɔ hi sɛ̧ɛ̧b gedu tuur a mɛmbal bɔ Iliniya dɔŋdi. Mi dɔg Kristu dɔglɔ gbɔɔltɔnɔ yɛd tuur hɔ sɛw.

²⁰ Mi ɓɛɛk an mi dɔg Yeesu dɔglɔ bɔ a lɛlyɔ hi lag Kristu nuŋgɔ ge ket gɛ, an bɔmi gbaa woos mi bɔ sɛŋkɔ a doo zaa ɔnɛ ha.

²¹ Anyɔ Bɛt ɗɛɛrwolɔ raa a dood wɔ hi dɔgsirihi nɛ dɔglɔ ket gɛ hí gbɛnɔ, wɛɛ wɔ hi lagdir nɛ dɔglɔ book ket gɛ hí kɛmɔ.

²² Yɔ anbɔ, dɔɔ kittɔnɔ ha̧a̧m rek nɛɛge, wɛɛ mi dāg gbɔnɔ gɛ.

²³ Yɛrɛ ɓɔryɔ an lɛlza zɛ̧ɛ̧rsim a hɛbt yɛrɛ gedu an mi woo gɛ, wɛɛ da wɛl kittɔnɔ mi mɔkugo an mi daa mi zɛ̧brin be, wɛɛ mi dag gbɔnɔ gɛ a woos mi bɔ gi dɔŋgo,

²⁴ mi mɔkugo an gɔ mi gi rek a Espay, mi daa mi zɛ̧brinɛ, nɛ ka̧mi, gɔ mi dag hat a ɔksig mi bɔ gedu hi nɛɛ kaasi, ɓɔr nɛ ɔɔm kaŋk yaazig ma.

²⁵ Yɛrɛ ɓɔryɔ mi gi rek a Urusalima kete an mi kam hinyɔ mi ɗans Bɛt doodɔ wɔ hi gi hɔ.

²⁶ Ya̧a̧nɛ Yeesu fɔkya wɔ a Makeduniya hi a Akaya ha̧a̧hi nɛ an hi mɔkts ya̧a̧rya Yeesu ɗɔbsigya wɔ hi gi a Urusalima gaasɛ.

²⁷ Ha̧a̧hi nɛ gbɔɔltɔnɔ hi rɔbo, wɛɛ hi gi belkyaadɛ a ya̧a̧rya wɔrɔ hi bɛrki, ya̧a̧n gii dood wɔ hi taa Yahuduyaadɛ gɛ hi ɔks hi gɛ̧ɛ̧ rɔɔs yɔ Bɛt Mɔkilɔ gaa Yahuduya wɔ, yɔ anbɔ gi an dood wɔ hi taa Yahuduyaadɛ gɛ hi ɗans Yahuduya wɔ rɔɔsya̧ be.

²⁸ Gɔ mi bɛɛ dɔgl bɔrɔ da̧a̧sugo, mi bɛɛhi tusgaas bɔrɔ gaak naan du, mi wa̧a̧ gbɔnɔ gɔ an mi rek a Espay mi daak nɛ lɛl nɔɔha.

²⁹ Mi mɛɛ a gɔ mi daak nɛ lɛlɛ, mi gi rek hi Kristu rɔbsɔ gbɔɔltɔnɔ.

³⁰ Mi gin zɔ̧ko nɛɛ yɛ̧ɛ̧dɛ mi wɛ a Waar wɛ Yeesu Kristu nuŋg du, hi a Bɛt Mɔkilɔ ha̧a̧tig du, zɔ̧bsinmi Bɛt hi tɛŋko, anyɔ mii mi zɔ̧k hɛw,

³¹ an mi za̧a̧ a Yahuduya wɔ hi ta̧a̧ Yeesu ɗɔbsig gɛ hi naan du, wɛɛ an gaas yɔ mi kaŋk a Urusalima gi bɛs Bɛt doodɔ wɔ a hɔ,

³² mi rek mi tuur a nɛɛge hi hato, gi ha̧a̧ Bɛto, mi wɛɛ mi dag hat hi nɛya a mi holum du.

³³ Àn Bɛto, Za̧a̧nyɔ gɔ gi gaak boolumi gi kɔm hi nɛɛ sɛw. Aanbɔ!